2 Samuel 3

₁Qaq de'era 'eetec co'ollaxa da nalattega't so llalaqpi so Saúl qataq so David ỹataqta qaỹoqtec. Qalaxaye so David nquictauec da la'añaxac, qaq so llalaqpi so Saúl qalaq nquicta'a't da la'añaxac.

₂Qaq 'eso so llalaqpi so David, maye lañoqo' ye Hebrón co'ollaq netaña yemaye, qaq so la'auaxanec llalec le'enaxat Amnón, som llalec aso Ajinoán, asom Jezrel lashe, ₃qaq so lỹa llalec le'enaxat, Quilab, som llalec aso Abigaíl maye npa'ai so Nabal maye lma' ye Carmel, qaq so lỹa llalec le'enaxat Absalón, som llalec aso Macá, maye llale so Talmay, som nta'a ye Gesur, ₄qaq so lỹa llalec le'enaxat Adonías, som llalec aso Jaguit, qaq so lỹa le'enaxat Sefatías, som llalec aso Abital, ₅qaq so lỹa le'enaxat Itreán, som llalec aso Eglá, maye lhua lỹa so David. Qaq 'eso so llalaqpi so David co'ollaq netaña ye Hebrón.

₆Qaq co'ollaq ñaq queta da nalattac so nalleppi so Saúl qataq so David, nache so Abner nquictauec da la'añaxac da ilotague' so llalaqpi so Saúl. ₇Qaq so Saúl huo'o co'ollaxa aso lhua lỹa, le'enaxat Rispá asom llale so Ayá, asomaye lauatapiguiñi' co'ollaxa so Abner. Qaq ỹoqo'oye so Isboset 'enapega co'ollaxa so Abner, 'eeta':

¿Ta'ainco' da 'arauatapiguiñi' aso lhua lỹa co'ollaxa ye ita'a? ₈Nache so Abner ỹataqta dalemataỹa so Isboset, nache 'eetega, 'eeta':

¿Peta'a 'aupi'itaxaatega da aỹem lalo pioq na Judá le'ecpi? Aỹem choche ivitta'a nagui da ichoxonnataxanaxa na llalaqpi so 'arta'a, qataq na lqaỹañecpi qataq na nauochaxauapi somaye, qaq ỹoqo'oye saishet da 'am sanem so David, qaq nagui ¿'am qonetega da huo'o ca ỹasouaxashet souaxat aso 'alo? ₉¡Qaq Ñim Nataxala' ỹauo'o qome ca ñeuaxanaguec da saishet da so'ot da la'aqtac maye ỹachaxanapecot co'ollaxa so David, ₁₀da Ñimaye ỹacona qome da lo'onataxanaxac da nta'a so Saúl, nache talec naqa'en so David da yaqto' nta'a ye Israel qataq ye Judá, chegoqchiguiña ye Dan ivitta'a ye Berseba! ₁₁Nache so Isboset ỹataqta saishet co'ollaxa da huo'o ca la'aqtac da ỹasateguet so Abner, souaxat da ỹataqta ñi'iỹa somaye. ₁₂Ime, nache so Abner huo'oi soua lamaxa'she, da yaqto' 'enapega so David, 'eeta':

«¿Negue't ca lalamaxat ne'ena 'alhua? ye nache 'amta, ỹoqo'oye 'onaxaic toxo' da ñaỹamaxataxa't yaqto' 'am setauan da 'am ỹe'eguelaxa 'enauac na Israel le'ecpi.» ₁₃Nache so David 'enapeco':

