So Pedro qaltaq ỹe'eguelaxa so nỹecpi ye Jerusalén
1Soua Jesús lamaxa'she qataq so nqaỹañecpi maye netaña ye 'alhua Judea, somayepi co'ollaxa la'axaỹaxac da nataqa'en ỹaconeguet da la'aqtac Ñim Lo'onatac 'Enauacna na saishet da judiopi. 2Qaq so Pedro co'ollaq ỹe'eguelaxa ye nỹecpi ye Jerusalén, nache nam judiopi maye ỹa'amaqten So Jesús qataq quetague' da lataxac da qaỹauo'o ca na'anaxashet na lo'oc cam judío le'ec, quetapeguelec so Pedro. 3Nache 'eetego' somaye, 'eeta':
–¡'Am 'aupa'aigui na lma' na shiỹaxauapi maye saishet da judiopi, qataq ivira'a da 'arquia'axaua namayepi!
4Nache so Pedro ỹachegoxottot da ỹa'axat dam chegoqchiguiña 'enauac dam huaigui, 'eeta':
5–Aỹem soota'a co'ollaxa ye ñegaxasom ye Jope. Nache can ñeqouagaxaueetac, nache huo'o so ỹauanaqchec: aỹem sela'a so 'eeta'am na hualoq laỹe lta'araic chegoqo'ot na piguem, qoỹaxatta'a't naua cuatro ltelal. Nache choche nvittaña ye soota'a. 6Qaq co'ollaq ỹoqta selochigui, nache sela'a na shiguiỹacpi maye cuatro naua lapia'ate, huo'o na nlopi qataq na huauec, qataq na hualectapigui', qataq na maỹopi. 7Nache sa'aqchigui so la'aqtac Ñim Lo'onatac 'Enauacna aỹem 'enapega, 'eeta': «Pedro, qoñisheguem, 'auauo'o ca 'aualauat ne'enapi, nache qollec.» 8Qalaxaye aỹem shenapec: «'A'i, 'am Ỹataxala', cha'aye aỹem ỹataqta sa sauanapega da sachec cam qaỹamata'ac da nshepaxan da lataxac, huo'otaq cam sa qaishetapec da qanallec.» 9Qalaxaye Ñim Lo'onatac 'Enauacna aỹem 'enapega, 'eeta': «Da Aỹem ỹa'aqtac da ishet da qollec ne'ena shiguiỹacpi, nache saishet qome da 'auamata'ac da nshepaxan da lataxac.» 10Qaq se'eso na'aqtac tres da ỹe'eguelaxalec da aỹem 'enapega. Huaña, nache Ñim Lo'onatac 'Enauacna 'enauac ỹe'egueloqot naqa'en na piguem. 11Huaña, nache nvildeua'a ñi nỹec maye soota'a soua tres ỹale't. Soomaye namaxa'she, chegoqra'a ye nỹecpi ye Cesarea da aỹem ñe'egueera'a. 12Nache So Saqcha'a Na'añaxac Qui'itta aỹem ỹamaxaguelo soomaye da seca'ateguelo, saishet da huo'o ca shectega. Nataqa'en huo'oi ne'enaua ñenaictegueto seis qarqaỹa't. Nache 'enauac da sepa'axaigui ñi lma' so Cornelio. 13Nache somaye qomi' da'aqtaxaatrapeguema da 'eetec co'ollaq huaña so lma' da nauane' so namaxashec piguem le'ec, nache 'enapego', 'eeta': «'Auauo'oi qome caua 'auamaxaregue da Jope, da yaqto' ỹe'egueera'a ñi le'enaxat Simón, da lỹa le'enaxat Pedro. 14Qaq ñimaye qome 'am da'aqtaxanem da 'eetec, da yaqto' 'am 'anca'alec qataq 'enauac nam hueta'a na 'arma'.» 15Qaq co'ollaq aỹem sa'aqtaxaatac, nache anac So Saqcha'a Na'añaxac Qui'itta da tanguit 'enauac somayepi, 'eeta'am da 'eetec qomi' co'ollaq cheta'ague da qomi' qotanguita. 16Huaña, nache aỹem seuennate co'ollaxa da la'aqtac So Qarataxala' maye 'eeta': «'Eesa so Juan da dachelaxanataxana na 'etaxat, qalaxaye da qoñiita qome qami' qanachelaxanguilo So Saqcha'a Na'añaxac Qui'itta.» 17Qaq Ñim Lo'onatac 'Enauacna nataqa'en ỹanem namayepi da 'eeta'ama naqa'en qomi' maye sa'amaqtenaq So Qarataxala' Jesucristo, qaq aỹem saishet da huo'o ca ỹa'añaxac da sheeta'am Ñim Lo'onatac 'Enauacna, da sataỹa'aguet da huo'o ca ỹo'ot.
