2 Timoteo 2

₁'Am ỹalec Timoteo, Ñim Lo'onatac 'Enauacna ỹataqta lta'araic da lauoche 'am, cha'aye 'aua'amaqten So Jesucristo. Qaq no'on da 'auỹaxanot Ñimaye da 'am ỹami' ca 'ara'añaxac da yaqto' 'anala'aguet 'enauac na chochena. ₂'Am 'aua'aqchigui nam sapaxagueeteguec na qalota shiỹaxauapi. Qaq nagui sauotaique da 'am 'auapaxaguenec ne'enapi na 'amqaanataxanaxaicpi cam ỹataqta 'arpe'et, da yaqto' sa nqalat da ỹapaxaguen ca lỹa.

₃Qaq 'am ỹataqta 'ana'añaxategueto' 'enauac na que'eenaxaguesat, 'aue'enaxatchiguio' ca laxaraic ale da 'am nale So Jesucristo. ₄Cha'aye ca ale da qaỹamaqtac, saishet da maiche ncoñera'aguet ca maiche lo'onataxanaxac, cha'aye mashe huetañot da lamaxasoxonaxac so huataxanaq lta'a. ₅Qaq nache 'ena'am ca ỹale da huo'otaq taua'a da qomitaxac, camaye saishet da nauec ca qanallettapigui da huo'otaq sa ipaguelec da ỹoqta lataxac da qomitaxac. ₆Nataqa'en ca ỹale da huetauga ca nanaxanaqa' da do'onataxaatac, camaye iuen da hua'auñi da ỹo'ot ca lanaxanaqa', qaq da ime, nache cheta'ague da ỹaconeguet ca alaỹaxac da lo'onataxanaxac. ₇'Auennataxaaleco' qome de'era sheetega, qaq So Qarataxala' 'am itauan da 'auaỹaten 'enauac de'era.

₈Saisheto' qome da 'aucoua'ai So Jesucristo maye chegoxoguet so nta'a David. Somaye Ñim Lo'onatac 'Enauacna nca'alaxatec co'ollaxa. Qaq 'era da na'aqtac maye chegaqaigui da nca'alaxa maye sa'axattapeguec. ₉Qaq nachera da huo'omshe huo'o da ñeque'eenaxac, choche sevitta'a da aỹem qaicoñettai', sheeta'am ca qalota na lasouaxashet. Qalaxaye da la'aqtac Ñim Lo'onatac 'Enauacna saishet da qaicoñettai'. ₁₀Ỹoqo'oye ña'añaxateguet na ỹotta'a't ñeque'eenaxacpi, yaqto' na lca'aguishecpi Ñim Lo'onatac 'Enauacna nca'alec, qataq ỹaconeguet da achaalataxac maye chochaq tatec, maye ỹachaxanapec So Cristo qataq Ñim Lo'onatac 'Enauacna.

₁₁Qaq de'era ỹataqta 'eesa:

