Colosenses 3

₁Qaq ỹoqo'oye da qami' sogote da qarỹaicheguem So Cristo co'ollaq qami' qanca'alaxatre'c, nache qanmichiỹaique cam hueta'ague da piguem dam neta'ague Somaye da nso'ootaua'a na aloic Ñim Lo'onatac 'Enauacna. ₂Qaq ỹataqta nda'a't ca hueta'ague da piguem da tatapigui ye qarvilli, qaq saishet da qauennacheetapega nam huetalec ana 'alhua. ₃Cha'aye qami' mashe qarleuaxauai So Cristo, qaq nagui da qanachaalataxaqui hueto'ot Somaye da na'attaua'a Ñim Lo'onatac 'Enauacna. ₄Cha'aye So Cristo nacheso so qanachaalataxaqui. Qaq qom ivita da ñe'eguelaq da nachaxan, nache qami' nataqa'en qanachaxañi. Nache qanhuañiỹaua'a da llo'oxoyec Somaye.

₅Qaq ỹoqo'oye qami' iuen da ileu qanqa'eñi da qarqopitaxanaqtaiqui maye qauem. Qaica qome ca huetapeeguet aca sa lhua, qataq saishet qome da sa qanaỹamaxachiỹapec, qataq qanlliỹañi qome da qauem qarqopitaxanaqtaiqui, qataq saishet qome da choche qanmichiita'a da choche qalaỹoñiitasheguem ana qo'omi, cha'aye damaye 'eeta'am da qanatameetacot na ne'enaqtacpi maye saq 'en. ₆Cha'aye 'enauac ne'ena nachena na chegoqchigui da Ñim Lo'onatac 'Enauacna dalemataỹa nam saishet da ỹalaq. ₇Qaq qami' qauo'ocheetac co'ollaxa 'enauac ne'ena co'ollaq saxanaxa da qauauattoñi So Cristo. ₈Qalaxaye nagui no'on da qaỹa'axañiiuec 'enauac ne'ena: Saishet qome da qanoitac, qataq saishet qome da qanmichiita'a da qauo'ochec ca sa ỹaỹamaxañi ca qarỹai, qataq saishet da qasheuñiitac Ñim Lo'onatac 'Enauacna huo'otaq ca qoñiỹa'am shiỹaxaua, ₉qataq saishet da huo'o ca ỹatenachet ca lỹa, cha'aye qami' mashe sogote da qaualache da qarataxaqui maye ỹo'ottac da ñe'etaxaloxo. ₁₀Qataq nagui mashe dalaxaic da qoviitaigui qarataxaqui.

Ỹataqta 'eesa da qami' shiỹaxau' dalaxaiqa, qanquiquiita'aguet da qoñiỹa'am Ñim Lo'onatac 'Enauacna maye maiche qami' lo'onataqa qataq nquictauec da ỹataqta qauauattoñiita Ñimaye. ₁₁Qaq damaye saishet da huo'otaq nachera da yo'oqchigui da judío le'ec huo'otaq da saishet, huo'otaq ca huo'o ca na'anaxat na lo'oc huo'otaq ca qaica, qataq ca ỹaqa'a ca chegaqa'ague, huo'otaq nam sa naỹamaxatapec, huo'otaq ca nlatac huo'otaq ca sa nlatac. Cha'aye So Cristo nachaqsota 'oonolec imata, qataq hueta'aguet 'enauac na shiỹaxauapi.

₁₂Cha'aye Ñim Lo'onatac 'Enauacna ỹataqta qami' ỹauoteque, qataq qami' lca'agui'she, da yaqto' qami' lalamaqa'ate. Qaq ỹoqo'oye ỹataqta qami' choxonnataxanaxaiqa, qataq qami' huotaxanaqtaqaiqa, qataq sa qami' na'amqaanaxaiqa, qataq qami' huesotte' da qarataxaqui, qataq qami' hualaxaunaxaiqa. ₁₃Ñi 'oonolec da qoñiita ỹataqta nhualaxaune' ca lỹa qataq ichoxoren da huo'otaq huo'o ca ỹasouaxat. Cha'aye, nache 'eetec So Cristo da qami' ichoxore'n. ₁₄Qalaxaye ỹataqta ỹactec qome da qa'añiiñi da qarsoxoyiqui, cha'aye nachera da na'atta't 'enauac naqa'en na shiỹaxauapi. ₁₅Qami' qaiỹaxanalo da qana'ayeetaua'a da 'oonolec no'ocỹaxac, dam lo'ocỹaxac So Cristo. Qauaqaita'a da nlagaxayec maye chegoqo'ot So Cristo da ilo'ogue da qarquiyaqteỹaxaqui, qataq qantoñiitapeguec.

