1Nache so Eliseo 'enapeco': Ña 'ana'axaỹaxana da la'aqtac Ñim Nataxala' maye, 'eeta': «Qonte', qom mashe 'eeta'am nagui, qom huaña ye ñegueuo ne'ena Samaria, nache da qaimen ca siete litro na ỹataqta no'on 'ayiiña, nache 'oonole aca lcatole ana plata aca lasheue, qataq ca quince litro na cebada, nache 'oonole aca lcatole ana plata aca lasheue.» 2Nache so ltaua so nta'a, ỹasategueto' so la'aqtaxanaxanec Ñim Lo'onatac 'Enauacna, 'eeta':
Qaq na'aictaxa taxa da Ñim Nataxala' ỹauatoigui ca lasom na piguem, qaq nache 'ena'am saishet da huo'o de'era qonapec.
Nache so Eliseo, 'enapeco': 'Am, 'auauaachigui qome de'era, qalaxaye saishet da 'avira'a da qollec. 3Qaq huo'oi soua cuatro ỹale't maye huetra'ac na lepra, maye huetra'a som ñegueuo ye huaqta'a't nỹecpi, qaq soomaye nnattega't co'ollaxa, 'eeta':
¿Ta'ainco' taxa da nache souaqta'a ne'ena da seuataqta'a da seleuaq? 4Qaq dam senoxonaxaua'a ne'ena huaqta'a't nỹecpi, nache seleuaqaigui qome namaye, cha'aye ỹataqta lta'araic na nqouaxa, qaq da nache souaqta'a ne'ena, nache nataqa'en seleuaqaña. Qaq 'onaxaictaxa da ñeqo'onaxauga yem siiriopi, shapegueto' da qomi' ichoxore'n, nache ñecala'axauec, qaq qom qomi' ỹalauat, qaq nache 'ena'am seleuaq qome. 5Ỹoqo'oye so mashe pe, nache ñeyeshegue'm, nache tareuga so lanataqa' so siiriopi, qaq co'ollaq mashe nayeetraua'a somaye, nache ỹaỹate'n da qaica ca hueta'a se'eso nanataqa'. 6Cha'aye Ñim Nataxala', hua'axaỹa naqa'en co'ollaxa so siiriopi da l-lamaxa aso naigona alaataxaquipi, qataq som qalota alleppi maye netalec so caipi, qataq so qalota alleppi maye petañepi, ỹoqo'oye somayepi 'enapeco': Ñi nta'a ye Israel, yo'oqta da isheeten ca nta'alpi hitiitapi, qataq ca nta'alpi egipciopi, da yaqto' qomi' iloquiaxa'n. 7Ỹoqo'oye somayepi, datauec co'ollaq mashe pe, nache no'onaxatchigui so lpe'lpi, lalo caipi, 'ashenapi, qataq nache no'oitai' so lpe'lpi maye na'attañipi, da yaqto' datauec nache nca'alec. 8Qaq co'ollaq ivildeuo se'esoua shiỹaxau' maye huetra'aque na lepra, nache taroigui so 'oonolec se'eso npe'lpi, nache deque'eta'ape qataq nỹomta'ape, qaq co'ollaq ima't da lquia'axa'c, nache ỹaconalo so lcat plata, oro, qataq som nogoxotpi, nache je'c da yaqto' ỹoxooyiñi somayepi. Ime, nache qaltaq ỹe'eguelaq, nache taroigui so lỹa npe'l, nache qaltaq ỹacona 'enauac som huetaiguipi somaye, nache qaltaq je'c, da yaqto' ỹoxooyiñi somayepi. 9Qaq ime, nache na'aqtaxaatega't nache, 'eeta':
Qomi', saỹaỹamaxañi de'era so'otaqtac. Cha'aye ne'ena na'a'q laloxoqui da no'on na'axaỹaxac, qaq qomi' da saishet da sa'axataq nagui, da seuataqta'a da yo'oxoñi, nache qomi' qarasouaxashet qome. Ỹoqo'oye no'on da qolaq nagui, da ñeqo'onaxaua'a ca nta'a nache sa'aqtaxanaxam de'era la'axaỹaxac. 10Nache soomaye tareua'a som huaqta'a't nỹecpi, nache iỹaxaneua'alo soua nauaatralec so ñegueuo, 'eeta':
