1Qaq aso Atalía, maye late'e so Ocozías, co'ollaq ỹaỹaten da ileu so llalec, nache asomaye nmatchiguiñi da ỹalauat som llalaqpi so nta'a. 2Qalaxaye aso Yoseba, asom llale so nta'a Jorán, maye lqaỹa so Ocozías, asomaye ỹeltaxan co'ollaxa so Joás, som llalec so Ocozías, co'ollaq mashe qaỹalauattac so llalaqpi so nta'a, qaq nache lỹatec nataqa'en asom 'alo maye illepaxaatac somaye, nache nqañoxotoigui naqa'en so lo'ochaqa' asomaye, da ỹoxocheesop aso Atalía, qaq 'era da 'eetec co'ollaxa da saishet da qaỹalauat so Joás. 3Qaq ivi' seis vi'iye co'ollaxa da qoỹoxottapiguiñi so Joás, qataq asom 'alo maye ilotague' somaye, netraigui aso atamnaxaqui maye lalamaqte Ñim Nataxala', qaq asom Atalía, nache ilotague' co'ollaxa yi'iye 'alhua. 4Qaq co'ollaq ivita so vi'i siete, nache so ntaxaỹaxanaxanec Joyadá, damaxasoxoneuga so nataxala'pi, qataq so nauanaxanaxanecpi, nache somaye ỹauegueua'a so pa'auo asom atamnaxaqui maye lalamaqte Ñim Nataxala'. Qaq nache huaña da ỹo'ot so naỹamaxataxac da naỹamaxate' somayepi, qataq ỹan naqa'en da la'aqtac da ipacchigui de'era, huaña co'ollaxa nache ỹachaxana somayepi som Joás, maye llalec so nta'a. 5Huaña nache 'enapega somayepi, 'eeta': «'Era qome da qauo'oche qami': Qaucolaxachiigui qome ne'ena alleppi, tres caua lpa'axaco, nache ca 'oonolec lpa'axac namayepi, nauaatalec qome ñi nma' lta'araic maye lo'onataxanaqa' so nta'a, ca na'a'q mataxaqui. 6Qaq cam laỹepi, qalaq nauaatalec qome ye ñegueuo maye pa'aigue da la'añaxa, qaq cam laỹepi camayepi, qalaq nauaatalec qome ye ñegueuo ye laponqa' naxa na alleppi, qaq nache nmeeta'a't qanqa'eñi cam nauaatalec ñi nma' lta'araic. 7Qaq caua dos lpa'axaco que'eca alleppi, maye mashe ime da nauaatalec ñi nma' lta'araic ye na'a'q mataxaqui, caamaye taỹa qome da nauaatalec so nta'a da hueta'a añi atamnaxaqui maye lalamaqte Ñim Nataxala'. 8Qaq qami' qauconñeesop qome so nta'a, nache ñi 'oonolec da qoñeeta nasoqta'a ca lo'ogoxonaxat, qaq da huo'o camachaqca shiỹaxaua da nshetaique da huenoxotaua'a somaye, nache qaualauache. Qataq saishet da qandoxocheetec so nta'a da huo'o ca taigue, iuen da qannaiquiitague' somaye.» 9Nache som nataxala'pi ỹo'ot co'ollaxa 'enauac de'era lamaxasoxonaxac so ntaxaỹaxanaxanec Joyadá. Nache ñi 'oonolec somayepi ỹauec nam maiche nalleppi, nam inoxoneuo da dauanaxan qataq nam mashe inoxonec da dauanaxaatac, som na'a'q mataxaqui nache taua'a so ntaxaỹaxanaxanec Joyadá. 10Qaq huaña nache so ntaxaỹaxanaxanec, ỹanem ñi 'oonolec som nataxala'pi, asom nataquiaxaipi qataq asom npaqtaxanaqtepi, maye lalamaqtepi co'ollaxa so nta'a David, maye netaigui aso atamnaxaqui maye lalamaqte Ñim Nataxala'. 