Qaỹalauat so Santiago qataq qaicoñerai' so Pedro
1Qaq se'eso na'a'q, nache so nta'a Herodes Agripa, maye ilotague' na judiopi, damaxasoxoolec da qaỹaconeua'a qataq sa qaiyacnapec na ỹa'amaqten So Jesús. 2Nache qaỹalauat so Santiago som lqaỹa so Juan, qairolec na ỹeelonec. 3Qaq somaye co'ollaq ila'a da na judiopi ỹataqta ỹaỹamaxareeta de'era, nache nataqa'en damaxasoxoolec da qaicoñe' so Pedro. Qaq de'era nache huetoiguilo soua na'axa'te da qanallec ana nauole 'ayiiña maye qaca aca lalecte maye ỹasheeraxachigui. 4Qaq co'ollaq mashe qaỹaconeua'a so Pedro, nache so Herodes ỹanaigui somaye aso ncoñetaxanaxaqui. Nache nauaatalec naqa'en so dieciséis huataxanaqpi, cuatro naqa'en naua huaxaỹapega't, cha'aye somaye ỹauotaique da qom ime so naponaxac le'enaxat Lapascua, nache nqatec so Pedro da ỹachaxana 'enauac na shiỹaxauapi da ỹalauat. 5Qaq ỹoqo'oye so Pedro netaigui aso ncoñetaxanaxaqui ỹataqta qanauaatalec. Qalaxaye na 'amqaanataxanaxaicpi ỹataqta huo'o da la'añaxac da queto'ot da nqouagaxaueetacot Ñim Lo'onatac 'Enauacna, da nqouagaxaueetapeguelec somaye.
Ñim Lo'onatac 'Enauacna huesoueeguesop naqa'en aso ncoñetaxanaxaqui so Pedro
6Qaq se'eso pe maye pa'aiguet se'eso na'a'q maye so Herodes huotaique da nqatec so Pedro da ỹachaxana na shiỹaxauapi. Nache so Pedro do'ocheto', huetanguilo soua dos huataxanaq lashe', qaicoñetta'aque soua dos lque'ete. Qaq soua lỹa't huataxanaq lashe' nauaata'ape so lasom aso ncoñetaxanaxaqui. 7Nache nque'elaxatta da nachatteuo so lamaxashec Ñim Lo'onatac 'Enauacna, nache ỹataqta yo'oqchiguiñi naqa'en na pa'auo aso ncoñetaxanaxaqui. Nache som namaxashec ỹa'areua'a na laỹe so Pedro da nquetoxon. Nache 'enapego', 'eeta':
–Qoñisheguem, 'anque'emgue.
Nache soua lque'ete naua lhua'q so Pedro ñere'c. 8Nache so namaxashec 'enapego' somaye, 'eeta':
–'Aỹa'aañi na 'ansaataxaqui, qataq 'aỹa'aayiñi naua 'arapela'ate.
Nache so Pedro naỹamaxat, nache so namaxashec 'enapego' somaye, 'eeta':
–'Anapogoña na 'arpo', nache aỹem 'auca'atteueegue.
9Nache so Pedro huenoxonec, ca'atteueegue so namaxashec. Qalaxaye sa ỹaỹaten da ỹoqta 'eesa de'era, huo'otaq da choche lchoxonaxac. 10Qalaxaye co'ollaq napacralec caua hua'auchiyiñi nauanaxanaxanaqa qataq jec, napactaleguete caua lỹa't, choche ivittrauga so lasom maye ima'a't lcat maye pa'aiguet so nqa'aic. Nache se'eso lasom maiche nauatoigui, nache inoxoore'c, nache je'c. Qaq co'ollaq napacralec ca 'oonolec nqa'aic, nache so namaxashec piguem le'ec ca'ai somaye da ndoqteetec. 11Huaña, nache so Pedro cheta'ague da ỹoqta ỹa'amaqten de'era. Nache 'enapeco':
–Nagui saỹaten da qache ỹoqta 'eesa de'era, da Ñim Nataxala' namaq so lamaxashec da aỹem nca'alaxateeguesop ñi Herodes qataq 'enauac dam nshetaique da aỹem ỹo'otec nam judiopi.
