Ye Judá huesoueeguesop da la'añaxac so Senaquerib
1Qaq so nta'a Ezequías co'ollaq hua'axaỹa de'era, nache ncolaxata'alo soua alogo, nache ỹaayiñi soua sansatte' alogo souaxat da nqui'ic, nache taua'a aso atamnaxaqui maye lalamaqte Ñim Nataxala'. 2Qataq ỹamaq so Eliaquín, maye ilotague' naxa so nma' lta'araic, qataq so Sebna maye ỹettapiguiñi naxa nam ỹo'otpi so nta'a, qataq som ỹataqta ỹa'axaiquipi ntaxaỹaxanaxanecpi, ỹaayiñi soua ỹataqta sansatte' alogo souaxat da nqui'ic, nache nqo'ona so na'aqtaxanaxanec Isaías, maye llalec so Amós, 3da yaqto' da'aqtaxanem da la'aqtac so nta'a Ezequías, maye 'eeta':
«Ne'ena na'a'q ỹataqta lta'araic da souaqaigui qanqui'ic, qanhuaxanaguec, qataq da ỹataqta qaica ca qomi' 'eneque qanqa'en, nache shenaqta'am aca 'alo da mashe yaqta'a da deco'o, qataq mashe qaica ca la'añaxac. 4Qaq 'onaxaictaxa da Ñim Nataxala' maye 'Anatamnaxala', ishet da hua'aqchigui da la'aqtac so 'amaqtaqaic nataxala' maye lamaxashec ñi nta'a ye Asiria, maye anaga da isheueetac Ñim Lo'onatac 'Enauacna. Qaq 'onaxaictaxa da Ñim Nataxala' maye 'Anatamnaxala' ỹauo'o ca nhuaxanaguec, souaxat de'era la'aqtac maye hua'aqchigui. Qaq ñaq 'anqouagaxaueelec qome nam shiỹaxauapi maye no'onañipi.» 5Qaq som lamaxashecpi so nta'a Ezequías, co'ollaq ivireua'a so Isaías, 6nache so Isaías, 'eeta': «Qoñiỹapega ca qana'aco'oi qoñiita': ‹Da la'aqtac Ñim Nataxala', 'eeta': Saishet qome da 'añi'iỹa 'enauac nam la'aqtacpi se'eso lamaxashecpi ñi nta'a ye Asiria, da aỹem isheueetac. 7Qaq ña 'aumeten da aỹem sauo'o qome ca iviro'ot la'axaỹaxac, maye ỹo'ot da ỹe'eguelaxa ye na'alhua, qaq nache huaña ñaqa'en qome yemaye da qaỹalauat, qairolec ca ỹeelonec.›» 8Nache se'eso 'amaqtaqaic nataxala' maye Asiria le'ec, la'axaỹaxac co'ollaxa da so nta'a ye Asiria, ca'ai ye huaqta'a't nỹecpi ye Laquis. Huaña nache somaye jec, ca'ai ye Jerusalén, nache natenalec so nta'a ye Asiria da iloquiaxaatac ye Libna. 9Qaq huaña yemaye da so nta'a ye Asiria, la'axaỹaxac da so Tiracá som nta'a ye Etiopía, taỹa da nalaate' somaye. Huaña nache somaye qaltaq ỹama'q soua ltaxaỹaxanaxanaqa da nqo'oora so Ezequías, maye nta'a ye Judá, 10da yaqto' 'enapega, 'eeta':
Ñim 'Anatamnaxala' maye 'anteetacot, Ñimaye 'eetega da saishet da ỹoxonec ye Jerusalén, qalaxaye saishet qome da choche 'am ỹatenachet Ñimaye. 11Cha'aye mashe 'aua'aqtapeguelec naxa nam ỹo'otpi so nta'alpi ye Asiria, qataq da 'eetec co'ollaq nlaxaañi na 'alhuapi. Qaq ¿peta'a 'aupettega da 'am qoỹetauec? 12Qaq ¿ne'ena atamnaxala'pi peta'a isheto' co'ollaxa da nca'alaxatec som ỹotta'a't shiỹaxauapi, maye nlaxaañi co'ollaxa so ita'alpi, yem: Gozán, Jarán, Resef, qataq so shiỹaxauapi maye Bet Edén le'ecpi maye netaña ye Telasar? 13Qaq ¿ca hueta'ague nagui ca nta'a ye Jamat, Arfad, Sefarvayin, Hena qataq ye Ivá? 14Nache so Ezequías, ỹaconeguet aso nere maye ndotrai' soua namaxa'she, nache itaxaỹaxan. Ime co'ollaxa nache somaye taua'a aso atamnaxaqui maye lalamaqte Ñim Nataxala', nache ỹaasheguem da ỹachaxanot Ñim Nataxala' asa'aso nere. 15Nache so Ezequías nqouagaxaunot Ñim Nataxala', 'eeta':
