So David qoỹanagui da nta'a ye Judá
1Qaq co'ollaq mashe ime de'era, nache so David inat co'ollaxa Ñim Nataxala', 'eeta':
¿Peta'a ishet da huo'o ca ñeqo'ona yem huaqta'a't nỹecpi maye ỹotta'a't naua nañalo na Judá?
Nache Ñim Nataxala', 'eeta':
Aja', ishet, qalaxaye so David qaltaq denataxan, 'eeta': ¿Qaq chaq negue't cam ishet da ñeqo'ona? Nache Ñim Nataxala', 'eeta': Qomye 'anqo'ona ye Hebrón. 2Nache so David jec co'ollaxa taỹa yemaye, nnaictagueto soua dos lamoxou', aso Ajinoán maye Jezrel lashe, qataq aso Abigaíl asom npa'ai so Nabal maye lma' co'ollaxa ye Carmel. 3Qaq nataqa'en ỹauec co'ollaxa so nalleppi qataq so llalaqpi somayepi, nache naña ye Hebrón. 4Qaq co'ollaq qaỹata'ague de'era, nache nvireua'a somaye so Judá le'ecpi, qaq nache huaña yemaye da qaicorelec so David, da yaqto' nta'a ye Judá. Qaq nataqa'en qaỹa'aqtaxanem co'ollaxa somaye, da so lma' ye Jabés yem huaigui ye Galaad, nachesopi som ilayiñi co'ollaxa so Saúl, 5nache so David ỹamaxalo soua la'aqtaxanaxanaqa so netaña ye Jabés da da'aqtaxanem da la'aqtac somaye, 'eeta': «Ñim Nataxala' qami' taleguete naqa'en qome ca lchoxonnataxanaxa, souaxat da qauaỹamaxachiichiguiñi da qaulayiiñi ye Saúl maye qarataxala'ai co'ollaxa. 6Nache nagui Ñim Nataxala' qami' ỹanema da lchoxonnataxanaxa, qataq da lauotaxanaqtaic. Qaq aỹem qome, qami' so'oteque ca ỹaỹamaqchiguiñi souaxat de'era qauo'oche. 7Qalaxaye nagui, qana'añaxache, qataq qami' qaramchiguilo qome, cha'aye na'aictoxo' da ileu ye Saúl, maye qarataxala'ai, qalaxaye na maiche nalamaxat nhuo' le'ecpi na Judá, anac da aỹem icorelec da yaqto' aỹem lta'a.»
So Israel le'ecpi qataq Judá le'ecpi maiche deloctega't
8Qaq so Abner, som llalec so Ner maye lataxala' na nalleppi so Saúl, ỹaconeua'a co'ollaxa so Isboset, som llalec so Saúl, nache ỹauega ye Majanayin, 9qaq huaña yemaye co'ollaxa da ỹanagui da lta'a so netaña ye, Galaad, Guesuri, Jezrel, Efraín, Benjamín qataq 'enauac ye Israel. 10Nache so Isboset co'ollaq ỹacoolec da lo'onataxanaxac da lta'a na netaña ye Israel, nache somaye mashe ivi' soua cuarenta vi'iye, qaq de'era lo'onataxanaxac da nta'a ivi' dos vi'iye. Qaq so Judá le'ecpi, qalaxaye datalec so David da ỹauo'o lta'a somayepi. 11Nache so David nta'a ye Judá soua siete vi'iye, qataq soua seis ca'agoxoiqa, qaq de'era lo'onataxanaxac da nta'a, nache netaña ye Hebrón. 12Nache so Abner, som llalec so Ner chegoqchiguiña co'ollaxa ye Majanayin, da taỹa ye Gabaón, lỹatec so nalleppi so Isboset som llalec so Saúl. 13Qaq so Joab, som llalec aso Seruyá, qataq so nalleppi so David chegoqchiguiña co'ollaxa ye Hebrón, da taỹa somayepi, nache natena'aguet co'ollaq huaña ye naña aso laỹe' na 'etaxat ye Gabaón. Nache huo'o so na'atague da le'ego aso laỹe' na 'etaxat, qaq so laỹepi mpa'aigue na laỹe. 14Nache so Abner 'enapega co'ollaxa so Joab, 'eeta':
'Onaxaictaxo' da hua'aua't na nsoxoppi da deloguiỹa't, qaq qomi' sataqtaua'a.
