Da lo'onataxanaxac so nta'a Manasés
1Qaq so Manasés mashe ivi' soua doce vi'iye da nachaalataxac co'ollaq ỹacoolec da lo'onataxanaxac da nta'a, nache ivi' cincuenta y cinco vi'iye da lo'onataxanaxac huaña ye Jerusalén. Qaq aso late'e somaye le'enaxat da Hepsibá. 2Qalaxaye somaye ỹo'ot co'ollaxa nam ỹataqta saỹaỹamaxaren Ñim Nataxala', cha'aye ỹe'enaxat da qauem lataxac som ỹotta'a't shiỹaxauapi maye Ñim Nataxala' ỹo'orauec co'ollaxa, ỹauaachigui naqa'en so Israel le'ecpi, 3cha'aye qaltaq no'oxoosheguem so qaỹoqotcheguema atamnaqa'pi maye nlaxaañi co'ollaxa so Ezequías maye lta'a somaye, qataq no'oxoosheguem aso nca'atoxonaxalatepi da yaqto' qanatamnot so Baal, qataq ỹo'ot aso le'enaqta lqui'i aso Aserá, qaq nache 'eeta'am da 'eetec co'ollaxa so Ajab, maye nta'a ye Israel, nataqa'en natameetacot 'enauac ana huaqaañi late'eraipi maye neto'ot na piguem, 4qataq no'oxoosheguem aso nca'atoxonaxalatepi aso atamnaxaqui maye lalamaqte Ñim Nataxala', maye co'ollaq detaqtega Ñim Nataxala' nache, 'eeta': «Ne'ena Jerusalén, nachena qome nam hueta'a da ỹe'enaxat.» 5Qataq no'oxoosheguem aso laỹepi nca'atoxonaxalatepi, nañalo naqa'en se'esoua dos nqasoxoco aso atamnaxaqui maye lalamaqte Ñim Nataxala', da yaqto' qaỹo'oxoren ana huaqaañi late'eraipi maye neto'ot na piguem. 6Nataqa'en ỹavigaxa't soua llalqa da yaqto' lachetaqtaxanaxat, qataq napaxaguena da qaiỹaxaneuga na saqcha'a na'añaxacpi, qataq da qailaviigui ca nỹa, qataq lapaxañi da lataxac da qaiỹaxaneuga na nqui'ipi, qataq da ñi'iyaqnataxanaxac. Nache nquigaxattauec nam qauem maye ỹo'otpi, maye ỹataqta saỹaỹamaxaren Ñim Nataxala', nache ivira'a da inogoqchet Ñimaye. 7Nataqa'en ỹanaigui aso atamnaxaqui maye lalamaqte Ñim Nataxala', aso le'enaqta lqui'i aso Aserá, maye Ñim Nataxala' mashe huaqattega co'ollaxa so David, qataq so llalec Salomón, co'ollaq 'eeta':
Ana'ana atamnaxaqui maye naña na Jerusalén, anamaye lleca'aguishe co'ollaq lleca'agui 'enauac nam maiche nalamaxat nhuo' Israel le'ecpi, da yaqto' nache 'eetai' da hueta'a da ỹe'enaxat. 8Qataq saishet qome da she'eguelaxata da nsomaxaatapigui' na Israel le'ecpi, da huetalec ne'ena 'alhua maye sanem co'ollaxa so hua'au lta'alpi, qom ipacchigui na ỹamaxasoxonaxacpi, qataq da ỹo'ot 'enauac na ỹapaxaguenataxanaxacpi, maye so ỹamaxashec Moisés, ỹanem co'ollaxa namayepi.