«Aja', aỹem saỹamaxareeta da aỹem 'anaỹamaxate', qalaxaye da 'auanac nache 'anauec aca Mical maye llale so Saúl, cha'aye da saishet da 'anauec, nache saishet da 'am selo'oguet qome.» ₁₄Qaq nataqa'en so David ỹauo'o so lamaxashec da ỹamaxa da la'aqtac so Isboset, 'eeta': «Aỹem 'avi'eguelaxatot qome aca Mical, maye maiche ihua, cha'aye acamaye lasheue da secheguec so cien logoxoshet lqaic lo'oc so filisteopi maye salauat co'ollaxa.» ₁₅Nache so Isboset damaxasoxoolec da qaiuotaxanec co'ollaxa asomaye, qanhuo' so Paltiel, som llalec so Lais, maye lhua co'ollaxa asomaye, ₁₆qalaxaye so Paltiel, icaalec co'ollaxa asomaye, nache choche ivitta'a ye Bajurín da nnoinaxac, qaq huaña yemaye co'ollaxa da so Abner 'enapega somaye da ỹe'eguelaq, nache so Paltiel ỹalaq da ỹe'eguelaq. ₁₇Qaỹata'ague co'ollaxa nache so Abner, detaxaỹapegue' so nqueroxonecpi ye Israel, 'eeta': «Mashe qaỹoqtegue da qansheetaique da qarta'ai so David. ₁₈Qaq nagui mashe ivita ye laloqo' da qauo'oche de'era, cha'aye Ñim Nataxala' mashe ỹan co'ollaxa so la'aqtac, 'eeta': ‹Chegoqchigui qome ñaqa'en so ỹamaxashec David da sesoueeguesop na Israel da la'añaxac na filisteopi qataq 'enauac na laỹepi mpa'aguenaxauapi namayepi.›» ₁₉So Abner nataqa'en detaxaỹapegue' co'ollaxa so chegoxoguetpi so Benjamín, ime nache nqo'ona ye Hebrón da yaqto' da'aqtaxanem so David, 'enauac da 'eetapeguec so nhuo' Israel le'ecpi qataq so maiche lalamaxat lauo' le'ecpi so Benjamín. ₂₀Nache so Abner co'ollaq ivireua'a ye Hebrón, nache lỹatreuo soua veinte so nalleppi, nache so David ỹo'ot co'ollaxa so lquia'axac so Abner qataq so nnaictague'pi. ₂₁Nache so Abner 'enapega co'ollaxa so David, 'eeta':

'Onaxaictoxo' qome da aỹem 'auasheetem da llaỹona't na Israel le'ecpi, yaqto' namayepi 'am naỹamaxate', yaqto' da 'aro'onataxanaxac da 'am nta'a, ỹataqta nquictauec qome, nache ipacchigui da 'arquiyaqteỹaxac. Ime, nache ncoyeguene' so Abner, nache somaye ỹe'eguelaq ỹataqta machiguiñi. ₂₂Qaq so Joab qataq so nalleppi so David co'ollaq ime da lqueuoxoc, nache nvireua'a ye Hebrón, nachetauo so qalota lhuotaxanaxatpi. Qaq so Abner qalaq mashe ime da datata'aguet co'ollaxa so David, qataq mashe ncoyegueetague' somaye nache machiguiñi co'ollaq jec. ₂₃Qaq co'ollaq nvireuo so Joab qataq so nnaictague' alleppi, nache qaỹa'aqtaxanem da hueta'a yi'iye so Abner, som llalec so Ner, da na'aqtaxaatague' so nta'a, qataq machiguiñi co'ollaq ỹe'eguelaq, cha'aye ime da ncoyegueetague' somaye. ₂₄Nache so Joab taua'a co'ollaxa so nta'a nache 'eetega, 'eeta':