«'Am Nataxala', maye Natamnaxala' na Israel le'ecpi, maye aca 'anso'onaxaqui netanguilo soua querubines, qataq nache 'amta da 'Am Atamnaxala' maye 'aulotalec 'enauac nam ỹotta'a't maye huetalec ana 'alhua, 'am 'aro'onatac co'ollaxa na piguem, qataq ana 'alhua. 16Ñaq 'auqochapigui', qataq 'ana'axaỹaxaañi 'Am Nataxala', ñaq 'anlouec, 'Am Nataxala', qataq 'aumeten de'era. Ñaq 'ana'axaỹaxana nam la'aqtacpi maye aỹem namaxa cam Senaquerib, da 'am isheueetac, 'Am Atamnaxala' maye 'anca'altauec. 17'Am Nataxala', ỹataqta 'eesa da so nta'alpi ye Asiria, da nlaxaañi co'ollaxa so ỹotta'a't shiỹaxauapi qataq so na'alhuapi, 18qataq ỹavigaxat co'ollaxa som atamnaxala'pi, cha'aye saishet da ỹoqta 'eesa da atamnaxala'pi, cha'aye choche ne'enaqtacpi, chegaqaigui na 'epaq, qataq na coma' maye maiche lo'onatac nam shiỹaxauapi, ỹoqo'oye ishet da nlaxaañi. 19Qaq ỹoqo'oye nagui, 'Am Nataxala' maye Qanatamnaxala', ñaq qomi' 'anca'alaxateeguesopa da la'añaxac ye Asiria, yaqto' 'enauac na ỹotta'a't shiỹaxauapi ana 'alhua, ỹaỹaten da nache 'amta 'Am Nataxala', da 'Am Atamnaxala'.» 20Huaña, nache so Isaías, maye llalec so Amós, ỹamaxa da la'aqtac so Ezequías, 'eeta':
«Da la'aqtac Ñim Nataxala' maye Natamnaxala' na Israel le'ecpi, 'eeta': Aỹem sa'aqchigui da 'anqouagaxaunaxac souaxat ñi Senaquerib, maye nta'a ye Asiria.» 21Qaq 'ena na la'aqtacpi Ñim Nataxala', maye talec naqa'en som nta'a ye Asiria, 'eeta':
«Ne'ena huaqta'a't nỹecpi na Sión,
qalaq 'eeta'am aca qa'añole da 'am lashetac, 'am Senaquerib.
Qaq na Jerusalén qalaq choche iconnaxan na lqaic da 'am ỹe'eetac,
da 'am ỹauaategue da qoca'ai namaye.
22¿Negue't cam 'aunogoqchettac qataq 'ausheueetac?
Qataq ¿negue't cam 'auqaqaato'ot,
qataq da ỹataqta huo'o da 'ana'amaqnaxac da 'auamatto'ot?
¡Qomye nacheñi Ñim Qui'itta Natamnaxala' na Israel le'ecpi!
23Qaq 'am 'anamaq so 'aramaxashecpi da 'ausheueetac Ñim Nataxala'.
Nache qoneta':
‹Sauota'a ana qalota ỹaigonapi ñalaataxaquipi,
da sasheguema na ỹataqta qaỹoqotcheguema ana qasoxonaxapi,
nam ỹataqta qaỹoqotcheguema maye sa qaivirapega ye Líbano.
Nache sequesoq anam ỹataqta logorai cedropi,
qataq ana piinopi maye ỹataqta 'onaxaipi.
Nache sevirasheguema na ỹataqta pa'asheguem,
nam aviaq maye 'eeta'am nam nañiguishe lma' maye ỹataqta 'onaxaic.
24Nache so'ot ana isherepi huaña naua ỹaqa'alo 'aleu',
nache ñeỹomgui na le'ec da yaqto' nme da ỹaquipegaxanaxac,
qataq souaxat da iqauaxac,
nache deqaxaỹañi ñaqa'en na talapi ye Egipto.›»
25¿Qaq peta'a saishet da 'auaỹaten da nachaỹem Nataxala',
maye ỹo'onatac 'enauac ne'enapi?