12Qaq tatapigui lauel de'era so Pedro, nache nqo'ona ca lma' aso María maye late'e so Juan, da lỹa le'enaxat Marcos. Qaq somaye nache hueta'a so qalota shiỹaxauapi lapoota'a't, nqouagaxaueetac. 13Qaq somaye co'ollaq iuaxaatapegueua'a so lasom som qasoxoc, nache huo'o aso qa'añole, le'enaxat Rode, npa'auga da choche nalleuga da negue't so deỹaxaatac. 14Nache co'ollaq ỹauatto'n naua la'aqtaqa so Pedro, nache saishet da ỹauatoigui so lasom, cha'aye ỹataqta ỹaguec da ntonaxac. Nache nqalgaqaua'a ca pa'auo da da'aqtaxanem som laỹepi da so Pedro hueta'a so lasom. 15Nache qoỹeetego' asomaye, qoỹeeta':
–¡Ỹoqta huo'o da 'oic peta'a!
Qalaxaye asomaye ỹoqta 'eesa naqa'en da nacheso. Qalaxaye somayepi 'enapeco':
–¡'A'i, saishet da nachera; souaxai' nachera da nhuataxaua namaxashec piguem le'ec!
16Qalaxaye so Pedro lamaaxa iuaxaatapegueua'a so lasom. Qaq co'ollaq qaỹauatoigui so lasom, nache qailauga somaye, nache ỹataqta ỹe'elaqchet somayepi. 17Qalaxaye somaye ỹauota'a na lhuaq da nhuogaxa somayepi da de'enaxaatai'. Ime, nache ỹa'axat da 'eetec Ñim Lo'onatac 'Enauacna da nqateeguesop somaye añi ncoñetaxanaxaqui. Ime, nache 'enapego' somayepi, 'eeta':
–Qaua'axachem qome 'enauac de'era ca Santiago qataq 'enauac na qarqaỹañicpi.
Ime, nache ncoyeguene' somayepi, nache jec da taỹa ca laỹepi nỹecpi.
18Qaq co'ollaq mashe yo'oxoñi, nache huo'o so lta'araic ncotaxac so huataxanaqpi. Qalaxaye qaica ca ỹaỹaten de'era maye qanayeuaigui, nda'a't da nnatteguela't ñi 'oonolec da chaq hueta'ague so Pedro. 19Nache so nta'a Herodes Agripa damaxasoxoolec da qanmitaique so Pedro. Qalaxaye somayepi saishet da ỹanata. Qaq ỹoqo'oye so Herodes ỹasaxalec da lasouaxashet som huataxanaqpi, nache damaxasoxoolec da qaỹalauat somayepi. Qaq co'ollaq ime de'era, nache so Herodes ca'ai ye 'alhua Judea, nache taỹa ye nỹecpi ye Cesarea, nache huo'oi soua na'axa'te da hueta'a.
Da l-leuaxa so Herodes Agripa
20So Herodes ỹataqta dalemataỹa nam shiỹaxauapi maye netaña ye ñegaxasom le'enaxat Tiro qataq ye Sidón. Qaq ỹoqo'oye huaxaỹapega't so shiỹaxauapi maye lma' se'esoua ñegaxasom da qaitaxaỹapegue' so Blasto, som lmala' ana alom som nta'a da yaqto' qanmitaique ca lataxac da qaica camachaqca, cha'aye yi'iye 'alhua deuaqto'ot so Herodes da ỹachegoxottacot nam lhuenec. 21Nache so Herodes ỹauo'o so na'a'q maye laloqnec da anac naqa'en so shiỹaxauapi. Qaq co'ollaq ivita se'eso na'a'q, nache somaye ỹaayiñi soua alogo maye lataxau' da lo'onataxanaxac da nta'a, nache nso'ongui aso nso'onaxaqui, ỹataqta nlaqchigui da ño'oxonnaxac, nache ỹauo'o so ltaxaỹaxac. 22Nache na shiỹaxauapi ỹa'alaqtagui, 'eeta':
–¡Ñi'iñi Herodes da lataxac da ltaxaỹaxac saishet da choche shiỹaxaua, damaye 'eeta'am da lataxac ca chegaqasheguem piguem le'ec maye 'añaxaic!
23Nache saqaỹaloq da anac so lamaxashec Ñim Lo'onatac 'Enauacna, nache ique'emaqchet so Herodes, cha'aye somaye ipi'itaxaatega da 'eeta'am da lataxac Ñim Lo'onatac 'Enauacna. Nache qaỹata'ague, nache ileu. Ilem na qoche'l maye chectac na lauel somaye.
24Qalaxaye nam quetague' So Jesús, nache queto'ot da ỹa'axattac da la'aqtaxanaxac Ñim Lo'onatac 'Enauacna.
25Qaq so Bernabé qataq so Saulo co'ollaq ima't da ỹaareuo aso nachetaqtaxanaqte, nache ỹe'eguela'q chegoqchiyiña ye nỹecpi ye Jerusalén. Qaq nnaictagueto so Juan, da lỹa le'enaxat Marcos da taregue da Antioquía.
