2 Tesalonicenses 3

₁Qaq da pa'atec qara'aqtac, qami' qarqaỹa't, qanqouagaxauñiitaleguete qomi', yaqto' da la'aqtac So Qarataxala' maye sa'axataqtac saqaỹaloq da ivira 'enauac na shiỹaxauapi qataq yaqto' namayepi ỹaconeguet qataq ỹauotec 'ena'ama co'ollaxa qami'. ₂Nataqa'en qanqouagaxauñiitaleguete qomi' da ña qomi' qanca'alaxateeguesopa na shiỹaxauapi qauemaicpi maye na'aqchettac da ỹaỹamaqchiguiñi, cha'aye saishet da 'enauac da huo'o da lpi'iỹaxac So Jesucristo. ₃Qalaxaye So Qarataxala' Jesucristo maye sa ỹatenachet ca la'aqtac, qami' itaua'n da yaqto' qami' 'añaxaiqa, qataq qami' ntelaqna'agueta na sa ỹaỹamaxañisat. ₄Qaq sanaqtacot da qana'achecỹaxac So Qarataxala' Jesucristo, cha'aye saỹatenaqta da qami' qoquiito'ot da qauo'ocheetac nam qami' samaxasoxoleguete. ₅Huo'o da qaryaxa da So Qarataxala' qami' itauneque da ỹataqta qauauochec na laỹepi shiỹaxauapi, 'eeta'am Ñim Lo'onatac 'Enauacna da ỹauotec 'enauac namayepi, qataq da qami' ỹanema da qara'añaxaqui da yaqto' ishet da qauataiỹa'aguet 'enauac da qanque'eenaxaqui, qoñiita'am So Cristo da nala'aguet co'ollaxa na nque'eenaxacpi.

₆Qami' qarqaỹa't, qami' shenaqapegalo, cha'aye qomi' lamaxa'she So Qarataxala' Jesucristo, da saishet da qavi'enaxache da lataxac ca camachaqca qarqaỹa da saishet da do'onataxan, qataq lamaaxa da saishet da quetegue da qarapaxaguenataxanaxac maye qami' sanaxama. ₇Cha'aye qami' mashe qauaỹaañita da lataxac da achaalataxac qataq dam qarataxac maye qami' sachaxanaxalo. Co'ollaq qami' souaqta'agueta, qalaq saishet da sa so'onataxanaq, ₈qataq saishet da choche sacheguenaqtac ca aloq ñi 'oonolec da qoñiita da huo'otaq sa sesheetenaq. Nachaqrata da so'onataxanaqtac, ñasamaqtañi naua na'axa'te qataq naua pesa'ache, cha'aye sauoqtaique da saishet da huo'o ca ime'eguet da huetapegueto qomi'. ₉Na'aictaxa da qomi' huo'o da qara'amaqchec da qami' seỹaxanaxaiguilo da qomi' qautauañi', qalaxaye qomi' ñaconaxala't da so'onataxanaqtac, cha'aye sauoqtaique da qami' qoquiitelec da qarataxac. ₁₀Cha'aye co'ollaq qami' souaqta'agueta, qalaq qami' sanaxama de'era lataxac da ca shiỹaxaua da sa ỹaỹamaxaren da do'onataxan, qaq maye deque'ectoxo'. ₁₁Cha'aye qomi' sa'axasoqtapeguelec da huo'o da qoñiita na sa ỹaỹamaxaren da do'onataxan. Chaqrata da nalemaqte' da lle'emaxa. ₁₂Que'eca shiỹaxaua samaxasoxonaxalec qataq seqataxa, cha'aye qomi' lamaxa'she So Qarataxala' Jesucristo, da camaye ỹataqta do'onataxan, saqca ca taỹapigui lauel yaqto' ishet da nauec ca lhuenec qataq ỹaxaañi da sa ỹalemaxat na laỹepi.

₁₃Qami' qarqaỹa't, saisheto' qome da qanasamiiñi da qauo'ocheetac ca ỹaỹamaqchiguiñi. ₁₄Da huo'o ca 'oonolec da qoñiita da saishet da ỹalaxalec da qara'aqtac maye huetalec ana qorere, qaq camaye ỹataqta qauauattoñiita. Nache saishet da qavi'enaxache da lataxac, yaqto' camaye maiche na'aloxon. ₁₅Qalaxaye saishet da qanpa'aguenaxauai camaye. Chaqrata da ỹataqta qoñiỹapega, qaue'enaxachiitem ca qarqaỹai.

₁₆Qaq So Qarataxala' Jesús maye chegoqo'ot da nlagaxayec, Somaye qami' ỹanema qome da l-lagaxayec 'enauaque naua na'axa'te qataq, nache 'eetai' da qami' nnaictagueto.

₁₇Aỹem Pablo maiche ñema'ai' da shiyiñi da iquinaxanaxac. Qaq de'era, nache sheeta'ac 'enauac ana ỹerepi da ỹataqta ñanerelec. Qaq 'enaua naua ỹeraqa. ₁₈Qaq So Qarataxala' Jesucristo qami' ỹanema ca qana'achecỹaxaqui qataq ca no'on qoyecỹaxaqui. Aja', nache 'eetec de'era.