Da lviraxac So Saqcha'a Na'añaxac Qui'itta
1Qaq co'ollaq ivita so na'a'q, le'enaxat Pentecostés, nache 'enauac nam ỹa'amaqten So Jesús lapoota'a't, 'oonolec ca qanayeeta'a. 2Nache nque'elaxatta da qaỹa'axaỹa so lta'araic nllimiaxa, chemqot na piguem, 'eeta'am da l-lamaxa na lta'araic la'at, ỹataqta iqaqñigui cam nỹec maye qanayeetaigui. 3Huaña, nache qaila'a so 'eeta'am na le'eraxa na norec, da netalec ñi 'oonolec somayepi. 4Nache 'enauac somayepi ỹataqta nlaqchigui So Saqcha'a Na'añaxac Qui'itta. Huaña, nache da'aqtaxanguilo naua ỹaqa'alo na'aqtaqa maye chegoqo'oto Somaye.
5Qaq se'eso na'a'q ye Jerusalén hueta'a na judiopi maye ỹa'amaqteetac Ñim Lo'onatac 'Enauacna. Namayepi chegaqa'alo naua ỹotta'a't 'aleu' maye nataqa'en ilotague' na Roma le'ecpi. 6Nache co'ollaq qaỹa'axaỹa se'eso nllimiaxa, nache lapona't 'enauac so shiỹaxauapi, nache ỹataqta sa ỹaỹaten ca 'eetec souaxat da ñi 'oonolec hua'aqtega da qaỹa'aqtaxaatapiguilo naua maiche la'aqtaqa. 7Nache ỹataqta huo'o da la'aalaxa qataq da le'elaxa, nache maiche detaqtega't, 'eeta':
–¿Saisheto' peta'a da 'enauac ne'ena detaqtacpi da lma' ye 'alhua Galilea? 8Qaq ¿ca 'eeteco' ye qomi' sa'axasoqtegalo naua maiche qaralamaqa'ate qara'aqtaqa da da'aqtaxaatapiguilo? 9Ye qomi' huo'o nam chegaqa'a ye 'alhua Partia, qataq ye Media, qataq ye Elam, qataq ye Mesopotamia, qataq ye Judea, qataq ye Capadocia, qataq ye Ponto, qataq ye 'alhua Asia, 10qataq ye Frigia, qataq ye Panfilia, qataq ye Egipto, qataq dam laỹe ye nỹecpi ye Cirene maye na'ague da sheu' yem 'alhua África. Nataqa'en huo'o na chegaqa'a ye nỹecpi ye Roma maye hueta'a ne'ena, qaq namayepi huo'o na chegoqteuo da judío llalec, qataq huo'o na saishet da judío le'ec, qalaxaye quegue da la'amqaanataxanaxac namayepi. 11Qataq huo'o nataqa'en na chegaqa'ata añi ỹaqa'ata 'alhuole le'enaxat Creta, qataq huo'o na chegaqa'a ye 'alhua Arabia. Qalaxaye 'enauac da shenaqta sa'axasoqtega da qaỹa'axattac nam qaica ca 'ena'am ỹo'otpi Ñim Lo'onatac 'Enauacna da qaỹa'aqtaxaatapoiguilo naua maiche qara'aqtaqa.
12Qaq 'enauac somayepi ỹataqta huo'o da la'aalaxa qataq sa ỹaỹaten ca 'eetec da lhuennataxa. Nache maiche nnattega't, 'eeta':
–¿Chaq 'eetec ca naigui 'enauac de'era?
13Qalaxaye huo'o na laỹepi na ỹe'eetac somayepi, 'eeta':
–Namayepi souaxai' choche taxaicpi.
Da ltaxaỹaxac so Pedro co'ollaq da'aqtaxanem so shiỹaxauapi
14Nache so Pedro nachaañi, nataqa'en soua lỹa't once namaxa'she, nache somaye ỹataqta na'axanneque naua la'aqtaqa co'ollaq detaqa, 'eeta':
–Qami' Judea le'ecpi qataq 'enauac nam netaña na Jerusalén, ñeshetaique da qami' qauaỹaañi de'era. Qaq no'on da qana'axaỹaxañiichigui de'era ỹa'aqtac. 15Ne'ena shiỹaxauapi saishet da taxaicpi. Saishet da nachera da qarhuennataqai, cha'aye ñaq cheta'ague da qaỹatasheguemgue añi nala'. 16Cha'aye de'era qauauañiichigui nagui, damaye nachera dam ỹa'axata'aguet co'ollaxa so la'aqtaxanaxanec Ñim Lo'onatac 'Enauacna, le'enaxat Joel, co'ollaq ỹa'axat da 'eeta':
17Ñim Lo'onatac 'Enauacna 'enapec:
Caua pa'atre'c na'axa'te,
nache Aỹem ñanacot Ñim Saqcha'a Ỹa'añaxac
da sanem 'enauac na shiỹaxauapi;
nache na ỹalleppi qataq na 'alpi,
ỹa'axa't qome naua ỹa'aqtaqa,
qaq na nsoxoppi huo'oi naua lauanaqcheco
chegoqo'oto Ñim Lo'onatac 'Enauacna,
qataq na ỹa'axaiquipi huo'oi naua lchoxonaxaco.
