1Nache so Pablo co'ollaq ỹamataigui so nta'alpi maye loicnatac na lataxaguesat. Nache 'enapeco':
–Qami' Israel le'ecpi, aỹem ỹataqta ỹe'emaqtac da ivilỹaxac, cha'aye choche ivitta'a nagui da ỹataqta salaxaguet 'enauac Ñim Lo'onatac 'Enauacna.
2Nache so Ananías maye nacheso so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, somaye ỹamaxalec nam saqaỹapeque so Pablo, da yaqto' iuaxanoigui na alap. 3Qalaxaye so Pablo 'enapeco':
–¡Ñim Lo'onatac 'Enauacna 'am iuaxan qome, 'am maye qonetega da 'am 'eesa! 'Am iuen da aỹem 'anmit 'aupagaqchiichigui da 'enapec naua nanettrañi lqataxaco so Moisés, qalaq ¿ta'ainco' da saishet da 'aualaxaleguete naamaye, ỹoqo'oye 'auamaxasoxoolec da aỹem qaiuaxan?
4Nache nam hueta'a yi'iye 'enapego' somaye, 'eeta':
–¿Ta'ainec ye qonetec de'era da 'ausheuen ñim lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna?
5Nache so Pablo 'enapeco':
–Qami' ỹaqaỹañicpi, aỹem saishet da saỹaten ñimaye da nacheñi ñim lataxala' na ntaxaỹaxanaxanecpi; cha'aye nache 'enapec naua nanettrañi na'aqtaqa, 'eeta': «Saishet qome da 'ausheuen cam lta'a na 'arhuo' le'ecpi.»
6Nache so Pablo co'ollaq ila'a da huo'o na saduceopi se'eso nta'alpi maye loicnatac na lataxaguesat, qataq huo'o na fariseopi. Nache somaye ỹataqta na'axanneque naua la'aqtaqa, 'eeta':
–Qami' Israel le'ecpi aỹem sachegaqaigui na fariseopi, qataq qalota nam ihuo' le'ecpi da sheeta'am, qalaq nagui ¿Ta'ainco' da aỹem qanmichiitac? ¿Souaxat peta'a da sa'amaqten da qaltaq qanca'alaxatec na leuaxaicpi?
7Qaq co'ollaq choche 'enapec de'era so Pablo, nache na fariseopi qataq na saduceopi maiche taỹa't da ncotatega't. Huaña, nache se'eso ntaxaỹaxac saishet da queta souaxat da npe'ena't da nhuennataxac. 8Cha'aye nam saduceopi, namayepi 'eetega da saishet da qaltaq nca'alec na leuaxaicpi, qataq saishet da huo'o ca chegaqasheguem lamaxashec Ñim Lo'onatac 'Enauacna, qataq qaica nam saq cha'api. Qaq nam fariseopi, qalaxaye ỹa'amaqten da huo'o 'enauac ne'enapi. 9Nache 'enauac somayepi ỹa'alaqtagui; nache huo'o na nachaañi nam dapaxaguenataxaatapeguec na namaxasoxonaxacpi maye nache laỹepi na fariseopi. Nache namayepi 'eeta':
–De'era ỹale, damaye saishet da huo'o ca ỹo'ot sa ỹaỹamaxañi, cha'aye saiuena'a da huo'otaq huo'o cam detaqtague' nam namaxashec piguem le'ecpi, huo'otaq nam saq cha'api na'añaxac. Qaq no'on da saishet qome da ñepa'aguenaqtague' Ñim Lo'onatac 'Enauacna.
10Nache ỹataqta lta'araic da cotaxac. Nache som huataxanaq lta'a ỹataqta huo'o da lcolanaxa da qaỹalauat so Pablo. Qaq ỹoqo'oye damaxasoxoneuga somaye da qaltaq qaỹauegueua'a so lma' na huataxanaq.
11Qaq se'eso pe, nache So Qarataxala' nachaxana so Pablo, nache 'eetega, 'eeta':
–Pablo, 'ana'añaxat qome, cha'aye de'era qonetec da Aỹem 'aua'axattac da huaña, na Jerusalén, qaq nataqa'en nachera qome da qonetec da Aỹem 'aua'axat, qom huaña ye Roma.
Qaitaqtapigui da qaỹalauat so Pablo
12Qaq so lỹa na'a'q, nache huo'o nam judiopi na detaxaỹapigui da huotaique da ỹalauat so Pablo, nache somayepi ỹan da la'aqtac da 'enapec saishet da deque'e, huo'otaq nỹom, da huo'otaq saxanaxa da ỹalauat somaye. 13Qaq napacalec cuarenta som ỹalleppi maye detaqtapigui de'era. 14Nache somayepi nqo'oneua'a som lataxala' na ntaxaỹaxanaxanecpi, qataq nam nqueroxonecpi maye lataxala' nam judiopi, nache 'enapeco':
–Qomi' sanaq da qara'aqtac da yaqto' sepagaqchigui da saishet da sequia'aq, da huo'otaq saxanaxa da salauataq so Pablo. 15Qaq nagui qami' qataq nam laỹepi nta'alpi maye loicnatac na lataxaguesat, qauỹaxañiỹot qome ñi huataxanaq lta'a, da yaqto' qonte' nte'eta, nache navigui' ca Pablo, choche qoñiỹapec qome da huotaique da ỹoqta qaumiiñita da lasouaxashet somaye. Qaq qomi' qome nache ñaỹamaxataqtai' da yaqto' salauataq camaye, qom huo'otaq saxanaxa da nvireuo.
