Da lo'onataxanaxac so Jorán da nta'a ye Israel
1Qaq co'ollaq mashe ivi' dieciocho vi'iye da so Josafat ilotague' ye Judá, nache so Jorán som llalec so Ajab, ỹacoolec da lo'onataxanaxac da nta'a ye Israel, huaña ye Samaria, nache ivi' doce vi'iye da ilotague' somayepi. 2Qaq nam ỹo'otpi co'ollaxa somaye ỹataqta sa ỹaỹamaxaren Ñim Nataxala', qalaxaye saishet da ỹapac da 'eeta'am so lta'a, qataq aso late'e, cha'aye somaye nlaxaañi co'ollaxa so atamnaxala' coma' maye lqui'i so Baal, som nauaxaỹaxaasheguem co'ollaxa so lta'a. 3Qalaxaye somaye icaachigui da ỹo'ot nam nasouaxashetpi maye ỹo'ot co'ollaxa so Jeroboán som llalec so Nabat, maye ỹo'ot naqa'en da huo'o na lasouaxashetpi so Israel le'ecpi.
So Eliseo ỹa'axata'a da qanauec so Moab le'ecpi
4Qaq so Mesa, maye lta'a so Moab le'ecpi, somaye qalota co'ollaxa aso lalo qaguetapi, qaq somaye nache desheetenaxana naxa asomayepi da isheeten so lta'a so Israel le'ecpi, nache ỹaneuo naxa na cien mil qagueta llalec, qataq cien mil na qagueta lhuaraic, lỹaueegue' na laue. 5Qalaxaye co'ollaq ileu so Ajab, nache se'eso lta'a so Moab le'ecpi, dataỹa'aguet co'ollaxa so lta'a so Israel le'ecpi. 6Huaña, nache jec so nta'a Jorán, chegoqchiguiña ye Samaria, da yaqto' naloqna't 'enauac so alleppi Israel le'ecpi. 7Ime, nache ỹamaxa da la'aqtac so Josafat, maye lta'a so Judá le'ecpi, 'eeta': «Ñi lta'a ye Moab le'ecpi, aỹem dataỹa'aguet. ¿Peta'a ishet da aỹem 'auca'ategue da ñalaate' ñimaye?»
Nache so lta'a so Judá le'ecpi, 'eeta': «Aja', 'am seca'ataxague qome, cha'aye aỹem qataq na ñalleppi, qataq na ilo caipi, 'am souaqta'aguet.» 8Qataq nataqa'en 'eeta': ¿Qaq hua'ago' cam saqteuga qome?
Nache so Jorán, 'enapeco': «Qomye saqteuga so nqa'aic ye toolec 'alhua ye Edom». 9Qaq ime, nache huenoxoorec co'ollaxa soomaye, som lta'a so Israel le'ecpi, Judá le'ecpi, qataq so lta'a so Edom le'ecpi. Qalaxaye souaxat da siete soua na'axa'te da quetalec ye toolec 'alhua, nache imeuo so 'etaxat maye laquip so nalleppi, qataq som lalopi. 10Nache so lta'a so Israel le'ecpi, 'eeta':
Ñim Nataxala', 'eeta'am da qomi' ỹauaxaỹaxana't qomi' tres nta'al, da yaqto' qomi' ỹanegueta da qomi' loxonqa ye Moab le'ecpi. 11Qalaxaye so Josafat, 'enapeco':
¿Peta'a qaico' ne'ena ca la'aqtaxanaxanec Ñim Nataxala', da yaqto' chegoqchigui camaye da senataq Ñim Nataxala'?
Nache huo'o so 'oonolec so lamaxashecpi so lta'a so Israel le'ecpi, 'eeta': Ne'ena, netaña so Eliseo, som llalec so Safat, maye lamaxashec co'ollaxa so Elías. 12Nache so Josafat, 'enapeco':
Camaye yo'oqta da ishet da qomi' da'aqtaxanema ca la'aqtac Ñim Nataxala'.
Nache so lta'a so Israel le'ecpi, nnaicapegueto co'ollaxa so Josafat, qataq so lta'a so Edom le'ecpi, da nqo'oora so Eliseo. 13Qalaxaye so Eliseo, 'enapego' so lta'a so Israel le'ecpi, 'eeta':
¿Negue'to' taxa cam huo'omshe 'am satapegueua'a? 'Anqo'ona taxa da 'aunat can la'aqtaxanaxanecpi som 'arta'a, qataq aso 'arate'e.