₁₆Qataq saishet da qaucoviỹa'ai da llo'oxoye'c naua lapaxaguenataxanaxaco So Cristo. Qataq da qauapaxagueñi ca qarỹai huo'otaq da qaua'añaqchichi qalaq ỹataqta qanaỹaanaxanaqchiñi. Qataq qauo'oñi na no'onecpi maye huetalec ana nere maye huetalec na la'aqtacpi Ñim Lo'onatac 'Enauacna, qataq qauo'oñi' naua no'onqa maye chegoqo'oto So Saqcha'a Na'añaxac Qui'itta, qataq qaỹa'añiitacot da qana'achecỹaxaqui Ñim Lo'onatac 'Enauacna ỹataqta imauec da qarquiyaqteỹaxaqui. ₁₇Qataq 'enauac nam qauo'oche huo'otaq cam qanasaqaiuec, ỹachaxan da ỹataqta 'eesa da qoquiitague' Som Qarataxala' Jesús. Qataq qaỹa'añiitacot da qana'achecỹaxaqui Ñim Lo'onatac 'Enauacna chegoqchigui dam qami' ỹo'oteque So Cristo.

₁₈Qaq qami' 'alpi maye mashe qauaroñi, ỹataqta qaualaqaiguet ca qarhuai, cha'aye nachera da lataxac acam ỹa'amaqteetac So Qarataxala'. ₁₉Qataq qami' ỹalleppi maye mashe qauaroñi, ỹataqta qauauochec aca qarhuai. Qataq saishet da saq qauyacñiỹapec acamaye. ₂₀Qataq qami' ñaqpiolec, ỹataqta qaualaqaigueta caua qarta'alli', cha'aye damaye ỹataqta ỹaỹamaxareeta So Qarataxala'. ₂₁Qataq qami' nta'alpi maye huo'o na qaỹa'alqui saishet qome da qanogoqchichi ca qaỹa'alqui, yaqto' saishet da qaica ca la'añaxac. ₂₂Qataq qami' nlatacpi, ỹataqta qaualaqaiguet ca yo'oqchigui qana'aco'oi ana'ana 'alhua. Saishet da nachaqrata da qami' ilotaguilo da yaqto' qami' ỹaỹamaxareete', nachaqrata da qauo'oche damaye souaxat da huesota qarquiyaqteỹaxaqui, qataq da 'enec qanqa'eñi So Qarataxala'. ₂₃Qaq camachaqca ca qauo'oche, qalaq ỹataqta qanasapacheetelec, 'eeta'am qanqa'eñi da nacheso So Qarataxala' Jesucristo da qauo'onataxañiitacot, qaq saishet da nacheca ca choche shiỹaxaua. ₂₄Cha'aye qami' mashe qauaỹaañi da Ñim Lo'onatac 'Enauacna ỹami' ca lsheetenaxanaxat maye iqataxaatapigui' nam lalamaxatpi, camaye nacheca ca nca'alaxa maye qaica ca loga't. Qataq qantooñita'ac da qauo'onataxañiitacot So Cristo maye ỹoqta 'eesa da qami' lalamaqa'ate. ₂₅Qalaxaye 'enauac nam ỹo'ottac ca sa ỹaỹamaxañi, qalaq Ñim Lo'onatac 'Enauacna ỹauo'o ca nhuaxanaguec, ipagaqchiichigui cam qauem maye ỹo'ottac. Cha'aye Ñimaye saishet da lca'atagui na shiỹaxauapi.