Da lasouaxashe't soua Ananías qataq aso Safira
1Qataq huo'o nataqa'en so lỹa ỹale le'enaxat Ananías naỹaane' aso lhua Safira, da ime'n so na'alhua. 2Qalaxaye no'onaxatrañi aso laỹe asom lasheue so lma', qaq aso laỹe asomaye iroua'alo soua lamaxa'she So Jesús, 'eeta'am naqa'en da nalota't. 3Nache so Pedro 'enapego' somaye, 'eeta':
–Ananías, ¿ta'ainec ye 'aualaxaguet so pa'aguenataxanaxaic? Ye 'am 'ano'onaxatañi aso laỹe asom lasheue so 'ana'alhua, 'aupi'itaxaatega da ishet da 'auatenachet So Saqcha'a Na'añaxac Qui'itta. 4¿Saisheto' peta'a da 'aralamaxat som 'alhua? Cha'aye co'ollaq 'aumen somaye, qaq ¿saisheto' peta'a da maiche 'aralamaqte aso lasheue? ¿Ta'ainco' ye tachiguio' ye 'arhuel da 'auo'ot de'era? 'Am 'auatenachet Ñim Lo'onatac 'Enauacna, saishet da nacheqomi'.
5Qaq co'ollaq hua'axaỹa de'era so Ananías, nache huañi da ileu. Qaq 'enauac nam hueta'a yi'iye ỹataqta huo'o da lcolanaxa. 6Nache ana'c soua nso'q, nache ỹaxateguelo somaye, nache irouec da ilalyiñi.
7Qaq co'ollaq mashe ivi' soua tres hora, nache nvireuo aso lhua Safira. Qaq asomaye saishet da ỹaỹaten da huaigui so lhua. 8Nache so Pedro inattac asomaye, 'eeta':
–Ñaq aỹem 'aua'aqtaxanem. ¿Peta'a nachaso aso lasheue cam qarmaye maye qaumiñi aso qandoiuo?
Nache asomaye 'enapeco':
–Aja', nachaso.
9Nache so Pedro 'enapego' asomaye, 'eeta':
–¿Ta'ainco' qami' ye qanasachiigui co'ollaxa da qauatenachichi So Saqcha'a La'añaxac Ñim Qarataxala'? Ñaq 'aula'a, 'enauacha'agueta naua nso'q maye cheta'ague da ima't da ilalyiñi so 'arhua, naamaye nataqa'en nagui 'am ilayiñi.
10Huaña, nache asomaye huañi, nache ileu, huaña ca hueta'a so Pedro. Qaq co'ollaq nnoxooreuo soua nso'q, nache ilaleguete asomaye, nache nqatre'c da ilalyiñi, ỹauaxaỹaxaatre' so lhua. 11Nache 'enauac nam shiỹaxauapi maye ỹa'amaqten So Jesús qataq 'enauac na laỹepi shiỹaxauapi co'ollaq ỹaỹaten de'era, nache ỹataqta qalota da lcolanaxa.
Ñim Lo'onatac 'Enauacna ỹo'ot na saqalota maye ỹo'ot da na'aalaxa
12Qaq ỹachegoxotchiguilo soua lamaxa'she So Jesús da Ñim Lo'onatac 'Enauacna queto'ot da ỹo'ottac nam sa qaỹauanapega qataq nam na'anecpi maye ỹo'ot da na'aalaxa da huaigui na shiỹaxauapi. Qaq 'enauaque naua na'axa'te da so ca'attague'pi So Jesús hueta'a so qaỹamata'ac nasom so Salomón. 13Qaq nam saishet da laỹepi somayepi ỹataqta saishet da nhuogoua'a, na'aictaxa da 'enauac na shiỹaxauapi da huo'o naq 'enec naqa'en somayepi, qataq 'onaxaic da ltaxaỹaxac da detaqtega somayepi. 14Qaq ima'ape naua na'axa'te da nquictauec ye lcata na ỹa'amaqten So Jesús, ỹalleppi qataq na 'alpi. 15Qaq ỹoqo'oye ivira'a da qanqatec na dalolaxaicpi, qaỹachetaleguete naua lmala'ate da qairougalo na nqa'aico, yaqto' da huo'o ca nateuga so Pedro. Nache na'aictaxa da huo'otaq choche lpaqal ca taalec ca 'oonolec namayepi, nache no'oita. 16Nataqa'en nam saqaỹapeque nỹecpiolec ye nỹecpi ye Jerusalén irouec na dalolaxaicpi qataq na shiỹaxauapi maye huo'o na netaigui saqcha'a na'añaxac leguemaxaic, nache 'enauac da no'oita.