₁₄Saishet da 'axaañi da 'auennataxanaxanec na shiỹaxauapi de'era sheetega yaqto' saishet da icoua'ai. Ỹataqta ỹauaachigui 'anqa'en Ñim Lo'onatac 'Enauacna da qonapega na 'amqaanataxanaxaicpi da saishet da ncotatega't, cha'aye de'era cotaxac, damaye saishet da huo'o ca ltaunaxanaxac, nachaqrata da na'aqchet nam na'axaỹaxaatega. ₁₅Ỹataqta 'ana'añaxato' qome yaqto' 'am ỹaỹamaxareeta Ñim Lo'onatac 'Enauacna, qoneta'am ca no'onataxanaxanec maye ỹataqta qaỹaỹamaxareeta, qataq qaica ca ncoqtaique. Nachaqrata da 'aloteueeguelo naua lataxaco ỹaỹamaqchiyiñi de'era na'aqtac maye 'eesa lataxac. ₁₆Qataq 'antela'agueto' nam ltaxaỹaxacpi nam saishet da ỹa'amaqten Ñim Lo'onatac 'Enauacna. Cha'aye naamaye ỹataqta qaica ca naigui. Cha'aye nam ltaxaỹaxac de'era, namayepi ỹataqta nquicta'aguet da ỹataqta qaica ca laỹamqa'. ₁₇Qataq naua qauema lapaxaguenataxanaxaco nquictraue'c, 'ena'am aca nhueta late'e. Qaq 'era da 'eeteque soua Himeneo qataq so Fileto. ₁₈Soomaye ilamaqraue'c, quera'ai da 'eesa lataxac, 'eetrega da na mashe ỹa'amaqten So Qarataxala', nache sa nauane' da qaltaq ileu. Qaq nachera da huo'omshe huo'o na isomapec na 'amqaanataxanaxaicpi. ₁₉Qalaxaye Ñim Lo'onatac 'Enauacna mashe lapaxañi so lo'oxonaxala' da lo'onataxanaxac maye qaica ca iraxanapec. Qaq somaye nanettalec so nerec, 'eeta': «Ñim Nataxala' ỹauatton ca mashe lalamaxat;» nataqa'en 'eeta': «'Enauac na ỹo'oxoren da le'enaxat Ñim Lo'onatac 'Enauacna, iuen da ỹaxaañi da ỹo'ottac na sa ỹaỹamaxañisat.»

₂₀Qaq ca nỹec maye lma' ca sallaxanec saishet da chaqcata ca nogoxoshet no'on maye chegaqaigui na oro, huo'otaq ca lcat plata da huetaigui. Nataqa'en huetaigui na chegaqaigui ana qo'oipaq qataq na 'alhua. Ne'ena nogoxoshetpi huo'o na taiguet da ño'oxoyec, qataq huo'o na taiguet da choche nhuenec lo'o. ₂₁Qaq nataqa'en qomi' da huo'o ca nshetaique da 'eco' nogoxoshet maye taiguet da ño'oxoyec, qataq nshetaique da qaiqui'itaxatta, qataq nshetaique da taiguet da lo'onataxanaxanec Ñim Nataxala', qaq camaye nale'en da iỹouec 'enauac na sa ỹaỹamaxañi, nache ỹataqta taiguet ca camachaqca no'onataxanaxac ỹaỹamaqchiguiñi.

₂₂Saishet da 'am ỹauectac da lqopitaxanaqtaic da 'annogotshec. 'Am mashe 'am nsoq, qaq ỹoqo'oye qoca'ai namayepi, nache 'analemaqte' da 'auo'ot ca ỹaỹamaqchiguiñi. Qataq 'anmitaique qome da 'eesa lataxac qataq da nsoxoyec qataq da nlagaxayec qataq 'auauaxaiguet 'enauac nam huesota da lquiyaqteỹaxac da ỹo'oxoreetac Ñim Lo'onatac 'Enauacna qataq pi'iỹa'a Ñimaye. ₂₃Qataq saisheto' da 'auqocha'a na cotaxacpi maye qaica ca naigui. Cha'aye nam ỹo'ottac de'era, nache saishet da nhuoona't. ₂₄Cha'aye ca lamaxashec Ñim Lo'onatac 'Enauacna saishet da quetaigui da lapetaxac. Nachaqrata da soxoraic, qataq ỹaỹaten da dapaxaguenataxan, qataq huo'o da lhualaxavic, ₂₅qataq huesotta da lataxac da nlaxanec ca depa'aguenataxaatac. Cha'aye saiuena'a da Ñim Lo'onatac 'Enauacna ishet da ỹami' camaye da naralaxat da lhuennataxac, qataq ỹami' da ỹaỹaten da 'eesa lataxac, ₂₆yaqto' ntouen, qataq ila'a da lqoinaxanaxac so pa'aguenataxanaxaic, nache ishet da dataueeguesop. Cha'aye nagui so pa'aguenataxanaxaic lcoñeteguishec namayepi qaltaq maiche ỹoiqueetac namayepi.