2 Pedro 3

₁Qami' ñauochaxau' ỹaqaỹa't, maye sa'amaqtenaqtac So Cristo, qami' samaxalo ana lỹa ỹere. Qaq ne'enaua dos ỹerel maye qami' samaxalo, sauotaique da qami' seqatalo da yaqto' ishet da ỹaỹamaqchiguiñi da qantoonaxaqui. ₂Qauennachiỹa'a da la'aqtaxanaxac som la'aqtaxanaxanecpi Ñim Lo'onatac 'Enauacna maye qomi' ỹanema soua qaỹoqteguelo vi'iye. Qataq saishet da qaucoviỹa'aisalo naua lamaxasoxonaxaco So Qarataxala' qataq Qarca'alaxaqui Jesucristo maye qami' ỹapaxagueneque soua lamaxa'she.

₃Qaq da hua'auñi, qami' iuen da qauaỹachiñi da que'ecaua pa'atre'c na'axa'te, nache nvi' qome ca shiỹaxauapi maye quetague' nam qauem lqopitaxanaqtaiguesat. Qataq qami' ỹe'eeta'ape. ₄Qataq qami' inatta'ape qome, 'eeta': «¿Hua'ague ca 'eetec cam qami' qaỹachaxanapecoto lle'eguelaxasoxoc So Cristo? Ye choche ivitta'a da ileu so hua'au qarta'alpi, qalaq ñaq 'eetalec da lataxac ana 'alhua, chegoqta'a co'ollaq cheta'ague da qaỹo'ot.» ₅Qaq ne'ena shiỹaxauapi saishet da taỹapigui lauel da soua qaỹoqteguelo vi'iye da Ñim Lo'onatac 'Enauacna, ỹo'ot co'ollaxa na piguem qataq ana 'alhua. Chegoqchigui so 'oonolec la'aqtac da ỹo'ot aso auaxai qataq na deqaqtelec 'alhua. ₆Nataqa'en do'ogoxona na 'etaxat da ỹo'ot so lta'araic auot da yaqto' ilaxachigui na huetalec ana 'alhua se'eso na'a'q. ₇Qalaxaye nataqa'en ỹachegoxotchigui se'eso la'añaxac da Ñim Lo'onatac 'Enauacna ỹan da la'aqtac, da qom ivita que'eca laloqo', nache na piguem qataq ana 'alhua maye huo'oi nagui, naamaye ilaxachiguilo, irolec ca norec. Naamaye qaỹavigaxa't qom ivita que'eca na'a'q da Ñim Lo'onatac 'Enauacna nmit 'enauacna, nache ilaxachigui 'enauac nam ỹo'ottac na qauem.

₈Qataq da lỹa, qami' ỹaqaỹarolqa, saishet da qaucoviỹa'ai da Ñim Nataxala' ye 'oonolec na'a'q qalaq 'eeta'ama naqa'en caua mil vi'iye, qataq caua mil vi'iye, qalaq 'eeta'ama naqa'en ca 'oonolec na'a'q. ₉Qaq saishet da Ñim Lo'onatac 'Enauacna da qaỹaloqta da ipaqueelec ca ỹachaxanapec, cha'aye huo'o na lhuennataxac de'era. Chaqrata da Ñimaye huo'o da lhualaxavic da qami' iuatta'alo, cha'aye Ñimaye saishet da ỹaỹamaxaren da huo'o ca ileu da qoñiita, chaqrata da 'enauac da qoñiita qavi'eguelaqaỹa da qaralaxayiqui.

₁₀Qalaxaye qom ñe'eguelaq So Qarataxala', nache ca lle'eguelaxasoxoc 'eeta'am ca cachaxaic da pa'aigui ca nỹec da decachigui. Qaq que'eca na'a'q na piguem deqat, huetoigui ca lta'araic nllimiaxa maye qaica ca 'ena'am da lchec. Qataq ana huaqaañipi, qalaq qairolec ca norec da qailaxachigui, qataq ana 'alhua qataq 'enauac nam huetalec anamaye deqat.

₁₁Qaq nagui da 'enauac ne'enapi, da 'eetec de'era da qailaxachigui qome, nache qami', iuen da qaualaqaiguet Ñim Lo'onatac 'Enauacna qataq qauo'oche ca ỹaỹamaqchiguiñi, ₁₂qataq huo'o da qaryaqai da qauacheeta'aguet que'eca na'a'q da Ñimaye nmit 'enauacna. Que'eca na'a'q ca norec ỹavigaxat na piguem, qataq quiguiñi naqa'en ana huaqaañipi. ₁₃Qalaxaye qomi' seuataqta'aguet ca dalaxaic piguem qataq aca dalaxai 'alhua maye qomi' ỹachaxanapecoto Ñim Lo'onatac 'Enauacna, cam hueta'a qome 'enauac na shiỹaxauapi maye no'on da lataxac qataq soxoraicpi.

₁₄Qaq ỹoqo'oye qami' ñauochaxau' ỹaqaỹa't, nagui da ña qauacheeta'aguet da yo'oq 'enauac de'era, qaq no'on da ỹataqta qanpogoxoiñiỹapegue' da qaulaquiichiguiñi da qoviito'ot Ñim Lo'onatac 'Enauacna, yaqto' Ñimaye saishet da qami' natenaleguete da huo'o ca qarasouaxashechi. ₁₅Qataq qantooñita'ac da So Qarataxala' Jesucristo qomi' iuatta'alo, da yaqto' ishet da ñeca'alaxauec qome. So qanauochaxaua qartaua qarqaỹa Pablo, nataqa'en ỹiyiñi co'ollaxa de'era, cha'aye Ñim Lo'onatac 'Enauacna ỹa'axatem co'ollaxa de'era. ₁₆Qaq 'enauac ana lerepi, somaye ỹa'axattac de'era, na'aictaxa da huo'o nam ỹa'axattacpi da saishet da saqalaq da qaỹaỹaten. Qaq ỹoqo'oye nam shiỹaxauapi maye qaica ca ỹaỹaanapec qataq nam saishet da ỹa'amaqten So Cristo, namayepi saishet da ỹaỹaten de'era. Qaq da nshetaique da ỹa'axategue ca naigui, nache sa ỹaỹamaxañi da la'aqtaxanaxac. Nache 'eetec nataqa'en da ỹa'axat nam nanettalec ana nere maye huetalec na la'aqtacpi Ñim Lo'onatac 'Enauacna. Qaq ỹoqo'oye Ñimaye ỹauo'o qome ca nhuaxanaguec namayepi.

₁₇Qami' ñauochaxau' ỹaqaỹa't, de'era ỹa'aqtaxanaxac ỹa'axat da mashe sogote da qami' sevitaqteetagalo 'enauac de'era. Qaq ỹoqo'oye ỹataqta qanchilỹañi qome, yaqto' saishet da qami' ỹatenache't na shiỹaxauapi maye qauemaicpi, ime nache qami' qaỹa'axañiiuec da qaua'amaqchiñiitac Ñim Lo'onatac 'Enauacna. ₁₈Nachaqrata da qauaqaita'a da nsoxoyec qataq da nauattonaxanaxac maye qomi' ỹanema So Qarataxala' qataq Qarca'alaxaqui Jesucristo da qami' itauneque da qaviyiỹa'a da ỹataqta no'on da qara'amqaanataxanaxaqui.

¡Qaq da qayo'oxonnataxanaxac So Jesucristo, damaye chochaq tatec qome! Aja', nache 'eetec.