So Natán iviraxato'ot co'ollaxa so David
1Qaq Ñim Nataxala' ỹamaq so na'aqtaxanaxanec Natán, da nqo'ona so David. Qaq co'ollaq ivireuo so Natán, nache 'enapega so David, 'eeta': Huo'oi soua dos shiỹaxau', neraña so huaqta'a't nỹecpi. So 'oonolec sallaxanec, qaq so lỹa choxoraq. 2Nache so sallaxanec, ỹataqta qalota aso lalo qaguetapi qataq huacapi, 3qaq so choxoraq, qalaq 'oonole asotai' lalo qagueta maye lsheenaxanaqte. Qataq maiche ỹaqchet, nache ỹeta'ai' asomaye qataq soua llalqa, qataq nache lquia'axaua naxa, qataq nỹomaxaua asomaye, qataq nsoqtauo naxa da do'ocheta, qaq se'eso ỹale ỹataqta ỹauotec asomaye, 'eeta'am aca lalamaqte llale. 4Qaq huo'o so na'a'q, nache se'eso sallaxanec huo'o so namaxasoxoic, qalaxaye co'ollaq huotaique da iquia'axan so namaxasoxoic, nache saishet da ỹaconeua'a aca 'oonole aso lalopi qaguetapi, huo'otaq huaca da ỹalauat, nacherata da ỹaconeua'a da ỹalauat asotai' 'oonole qagueta maye lalo som choxoraq, da yaqto' ỹo'ot so aloq so namaxasoxoic. 5Nache so David ỹataqta dalemata souaxat da ỹo'ot se'eso ỹale, nache 'enapego' so Natán, 'eeta': ¡'Am 'aua'aqchigui da ỹa'aqtac da sanot Ñim Nataxala', da ỹataqta 'eesa qome da que'eca shiỹaxaua maye ỹo'ot de'era, iuen da qaỹalauat! 6¡Qaq camaye iuen da isheeten qome asotai' qagueta, nache cuatro da ỹe'eguelaxalec da isheeten da ỹataqta lasheechiỹaxac asomaye. Cha'aye saishet da dechoxonnataxan da ỹo'ot de'era! 7Nache so Natán 'enapeco': «¡Se'eso ỹale, nache 'am! Qaq 'era da la'aqtac Ñim Nataxala' maye Natamnaxala' na Israel le'ecpi: ‹Aỹem, 'am lleca'aguishec co'ollaxa da yaqto' 'am nta'a na Israel, qataq 'am ñeca'alaxateeguesop da la'añaxac so Saúl. 8Qataq 'am sanem co'ollaxa na lma' lta'araic so 'arataxala' Saúl, qataq ana lamoxouapi. Qataq 'am sanem da 'aulo'ogue na Israel qataq na Judá. Qaq taxa da 'eco' saq 'amaqtaq 'anqa'en ne'ena 'am sanempi, nache ishet taxa da qaltaq ñequigaxattec ca 'am sanem.› 9Qalaq ¿ta'ainco' da qaica ca naiguilo 'anqa'en naua ỹa'aqtaqa, nache 'auo'ot da sa saỹamaxaren? Cha'aye 'am, 'aualauat so Urías som hitiita, nache 'auo'ogoxona so amoniitapi da yaqto' ỹalauat, ime nache 'anamataxaalec añi lhua. 10Qaq cha'aye 'am, saishet da Aỹem 'aualaxaguet, souaxat da 'auotaxanec añi lhua so Urías som hitiita, da 'auo'ot 'arhua, nache dam qauem saishet qome da ca'ai na 'arma'. 11Qataq 'eeta' da la'aqtac Ñim Nataxala': ‹Aỹem, so'ot qome da na 'aralamaxat 'aỹa'alaqpi, maiche 'am ỹo'otec ca qauem. Qataq 'auauaachigui qome da, ana 'aramoxouapi lauañi' ñaqa'en ca 'oonolec 'arhuo' le'ec, ca na'a'q laiñi. 12Cha'aye dam 'auo'ot, maye ỹataqta 'oxotchiguiñi co'ollaxa, damaye ỹataqta ỹauaachigui ñaqa'en qome 'enauac na Israel le'ecpi.›» 13Nache so David, da'aqtaxanem so Natán, 'eeta':
Aỹem, huo'o da ỹasouaxashet hueto'ot Ñim Nataxala'. Nache so Natán, 'enapeco':
Ñim Nataxala', mashe ỹapalaxat da 'arasouaxashet, qaq saishet da 'aleu qome. 14Qalaxaye souaxat da ỹataqta 'aunogoqchet Ñim Nataxala', nache yi'iye 'aỹa'alec maye ñaq cheta'ague da ñiguiñi, ileu qome. 15Qaq co'ollaq ỹe'eguelaxa so lma' so Natán, nache Ñim Nataxala', ỹataqta dalola naqa'en so llalec so David maye llalec aso lhua co'ollaxa so Urías. 16Nache so David, ỹataqta nqouagaxaueetacot Ñim Nataxala' souaxat se'eso nogotolec, qataq nqouaqchet, qataq huo'oi soua pe' da nnaata'aguet na 'alhua. 17Nache so nqueroxonecpi maye netaña so lma' lta'araic somaye, taua'a co'ollaxa somaye nache nachoxoreetacot da ñesheguem qataq da deque'e, qalaxaye somaye sa nashen da ñesheguem, qataq saishet da dequi'iỹa'ai' somayepi. 18Qaq co'ollaq inoxoore'c soua siete na'axa'te, nache ileu se'eso nogotolec. Qaq so nataxala'pi maye ltauapi so David, ỹataqta ñi'iỹa da da'aqtaxanem so David da ileu se'eso nogotolec, cha'aye da lhuennataxa somayepi, 'eeta':
