1–Qami' ỹaqaỹañicpi, qataq qami' ita'alpi, ña qana'axaỹaxañiỹa da itaxaỹaxac da ñeueela't.
2Qaq co'ollaq qaỹa'axaỹa da detaxaiguilo naua judío la'aqtaqa, nache ỹataqta ỹe'emaqtom so shiỹaxauapi. Nache so Pablo 'enapeco':
3–Aỹem judío le'ec. Ỹañoqo' ye nỹecpi ye Tarso maye huaigui ye 'alhua Cilicia. Qalaxaye aỹem ñañaxatalec na Jerusalén, aỹem lapaxaguenatac so Gamaliel. Qaq aỹem ỹataqta shecteguelo naua lqataxaco som hua'au qarta'alpi. Ỹoqo'oye nache 'eetai' da ỹataqta huo'o da iuogoxo da so'onataxaatacot Ñim Lo'onatac 'Enauacna, ỹataqta semato'ot da iquiyaqteỹaxac. Qaq nache sheeta'am 'enauac da qoñiita nagui. 4Qaq aỹem co'ollaxa ỹataqta secaatac nam quetague' So Qarataxala' Jesús, choche ivitta'a da huo'o na salauat. Nache saconeua'a da secoñe' na ỹalleppi qataq na 'alpi, da yaqto' sanaigui añi ncoñetaxanaxaqui. 5Qaq som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq 'enauac nam laỹepi nataxala'pi, namayepi ishet da ỹa'axat de'era, qataq nachena namayepi na aỹem ỹanem aso nere maye taỹa'a na qaraỹepi judiopi maye netaña ye Damasco. Qaq aỹem saỹa'a yemaye co'ollaxa da she'eguena'a na 'amqaanataxanaxaicpi da yaqto' ñauega na Jerusalén, yaqto' qaiuaxan.
So Pablo ỹa'axat da 'eetec co'ollaq da'amqaanataxan
6Qalaxaye co'ollaq shectague' so nqa'aic, nache mashe ñayeetaua'a ye Damasco, qaq mashe yaqta'a da na'a'q laiñi, nache nque'elaxatta da souaigui so ne'eraxa maye chegoqo'ot na piguem. 7Nache aỹem sanaañi. Ime, nache sa'axaỹa so na'aqtac aỹem 'eetega, 'eeta': «Saulo, Saulo, ¿ta'ainco' ye Aỹem 'aucaatac?» 8Nache aỹem senataxaatac, sheeta': «'Am Ỹataxala', ¿negue't 'am?» Nache somaye aỹem 'enapega, 'eeta': «Qomye Nachaỹem Jesús maye Aỹem Nazaret le'ec, Nachaỹem maye Aỹem 'aucaatac.» 9Qaq som ñenaictegueto, soomaye ỹauaachiguilo som ne'eraxa, nache ỹataqta ñi'i', qalaxaye saishet da qaỹa'axaỹa som aỹem 'eetega. 10Nache aỹem shenapec: «'Am Ỹataxala', ¿negue't ca 'anshetaique da so'ot?» Nache So Qarataxala' aỹem 'enapega, 'eeta': «Qoñisheguem, nache qocot da 'icỹaxac da 'anqo'oneua'a ye nỹecpi ye Damasco. Qaq qom huaña yemaye, nache 'am qaỹa'aqtaxanem 'enauac cam 'aro'onataxanaxac.» 11Qaq cha'aye aỹem nache sa ñauaañi souaxat so ne'eraxa, nache soua ñenaictegueto aỹem ỹauecta'agueta, choche sevittaua'a ye Damasco.
12Qaq yemaye nache netaña so ỹale le'enaxat Ananías somaye ỹataqta ỹalaxaguet Ñim Lo'onatac 'Enauacna qataq ỹataqta ỹalaxalec nam namaxasoxonaxacpi maye chegoqo'ot so Moisés, qaq nam judiopi maye lma' ye Damasco ỹataqta huo'o naq 'enec naqa'en somaye. 13Nache se'eso Ananías aỹem naỹa, nache aỹem 'enapega, 'eeta': «'Am ỹaqaỹa Saulo, 'am qaltaq 'anauaañi qome.» Huaña, nache qaltaq ishet da ñauaañi, nache sela'a somaye. 14Nache somaye aỹem 'enapega, 'eeta': «Ñim Lo'onatac 'Enauacna maye ỹo'oxoreetac co'ollaxa som hua'au qarta'alpi, Ñimaye 'am lca'aguishec, cha'aye nshetaique da yaqto' 'am 'auaỹaten cam maiche 'eetapeguec Ñimaye, qataq 'anauane' naqa'en So Jesús som no'on da lataxac, qataq da yaqto' 'ana'axaỹaxana Somaye da 'am detaxaỹot. 15Qataq 'am 'aua'axat qome Ñimaye da 'aua'aqtaxanem 'enauac na shiỹaxauapi, qataq da 'aua'axat dam 'arauanaqchec qataq dam 'aua'aqchigui. 16Qaq nagui, ¿negue't cam 'auatta'a? Qoñisheguem qome, nache 'am qanachelaxan, ỹataqta 'aupi'iỹa'a da le'enaxat So Qarataxala', yaqto' ishet da qaỹapalaxat na 'arasouaxashetpi.»