So Pedro qataq so Juan qaicaata'ape
17Nache som lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq so saduceopi maye nnaictague' somaye, ỹataqta nquiỹalo soua lamaxa'she So Jesús. 18Qaq ỹoqo'oye damaxasoxoneugalo da qaỹaconeua'alo da yaqto' qoỹaaraigui aca ncoñetaxanaxaqui late'erai yem nỹecpi. 19Qalaxaye so lamaxashec Ñim Qarataxala' ỹauatoiguilo soua laso'omi aso ncoñetaxanaxaqui se'eso pe, nache nqatre'c soomaye. Nache 'enapegalo', 'eeta':
20–Qanqo'oñiỹa añi no'onaxanaxaqui late'erai. Huaña, nache qaua'aqtaxañim 'enauac na shiỹaxauapi dam na'aqtaxanaxac maye chegaqaigui da nca'alaxa.
21Qaq co'ollaq mashe yo'oxoñitai', nache soua namaxa'she ivireua'alo so naloteuga aso no'onaxanaxaqui late'erai, nache da'aqtaxaatrapeguem na shiỹaxauapi.
Qaq se'eso lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som ltauapi, ỹataxana't so nta'alpi maye nmit na nasouaxashet, qataq so lta'alpi na shiỹaxauapi. Ime, nache qaỹamaxasoxoneua'alo soua Jesús lamaxa'she maye netraigui aso ncoñetaxanaxaqui. 22Qalaxaye soua huataxanaq lashe' co'ollaq ivireua'alo aso ncoñetaxanaxaqui, nache saishet da ỹanatalo soomaye. Nache ỹe'eguela'q da ỹache' de'era na'axaỹaxac, 23'eeta':
–Qomi' semetenaqtac añi ncoñetaxanaxaqui da ỹataqta qaỹapochigui, qataq huo'oi daua huataxanaq lashe' maye nauaata'ape naua laso'omi. Qalaxaye so sauataxaigui, nache saishet da huo'o ca selaqa'a na pa'auo.
24Nache co'ollaq hua'axaỹa de'era som lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som lta'a na huataxanaq maye ilotague' aso no'onaxanaxaqui late'erai, nache sa ỹaỹaten ca 'eetec somayepi, qataq sa ỹañoxot da ỹaỹaten ca 'eetec de'era maye qanayeuaigui. 25Huaña, nache nque'elaxatta da nvireuo so ỹale, nache da'aqtaxanem somayepi, 'eeta':
–Daua ỹale't maye qami' qaỹa'añiỹaiguilo añi ncoñetaxanaxaqui so lỹa na'a'q, daamaye qaltaq huetra'a ye naloteuga añi no'onaxanaxaqui late'erai, qana'axaỹaxaategalo, ỹapaxagueetrac na shiỹaxauapi.
26Nache som lta'a na huataxanaqpi qataq soua ltau' je'c da ỹaconeua'alo soua Jesús lamaxa'she, qalaxaye saishet da ỹapac da sa iyacna'ape, cha'aye huo'o da lcolanaqa' na shiỹaxauapi da dalemataỹalo soomaye, nache qaỹasa'q na coma'. 27Qaq co'ollaq iviraxateua'alo so ltaxaỹaqa' so nta'alpi, nache so lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna 'enapeco':
28–Qomi' mashe ime da qami' seqataqtegalo da saishet da qauapaxaguenataxañic da na'aqtaguec So Jesús, qalaxaye qami' saishet da qomi' qaualaqaigueta. 'Enauac na Jerusalén da qaua'aqtaxañiiteguem So Jesús, ivira'a da qomi' qanmaqaileguete da qoñiitega da qomi' salauataq Somaye.
