2 Samuel 22

«Ñim Nataxala', nacheñi ñi Aỹem mpaxattalec,

ỹo'ot da ỹa'añaxac qataq aỹem nca'alaxatec,

₃Ñim Ñatamnaxala', 'eeta'am ana coma' da aỹem mpaxattalec,

qataq ana mpaqtaxanaqte da aỹem mpaxattalec,

qataq 'eeta'am ca ỹataqta qaỹoqotcheguema ñeqañoxotaqa',

qataq ica'alaxaqui.

¡Qataq aỹem nca'alaxateeguesop da ñecogaxanataguec!

₄Ñim Nataxala', ỹataqta 'itchiguiñi da sho'oxoren,

cha'aye naxa da seỹaxana

nache aỹem nca'alaxateeguesop na ñepa'aguenaxauapi.»

₅«Qaq so nleuaxa, 'eeta'am ana lapaxa na 'etaxat

da aỹem lpachigui, qataq ỹo'ot da icolanaxa,

somaye 'eeta'am ana ỹataqta chaxaguet lapaxa

maye dalaataxanapec.

₆Nache mashe aỹem lpachigui so lqoinaxanaxat da nleuaxa,

qataq mashe sootaua'a na loigue añi huachiqui.

₇Qaq souaxat da lta'araic ỹachetataic,

nache ñatamnot Ñim Nataxala',

seỹaxanot Ñim Ñatamnaxala' da aỹem itauan.

Nache iviro'ot de'era ñachoxonnaxac,

huaña añi atamnaxaqui maye lalamaqte Ñimaye,

da aỹem hua'axaỹa.»

₈«Nache huo'o so lta'araic ldaxa ana 'alhua,

nache cholaxan naqa'en na na'attalecpi na piguem,

souaxat da layeloxo Ñim Nataxala'.

₉Nache naviiguilo naua lmic lauaco, na lmala'q,

qaq na alap qalaq chegaqaigui na norec dalaataxanapec,

qataq ana poqo 'ettaigui.

₁₀Nache nquiguiñi naqa'en na piguem da huenotec.

Nache petaigui so sansattec lo'oc.

₁₁Nache netalec so huo'oi naua laua't le'enaxat querubín,

nache huaỹotac quetaigui na la'at.

₁₂Qataq taigui so ỹataqta lta'araic napalaxa,

qataq so lo'oc maye nlaqchigui na 'etaxat,

da 'eco' lapoxonaxat.

₁₃Nache na le'eraxa ye lanataqa',

chegoqteua'a ana 'ettaigui poqo.»

₁₄«Ñim Nataxala' ỹataqta ỹalachiguilo naua la'aqtaqa

Ñim Nataỹaña 'enauacna, ỹo'ot da qaỹa'axaỹa naqa'en

da lavilỹaxac maye chemaqot na piguem.

₁₅Qataq 'eeta'am ana checna da anac na lqashelgaxa Ñimaye,

nache ilagaxattac na ñepa'aguenaxauapi.

₁₆Qaq souaxat da layeloxo Ñim Nataxala',

nache ya'aqlec naqa'en na pa'aguiñi aso auaxai,

qataq na na'attalecpi ana 'alhua qalaq ỹaatec,

souaxat na la'at maye chegaqaigui ñi nmic Ñimaye.»

₁₇«Ñim Lo'onatac 'Enauacna,

chegoqotcheguema na ỹataqta pa'asheguem,

da ỹauota'a na lhuaq da aỹem ỹacoosop,

aỹem ỹachegoxotchiguiña ye ỹataqta pa'aguiñi aso auaxai.

₁₈Nache aỹem isoueeguesop na ñepa'aguenaxauapi

maye 'añaxaicpi, maye ỹataqta aỹem nquiỹa,

qataq napacalec da ỹa'añaxac.

₁₉Qaq huaigui se'eso na'a'q maye qaica ca iyac,

da aỹem iloquiaxan, qalaxaye Ñim Nataxala' aỹem itauan.

₂₀Nache aỹem isouec Ñimaye, qataq aỹem nca'alaxatec,

cha'aye souaxat da aỹem ỹauotec.

₂₁Ñim Nataxala', ỹo'ot da ñesheetenaguec,

souaxat da nalochiguiñi da ỹataxac,

₂₂cha'aye aỹem salaxagueta naua lapaxaguenataxanaxaco Ñim Nataxala',

¡qataq saishet da sheca'ai Ñim Ñatamnaxala'!

₂₃Qataq sepaqueelec da so'o't naua lapaxayiñi lataxaco,

¡qataq saishet da sheca'aisalo naua lqataxaco!

₂₄Ñimaye aỹem ỹauaachigui da ỹaỹamaqchiguiñi da ỹataxac,

qataq sevita'aguet da so'ot ca qauem.

₂₅Nache Ñim Nataxala', ỹo'ot da ñesheetenaguec,

souaxat da ỹaỹamaqchiguiñi, qataq da qui'itta ỹataxac.»

₂₆«Qaq 'Am Nataxala', ỹataqta 'auchoxoren,

ca shiỹaxaua choxonnataxanaxaic,

qataq 'auo'otec ca ỹaỹamaqchiguiñi,

cam nalochiguiña da lataxac,

₂₇qataq 'Am huesota, da huesota ca shiỹaxaua,

qalaxaye sa 'anqalaate' da 'oicnapec,

cam ỹe'enai' ca lỹa.