16Qalaxaye som llalec aso lqaỹa so Pablo ỹaỹaten de'era qoỹoxottañi aỹamaxataxac da qaỹalauat so Pablo, nache somaye jec da nqo'oneua'a so lma' na huataxanaqpi, nache ỹa'axatem de'era so Pablo. 17Nache so Pablo iỹaxana so 'oonolec nam ltauapi so huataxanaq lta'a, nache 'enapega, 'eeta':
–'Auauegueua'a qome de'era nsoq ca nta'a, cha'aye damaye huo'o da la'aqtaxanaxac da da'aqtaxanem camaye.
18Nache se'eso ltaua so nta'a ỹauegueua'a somaye so nta'a, nache da'aqtaxanem, 'eeta':
–Ñim Pablo maye ncoñeteguishec, ñimaye aỹem iỹaxana, nache aỹem 'enapega da yaqto' 'am ñauegueua'a ne'ena nsoq, cha'aye huo'o cam la'aqtaxanaxac da 'am da'aqtaxanem.
19Nache so nta'a ỹacona na lhuaq so nsoq, nache iỹotauga. Nache inattac, 'eeta':
–¿Negue't cam huotaique da aỹem 'aua'aqtaxanem?
20Nache so nsoq 'enapeco':
–Huo'o na judiopi mashe nmachigui da la'aqtac da huotaique da 'am qaiỹaxanot qonte' nte'eta, da yaqto' 'auauega ñi Pablo na nta'alpi maye loicnatac na lataxaguesat, qaq choche qaỹatenataxangui da qoỹeetega da ỹoqta qanmit ca lasouaxashet. 21Qalaxaye saishet qome da 'aua'amaqten; cha'aye napacalec ca cuarenta na shiỹaxauapi na nqañoxottañi da dauanaxaatac. Qaq namayepi ỹan da la'aqtac da 'enapec sa deque'e qataq sa nỹom, da huo'otaq saxanaxa da ỹalauat ñi Pablo. Qaq yemayepi nagui mashe naỹamaxattai' choche qaiuatta'a ca 'ara'aqtac.
22Nache so nta'a nquine' so nsoq, nache huaqattapeguelec da yaqto' saishet da huo'o ca ỹa'axatem de'era.
So Pablo qaỹamaxa so nta'a le'enaxat Félix
23-24Nache so nta'a iỹaxanalo soua dos maye ilotegueto na huataxanaqpi, nache 'enapegalo 'eeta': Qauqataxañiỹai' ca doscientos huataxanaqpi na petañi, qataq setenta nam ỹauota'a na lalo caaỹo, qataq doscientos nam ỹauota'a ana lataquiaxai. Qataq nataqa'en qauauo'oi ca nnotaxala' caaỹo ca Pablo, cha'aye ñeshetaique da qomele qaỹata'ague na pe, nache qanqo'oñiỹa ye nỹecpi ye Cesarea da qauauequiiua'a ñi nta'a Félix. Qanchelỹa'a qome ca Pablo, yaqto' qaica ca ivireguet qauem. 25Nataqa'en so nta'a ỹauo'o aso ỹamaxaguelo lere so huataxanaqpi maye huetalec da 'eeta':
26«Aỹem Claudio Lisias, 'am samaxa da iquinaxanaxac, 'am maye 'am 'amaqtaqaic ita'a Félix. 27Na lataxala'pi na judiopi co'ollaxa ỹaconeua'a ne'ena ỹale, nache mashe huotaique da ỹalauat. Qalaxaye co'ollaq saỹaten da namaye Roma le'ec, nache sauo'o so ñalleppi, nache ñeqo'ona da ñeca'alaxatec. 28Qaq co'ollaq sauotaique da saỹaten cam qoỹeetega lasouaxashet, nache sauega nam lta'alpi na judiopi. 29Huaña, nache saỹaten da choche huasoitapeguelec nam maiche nqataxacpi namayepi, qaq qaica cam ỹoqta huasoilec namaye da yaqto' qaỹalauat, huo'otaq da qaicoñettai'. 30Qalaxaye co'ollaq aỹem ỹa'axaỹaxac da na judiopi mashe detaqtapigui namaye da huotaique da ỹalauat, nache namaye 'am samaxa. Nataqa'en shenapega nam ipa'agueetacpi namaye da nataqa'en 'am taỹa, da yaqto' ỹa'axat cam 'eetega lasouaxashet namaye. Hua', nache tachiguiña.»
31Nache so huataxanaqpi ỹo'ot dam la'aqtac so nta'a. Nache se'eso pe qaỹauec so Pablo, qaỹauega so lma' na huataxanaq maye naña ye Antípatris. 32Qaq so lỹa na'a'q nache so huataxanaqpi maye petañi ñe'eguelaxa so lma' na huataxanaq maye naña ye Jerusalén, nache ndotec som huota'a lalopi so nnaicapegue' so Pablo. 33Qaq co'ollaq qaivita ye Cesarea, nache qanqo'oneua'a so nta'a, nache qoỹanem aso nere, nataqa'en qoỹaneuo so Pablo. 34Qaq co'ollaq imat da itaxaỹaxaatac aso nere so nta'a, nache inattac so Pablo da chaq hua'ague ca chegoqchiguiña. Qaq co'ollaq mashe ỹaỹaten somaye da chegoqta'ague da 'alhua Cilicia. 35Nache 'enapego', 'eeta':
–Maiche 'am ña'axaỹaxano' qom ivita da nvi' cam 'am ipa'agueetacpi.
Ime, nache so nta'a damaxasoxoolec somaye da yaqto' qaỹauega ca lma' co'olloxocheye so Herodes. Nache qaỹauo'o so nhuataxaua.
