2 Pedro 1

₁Aỹem, Simón Pedro, so'onataxaatacot So Jesucristo, Som aỹem ỹamaq da sa'axatec da la'aqtaxanaxac. Qauacoñiiguet da iquinaxanaxac. So Jesucristo maye ñatamnaqtacot qataq Qarca'alaxaqui, Somaye ỹataqta no'on da lataxac qataq ichoxoren 'enauac da qoñiita, cha'aye qami' ỹo'oteque da qaupi'iỹa'ai Somaye 'eeta'am da qomi' ỹo'oteque da sepi'iỹaqa'a Somaye.

₂Seỹaxaatacot Ñim Lo'onatac 'Enauacna da ỹataqta qami' ỹauoteque qataq qami' ỹanema da qoviitaigui da qarlagaxayiqui, qataq da nache 'eetai' da qami' lhuotte' da nquictauec da ỹataqta qauauattoñiita Ñim Lo'onatac 'Enauacna qataq So Qarataxala' Jesús.

₃Ñim Lo'onatac 'Enauacna do'ogoxona da la'añaxac da yaqto' qomi' ỹanema 'enauac nam seuenaqtaique, qataq yaqto' ñachaataqtaigui dam ỹataqta 'eetapeguec. Nataqa'en Ñimaye qomi' ỹanema 'enauac de'era co'ollaq qomi' ỹauattonaxanaxaneque So Jesucristo. Qataq chegoqchigui Somaye da qomi' lca'agui'she da yaqto' ñeuanaqaua'a da llo'oxoyec da lo'onataxanaxac. ₄Nataqa'en qomi' ỹanema 'enauac nam lataxacpi maye ỹataqta 'onaxaic qataq huo'o da lta'araic naigui maye qomi' ỹachaxanapeguema co'ollaxa. Qaq nache chegoqchigui damaye da qami' ishet da qoñiỹa'am da lataxac Ñim Lo'onatac 'Enauacna, qaq saishet da qoñiỹa'am na shiỹaxauapi 'etaxaloxoicpi maye huetalec ana 'alhua, cha'aye na qauem lqopitaxanaqtaiguesat namayepi, nachena na ilaxachigui na laỹepi shiỹaxauapi.

₅Qaq ỹoqo'oye, da iqataxac no'on da ỹataqta qanpogoxoiñiỹapegue' da:

₈Da qami' qauauattoñi So Jesucristo, nache maiche qauo'oche 'enauac de'era qataq qanpogoxoiñiỹapegue' da qanquiquiita'aguet da ỹataqta ỹaỹamaqchiguiñi. Huaña, nache ivita da nda'a't da ỹaỹamaqchiguiñi qauo'ocheetac. ₉Qaq cam saishet da ỹo'ot de'era, nache camaye 'eeta'am da sa nauaañi qataq icoua'ai da Ñim Lo'onatac 'Enauacna ỹapalaxat 'enauac nam qauem maye ỹo'ot co'ollaxa. ₁₀Qami' ỹaqaỹa't, Ñim Lo'onatac 'Enauacna qami' lca'agui'she da yaqto' qauallicỹoigui na lalamaxatpi. Qaq da qauauoitaique da nache 'eetai' da qaualliquiitaigui namayepi, nache qami' iuen da qanquigaxachiitec da qana'añaxataxaqui da qauo'oche 'enauac de'era. Qaq da nache qoñiitec de'era, nache saishet da huo'o ca nqanaxat da qanachaalataxaqui da qaua'amaqchiñiitac So Cristo. ₁₁Qaq Ñim Lo'onatac 'Enauacna ỹataqta qami' ntootegueque da qami' ỹaconegueta da yaqto' qaunoxoñiiua'a da lo'onataxanaxac So Qarataxala' qataq Qarca'alaxaqui Jesucristo, qom nachaxan da ilo'ogue 'enauacna.

₁₂Qaq ỹoqo'oye aỹem shecto'ot da qami' seuennataxanaxaatapegueque de'era, na'aictaxa da qami' mashe qauaỹaañi damaye, qataq ỹataqta saishet da qoquiỹa'ai de'era 'eesa lataxac maye qami' qaỹapaxagueneque. ₁₃Nagui da ñaq ñeca'altauec, nache aỹem sa'amaqten da maiche ỹo'onataxanaxac da qami' seuennataxanaxaategueque 'enauac de'era. ₁₄So Qarataxala' Jesucristo mashe aỹem ỹaỹaanaxanaxanec da saqaỹaloq da ivita ca loga't da ñachaalataxac; ₁₅qalaxaye aỹem ỹataqta ñepogoxoueetapegue' da yaqto' qami' qantooñita'ac de'era iqataxac, na'aictaxa qom mashe ime da seleu.

₁₆Co'ollaq qami' sapaxaguenaqtapegueeque da la'añaxac So Qarataxala' Jesucristo qataq da lle'eguelaxasoxoc, nache qomi' saishet da maiche so'otaq ca qara'aqtaxanaxac, nachaqrata da ỹataqta ñimaqa'ai' co'ollaxa da seloqtagui de'era lta'araic la'añaxac So Qarataxala'. _17-18Qomi' sauanaqchigui co'ollaq Ñim Lo'onatac 'Enauacna maye Nta'a, dam ỹo'otec So Jesús da lta'araic 'enec qataq ỹachaxan dam qaica ca 'ena'am llo'oxoyec Somaye. Qaq nache huaña añi saqaỹoqotcheguemec 'alhua maye sa qaishetapec da sa'axasoqchigui co'ollaq Ñim qaica ca 'ena'am da la'amaqchec qataq da llo'oxoyec co'ollaq 'eeta': «'Ena na Ỹalec. Aỹem ỹataqta ỹauotaxat namaye, qataq ỹo'ot da ỹamaicỹaxac.»

₁₉Qaq aỹem ỹataqta 'eesa ñaqa'en de'era la'aqtaxanaxac Ñim Lo'onatac 'Enauacna maye ỹa'axattac co'ollaxa so la'aqtaxanaxanecpi Ñimaye. Qaq ỹoqo'oye qami' ñachoxoreetoiguilo da ỹataqta qana'axaỹaxañiỹa de'era na'aqtaxanaxac, cha'aye damaye nachera da qami' da'aqtaxanema da 'eetec da qanachaalataxaqui, choche ivitta'a que'eca na'a'q qom ñe'eguelaq So Cristo, nache naralaxat da qanachaalataxaqui. ₂₀Qalaxaye hua'auñi qome da qami', iuen da qauaỹaañi da qaica ca napaxaguenataxanaxac da chegaqaigui ana nere maye huetalec na la'aqtacpi Ñim Lo'onatac 'Enauacna da maiche qandoolec da qaỹa'axategue ca naigui, ₂₁cha'aye 'enauac som hua'au la'aqtaxanaxanecpi Ñim Lo'onatac 'Enauacna saishet da huo'o ca 'oonolec da maiche nallegoxottela't ca la'aqtaxanaxac. Nachaqrata da 'enauac somayepi ỹa'axattac dam chegoqo'ot Ñim Lo'onatac 'Enauacna, qataq So Saqcha'a Na'añaxac Qui'itta ỹauecta'aguet da lhuennataxac.