₂₈'Am 'anca'alaxatec ca qaica ca 'enec,

qalaxaye na na'amqaanaxaicpi, qalaq qaica ca naigui 'anqa'en.

₂₉Qaq 'Am Nataxala',

nache 'Am maye icoỹaraxanaqte,

Qataq 'Am, aỹem 'aucoỹarelec da sootaigui na napalaxa.

₃₀Qaq de'era 'artaunaxanaxac da sheeta,

aỹem itauan da seloquiaxan na ñepa'aguenaxauapi

qataq da selaxachigui na lpaqtaxat na huaqta'a't nỹecpi

maye lalamaxat namayepi.»

₃₁«Da nqa'aicỹaxac Ñim Lo'onatac 'Enauacna,

ỹataqta nalochiguiñi;

qataq naua ỹa'n la'aqtaqa, ỹataqta qaipi'iỹa'alo.

Qataq mpaxaalec ca ỹe'eguenot Ñimaye.

₃₂Cha'aye ¿Negue'to' ca lỹa Atamnaxala' ye nacheñita Ñim Nataxala'?

¡Qataq nacheñita Ñimaye da qomi' mpaxattaleguete!

₃₃Qataq Ñim Lo'onatac 'Enauacna, nacheñi Ñim aỹem ỹa'añaqchet,

qataq no'oitegue naqa'en da ỹecỹaxac.

₃₄Qataq sa ilaua'ague naqa'en da iqauaxac,

'eeta'am ana ñi'imshe,

qataq aỹem ỹa'añaxatchiguiñi da sootasheguema na qaỹoqotcheguema,

₃₅qataq aỹem ỹapaxaguenec da ñalaataxac,

qataq ỹo'ot da ỹa'añaxac da yaqto' sauec na nchecnec bronce.»

₃₆«'Am, aỹem 'antela'a, qataq aỹem 'anca'alaxatec;

qataq da 'archoxonnataxanaxa, nquictauec naqa'en da ñeqouagaxa.

₃₇Qataq no'oitegue 'anqa'en so ỹec,

da yaqto' saishet da huo'o ca sepogolaxaisop.»

₃₈«Qataq da secanapec na ñepa'aguenaxauapi,

nache ivitta'a da sevi', qataq saishet da ñe'eguelaq,

da saxanaxa da ñematchiguiñi namayepi.

₃₉Nache ỹataqta ñematchiguiñi, qataq sapigui.

¡Nache saishet da ỹe'eguelaxa da ñisheguem!

₄₀Qataq aỹem 'anem da ỹa'añaxac da sootaigui da alaataxac,

qataq aỹem nañanot 'anqa'en, na ñepa'aguenaxauapi,

₄₁qataq datauec 'anqa'en na namayepi.

Nache ishet da ñematchiguiñi 'anqa'en na aỹem nquiỹatega.

₄₂Namayepi iỹaxaataique co'ollaxa ca ntaunaguec,

qalaxaye qaica ca anac da itauan,

nataqa'en iỹaxaatacot Ñim Nataxala',

qalaxaye Ñimaye saishet da hua'axaỹa.

₄₃¡Nache ỹataqta ñelaxatchiguiñi,

'eeta'am ñaqa'en na namoxoỹaxa!

¡Qataq sapigui, 'eeta'am ñaqa'en na nshaxa na nqa'aic!

₄₄Qataq aỹem 'eltaxaneguet da ncotaxac na maiche ihuo' le'ecpi,

qataq aỹem 'aỹa'anagui da lataxala' na ỹotta'a't shiỹaxauapi,

nache samaqtac na shiỹaxauapi maye sa sauatton.

₄₅Qataq na chegaqauecpi qalaq aỹem ỹo'oxoren,

qataq da choche aỹem hua'axaỹa da samaxasoxon,

nache namayepi aỹem ỹalaxaguet.

₄₆Nache ne'ena chegaqauecpi, qaica ca la'añaxac,

qataq ỹataqta iviloxol da ca'aisalo naua nqañoxotaqa'ate!»

₄₇«¡Qaq nache 'eetai' qome Ñim Nataxala'!

¡Ỹataqta qaỹo'oxoren Ñim Ñatamnaxala' maye ica'alaxaqui!

₄₈Ñim Lo'onatac 'Enauacna, nacheñi Ñim aỹem iueelec,

qataq aỹem nañanot naqa'en na shiỹaxauapi.

₄₉Qataq aỹem isoueeguesop na ñepa'aguenaxauapi,

qataq na sa ỹalaq maye aỹem dataỹa'aguetpi.

Qataq aỹem ntelaqna'aguet na shiỹaxauapi

maye qaica ca iren.

₅₀Qaq ỹoqo'oye 'Am Nataxala', ỹataqta 'Am sho'oxoren

da sootaigui na ỹotta'a't shiỹaxauapi,

qataq so'onaxaataueegue da 'are'enaxat.

₅₁Qataq ỹataqta 'aỹa'anem da dauegaxan,

na nta'a maye 'arca'aguishec

qataq nache 'eetai' da 'arauotaxanaqtaic na David

qataq na chegoxoguetpi.»