2 Timoteo 3

₁Nataqa'en 'auaỹateeta de'era qom mashe nayeeta'a ca loga'tna, nache nvildeuo caua na'axa'te ỹoqta huo'o da lqalai'c. ₂Huo'o qome na shiỹaxauapi na maiche nauoola't, qataq quetague' da lqopitaxanaqtaic ana anom. Nataqa'en huo'o qome na shiỹaxauapi ño'oxonnaxaic, 'eetega da ỹactec da la'amaqchec, saq 'ena'am na laỹepi. Saishet da huo'o ca 'enec naqa'en Ñim Lo'onatac 'Enauacna qataq saishet da ỹalaxaleguete caua yo'oqchiguilo lta'al, nachaqrata da qaica ca nmaatega qataq camachaqca ca isheuen. ₃Namayepi ỹataqta qauemaicpi qataq quiỹaxanaqtaqaicpi. Qataq ỹasaqteguelec da latenataxanaxac na laỹepi qataq saishet ncherapec qataq sa ỹañoxot da nllañi da lqopitaxanaqtaic. Qataq nquiỹa 'enauac nam ỹaỹamaqchiguiñi. ₄Namayepi saishet da qaipi'iỹa'a, cha'aye ne'ena ño'oxonnaxaicpi, namayepi saishet da deuennataxaalec da huo'o ye ỹo'ot. Qataq saishet da ỹalaxaguet Ñim Lo'onatac 'Enauacna, nachaqrata da ỹagaqchenapeguec da ỹo'ottac ca maiche 'eetapeguec. ₅Namayepi 'eetega ỹauotec qataq huo'o naq 'enec naqa'en Ñim Lo'onatac 'Enauacna, qalaxaye da lataxac npe'eneguet da ỹoqta lataxac da na'amqaanataxanaxac.

Qaq 'ena qome na 'antela'aguet. ₆Cha'aye namayepi, da lataxac taua'alo naua nma'ate da ỹatenachet ana 'alo maye 'oopai qataq 'etaxaloxoi maye saishet da nllañi da qauem lqopitaxanaqtaic, ₇qataq nshetaique da huo'o ca dalaxaic ỹaỹaten, qalaxaye saishet da ivireguet da ỹaỹaten da ỹoqta 'eesa lataxac. ₈Namayepi 'eeta'ama soua huo'o da no'onataxa'c Janes qataq so Jambres maye dataira'aguet co'olloxocheye so Moisés. Nataqa'en ne'ena shiỹaxauapi ỹataqta dataỹa'aguet da 'eesa lataxac maye na'aqtaguec Ñim Lo'onatac 'Enauacna. Namayepi mashe sotaq ỹaỹamaq da lauattonaxanaxac, qataq sa ỹaỹaten da llec da qaipi'iỹa'a Ñim Lo'onatac 'Enauacna. ₉Qalaxaye namayepi saqaỹa'ague qome da llecỹaxac, cha'aye saqaỹaloq da qaỹaỹaana'a't da qaica ca ỹaỹaanapec. 'Eeta'ama soua Janes qataq so Jambres.

₁₀Qalaxaye 'am Timoteo, mashe 'auaỹateeta da ỹapaxaguenataxanaxac, qataq da ỹataxac ỹaỹamaqchiguiñi, qataq dam sheetapeguec, qataq da ipi'iỹaxac, iualaxavic, isoxoyec, qataq da ña'añaxateguet 'enauac na chochena lqalaiguesat, ₁₁qataq da ñecanaguec, qataq da ñeque'eenaxac. Qataq mashe 'auaỹateeta 'enauac nam qauem aỹem qaỹo'otec co'ollaq soota'a ye nỹecpi ye Antioquía, qataq ye Iconio, qataq ye Listra. Ñeque'etaxangui 'enauac na ñecanaguecsat, qalaxaye So Qarataxala' aỹem nca'alaxateeguesop 'enauac de'era. ₁₂Qaq ỹataqta 'eesa da 'enauac na nshetaique da nañanot da quetague' So Cristo Jesús, nataqa'en nque'etaxangui qome da ncanaguec. ₁₃Qalaxaye na qauemaicpi qataq na tenataxanaxaicpi taỹañicra, nquicta'aguet 'enauac na sa ỹaỹamaxañisat. Namayepi datenataxaatac, qalaxaye nache 'ena'am natenatac.

₁₄Qalaxaye 'am, qoquetelco' da 'anapaxaguenataguec maye 'auaỹateeta da ỹoqta 'eesa. 'Am mashe 'auaỹateeta nam 'am ỹapaxaguenec de'era, ₁₅nataqa'en iuen da 'antoueeta'ac da co'ollaq ñaq 'am nogotolec, qaq nache 'eetai' da 'autaxaỹaxaata'ape naua ñiyigui'she la'aqtaqa Ñim Lo'onatac 'Enauacna, qaq naamaye nachenaua naua ivira'a naqa'en da 'am ỹaanaxanaxaic, da yaqto' 'auaỹaten da ỹoqta 'aupi'iỹa'a So Jesucristo, ime, nache 'anca'alec. ₁₆'Enauaque naua ñiyigui'she la'aqtaqa Ñim Lo'onatac 'Enauacna, naamaye ỹilyiñi naqa'en co'ollaxa so la'aqtaxanaxanecpi. Namayepi taiguet da qaỹapaxaguenataxanec, qataq da qaitaunaxanot da huo'o ca qaỹaỹamaxaañi nataxac, qataq da qaỹachaxan ca ỹoqta llec da achaalataxac, ₁₇yaqto' ca lamaxashec Ñim Lo'onatac 'Enauacna ỹataqta ỹaỹaten da lo'onataxanaxac qataq lhuotta da ỹo'ot ca ỹaỹamaqchiguiñi.