18Que'ecaua na'axa'te, nache Aỹem ñanacot
qome Ñim Saqcha'a Ỹa'añaxac,
nache sanem na ilatacpi qataq ana ilatapi.
Huaña qome,
nache ỹa'axa't naua ỹa'aqtaqa.
19Qataq na piguem huo'ot ñaqa'en ca
sachaxan ca ishet da ỹo'ot da na'aalaxa,
qaq ana 'alhua sauo'o na na'anecpi:
ntago'q, norec,
nchaxa lta'araic.
20'Om añi nala',
ñi ca'agoxoic qalaq 'eeta'am na ntago'q,
qom yaqta'a da ivita ca na'a'q maye
lviraxaqui Ñim Nataxala'.
Que'eca na'a'q ỹataqta qaica ca 'ena'am da
la'amaqchec qataq da llo'oxoyec.
21Huaña qome, nache 'enauac nam
iỹaxaatega da le'enaxat Ñim Nataxala',
namayepi qanca'alaxatec.
22Qaq ỹoqo'oye qami' Israel le'ecpi, qana'axaỹaxañiỹa da ỹa'aqtac, 'eeta': So Jesús maye Nazaret le'ec, Somaye ỹataqta qaỹaỹateeta da 'eesa lamaxashec Ñim Lo'onatac 'Enauacna. Qaq qami' qauauañiichigui co'ollaq Somaye ỹo'ot nam ỹo'ot da na'aalaxa qataq nam sa qaỹauanapega qataq nam na'anecpi maye qami' huanguilo da ỹo'ot naqa'en Somaye Ñim Lo'onatac 'Enauacna. Qaq qami' mashe sogote da qauaỹaañita damaye. 23Qaq nache 'eetai' da Ñimaye lhuennataxac da So Jesús huo'o da nque'eenaxac qataq qoỹaneua'a na npa'aguenaxauapi. Qami' qaucoñiye Somaye qataq qaỹa'añiiua'a na Roma le'ecpi da yaqto' ỹalauat. 24Qalaxaye Ñim Lo'onatac 'Enauacna qaltaq nca'alaxatec Somaye, nca'alaxateeguesop da la'añaxac da nleuaxa, cha'aye da nleuaxa qaica ca la'añaxac da nllañi Somaye. 25Qaq so nta'a David nataqa'en ỹa'axata'a co'ollaxa So Jesús, 'eeta':
Aỹem nache 'eetai' da 'am soota'aguet;
da qouetaua'a na ỹaỹe,
nache qaica ca ishet da Aỹem nqaañi.
26Qaq ỹoqo'oye ỹataqta nlaqchigui añi
iquiyaqte da ñetonaxac,
qataq naua ỹa'aqtaqa ndotec da
ỹamaicỹaxac da setaqa.
Ỹoqo'oye nataqa'en da ỹo'ocỹaxac da ivita da nmatec,
qalaq qaica ca ñe'etaique.
27Cha'aye 'am saishet da Aỹem 'aualataña
cam laponqa' na leuaxaicpi,
qataq saishet da 'auasheetem da
nlaguiñi da lo'ocỹaxac nam 'aramaxashec maye 'arauotaxat.
28Qataq Aỹem 'auachaxana so
nqa'aic maye taỹa'a da nca'alaxa,
qataq ỹataqta Aỹem nlaqchigui da ñetonaxac,
cha'aye Aỹem qoueta'aguet.
29Qami' ỹaqaỹa't, qami' qauaỹaañita da so hua'au qarta'a David, somaye co'ollaq ileu, nache qailareñi, qaq nagui ña seloqta'a añi nhuachiqui da ñaq huo'o. 30Qalaxaye so David ye la'aqtaxanaxanec Ñim Lo'onatac 'Enauacna. Nache somaye ỹaỹaten da Ñim Lo'onatac 'Enauacna ỹachaxanapecot somaye da chegoxoguet qome ca lta'a na Israel le'ecpi. 31Qaq so David ỹaỹaten da Ñim Lo'onatac 'Enauacna ipacchigui da ỹachaxanapec. Qaq ỹoqo'oye 'enapec da que'eca Lca'aguishec Ñimaye saishet da ileu, chaqrata da qaltaq ỹe'eguelaxalec da nca'alec. 32Qaq ỹoqo'oye Ñim Lo'onatac 'Enauacna qaltaq nca'alec naqa'en So Jesús. Qaq de'era 'enauac da shenaqta sauanaqchigui. 33Qaq ỹoqo'oye Ñim Lo'onatac 'Enauacna ỹacoosop da ỹaueegue da piguem, nache ỹana'ague da aloic. Huaña, nache Somaye ỹaconeguet So Saqcha'a Na'añaxac Qui'itta maye ỹachaxanapeguem co'ollaxa Ñim Lta'a da ỹanem Somaye. Ime, nache Somaye qomi' ỹanema se'eso Saqcha'a Na'añaxac Qui'itta maye nataqa'en qomi' ỹachaxanapecoto co'ollaxa. Qaq nachera de'era qauloitagui qataq qaua'aqaitega nagui. 34Saỹaanaq da so David saishet da nacheso so taigue da piguem. Cha'aye somaye 'enapeco':
Ñim Lo'onatac 'Enauacna,
'enapega Ñim Ỹataxala' maye Lca'aguishec, 'eeta':
«'Anso'oota'ague qome da aỹoic,
35choche ivitta'a qome da sacho'oto naua
'arapia'ate nam 'am ipa'agueetacpi.»
