So Pablo qaỹataxanot so Festo
1So Festo nvita ye nỹecpi ye Cesarea da do'onataxan da nta'a, qaq co'ollaq ivi't soua tres na'axa'te, nache chegoqchiguiña yemaye da taỹa ye nỹecpi ye Jerusalén. 2Qaq huaña yemaye, nache na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq na judiopi maye ỹo'oxoraicpi, nachaateua'a somaye da qaiquictapegueua'a so Pablo. 3Nache qanachoxoreetacot somaye da ishet da nqouaguec da damaxasoxona so Pablo da qanauega ye Jerusalén. Qaq da lhuennataxac somayepi, nshetaique da damaxasoxoolec somaye da qaỹachangui na nqa'aic da qaỹalauat. 4-5Qalaxaye so Festo 'enapeco':
–Saishet; ca Pablo no'on da nache queta da qaicoñettai' da neta'ague da Cesarea, cha'aye saqaỹaloq da saigue damaye. Qaq camaye da huo'o ca ỹo'ot sa ỹaỹamaxañi qataq na qarataxala'aipi da 'eetega da huo'o ca lasouaxashet, qaq no'on da ñenaicapegue'. Qaq huaña yemaye da ỹa'axat cam 'eetega lasouaxashet.
6Nache so Festo hua'c da ivi' naua ocho na'axa'te da hueta'a ye Jerusalén. Ime, nache ỹe'eguelaxague da Cesarea, qaq so lỹa na'a'q, nache nqo'oneua'a aso lo'onataxanaxaqui, nache damaxasoxoneuga so Pablo. 7Nache co'ollaq nvireuo so Pablo, nache anac so judiopi maye chegaqa'ague da Jerusalén. Nache ỹataqta qalota na qaỹasaxalec lasouaxashetpi somaye, qalaxaye saishet da huo'o ca ỹataqta 'eesa nam qaỹasaqtapeguelecpi. 8Nache so Pablo ỹo'ot da ltaxaỹaxac, 'eeta':
–Aỹem saishet da huo'o ca ỹasouaxashet, saishet da huo'otaq ñepa'agueetague' na namaxasoxonaxacpi maye chegoqo'ot so Moisés, qataq sa ñepa'agueetega añi no'onaxanaxaqui late'erai, qataq cam nta'a maye neta'ague da Roma.
9Qalaxaye so Festo ye nshetaique da qaica camachaqca naqa'en na judiopi, nache inat so Pablo, 'eeta':
–¿'Anshetaique peta'a da 'aigue da Jerusalén, da yaqto' hua'ague damaye da 'am ñimit da huo'otaq 'en da huo'o ca 'arasouaxashet?
10Nache so Pablo 'enapeco':
–Aỹem mashe sootaigui mque' ana lo'onataxanaxaqui ca nta'a maye neta'ague da Roma, qaq nachena na huañactaxa da ishet da aỹem qanmit. Cha'aye 'am mashe 'auaỹateeta da aỹem qaica ca ỹasouaxashet da huo'otaq huetaigui na judiopi. 11Cha'aye da ỹoqta 'eesa da huo'o ca ỹasouaxashet maye naigui ca ñalaataguec, qaq aỹem saishet da ñelletac da aỹem qaỹalauat. Qalaxaye da huo'otaq saishet da huo'o ca 'en nam aỹem qaỹasaqtapeguelecpi, qaq nataqa'en saishet da huo'o ca choche aỹem ỹacoolec da aỹem ỹanoigui namayepi. Qaq ỹoqo'oye aỹem seỹaxaneua'a da no'on da nacheca ca nta'a maye neta'ague da Roma da aỹem nmit.
12Nache so Festo co'ollaq ime da detaxaỹapegue' so ltauapi, nache 'enapego' so Pablo, 'eeta':
–'Am 'aỹaxaneua'a da 'am nmit ca nta'a maye neta'ague da Roma. Qaq nagui nacheca ca 'anqo'ona, da yaqto' 'am nmit.
