So Pablo hueta'a ye nỹecpi Corinto
1Qaq co'ollaq ime de'era, nache so Pablo ca'ai ye nỹecpi ye Atenas da taỹa ye nỹecpi ye Corinto. 2Qaq huaña yemaye, nache natena'aguet so judío le'ec le'enaxat Aquila. Somaye lma' co'ollaxa ye 'alhua le'enaxat Ponto. Qaq se'eso Aquila qataq aso lhua Priscila ñaq cha'aguelo da nvi't, chegoqtra'a ye 'alhua Italia. Quera'ai yemaye, cha'aye so lta'a na nta'alpi le'enaxat Claudio 'enapega 'enauac na judiopi da ca'ai ye 'alhua Roma. Nache so Pablo namaqtegalo' soomaye, 3cha'aye nache 'eeta'ama da lo'onataxanaxa'c da ỹo'ottrac na npe'l, nache na'asopa soomaye da lo'onataxanaxau'. 4Qaq naxa da iviteuga ye na'a'q mataxaqui, nache so Pablo taua'a aca napaxaguenaxaqui na judiopi, nache da'aqtaxaatapeguem namayepi, nataqa'en nam Grecia le'ecpi, da yaqto' da'amqaanataxan naqa'en.
5Qaq co'ollaq nvilye' so Silas qataq so Timoteo, chegoqra'a ye 'alhua Macedonia, nache so Pablo ỹataqta nalemaqteguet da ỹa'axattac da la'aqtac Ñim Lo'onatac 'Enauacna, da ỹataqta da'aqtaxaatem na judiopi da So Jesús, Somaye nacheso So Lca'aguishec Ñim Lo'onatac 'Enauacna maye qaiuattaique. 6Qalaxaye somayepi ỹataqta ncotatague' somaye qataq isheueetac, nache so Pablo ichego'q soua alogo, cha'aye damaye la'anaxat da jec. Nache 'enapego' somayepi, 'eeta':
–Ñim Lo'onatac 'Enauacna da ỹauo'o ca qanhuaxanaguiiqui, nache qami' maiche qarasouaxashechi; saishet da ỹasouaxashet. Qaq nache chegoqchiguiña ne'ena na'a'q da sa'aqtaxanem nam saishet da judiopi.
7Nache ca'ai aso napaxaguenaxaqui na judiopi, nache taỹa ca lma' so ỹale le'enaxat Ticio Justo. Somaye quetague' Ñim Lo'onatac 'Enauacna qataq nache saqaỹapeque ca lma' aso napaxaguenaxaqui na judiopi. 8Qaq so Crispo maye ilotague' aso paxaguenaxaqui, somaye qataq 'enauac som netaña ye lma' ỹa'amaqten So Qarataxala' Jesús. Nataqa'en qalota nam shiỹaxauapi maye lma' ye nỹecpi ye Corinto, co'ollaq hua'axaỹa da la'aqtaxanaxac so Pablo, nache da'amqaanataxan, nache 'enauac qanachelaxan. 9Qaq huo'o so pe, nache So Qarataxala' 'enapego' so Pablo co'ollaq huaigui so lo'ochaxa, 'eeta':
–Saishet da 'añe'etac, nache qoqueto'ot da 'ara'aqtaxanaxac, saishet da 'anañaxaañi. 10Cha'aye Aỹem 'am soota'aguet, qaq saishet qome da huo'o ca 'am ỹaconeua'a da huo'o ca 'am ỹo'otec. Cha'aye ỹataqta qalota na shiỹaxauapi na netaña ne'ena nỹecpi na ỹalamaxatpi.
11Nache so Pablo naña ye nỹecpi ye Corinto so 'oonolec vi'i qataq so laiñi so lỹa vi'i da ỹapaxagueetapeguec somayepi da la'aqtac Ñim Lo'onatac 'Enauacna.
12Qalaxaye so na'a'q co'ollaq lta'a nam netaña ye 'alhua Acaya so le'enaxat Galión, nache na judiopi maye lma' ye Corinto, huaxaỹa't da qanpa'aguena so Pablo. Nache qaỹaconeua'a somaye da qaỹauegueua'a aca lo'onataxanaxaqui so nta'a da yaqto' qanmit. 13Nache qoỹenapego' so nta'a, qoỹeeta':
–De'era ỹale, damaye quetapegueua'a na shiỹaxauapi, da yaqto' natamnot naqa'en Ñim Lo'onatac 'Enauacna, qalaxaye dam lataxac da ño'oxonnataxanaxac ỹataqta npe'eneguet na maiche qanqataxacpi.
14Qaq co'ollaq mashe huotaique da detaqa so Pablo, nache so nta'a Galión 'enapego' so judiopi, 'eeta':
–Qami' judiopi, da huo'otaq aỹem qandoiua'a ca negue'tca cotaxac, huo'otaq lta'araic nasouaxashet, nache aỹemctaxa ishet da ñeualaxaune' da qami' ña'axaỹaxanalo. 15Qalaxaye de'era aỹem qandoiua'a nagui ye choche na'aqtac dam qancotaitapigui, qataq dam ne'enaxat, qataq nam maiche qanqataxaqui maye qami' qoỹanema co'ollaxa, qaq ỹoqo'oye no'on da maiche qauo'oche ca lataxac. Aỹem saishet da saỹapegueua'a da so'ot ca lataxac damaye.