«Qomi' souaqtauga ye lanataqa' so siiriopi, qalaxaye qaica ca netaña yemaye, huo'otaq da qaỹa'aqtega da huo'o ca demailtac. Nacheyeta ye caipi, qataq ye 'ashenapi maye qaicoñettai', qataq ye npe'lpi no'oitai'.» 11Nache soua nauaatralec so ñegueuo, sanaỹaloxon da da'aqtaxanem som netaiguipi so lma' lta'araic so nta'a. 12Nache so nta'a ñisheguem so pe, nache 'enapega so lamaxashecpi, 'eeta':
Qami' sa'aqtaxanema dam huotaique qomi' ỹo'oteque som siiriopi. Cha'aye somayepi ỹaỹaten da ỹataqta huo'o na qarqouaxa, qaq nache ca'ai ye lpe'lpi, nache tauga na no'onaxa da nqañoxooñi, yaqto' da senoxonaxauec da qolaqa'ai ne'ena huaqta'a't nỹecpi, nache somayepi qomi' loxonqa, qaq huaña qome nache taigui ne'ena nỹecpi. 13Nache huo'o so 'oonolec som lamaxashecpi somaye, 'eeta':
Ña qaỹama'q taxa caua ỹale't, nache neleguete naua cinco caaỹol maye no'oirañi, yaqto' saỹatenaq ca 'eetec. Cha'aye da ileu', nache saishet da 'eeta'am da nque'eenaxac nam qalota Israel le'ecpi, maye ño'onaqaña ne'ena. 14Huaña, nache qaỹaỹamaxaayiñi soua dos naigona, qaicoñeldeuo soua lauegaxala'ate caaỹo, nache so nta'a damaxasoxoneuga da qaimeten so lanataqa'pi so siiriopi. 15Nache jec somayepi da iual-lec so llec so siiriopi, nache ivittaxaama so tala Jordán, nache somayepi ilalec som huetangui so llec somayepi, nogoxot, qataq som laỹepi nogoxoshetpi, maye naañi co'ollaq datauec som siiriopi, souaxat da lỹalaxa. Nache se'esoua namaxa'she ỹe'eguelaxareuo co'ollaxa da yaqto' da'aqtaxanem so nta'a. 16Huaña, nache se'eso nhuo' le'ecpi tauga se'eso lanataqa' so siiriopi, nache ỹacona 'enauac som huetaigui so npe'lpi. Huaña nache ipacchigui da la'aqtac co'ollaxa Ñim Nataxala', nache da qaimen na siete litro na 'ayiiña, nache 'oonole ana lcatole ana plata ana lasheue, qaq na quince litros na cebada nache nataqa'en 'oonole ana lcatole ana plata ana lasheue. 17Qaq so nta'a ỹamaq co'ollaxa so maiche ltaua, da ilo'ogue so ñegueuo se'eso huaqta'a't nỹecpi, qalaxaye so shiỹaxauapi ỹe'eguingui somaye, nache ileu. Huaña, nache ipacchigui da la'aqtac co'ollaxa so Eliseo, maye la'aqtaxanaxanec Ñim Lo'onatac 'Enauacna, co'ollaq so nta'a tauga somaye. 18Qaq nache ỹataqta ipacchigui da la'aqtac so la'aqtaxanaxanec Ñim Lo'onatac 'Enauacna, co'ollaq 'eetega so nta'a, 'eeta': Qonte', nache huaña qome ye ñegueuo na Samaria, da qaimen na ỹataqta no'on 'ayiiña nache 'oonole ana lcatole ana plata aca lasheue, qataq da qaimen na quince litro na cebada, nache nataqa'en 'oonole ana lcatole na plata aca lasheue. 19Qataq so ltaua so nta'a co'ollaq ỹasateguet som la'aqtaxanaxanec Ñim Lo'onatac 'Enauacna, 'eeta': Qaq na'aictaxa taxa da Ñim Nataxala' ỹauatoigui ca lasom na piguem, qaq nache 'ena'am saishet da huo'o de'era qonapec.
Qaq so Eliseo, 'enapeco': 'Am, 'auauaachigui qome de'era, qalaxaye saishet da 'avira'a da qollec. 20Qaq nache ipacchigui co'ollaxa de'era, cha'aye som shiỹaxauapi maye lma' so huaqta'a't nỹecpi, ỹe'eguingui co'ollaxa somaye, huaña som ñegueuo nache ileu.