«Can ña nca'altauec yi'iye nogotolec, nache da setaxasoqtacot naxa ñi nta'a, qalaq saishet da qomi' ỹalaxagueta. Qaq ¿ca 'eeteco' nagui da sa'aqtaxanaxam da ileu ye nogotolec? ¡Qaigo' ỹo'ot ca ỹapactec sa ỹaỹamaxañi!» 19Qalaxaye so David, co'ollaq ila'a da nchettega't da na'aqtaxaatega't so nta'alpi maye ltauapi somaye, nache ipeta'a da mashe ileu so nogotolec. Nache somaye inat so ltauapi, 'eeta':
¿Peta'a mashe ileu ca nogotolec? Nache somayepi 'enapeco':
Aja', mashe ileu. 20Huaña, nache ñesheguem so David. Ime, nache nachel, qataq ncoyigui so ncoraxat maye ama da laitaỹaxac, qataq naralaxa't soua alogo, nache taua'a aso atamnaxaqui, da ỹo'oxoren Ñim Nataxala'. Qaq co'ollaq ime, nache taỹa so lma', qataq iỹaxanaique so aloq nache deque'e. 21Nache so nta'alpi maye ltauapi, inattaco' somaye, 'eeta':
¿Ca 'eetec 'am? Ye co'ollaq ña nca'altauec ye nogotolec, nache ỹataqta 'anqouaqchet qataq 'anỹeetapeguelec, qaq nagui da ileu yemaye nache 'am qoñesheguem qataq 'auque'e. 22Nache so David 'enapeco':
Co'ollaq ña nca'altauec yi'iye nogotolec, nache aỹem ñeqouaqchet qataq ñeỹeetapeguelec, cha'aye sauotaique da aỹem ichoxoren Ñim Nataxala', da nache nca'altauec naqa'en yemaye. 23Qalaxaye nagui ye mashe ileu yemaye nache ¿ta'ainco' ctaxa da ñeqouaqchettac? Ye saishet da ỹe'eguelaxa da nca'alec ñaqa'en yemaye. Aỹem ñeqo'ona qome yemaye, qalaxaye yemaye saishet da aỹem ñe'eguelaxa. 24Qaq co'ollaq ime de'era, nache so David taỹa aso lhua Betsabé da yaqto' machiguiñi naqa'en, qataq nache lauatapiguiñi'. Nache asomaye qaltaq huo'o so llalec, nache so David ỹanagui da le'enaxat Salomón. Qaq Ñim Nataxala' ỹataqta ỹauotec se'eso nogotolec, 25nache Ñimaye ỹamaxague da la'aqtac so la'aqtaxanaxanec Natán, da 'enapega so David da ỹanagui da le'enaxat Jedidías, se'eso nogotolec. Nache so David ipacchigui da la'aqtac Ñim Nataxala' da ỹanagui da le'enaxat Jedidías se'eso nogotolec.
So David loxonec ye Rabá
26Qaq so Joab, ña iloquiaxaatac co'ollaxa so amoniitapi maye lma' ye Rabá, qaq co'ollaq mashe yaqta'a da deuotaxanec so lma' so nta'a, 27nache ỹamaxaguelo soua lamaxa'she so la'aqtac maye taỹa'a so David, 'eeta': «Aỹem seloquiaxaatac na netaña na Rabá, qataq mashe ỹoxonec na huaqta'a't nỹecpi maye netaña ana laỹe'pi na 'etaxat. 28Qaq 'am nta'a, 'alaỹona't qome nam no'onañi alleppi, nache 'auanac da 'auloquiaxan ne'ena huaqta'a't nỹecpi nache 'auotaxanec, yaqto' saishet da nachaỹem da ỹoxonec, qataq da qoỹanagui da ỹe'enaxat.» 29Nache so David laỹona't co'ollaxa 'enauac so nalleppi, nache taỹa ye Rabá da iloquiaxan, nache loxonec. 30Ime, nache ỹacona aso naro'o so lta'a somayepi, maye oro, qataq llo'oxoraxat na ỹataqta no'on coma', qataq ivi' treinta y tres kilos, nache naro'ooña so David. Qaq so David nataqa'en ỹataqta qalota so lhuotaxanaxat som no'on nogoxoshetpi, 31qataq nqatec so shiỹaxauapi maye no'onaña se'eso huaqta'a't nỹecpi, nache ỹo'onataxanaxan, ỹamaxalec so ỹataqta qapa'atta no'onatacpi, dechegaxaatac qataq dequesoxootega ana qachepe, qataq ỹo'ottac na losoc. Qaq nache 'eeta'am naqa'en da 'eetec so laỹepi amoniitapi maye netaigui so lalamaxat huaqta'a't nỹecpi. Ime, nache so David ỹe'eguelaxa ye Jerusalén, lỹatec 'enauac so nalleppi.