So Pablo ỹa'axat da 'eetec co'ollaq qaỹamaxa nam saishet da judiopi
17Qaq co'ollaq aỹem ñe'eguelaxague na Jerusalén, nache ñeqo'oneua'a añi no'onaxanaxaqui late'erai da yaqto' ñeqouagaxauen, nache huo'o so ỹauanaqchec. 18Aỹem sela'a So Qarataxala', nache aỹem 'eetega, 'eeta': «Sa 'anaỹaloxon qome da qoca'ai na Jerusalén, cha'aye saishet da qaỹaconeguet da 'ara'aqtaxanaxac da Aỹem 'aua'axattac.» 19Nache aỹem sheeta': «'Am Ỹataxala', namayepi ỹaỹaten da aỹem shectagui co'ollaxa 'enauac ana napaxaguenaxaquipi na judiopi, nache saconeua'a da secoñe' 'enauac nam ỹa'amaqteetac da qoneta, qataq seuaxaatac. 20Qataq co'ollaq qaỹalauat ye Esteban maye 'ara'aqtaxanaxanec, qalaq aỹem salectauo, qataq sevira'a da selotague' na logoxotpi nam dalaataxanpi.» 21Qalaxaye So Qarataxala' aỹem 'enapega, 'eeta': «'Aue qome, qojec, cha'aye ỹataqta qaỹoqtegue cam 'am samaxague, 'am samaxa qome nam saishet da judiopi.»
So huataxanaq lta'a qaltaq icoñi' so Pablo
22Huaña, nache tachiguiña da saishet da qana'axaỹaxana. Nache so shiỹaxauapi ỹataqta ỹa'alaqtagui, 'eeta':
–¡No'on da qaỹalauat de'era ỹale! ¡Saishet da nache 'eetai' da nca'altauec!
23Qaq cha'aye nache queto'ot da ỹa'alaqtagui somayepi, qataq imetta'ape naua alogo qataq na 'alhua, 24nache so huataxanaq lta'a damaxasoxoolec da qaltaq qoỹanaigui so lma' so huataxanaqpi so Pablo, qataq damaxasoxoolec da qaiuaxan somaye, da yaqto' ishet da ỹa'axat ca huo'omshe ỹa'alaqtalec somaye na shiỹaxauapi. 25Qalaxaye co'ollaq mashe ime da qaicoñe' da qaỹauotaique da qaiuaxan, nache so Pablo 'enapeco':
–¿Qami' qache isheto' da huo'o da qoñic da qauaxañi ca Roma le'ec, da huo'otaq saxanaxa da qanmichi ca 'eetec ca lasouaxashet?
26Qaq co'ollaq hua'aqchigui de'era so ltaua so huataxanaq lta'a, nache jec da icoyeguen so lta'a, 'eeta':
–Maxatchaxa qome da 'anshetaique da 'auo'ot, cha'aye de'era ỹale, damaye Roma le'ec.
27Nache se'eso nta'a nqo'oneua'a so Pablo, nache inattac, 'eeta':
–¿'Eesa peta'a da 'am Roma le'ec?
Nache so Pablo 'enapeco':
–Aja'.
28Nache so nta'a 'enapeco':
–Aỹem ỹataqta late'erai aso sesheetenaxana da yaqto' aỹem Roma le'ec.
Qalaxaye so Pablo 'enapeco':
–Aỹem, qalaxaye ỹataqta ỹañoqo' yemaye.
29Huaña, nache som nshetaique da iuaxan somaye, nache nlagaxatapec. Ivira'a som nta'a co'ollaq mashe ỹaỹaten da somaye Roma le'ec, nache somaye ỹataqta huo'o da lcolanaxa souaxat da icoñettai' so Pablo.
So Pablo qaỹataxanoigui so nta'alpi maye loicnatac na lataxacpi na judiopi
30Qaq so lỹa na'a'q, nache som nta'a huotaique da ỹaỹaten chaq ta'ainec na judiopi da nquiỹatega so Pablo. Nache nqa't so lque'ete somaye, nache ỹamaxalec da ỹo'ot so ltaxaỹaxac soua lataxala'ate na ntaxaỹaxanaxanecpi, nataqa'en 'enauac so nta'alpi maye nmit na nasouaxashet. Nache nqatec so Pablo da ỹataxanoigui somayepi.