Nache so lta'a so Israel le'ecpi, 'enapeco':
Saishet, cha'aye Ñim Nataxala', 'eeta'am da huaxaỹa't naqa'en ne'enaua tres nta'al, da yaqto' ỹanegueta da lhuaqỹaxac ye Moab le'ecpi. 14Nache so Eliseo 'enapeco':
Qaq cha'aye 'eesa da nca'altauec Ñim Nataxala' maye Qaica ca Ỹaqalanapec, maye aỹem ilota'a nagui. Cha'aye da saishet taxa da huo'o naq 'enec ñaqa'en da Josafat, nache saishet taxa da 'am seqocha'a, huo'otaq da 'am samato'ot. 15Qalaxaye, ña qanaviquiiuo nagui cam nvicnaxanaq. Nache co'ollaq devicnaxaatac so nvicnaxanaq, nache da lhuaqỹaxac Ñim Nataxala' talec so Eliseo, 16nache so Eliseo, 'enapeco':
«Da la'aqtac Ñim Nataxala', 'eeta': ‹Qauo'oche qome aca qalota nsherepi lapelpi ne'ena ca'amapega't 'alhua, 17cha'aye Ñim Nataxala' 'enapec: Na'aictaxa da saishet da qauloỹa'a ca la'at, huo'otaq ca auot, qalaxaye ne'ena ca'amapega't 'alhua, nlaqchigui qome ca 'etaxat, nache ishet qome da qanỹomi, qataq na qareloipi shiguiỹacpi.›» 18Qaq damaye, ye saq 'amaqtaq naqa'en Ñim Nataxala', nache Ñimaye qami' ỹanema nataqa'en qome ye moabiitapi da yaqto' qoroxoñiqui. 19Nache qami', qanlaxachiiñi qome 'enauac ye ỹataqta qanpaxattaua'a huaqta'a't nỹecpi, qataq ye ỹataqta 'amaqtaqaic huaqta'a't nỹecpi, qataq qauquesoqoi 'enauac aye ỹataqta no'on qo'oipaqpi, qataq qauapoilec qome 'enauac ye chegoqtapiguingui na npaxaatasheguem 'etaxat, qataq qanlaxacheetelec qome ca coma' 'enauac ye 'alhuapi maye nanaxanaqa'pi.
20Qaq so nte'eta so lỹa na'a'q, maye huetoigui naxa da qoỹaneuo ana nachetaqtaxanaqte, nache chegaqa'ague da pa'aigue ye Edom so 'etaxat, nache ipaxaalec naqa'en yemaye. 21Qaq so Moab le'ecpi co'ollaq la'axaỹaxac da huaxaỹa't soua tres nta'al da yaqto' iloquiaxan somayepi, nache laỹona't co'ollaxa 'enauac so nsoxoppi, qataq so ỹepi, maye mashe ishet da nalat, nache nauan so loga't ye na'alhua. 22Qaq so nte'eta co'ollaq ñisheguem somayepi, nache na le'eraxa añi nala' ỹataqta qashelec naqa'en so 'etaxat, nache so Moab le'ecpi ila'a co'ollaxa na ltogaxa so 'etaxat da 'eeta'am na ntago'q. 23Nache somayepi, 'enapeco': «¡Ne'ena ntago'q, yo'oqta da qaỹauota'a ỹeelonec co'ollaxa da huecorec qanqa'en! Qaq yo'oqta da maiche taỹa't da deloguiỹa't que'ecaua nta'al, nache ñi 'oonolec camayepi ỹalauat na maiche lỹa. Qolaq qome, qami' moabiitapi, ñaq she'eguenaqa'a da saconaxa cam lalamaxatpi camayepi.» 24Qalaxaye co'ollaq ivira yem lanataqa' so Israel le'ecpi, nache so Israel le'ecpi iloquiaxan co'ollaxa somayepi, nache so Moab le'ecpi ỹataqta datauec. Qaq so Israel le'ecpi, icaatac co'ollaxa somayepi nache ivitta'a da ỹalauat. 25Huaña, nache ỹataqta nlaxaañi se'eso huaqta'a't nỹecpi maye naña yi'iye 'alhua, qataq ỹasaxalec so coma' so nanaxanaqa'pi yi'iye 'alhua, qataq ỹapolec 'enauac so chegoqtapiguingui so npaxaatasheguem 'etaxat, qataq iquesoq 'enauac aso ỹataqta no'on qo'oipaqpi. Nachesota so huaqta'a't nỹecpi ye Quir Jaréset da no'onañi, qalaxaye so npocnaxanaxat lo'opi coleesop co'ollaxa somaye nache loxonec. 26Qaq so lta'a so Moab le'ecpi, co'ollaq ila'a da qanauec se'eso alaataxac, nache ỹauec so setecientos alleppi maye ỹaỹaten da do'ogoxona na ỹeelonec, da yaqto' iloquiaxan so nta'a Edom le'ec, qalaxaye sa ỹañoxot co'ollaxa. 27Huaña, nache somaye ỹaconeua'a so la'auaxanec llalec, som talec taxa da lo'onataxanaxac da nta'a, nache ỹaneuo da lachetaqtaxanaxat qaỹavigaxatta, hualec naqa'en na pa'asheguem so npaqtaxanaxat. Qaq de'era nachera da ỹo'ot da ỹataqta lta'araic lli'iỹaxa so Israel le'ecpi. Nache somayepi jec co'ollaxa, ỹe'eguelaxa ye na'alhua.