¿Ca 'eetec de'era 'auo'ottac ye 'am naua'a co'ollaxa so Abner? Qalaq ¿ta'ainco' co'ollaxa da 'anasheeteguet, qataq da machiguiñi 'anqa'en co'ollaq ỹe'eguelaq? ₂₅¡'Am 'auauatton mque' so Abner, maye llalec so Ner! Somaye naỹa da choche 'am ỹatenachet, qataq da imeten 'enauac na 'auo'ottacpi da qojec, qataq da 'añe'eguelaq. ₂₆Nache so Joab co'ollaq ime da na'aqtaxaatague' so David, nache huo'oi soua ỹama'q da nmitraique so Abner, nache soomaye ñe'eguelaxa't somaye co'ollaq huaña aso nshere ye Sira, qaq so David saishet co'ollaxa da ỹaỹaten de'era. ₂₇Qaq co'ollaq nvireua'a ye Hebrón so Abner, nache so Joab ỹauegueuga ye 'oonolec laỹe ye ñegueuo so huaqta'a't nỹecpi, cha'aye 'eetega huotaique da ndote' da na'aqtaxane' nache huaña co'ollaxa yemaye da ipalaique lvi' so Joab, nache ỹa'attoiguilo naua lchishe'ete so Abner nache ỹalauat, souaxat da ỹalauat co'ollaxa so Asael. ₂₈Qaq so David co'ollaq ỹaỹaten de'era, nache 'eeta': «Ñim Nataxala', ỹauaachigui da aỹem qataq da ỹo'onataxanaxac da aỹem nta'a, saishet da ỹasouaxashet da l-leuaxa so Abner maye llalec so Ner. ₂₉¡De'era nasouaxashet talec qome so Joab, qataq 'enauac na chegoxoguetpi so lta'a! ¡Nache namayepi qaica qome ca saq hueta'ac da nalolaxa maye anactac na ntago'q, qataq na nchega naqa'en na no'oc, qataq na vi'iỹa'a't, qataq qaỹalauat, huo'otaq da ilem na lqouaxa!» ₃₀Qaq 'era da 'eetec co'ollaxa da so Joab qataq so Abisay da ỹalaua't so Abner, cha'aye somaye ỹalauat co'ollaxa so lqaỹa't soomaye, huaigui so alaataxac. ₃₁Qaq co'ollaq ime de'era, nache so David 'enapega so Joab, qataq so nnaictague' laỹepi, 'eeta': «Qancolaxachiỹa'aisalo qome naua qorogolli', nache qaỹa'añiiñi na quesaxaguet nogoxot da qauo'oche da lataxac da nasouaxac, souaxat da l-leuaxa ye Abner.» Nache so nta'a David, ca'attaueegue co'ollaxa aso laỹe' so Abner, ₃₂nache so Abner huaña qanqa'en ye Hebrón da qailareñi. Nache so nta'a ỹataqta na'alaxañi co'ollaq nỹeetapeguelec so Abner, netaña na laỹe aso huachiqui, nache 'enauac so shiỹaxauapi nataqa'en nỹeetac co'ollaxa. ₃₃Nache so David, ỹo'ot so lo'onec nỹeetaueegue souaxat da nqui'ic da do'onaxaalec so Abner, 'eeta':

₃₅Qaq co'ollaq ime, nache 'enauac so shiỹaxauapi, 'eetega so David da deque'e co'ollaq ñaq saxanaxa da inoxooñi aso nala', qalaxaye so David, ỹan co'ollaxa so la'aqtac, 'eeta': «¡Ñim Nataxala' ỹataqta sa ỹala'ac qom ỹo'ot ca ñeuaxanaguec, qom huo'o ca sachec da ñaq saxanaxa da inoxooñi añi nala'!» ₃₆Nache 'enauac somayepi ỹaỹateeteguet co'ollaxa de'era, nache ỹaỹamaxareeta, cha'aye som shiỹaxauapi ỹataqta ỹaỹamaxareeta 'enauac na ỹo'otpi so nta'a. ₃₇Nache se'eso na'a'q, 'enauac so Israel le'ecpi ỹataqta ỹa'amaqten da se'eso nta'a saishet da lasouaxashet da l-leuaxa so Abner maye llalec so Ner. ₃₈Ime, nache so nta'a 'enapega so nalleppi, 'eeta': «Qami' qauaỹachiñi nagui da ileu so shiỹaxaua maye huo'o da la'amaqchec na Israel. ₃₉Ỹoqo'oye nagui, aỹem nta'a maye lca'aguishec Ñim Nataxala', qalaxaye qaica ca ỹa'añaxac da sataỹa'aguet na llalaqpi aso Seruyá. ¡Qaq Ñim Nataxala' ỹo'ot qome ca nhuaxanaguec ne'ena qauemaicpi maye ỹo'ot de'era qauem!»