16Nache so Galión damaxasoxoolec da ỹamaqauec somayepi aso lo'onataxanaxaqui. 17Nache huo'o so judiopi da ỹaconeua'a so Sóstenes som ilotague' aca paxaguenaxaqui, nache ỹataqta iuaxaatac, ỹauaachigui naqa'en so nta'a Galión. Qalaxaye somaye saishet da iqochetega de'era.
So Pablo ỹe'eguelaxague da Antioquía
18Nache so Pablo ỹataqta huo'oi soua na'axa'te da hueta'a ye nỹecpi ye Corinto. Qaq co'ollaq ime, nache somaye ncoyeguene' so nqaỹañecpi, nache huenoteua'a aso notaxaqui maye quiguingui na 'etaxat da nqo'ona ye 'alhua Siria, lỹatac so Aquila qataq aso Priscila. Qaq somaye co'ollaq yaqta'a da ca'ai ye ñegaxasom Cencrea da huenoteuo, nache npetec na laue ỹataqta nmatta, cha'aye mashe ipacchigui cam la'aqtac maye ỹan co'olloxocheye. 19Qaq co'ollaq ivitra ye nỹecpi ye Éfeso, nache so Pablo no'onaxatañi aso Priscila qataq so lhua Aquila, nache taua'a aso napaxaguenaxaqui na judiopi, nache na'aqtaxaatague' 'enauac so lapoota'a't judiopi. 20Nache somayepi nachoxoreetacot so Pablo da ñaq cara'ac hua'a, qalaxaye somaye saishet da ỹaỹamaxaren. 21Chaqrata da ncoyeguene' somayepi da jec. Nache 'eetega, 'eeta':
–Aỹem huo'o da iyaxa da saỹa ye nỹecpi ye Jerusalén, da yaqto' salectauo na naponaxac maye nayeetauo. Qalaxaye huo'o qome ca na'a'q da aỹem qaltaq qami' ñe'eguelaxalo, qom huo'otaq aỹem ỹanem ca ỹecỹaxac Ñim Lo'onatac 'Enauacna.
Nache somaye huenoteuo, chegoqchiguiña ye nỹecpi ye Éfeso. 22Nache co'ollaq ivita ye nỹecpi ye Cesarea, nache so Pablo taỹa ye Jerusalén da dequinaxana so 'amqaanataxanaxaicpi. Qaq co'ollaq ime, nache taỹa ye nỹecpi ye Antioquía. 23Qaq co'ollaq mashe huo'oi soua na'axa'te da hueta'a yemaye, nache qaltaq inoxonec, quetaguilo yeua 'aleu' Galacia qataq ye Frigia, da ỹa'añaqchettac 'enauac na 'amqaanataxanaxaicpi.
So Apolo ỹa'axattac da no'on na'axaỹaxac hueta'a ye Éfeso
24Qaq se'esoua na'axa'te nache nvita ye nỹecpi ye Éfeso so judío le'ec le'enaxat Apolo. Somaye lañoqo' ye 'alhua Alejandría, qaq somaye ỹataqta ỹaỹaten da la'aqtaxanaxac, qataq ỹataqta ỹaỹate'n naua lleco naua nanettrañi la'aqtaqa Ñim Lo'onatac 'Enauacna. 25Qataq ỹataqta ỹaỹaten da llecỹaxac da lo'onataxanaxac So Qarataxala', nache da dapaxaguenataxaatac qalaq ỹataqta huo'o da lhuogoxo da ỹa'axattegue da na'aqtaguec So Jesús. Qaq na'aictaxa da ndotec da lachelaxanataxanaxac so Juan da ỹaỹaten da dapaxaguenataxanec. 26Nache so Apolo co'ollaq huaigui aca napaxaguenaxaqui na judiopi, nache da'aqtaxaatac, qaica ca ñe'etaique. Qalaxaye co'ollaq na'axaỹaxaategalo somaye aso Priscila qataq so Aquila, nache qandoxottec da qaỹauec, nache ỹataqta qaỹa'aqtaxaatem da llecỹaxac da lo'onataxanaxac Ñim Lo'onatac 'Enauacna. 27Nache so Apolo co'ollaq huo'o da lyaxa da taitague da 'alhua Acaya, nache so nqaỹañecpi itauan somaye da ỹa'añaqchet, nache qaỹauo'o aso nere, qaỹamaxa so 'amqaanataxanaxaicpi maye naña yi'iye 'alhua da ỹataqta qailo'oguet somaye. Nache somaye co'ollaq ivita ye 'alhua Acaya, nache ỹataqta lta'araic da ltaunaxanaxac da itauaatac nam ỹa'amaqten So Jesús, chegoqchigui da lqouagaxanaqtaic Ñim Lo'onatac 'Enauacna. 28So Apolo ỹataqta ncotatague' so judiopi maye sa ỹa'amaqten So Jesús, nache ỹaconalo naua nanettrañi ñiyigui'she na'aqtaqa da ỹa'axattac da So Jesús da nacheso So Lca'aguishec Ñim Lo'onatac 'Enauacna.