So Pablo qaỹataxanot so nta'a Agripa
13Qaq co'ollaq mashe qaỹata'aguelo soua na'axa'te, nache anac so nta'a Agripa qataq aso lhua Berenice da nqo'oora ye nỹecpi ye Cesarea da dequinaxaara so Festo. 14Nache ỹataqta huo'oi soua na'axa'te da huetra'a yemaye, nache so Festo da'aqtaxaatapeguem so Agripa da 'eetec da huaigui so Pablo, 'eeta':
–Huo'o ñi ỹale hueta'a ne'ena maye damaxasoxoolec co'ollaxa so Félix, da nache 'eetai' da qaicoñettai'. 15Qaq co'ollaq soota'ague da Jerusalén, nache na lataxala'pi na ntaxaỹaxanaxanecpi qataq nam lqueroxonecpi na judiopi aỹem dequictacot da huo'otaq ishet da sasheeta da yaqto' qaỹalauat. 16Nache aỹem sa'aqtaxaatapeguem namayepi da na nta'alpi maye chegaqa'ague da Roma, saishet da lataxac da ỹaneguet da nalaataguec ca ncoñeteguishec da huo'otaq saxanaxa da nataỹa'ai' da ncotaỹapegue' cam decoñetaxanpi. 17Qaq ỹoqo'oye somayepi co'ollaq anac da naỹa ne'ena, nache aỹem sa saỹaloxonai' da so lỹa na'a'q, nache saua'a añi ỹo'onataxanaxaqui, nache samaxasoxoneuga ñi'iñi ỹale. 18Qalaxaye som nachaateuopi da ỹa'axat na 'eetega lasouaxashetpi ñimaye, saishet da huo'o ca nateneguet nam qoỹeetega lasouaxashetpi nam sepettegapi. 19Chaqrata da qancotatapigui dam maiche na'amqaanataxanaxac, qataq cam le'enaxato' Jesús maye qaỹalauat co'ollaxa, qalaxaye ñi Pablo 'eetega camaye da qaltaq nca'alec. 20Qaq aỹem ye saishet da saỹaten ca sataxaateuga ca 'eeta'am de'era, nache senattac ñi'iñi Pablo da huo'otaq nshapeque da taigue da Jerusalén, da yaqto' hua'ague da ishet da qanmit. 21Qalaxaye ñimaye maiche iỹaxaneua'a da yaqto' nmit ñim nta'a Augusto maye na'ague da Roma. Nache aỹem samaxasoxoolec ñimaye da yaqto' nache 'eetai' da qaicoñettai', maicheye da ivita da samaxa ñi'iñi nta'a maye neta'ague da Roma.
22Nache so nta'a Agripa 'enapego' so Festo, 'eeta':
–Aỹem nataqa'en ñeshetaique da ña'axaỹaxana que'eca ỹale.
Nache so Festo 'enapeco':
–Qonte', qaq 'ana'axaỹaxana ñimaye.
23Qaq so lỹa na'a'q co'ollaq nvildeuo so Agripa qataq aso Berenice, nache ỹataqta qalota da llo'oxoyec qanqa'e'n, lỹatreuo so huataxanaq lta'alpi qataq nam nta'alpi yem nỹecpi da qotaigui aso ntaxaỹaxaqui. Nache so Festo damaxasoxoneuga so Pablo. 24Nache 'enapeco':
–'Am nta'a Agripa, qataq 'enauac nam qomi' ỹalectaiguilo, 'era dam ỹale maye ỹataqta qalota na judiopi maye netaña ye Jerusalén qataq nam netaña na Cesarea da dequictapegueua'a. Qaq namayepi ỹataqta aỹem ỹe'eguelaqto'ot da de'era ỹale saishet da nache 'eetai' da nca'altauec. 25Qalaxaye aỹem saishet da sela'a da huo'o ca lasouaxashet da yaqto' naigui ca nalaataguec damaye. Qalaxaye damaye ye maiche iỹaxaneua'a da yaqto' nmit cam nta'a Augusto, qaq aỹem mashe sasateguet damaye da yaqto' samaxague da Roma. 26Qalaxaye aỹem ña seqalaataique ca ỹa'aqtac da yaqto' samaxa cam qarta'a maye neta'ague da Roma, da sa'axat ca lasouaxashet damaye, qaq ỹoqo'oye damaye qami' ñauegueua'alo. Qaq aỹem ỹataqta 'am salamaxatchigui, 'am nta'a Agripa, da yaqto' 'aunat damaye, yaqto' aỹem qome ishet da huo'o ca shiyiñi ỹa'aqtaxanaxac da samaq. 27Cha'aye aỹem sela'a da sa ỹaỹamaxañi da choche samaq ca ncoñeteguishec da huo'otaq saishet da shiyiñi ca qoỹeetega lasouaxashet.
