Ñim Nataxala' qaica ca ỹet da ỹauo'o ca nhuaxanaguec na shiỹaxauapi
1Qaq ime, nache sela'a Ñim Nataxala', nachattaua'a na laỹe añi nca'atoxonaxalate, nache aỹem 'enapega, 'eeta':
«'Auaxaalec qome na pa'asheguem
ana lauoqtepi añi atamnaxaqui,
yaqto' cholaxan na l-llecnaxanaxatpi
nache da naañi na laỹepi
nache talec na lqaic na shiỹaxauapi.
Qaq ca lca'alaxaicpi namayepi
nache serolec qome ca ỹeelonec da salauat.
Nache ỹataqta qaica qome ca ishet da datauec,
qataq qaica qome ca nca'alec.
2Nache na'aictaxa da taña ca ỹataqta qaỹoqchiguiña
ana 'alhua da nqañoxooñi,
qalaq nache sachegoxotchiguiña da ñeqatsheguem,
qataq na'aictaxa da tasheguema
ca ỹataqta qaỹoqotcheguema na piguem,
qalaq nache sachegoxotasheguema da ñeqaañi qome.
3Qaq da tasheguema ana lmilo
añi qasoxonaxa Carmelo da nqañoxooñi,
qalaq ñaqaiyeta sasheguema da ñimitaique
nache saconeua'a,
qaq da aỹem nqañoxotaisop da taña
na ỹataqta pa'aguiñi aso auaxai,
nache samaq aso 'araxanaq late'e da yaqto' inac.
4Qaq da huo'otaq ca npa'aguenaxauapi
da loxonecpi namayepi,
nache da ỹauega ca ỹaqa'a 'alhua
nache ilem ñaqa'en ca ỹeelonec.
Qaq aỹem selota'a qome namayepi
qalaxaye saishet da so'otec ca no'on,
nacherata da talec ñaqa'en qome ca qauem.»
5Qaq Ñim Nataxala' maye Qaica ca Ỹaqalanapec,
da choche nhuocteguet ana 'alhua,
nache anamaye nlaguiñi,
qaq nam netalecpi anamaye qalaq 'enauac da nỹen.
Ana 'alhua nquiguiñi qataq nquiguisheguem,
'eeta'am na 'etaxat maye huetangui aso tala Nilo.
6Qaq Ñim Lo'onatac 'Enauacna
ỹo'ot ye lanataqa' na piguem,
qalaq nache na'attalec naqa'en ana 'alhua,
qaq Ñimaye da iỹaxana na 'etaxat
maye huetangui aso auaxai,
nache huecorelec naqa'en ana 'alhua.
Qaq Ñimaye, le'enaxat Nataxala'.
7Qaq Ñim Nataxala', 'eeta': «Qami' Israel le'ecpi,
da qami' selota'alo nache ỹataqta qoñeeta'am na etiopepi.
Qaq cha'aye co'ollaq qami' sachegoxota'alo ye Egipto,
qaq nache 'eeta'am na filisteopi
da sachegoxota'a ye Creta,
qataq na arameopi da sachegoxota'a ye Quir.»
8Qaq Ñim Nataxala' imeteetac da qauem
lo'onataxanaxac ne'ena shiỹaxauapi,
ỹoqo'oye 'eeta':
Ỹataqta pal ñaqa'en qome ne'ena
shiỹaxauapi da huetalec ana 'alhua,
qalaxaye saishet da imauec da pal ñaqa'en nam chegoxoguetpi so Jacob.
Qaq 'era da ỹa'aqtac, Aỹem Nataxala'.
9Cha'aye aỹem samaxasoxoolec qome
da qaichegoq na Israel le'ecpi
da ỹalectaigui na ỹotta'a't shiỹaxauapi,
'eeta'am da qaichegoq na trigo da qanqateua'a na lvi,
qaq nache saishet da huo'otaq 'oonole ala aca naañi
qanqa'en da talec na 'alhua.
10Nache 'enauac ne'ena ỹalamaxat
nhuo' le'ecpi maye huo'o na lasouaxashetpi,
qairolec qome ca ỹeelonec da qaỹalauat,
nam 'enapec naxa: «Saishet da qomi' taleguete qome de'era,
dam qauem saishet da qomi' iviraugalo.»
Qom qaltaq qanauaxaỹaxaasheguem na Israel le'ecpi
11Qaq que'eca na'a'q, nache qaltaq ñauaxaỹaxaasheguem qome ye mashe nlaguiñi lma' so David. Nache sapogui nam lpoxoỹaxapi, qataq ño'oxoosheguem nam mashe nlaguiñi, nache se'enaxatchigui so hua'auchiguiñi lataxac co'ollaxa, 12yaqto' nam saq 'amaqtaqpiolec no'onañipi ye Edom maye ỹo'oxoreetac da ỹe'enaxat qataq 'enauac nam ỹotta'a't shiỹaxauapi, ỹe'eguelaxa qome da lalamaxat ye Israel. Qaq 'era da la'aqtac Ñim Nataxala' maye ỹo'ot qome de'era. 13Qataq natrauo caua na'axa'te qom ñaq qanqattac na ala na trigo, nache mashe qaltaq qana'ayisheguem nam nanaxanaqa'pi, qataq qom ñaq saxanaxa da ime da qailaxattapigui ana ala ana uvapi, nache mashe qaltaq qoỹaañi na trigo. Nache na lataxa qalaq 'eeta'am na la'auaxacpi na 'etaxat da chegaqasheguema ana qasoxonaxapi qataq ana lcomaraxalatepi. 14Huaña nache ñe'eguelaxaala't qome nam ỹalamaxat nhuo' Israel le'ecpi maye noxonecpi co'ollaxa. Nache namayepi qaltaq no'oxoosheguem qome na huaqta'a't nỹecpi maye mashe nlaguiñipi, nache qaltaq naigui qome nache qaltaq ỹo'ot nam lanaxanaqa'pi da ỹaañi ana uvapi, nache nỹomtapigui na maiche lo'onatac lataxa, qataq ỹaañi ana lañiguishepi qo'oipaqpi nache maiche chectac ana ala anamaye. 15Cha'aye aỹem sanalec qome namayepi na maiche na'alhua co'ollaxa, huaña nache qaica ca ishet da qaltaq anac da ỹauec namayepi. Qaq 'era da la'aqtac Ñim Nataxala' maye Lo'onatac 'Enauacna.