11Nache som alleppi taỹa som lauanaxanaqa'pi nasoqta'a nam lo'ogoxonaxatpi, nache naloguiñi chegoqchiguiña da pa'aigue da aloic, nache ivitta'a da pa'aigue da ne'emaq aso atamnaxaqui, da coleesop asomaye qataq aso nca'atoxonaxalate da nauaatalec so nta'a. 12Huaña, nache so Joyadá, npaxanec co'ollaxa so Joás, maye llalec so nta'a, nache ỹanaxanaxaangui aso naro'o, qataq ỹanem asom nere maye nanettalec da aỹamaxataxac, huaña nache icorelec na lqaic so aceite da yaqto' qoỹanagui da nta'a. Ime, nache 'enauac somayepi, da iuaxana't naua lhua'q qataq ỹa'alaxalec, 'eeta': «Nache 'eetai' qome da nta'a.» 13Qaq aso Atalía, co'ollaq hua'axaỹa som alleppi da ỹa'alaqtagui, qataq som shiỹaxauapi, nache asomaye taua'a aso atamnaxaqui maye lalamaqte Ñim Nataxala' maye hueta'a 'enauac somayepi. 14Nache ila'a so nta'a Joás, nachattañi huaqta'ai' aso nhuoqte, cha'aye maiche lataxac naxa somayepi da qoỹaneuo na nta'a. Qaq so nataxala'pi qataq som nasheere lo'opi nache huaqta'ai' so nta'a, qaq 'enauac som shiỹaxauapi ỹataqta machiguiñi nache ỹashettapigui ana lasheerepi. Huaña nache aso Atalía, icolaxata'aguelo soua alogo, nache ỹa'alaq 'eeta': «Qomi' qaique'elaxa't, qomi' qaique'elaxa't». 15Qalaxaye so ntaxaỹaxanaxanec Joyadá, 'enapego' som lataxala'pi so alleppi, 'eeta': «Qaupa'axañiiuec ara'ara, qaq da huo'o ca nshetaique da itauan aramaye, nache qaualauache nataqa'en.»
Qaq cha'aye so ntaxaỹaxanaxanec, 'enapega co'ollaxa somayepi da saishet da ỹalauat asomaye da huaigui aso atamnaxaqui maye lalamaqte Ñim Nataxala', 16nache somayepi ỹaconeua'a co'ollaxa asomaye da nqatec, tateuga naqa'en so ñegueuo maye taỹaua'a so nma' lta'araic maye lo'onataxanaqa' so nta'a, maye llegueuo naxa som alleppi da netalec so caipi, huaña nache qaỹalauat asomaye. 17Ime co'ollaxa, nache so Joyadá, ỹo'ot da so nta'a qataq so nhuo' le'ecpi naỹamaxate' Ñim Nataxala'. Da yaqto' Ñimaye ỹataqta lalamaxat se'eso nhuo' le'ecpi. Qataq nache 'eetec nataqa'en so nta'a, qataq so nhuo' le'ecpi. 18Huaña nache 'enauac so shiỹaxauapi, taua'a aso atamnaxaqui maye lalamaqte so Baal, nache nlaxaañi, qataq ilaxachigui aso nca'atoxonaxalatepi, qataq so ne'enaqtacpi nqolacpi. Qataq ỹalauat so Matán, maye ltaxaỹaxanaxanec so Baal, huaña naqa'en so sa qaỹapeque aso nca'atoxonaxalatepi. Qaq co'ollaq ime nache so ntaxaỹaxanaxanec Joyadá, ỹauo'o som nauaatalec aso atamnaxaqui maye lalamaqte Ñim Nataxala', 19qaq ime, nache nnaicapegue' som lataxala'pi so alleppi, qataq so quereteopi, qataq som nauanaxanaxanecpi, nache 'enauac so nhuo' le'ecpi da ỹauegueuo so nta'a, chegoqchiguiña aso atamnaxaqui maye lalamaqte Ñim Nataxala', nache ivitta'a so nma' lta'araic maye lo'onataxanaqa' so nta'a, tateua'a so ñegueuo maye naña som laponqa' som alleppi. Huaña nache so Joás, nso'ongui aso nso'onaxaqui da nta'a, 20nache 'enauac so nhuo' le'ecpi, ỹataqta machiguiñi. Qaq cha'aye mashe ileu aso Atalía, maye qairolec co'ollaxa so ỹeelonec, huaña so sa qaỹapeque so nma' lta'araic maye lo'onataxanaqa' so nta'a, nache 'enauac so hueta'a se'eso huaqta'a't nỹecpi ỹataqta ỹe'emaqtac.