9Qalaxaye somayepi saishet da ỹalaq, qataq so Manasés, ỹauega co'ollaxa da ỹataqta nquictauec da ỹo'ot na qauem, napacalec som ỹotta'a't shiỹaxauapi maye Ñim Nataxala' ilaxachigui co'ollaxa, ỹauaachigui naqa'en so Israel le'ecpi. 10Qaq ỹoqo'oye Ñim Nataxala', ỹachegoxotchigui co'ollaxa so la'aqtaxanaxanecpi maye lamaxashecpi da detaqa, 'eeta': 11«Qaq cha'aye ñi Manasés, maye nta'a ye Judá, ỹo'ot nam qauemsat, nache ỹataqta napacalec som hua'au amorreopi, qataq ỹo'ot da huo'o naqa'en na lasouaxashetpi na Judá le'ecpi, souaxat nam natamnaxala'pi somaye, 12qaq ỹoqo'oye Ñim Nataxala' maye Natamnaxala' na Israel le'ecpi, 'eeta': Aỹem ñamaxa qome ca ỹataqta lta'araic lchec na Jerusalén, qataq na Judá, nache cam hua'axaỹa camaye, nache ỹataqta dauaxa'n naqa'en naua ltela lauaco. 13Qaq da nque'eenaxac na Jerusalén, ñaloqteeteguet qome da nque'eenaxac co'ollaxa ye Samaria, qataq sauo'o ca nhuaxanaguec nam chegoxoguetpi so Ajab, nache ỹataqta qui'ittelec ñaqa'en na Jerusalén, 'eeta'am da qaiqui'itaxatta ca nquia'axaqui, ime nache qanqapaxanaqchiiñi. 14Qaq ca no'onañipi ne'ena ỹalamaxat nhuo' le'ecpi, qalaq salat qome nache saneguet da lhuaqỹaxac ca npa'aguenaxauapi da yaqto' nhuotta qataq imaqauec. 15Cha'aye sauaachigui da ỹo'ot nam qauem maye sasaỹamaxaren, qaq nache chegoqchiguiña co'ollaq ca'ai ye Egipto so lta'alpi namayepi, nache ivitta'a nagui da nache 'eetai' naxa da Aỹem inogoqchettac.»
16Qaq 'enauac na lasouaxashetpi so Manasés, da nataqa'en ỹo'ot da huo'o nam lasouaxashetpi ye Judá, cha'aye ỹo'ot nam qauem maye sa ỹaỹamaxarenpi Ñim Nataxala', qataq ỹalauat so qalota maye qaica ca lasouaxashet, nache ỹataqta nlaxalec ye Jerusalén na ntago'q. 17Qaq na laỹepi na'aqtaguecpi so Manasés, qataq nam ỹo'otpi, qataq nam lasouaxashetpi, nache nanettalec aso nere maye huetalec da na'aqtaguec so nta'alpi ye Judá. 18Qaq co'ollaq ileu so Manasés, nache qailareña som nañiguishe lma', maye huaña so lma' lta'araic, som nañiguishe lma', maye le'enaxat Uzá. Qaq da lo'onataxanaxac da nta'a, nache talec so llalec Amón.
Da lo'onataxanaxac so nta'a Amón
19Qaq so Amón, mashe ivi' soua veintidós vi'iye da nachaalataxac, co'ollaq ỹacoolec da lo'onataxanaxac, huaña ye Jerusalén, qaq ivi' soua dos vi'iye da nta'a ye Jerusalén. Qaq aso late'e le'enaxat da Mesulemet, asomaye Jotbá lashe, llale so Jarús. 20Qalaxaye somaye ỹo'ot nam qauem maye ỹataqta sa ỹaỹamaxaren Ñim Nataxala', 'eeta'am nam ỹo'otpi co'ollaxa so lta'a Manasés. 21Nache icaachigui 'enauac nam qauem maye ỹo'otpi co'ollaxa so lta'a, qataq ỹo'oxoreetac som atamnaxala'pi maye natameetacot co'ollaxa so lta'a. 22Nache ca'ai Ñim Nataxala' maye Natamnaxala' so hua'au lta'alpi, nache saishet da ỹo'ot dam 'eetapeguec Ñim Nataxala'. 23Qaq som lamaxashecpi so Amón, dataỹa'aguet co'ollaxa somaye, nache ỹalauat huaña so lma' lta'araic. 24Qalaxaye som shiỹaxauapi maye lma' yi'iye 'alhua, ỹalauat co'ollaxa 'enauac se'eso shiỹaxauapi maye dataỹa'aguet so nta'a Amón, qaq da lo'onataxanaxac da nta'a, nache talec qanqa'en so Josías, maye llalec somaye.
25Qaq na laỹepi na'aqtaguecpi so Amón, qataq nam ỹo'otpi, nache nanettalec aso nere maye huetalec da na'aqtaguec so nta'alpi ye Judá. 26Qaq co'ollaq ileu so Amón, nache qailareña yem nañiguishe lma' maye le'enaxat Uzá. Qaq da lo'onataxanaxac da nta'a, nache talec so llalec Josías.