18Nache som nqaỹañecpi maye netaña ye Jerusalén, co'ollaq hua'axaỹa de'era, nache nañaxaañi da ltaxaỹaxac, nache ỹo'oxoreetac Ñim Lo'onatac 'Enauacna, 'eeta':
–¡Aja', qache nache 'eeteco' Ñim Lo'onatac 'Enauacna da nataqa'en ỹanem na saq judiopi, da yaqto' naralaxa't naua lhuennataxaco, qataq da huo'o da lca'alaxa maye chochaq tatec!
So 'amqaanataxanaxaicpi maye netaña ye nỹecpi ye Antioquía
19Qaq co'ollaq mashe qaỹalauat so Esteban, nache chegoqchiguiña da nataqa'en qaicanaxangui na laỹepi maye ỹa'amaqten So Jesús, nache namayepi datauec. Huo'o na taỹa ye 'alhua Fenicia, qataq añi ỹaqa'ata 'alhuole le'enaxat Chipre, qataq ye nỹecpi ye Antioquía. Huañalo ne'enaua 'aleu', nache qaỹa'axattac da no'on na'axaỹaxac, qalaxaye qandoxottec na judiopi, qaq na laỹepi shiỹaxauapi saishet da qaỹa'aqtaxanem. 20Qalaxaye huo'o na 'amqaanataxanaxaicpi maye chegaqa'ata añi ỹaqa'ata 'alhuole le'enaxat Chipre qataq ye nỹecpi ye Cirene na nvita ye nỹecpi ye Antioquía. Nache namayepi nataqa'en da'aqtaxanem nam saishet da judiopi, da ỹa'axatem dam no'on qara'axaỹaxac maye na'aqtaguec So Jesús maye Qarataxala'. 21Nache dam la'añaxac Ñim Lo'onatac 'Enauacna ỹataqta hueta'aguet namayepi, qaq ỹoqo'oye ỹataqta qalota na ỹaxanec da togoshec la'amqaanataxanaxac, nache ỹa'amaqten So Qarataxala'.
22Nache nam ỹa'amaqten So Jesús maye netaña ye nỹecpi ye Jerusalén, co'ollaq la'axaỹaxac de'era, nache qaỹamaq so Bernabé da taỹa ye nỹecpi ye Antioquía. 23Qaq so Bernabé maye no'on da lataxac qataq nlaqchigui da la'añaxac So Saqcha'a Na'añaxac Qui'itta, qataq nda'a't So Qarataxala' da lpi'iỹaxac. Somaye co'ollaq ivi', nache ila'a da lqouagaxanaqtaic Ñim Lo'onatac 'Enauacna da huetalec 'enauac so shiỹaxauapi. Nache somaye ỹataqta machiguiñi. Huaña, nache ỹataqta huaqattega 'enauac somayepi da yaqto' da lquiyaqteỹaxac sa dasheuec, chaqrata da ỹataqta quetegue So Qarataxala'. 24Cha'aye so Bernabé ỹataqta no'on da lataxac, qataq somaye nlaqchigui So Saqcha'a Na'añaxac Qui'itta qataq da lpi'iỹaxac. Qaq ỹoqo'oye ỹataqta qalota so dalaxaic shiỹaxauapi da quegue So Qarataxala'.
25Qaq co'ollaq ime de'era, nache so Bernabé taigue da Tarso da ỹe'eguena'a so Saulo. Qaq co'ollaq ỹanata somaye, nache nauega ye nỹecpi ye Antioquía. 26Nache neraña yemaye, ỹalectraigui na ỹa'amaqten So Jesús, ivi' so 'oonolec vi'i. Nache ỹataqta qalota na shiỹaxauapi na ỹapaxagueetrac. Qaq huaña ye Antioquía, nache cheta'ague da na ỹa'amaqten So Jesús qailonec da «nam quetague' So Cristo.»
27Qaq se'esoua na'axa'te huo'oi soua la'aqtaxanaxanaqa Ñim Lo'onatac 'Enauacna chegoqraña ye Jerusalén da nqo'oora ye nỹecpi ye Antioquía. 28Qaq huo'o so 'oonolec soomaye, le'enaxat Agabo. Somaye nachaañi co'ollaq huetaigui so nqaỹañecpi, nache So Saqcha'a Na'añaxac Qui'itta ỹa'aqtaxanaxanec somaye da huo'o qome ca lta'araic nqouaxa ana 'alhua. Qaq de'era la'aqtaxanaxac ipacchigui, huetoiguilo soua vi'iye co'ollaq lta'a na nta'alpi ye Roma so le'enaxat Claudio. 29Nache nam 'amqaanataxanaxaicpi maye netaña ye Antioquía detaxaỹapigui da ỹauo'o aca ltaunaxanaqte da ỹamaxa so 'amqaanataxanaxaicpi maye netaña ye 'alhua Judea. Qalaxaye ñi 'oonolec ỹan cam nalota'ai' da ỹan. 30Qaq 'era da 'eetec somayepi da ỹamaq aso lachetaqtaxanaqte, da ỹamaxa so lataxala'pi na 'amqaanataxanaxaicpi maye netaña ye 'alhua Judea, iroi' naqa'en so Bernabé qataq so Saulo.