29Nache so Pedro qataq soua lỹa't namaxa'she 'ena'apo':
–Qomi' iuen da hua'auñi da salaxasoxoguet Ñim Lo'onatac 'Enauacna, ime, nache nataqa'en ca choche shiỹaxaua. 30Qami' qaualauache So Jesús, qauaxañiiguet so npe'enaxaqui, qalaxaye Ñim Lo'onatac 'Enauacna maye ỹo'oxoreetac so hua'au qarta'alpi qaltaq nca'alaxatec Somaye. 31Ñim Lo'onatac 'Enauacna ỹo'otec da So Jesús nso'oota'ague da aloic qataq ỹanagui da Nataxala', qataq Nca'alaxaqui, da yaqto' na Israel le'ecpi ỹaxaañi da ỹo'ottac na qauem, nache Ñim Lo'onatac 'Enauacna ỹapalaxa't naua lasouaxashe'ete. 32Qomi' ỹataqta saỹatenaqta de'era sa'axataqtac, qataq So Saqcha'a Na'añaxac Qui'itta nataqa'en ỹa'axattac, cha'aye Ñim Lo'onatac 'Enauacna ỹanem 'enauac So Saqcha'a Na'añaxac Qui'itta 'enauac nam ỹalaxaguet Ñimaye.
33Qaq co'ollaq hua'axaỹa de'era so nta'alpi maye 'amaqtaqaicpi qataq so lataxala'pi na judiopi, nache somayepi ỹataqta dalemata, nache huotaique da ỹalaua't soomaye. 34Qalaxaye huo'o so ỹalectaigui na fariseopi, le'enaxat Gamaliel. Somaye damaxasoxoolec da cara'ac qanqatre'c soua namaxa'she. Se'eso Gamaliel, somaye dapaxaguenataxaatapeguec na namaxasoxonaxacpi, qaq na judiopi ỹataqta huo'o naq 'enec naqa'en somaye. 35Qaq somaye 'enapega so laỹepi, 'eeta':
–Qami' Israel le'ecpi, no'on da ỹataqta qauennataxañiitelec dam huotaique qauo'oche'c de'eraua ỹale't. 36Cha'aye qami' qauennache da huo'o so na'a'q co'ollaxa da nachaañi so Teudas, nache 'enapec da huo'o naq 'enec, nache ivi' cuatrocientos so ỹalleppi maye quegue somaye. Qalaxaye somaye co'ollaxa qaỹalauat, nache 'enauac som quetague'pi somaye nlagaxattac. Huaña, nache imeuo da lo'onataxanaxac. 37Qaq co'ollaq qaỹata'ague de'era, nache qaltaq huetoigui so na'a'q co'ollaq qoỹiyiñi 'enauac na shiỹaxauapi da qanaloqna't, nache nachaañi so Judas, Galilea le'ec. Qaq nache 'ena'am ỹataqta qalota na quegue somaye. Qalaxaye somaye nataqa'en qaỹalauat, nache 'enauac nam quetague'pi nlagaxattac. 38Qaq ỹoqo'oye qami' no'on da qauaqaita'alo qome de'eraua ỹale't, saishet da sa qaualemaxache'. Cha'aye de'era ỹo'ottrac, qom maiche lalamaxa't, nache damaye qome saishet da qaỹa'ague. 39Qalaxaye damaye da huo'otaq nacheñi Ñim Lo'onatac 'Enauacna da chegoqo'ot, nache qami' saishet da qauañoxoche da qanlaxachiiñi. Ỹoqo'oye qarvichiỹalec de'era. Cha'aye da nache qoñiitec de'era, nache qami' qanpa'aguiñiitague' Ñim Lo'onatac 'Enauacna.
40Nache 'enauac somayepi ỹaỹamaxareeta da 'enapec so Gamaliel. Nache qaiỹaxaneugalo soua Jesús lamaxa'she, nache qaỹalasheeta'ape qataq qoỹeetegalo da saishet da ỹa'axattrac da na'aqtaguec So Jesús. Ime, nache qaisore'c. 41Nache se'esoua Jesús lamaxa'she chegoqtoiguilo so nta'alpi ỹataqta huo'o da ntonaxa'c, cha'aye Ñim Lo'onatac 'Enauacna ỹasheetegueta soomaye da huo'o da nque'eenaxa'c, huasoirelec da ỹataqta ỹalaxareguet So Jesús. 42Nache 'enauaque naua na'axa'te da soomaye queto'oto da dapaxaguenataxaata'ape qataq ỹa'axattrac da So Jesús Lca'aguishec Ñim Lo'onatac 'Enauacna, huaña aso no'onaxanaxaqui late'erai, qataq naua nma'ate.