Qataq nache 'eetai' co'ollaxa da llapaqtapiguiñi de'era,
qaq nagui nache sacoolec da so'ot.
Qaq ỹoqo'oye 'am, ishet da 'anlaxaañi
som huaqta'a't nỹecpi maye ỹataqta qanpaxatteua'a,
nache nlachiguiñi 'anqa'en nache choche 'alapoosheguem.
26Qataq so netalecpi yemaye qaica ca la'añaxac,
nache lta'araic da lcolanaxa qataq lcoxo,
huaña nache 'eeta'am ana huouepi maye huauga na no'onaxa,
qataq 'eeta'am na 'auaqpi maye ñaq darala,
qataq 'eeta'am ana huoue maye ñaxattalec na nỹec l-laq,
da ỹavigaxat na la'at maye chegaqa'ague da yo'oxoñi.
27Aỹem saỹaten 'enauac na 'arqauaxacpi,
qataq saỹaten 'enauac nam 'auo'ottacpi,
qataq da aỹem 'aunotega.
28Qaq souaxat da aỹem 'aunotega,
qataq aỹem iviro'ot da 'año'oxonnaxac,
nache nagui sanagui na 'armic aca colliichigui 'armiiguishe lcat,
qataq caua lque'ete na 'ap,
nache 'am she'eguelaxattegue ca 'ec maye 'auanactegue co'ollaxa.
29Nache so Isaías, 'enapega co'ollaxa so Ezequías, 'eeta':
'Era qome da la'anaxat cam naỹa'acna:
Ne'ena vi'i qataq ca lỹa vi'i maye ñaq natauo,
nache qollequiitac qome na ala cam trigo maye chochaq nasheguem,
qaq ca vi'i tres nache ishet da qa'anaxañi qataq qauqataxañi,
qataq qaỹa'añiiñi ana uva nache qollequiitac aca ala.
30Qaq na lca'alaxaicpi maye chegoxoguetpi so Judá,
nache 'eeta'am aca nañiguishe, da ỹa'ayiñi na lpa'a',
qataq nañaxat ime nache huo'o ana ala.
31Cha'aye huo'o qome catai' no'onaña ye Jerusalén,
qataq huo'o ca lca'alaxaicpi añi qasoxonaxa Sión.
Qaq de'era, ỹo'ot qome Ñim Nataxala' maye Qaica ca Ỹaqalanapec,
souaxat da lta'araic lauotaxanaqtaic.
32«Qaq dam la'aqtac Ñim Nataxala',
maye talec so nta'a ye Asiria, 'eeta':
‹Saishet qome da inoxoneua'a ne'ena huaqta'a't nỹecpi,
qataq saishet da irolec aca lchecna da ỹaỹen,
qataq saishet da ỹauota'a aca lpaqtaxanaqte da iloquiaxan,
huo'otaq da ỹo'ot cam lliguisheguem da tasheguema.
33Qaq nacherata da ỹe'eguelaqtegue
cam llec maye nateuga co'ollaxa,
nache saishet da huenoxoneua'a ne'ena huaqta'a't nỹecpi.
Aỹem Nataxala', san de'era ỹa'aqtac.
34Cha'aye aỹem, ñepaxattalec qome ne'ena huaqta'a't nỹecpi,
nache ñeca'alaxatec souaxat da ỹauotaxanaqtaic
so ỹamaxashec David, qataq da sheeta.›»
35Qaq nacheso se'eso pe, anac so lamaxashec Ñim Nataxala', nache ỹalauat so ciento ochenta y cinco mil ỹalleppi se'eso lanataqa' so Asiria le'ecpi. Qaq so nte'eta so lỹa na'a'q, nache somayepi huetaiya' da mashe ileu. 36Huaña nache so Senaquerib, maye nta'a ye Asiria, nqat so lpe'l, nache ỹe'eguelaxa ye Nínive. 37Qaq huo'o so na'a'q co'ollaq somaye yo'oxonnataxaatac, huetaua'a aso atamnaxaqui maye lalamaqte som Nisroc maye natamnaxala' somaye. Nache soua llalqa Adramelec, qataq Sarezer, ỹa'arapec co'ollaxa somaye nache ỹalaua't, huaña nache datarec, taỹalo ye 'alhua Ararat. Qaq da lo'onataxanaxac da nta'a, nache talec so llalec Esarjadón.