36Ỹoqo'oye qami', Israel le'ecpi, iuen da ỹataqta qauaỹaañita de'era, da So Jesús maye qami' qauaxañiiuo co'ollaxa, nacheso so ỹanagui Ñim Lo'onatac 'Enauacna da Qarataxala' qataq Lca'aguishec Ñimaye.
37Nache so shiỹaxauapi co'ollaq hua'axaỹa de'era, nache ỹataqta daỹalli' naua lquiyaqte. Nache qainattac so Pedro qataq soua lỹa't namaxa'she, qoỹeeta':
–Qami' qarqaỹa't, qaq nagui ¿chaq hua'ague ca shenaqtec?
38Nache so Pedro 'enapego' somayepi, 'eeta':
–Qomye qauỹaxañiỹot Ñim Lo'onatac 'Enauacna da qami' ichoxore'n qataq qavi'eguelaqaỹot da qaualaqaiguet Ñimaye qataq qauaqaita'a da qami' ñachelaxanaxaguilo da le'enaxat So Jesucristo. Yaqto' Ñim Lo'onatac 'Enauacna ỹapalaxa't naua qarasouaxashe'echilli' qataq qami' ỹanema So Saqcha'a Na'añaxac Qui'itta. 39Cha'aye de'era qaỹachaxanapec co'ollaxa, damaye qaralamaxache, nataqa'en nam qaỹa'alquipi, qataq 'enauac na laỹepi shiỹaxauapi. Cha'aye damaye qaỹauotaique da taỹot 'enauac nam iỹaxaneuga Ñim Lo'onatac 'Enauacna maye Qarataxala'.
40Qaq 'era da la'aqtaxanaxac so Pedro. Qataq huo'o na laỹepi la'aqtaxanaxac da huaqattega somayepi, 'eeta':
–Qananeltaxañeeguet ca nhuaxanaguec ne'ena shiỹaxauapi maye taỹa'a da deqat, yaqto' qarca'alliiuec.
41Huaña, nache nam ỹalaxaguet da la'aqtaxanaxac so Pedro, nache qanachelaxan. Nache se'eso na'a'q nquiguec nam ỹa'amaqten So Jesús, qaq ivi' ye tres mil so shiỹaxauapi maye ỹa'amaqten da la'aqtaxanaxac somaye. 42Qaq 'enauac somayepi ỹataqta queteguelo naua lapaxaguenataxanaxaco se'esoua namaxa'she, qataq ỹataqta nhuoteeta't, qataq nqouagaxaueetac, qataq da deque'e, qalaq 'enauac ima'a't.
Da lataxac so hua'auchiguiñi 'amqaanataxanaxaicpi
43Qaq 'enauac na shiỹaxauapi ỹataqta huo'o da la'aalaxa, cha'aye soua namaxa'she qalota na ỹo'o't na'anecpi qataq nam sa qaỹauanapega maye Ñim Lo'onatac 'Enauacna ỹo'ot ỹachegoxotchiguilo soomaye. 44Qaq 'enauac na da'amqaanataxanpi ỹataqta 'oonolec da lataxac, qataq 'enauac na lalamaxatpi ỹataqta nhuaachigui. 45Huo'o na imen na lma', qataq huo'o na imen na logoxoshetpi, nache ana lasheue ỹanem ca lỹa, qalaxaye ỹataqta ca tachiguiña ca lhuenaxanaxa ñi 'oonolec. 46Nache 'enauaque naua na'axa'te lapootega't, qanayeeta'a aso no'onaxanaxaqui late'erai, qataq da qanayeetaugalo naua nma'ate da nquia'axauapi, ỹataqta machiguiñi qataq qaica ca na'amqaanaxac. 47Nache qaỹo'oxoreetac Ñim Lo'onatac 'Enauacna, nache 'enauac na shiỹaxauapi ỹataqta huo'o naq 'ene'c naqa'e'n soua namaxa'she. Nache Som Qarataxala', 'enauaque naua na'axa'te da nqochenaxattauec na 'amqaanataxanaxaicpi maye nca'alaxatec.