Nache so Joab, 'enapeco': Aja', nache 'eetec. 15Nache so chegoxoguetpi so Benjamín, maye nalleppi so Isboset som llalec so Saúl, hua'autec naqa'en so doce nsoxoppi, qataq so nalleppi so David nataqa'en hua'autec so doce nsoxoppi. 16Nache ñi 'oonolec delogui' so mpa'aguenaxaua, ỹacootec na lqaic nache ỹa'atteua'a na laỹe so lainec, nache 'enauac somayepi nmañi da ileu. Ỹoqo'oye yi'iye 'alhua maye huaigui ye Gabaón, qoỹanagui da le'enaxat no'onaxa, «Qaỹa'areua'a na Laỹe». 17Qaq se'eso na'a'q ỹataqta deloguiỹa't somayepi, nache so nalleppi so David nauec so Abner qataq so nalleppi Israel le'ecpi. 18Nataqa'en ỹalectrauo soua tres llalqa aso Seruyá: Joab, Abisay qataq Asael. Qaq so Asael ỹataqta ayaqaic, 'eeta'am ana ñi'imshe da nqalgoqteguelec na no'onaxa, 19nache somaye ỹataqta nalemaqte' da icanapec co'ollaxa so Abner, qaica ca lỹa iqochetega. 20Qaq co'ollaq namata'ague na l-laq so Abner, nache 'eetega somaye, 'eeta':
¡Qache nache 'am, Asael! Nache somaye 'enapeco':
¡Aja' nachaỹem! 21Nache so Abner, 'eeta':
¡'Axaañectaxa da aỹem 'aucaatac! 'Onaxaictoxo' da ỹaqa'a ca 'auaconeua'a ne'ena ỹalleppi, nache 'auacona ca lo'oxonaxat. Qalaxaye so Asael saishet da ỹaxaañi da icaatac somaye, 22nache so Abner ỹe'eguelaxalec da 'enapega somaye, 'eeta':
¡'Axaañi da aỹem 'aucaatac, cha'aye da saishet da 'anañaxaañi, nache 'am salauat qome! Qaq da ime, nache ¿ca sheeteco' ca ỹa'aqtac da ñeqo'oneua'a so 'arqaỹa Joab? 23Qalaxaye so Asael saishet da ỹaxaañi da icaatac somaye, nache so Abner ỹe'eguelaxaguet somaye, nache ỹauota'a aso lataquiaxai da ỹa'arapec, ỹa'atchigui so lcheshet lhuotauga naqa'en na l-laq, nache huaña yemaye da ileu so Asael. Qaq 'enauac nam nateuga so huetaña somaye da ileu, nache vi'iiguet da imeteetac. 24Qalaxaye so Joab qataq so Abisay icaaleguete co'ollaxa so Abner. Qaq co'ollaq mashe inoxootapiguiñi aso nala', nache soomaye ivitalo co'ollaxa añi lcomaraxalate ye Amá, maye datatta ye Guiaj yem nlectot so nqa'aic maye taỹa'a ye toolec 'alhua ye Gabaón. 25Qaq huaña co'ollaxa yemaye da lapona't so chegoxoguetpi so Benjamín, nache itauan so Abner datalec somaye da naloguiñi somayepi, huaña na pa'asheguem aso lcomaraxalate. 26Nache so Abner ỹa'alaxalec so Joab, 'eeta':
¿Peta'a sa 'ausheto' da 'avia'axaneguet de'era nalaataxanaxac? ¿Peta'a sa 'auaỹateno' da 'enauac de'era taỹa'a da que'eenaxac? ¿Negue't ca 'auatta'a da sa qonapega na 'analleppi da a'aye, ỹaxaañi da icaatac na lqaỹañecpi? 27Nache so Joab, 'enapeco':
Ỹataqta nca'altauec Ñim Lo'onatac 'Enauacna da saishet taxa da 'anasaxauec de'era 'ara'aqtac, nache ne'ena ñalleppi queto'ot da icaatac taxa na lqaỹañecpi choche ivitta'a da yo'oxoñi. 28Nache so Joab, sa naỹaloxon da qaỹashiiyigui naqa'en aso nasheere, nache 'enauac somayepi vi'iiguet, ỹaxaañi da icaatac so Israel le'ecpi da iloquiaxaatac. 29Nache so Abner qataq so laỹepi, palom da petañi quetalec ye nalochiguiñi 'alhua ye Arabá, qataq ỹa'axasoxoolec so Jordán qataq so na'axasoxonatac ye Bitrón, nache ivitta'a ye Majanayin. 30Nache so Joab ỹaxaañi co'ollaxa da icaatac so Abner, nache laỹona't co'ollaxa so nalleppi, qaq co'ollaq naloqna't somayepi, nache nanoma da diecinueve so qaica so nalleppi so David, ỹalegueuo nataqa'en so Asael. 31Qalaxaye so nalleppi so David ỹalauat so trescientos sesenta ỹalleppi, som chegoxoguetpi so Benjamín, maye nalleppi so Abner. 32Qaq so nalleppi so Joab, ỹacoosop co'ollaxa so Asael, nache ira'a ye Belén da ilaroigui aso nhuachiqui so lta'a, qaq somayepi palom co'ollaxa da queta petañi. Qaq so mashe yaqta'a da yo'oxoñi, nache ivita ye Hebrón.
