1Qaq 'era da la'aqtaxanaxac so Amós, som qagueta lo'o maye lma' ye Tecoa, dam lauanaqchec maye chegoqo'ot Ñim Lo'onatac 'Enauacna, maye taỹa'a da talec na Israel le'ecpi, co'ollaq saxanaqcaua soua dos vi'iye da nvi' so nacholaxanaxa ana 'alhua, maye huetoigui da lo'onataxanaxac so Uzías, maye nta'a ye Judá, qataq da lo'onataxanaxac so Jeroboán, som llalec so Joás, maye nta'a ye Israel.
2Nache so Amós, 'eeta': Ñim Nataxala', qaỹa'axaỹa qome da lavilỹaxac 'eeta'am na nalataxa,
huaña añi qasoxonaxa ye Sión maye naña ye Jerusalén,
nache na 'alhuapi qataq na 'auaqpi deqaqa qome,
qataq deqaqa ana lmilo añi qasoxonaxa Carmelo.
Dam taỹa'a nhuaxanaguec na ỹotta'a't shiỹaxauapi maye nhuoreuapi
3Da la'aqtac Ñim Nataxala', 'eeta': na Damasco le'ecpi ỹataqta ỹapacauec na lasouaxashetpi,
qaq saishet qome da saxaañi da sauo'o na nhuaxanaguecpi,
cha'aye namayepi ỹataqta ilaxachigui co'ollaxa na lma' ye Galaad,
ỹauota'a ana namoxoỹaqtaxanaqte lcat.
4Qaq ỹoqo'oye serolec qome ca norec da savigaxat ñi lma' lta'araic so Jazael,
qaq que'eca norec nataqa'en ỹavigaxat qome ñi lma' lta'araic so Ben Adad.
5Qataq senoxotaua'a qome da sacagaxat na nasompi ye Damasco,
qataq selaxachigui qome na nta'alpi ye ca'amapega't 'alhua ye Avén,
qataq cam nta'a maye ilotague' ye Bet Edén,
qataq noxonecpi qome na siiriopi, nache qaỹauega ye Quir.
Qaq 'era da la'aqtac Ñim Nataxala'.
6Qaq Ñim Nataxala', 'eeta': na Gaza le'ecpi ỹataqta qalota na qauem ỹo'otpi,
ỹoqo'oye saishet qome da saxaañi da sauo'o na nhuaxanaguecpi,
cha'aye ỹataqta imatta co'ollaxa da ỹauec na nhuo' le'ecpi,
nache imenot na Edom le'ecpi da yaqto' l-latacpi.
7Qaq ỹoqo'oye sauo'o qome ca norec da ỹavic ñaqa'en na lpaqtaxanaxatpi ye Gaza,
nache que'eca norec nlachiguiñi naqa'en na nma' lta'araicpi.
8Qataq selaxachigui qome nam ilotague' ye Asdod,
qataq nam ilotague' ye Ascalón.
¡Qataq serolec da ỹa'añaxac ye Ecrón,
qataq ỹataqta nmichiguiñi ñaqa'en da ileu na filisteopi!
Qaq 'era da la'aqtac Ñim Nataxala'.
9Qaq Ñim Nataxala', 'eeta':
Na Tiro le'ecpi ỹataqta qalota nam qauem ỹo'otpi,
ỹoqo'oye saishet qome da saxaañi da sauo'o na nhuaxanaguecpi,
cha'aye so qalota nhuo' le'ecpi maye loxonecpi co'ollaxa imenot na Edom le'ecpi da yaqto' l-latacpi,
qaq saq tagui lauel da naỹamaxataxac co'ollaq naỹamaxate' da 'eco' lqaỹañecpi somayepi.
10Qaq ỹoqo'oye sauo'o qome ca norec da ỹavic ñaqa'en na lpaqtaxanaxatpi ye Tiro,
nache que'eca norec ỹavigaxat qome na nma' lta'araicpi.
11Qaq Ñim Nataxala', 'eeta':
Na Edom le'ecpi ỹataqta qalota nam qauem ỹo'otpi,
ỹoqo'oye saishet qome da saxaañi da sauo'o na nhuaxanaguecpi,
souaxat da ỹataqta sa ichoxonnai' da irolec na lainec,
co'ollaq icaatac na maiche lqaỹañecpi Israel le'ecpi.
Qataq ỹataqta lta'araic da lalemataic, qataq da lquiỹaxa namayepi.
12Qaq ỹoqo'oye sauo'o qome ca norec da ỹavic ñaqa'en ye Temán,
nache que'eca norec nlachiguiñi naqa'en qome na nma' lta'araicpi ye Bosra.
13Qaq Ñim Nataxala', 'eeta':
Na Amón le'ecpi ỹataqta qalota nam qauem ỹo'otpi,
ỹoqo'oye saishet qome da saxaañi da sauo'o na nhuaxanaguecpi,
souaxat da nshetaique da nquigaxatec na na'alhuapi,
nache namayepi ipeleca'ague ana da'am ana hualaxaipi maye lma' ye 'alhua Galaad.
14Qaq ỹoqo'oye sauo'o qome ca norec da ỹavic ñaqa'en na lpaqtaxatpi ye Rabá,
nache que'eca norec nlachiguiñi naqa'en qome ca nma' lta'araicpi,
qaq que'eca na'a'q ỹataqta huo'o da na'alaxac da qaỹa'alaxalec ca alaataxac,
qataq huo'o da l-llimiaxa na la'at que'eca na'a'q.
15Qaq ca lta'a namayepi qaỹauega qome ca ỹaqa'a 'alhua,
nache lỹatec qanqa'en nam 'amaqtaqaic ltauapi.
Qaq 'era da la'aqtac Ñim Nataxala'.
