So lchoxonaxac so nta'a Nabucodonosor
1Qaq co'ollaq mashe dos vi'iye soua lo'onataxanaxaqui' da nta'a so Nabucodonosor, nache somaye huo'o so lchoxonaxacpi, qaq souaxat somayepi, nache se'eso nta'a ỹataqta huo'o da lachetataic, nache saishet da do'oche. 2Qaq huaña nache damaxasoxoneuga 'enauac som 'oiquiaxaipi, qataq som ilaviigui ca lỹa, qataq so 'iyaxaic lo'opi, qataq so ỹaanaxanaxaicpi, da yaqto' somayepi da'aqtaxanem somaye ca naigui se'eso lchoxonaxacpi. Nache somayepi jec da nachaateua'a so nta'a, 3nache se'eso nta'a 'enapec: Aỹem huo'o so ichoxonaxac, qaq aỹem ỹataqta huo'o da iuogoxo da sauotaique da saỹaten ca naigui somaye.
4Nache so ỹaanaxanaxaicpi ỹauota'aisalo naua la'aqtaqa na arameo da 'enapega so nta'a, 'eeta':
¡Nache 'eetai' qome da 'anca'altauec 'am nta'a! 'Am nta'a ñaq 'aua'aqtaxanem ne'ena 'aramaxashecpi cam 'archoxonaxac, nache qomi' 'am sa'aqtaxanaxam qome ca naigui.
5Nache so nta'a 'enapeco': Mashe secoua'ai cam 'eetec so ichoxonaxac, qalaxaye qami' da saishet da aỹem qaua'axachem cam 'eetec som ichoxonaxac, nache qami' qailaxachiguilo qome, qataq na qarma'aipi 'eeta'am qome ca logosheguem lasogoñi. 6Qalaxaye da aỹem qaua'aqtaxañim som sechoxootega, qataq cam naigui som ichoxonaxac, nache sauo'o qome ca qanmei, qataq qami' ñeqouagueque, qataq qami' sanema ca lta'araic qara'amaqchiqui. Qaq hua', ñaq aỹem qaua'aqtaxañim negue't som sechoxootega, qataq aỹem qaua'aqtaxañim cam naigui somaye. 7Nache som ỹaanaxanaxaicpi, qaltaq ỹe'eguelaxalec da ỹasat, 'eeta': 'Am nta'a, ñaq qomi' 'aua'aqtaxanema negue't co'ollaxa cam 'auchoxootega, nache qomi' 'am sa'aqtaxanaxam cam naigui camaye. 8Nache so nta'a ỹasat, 'eeta': Aỹem saỹaten da qami' qauauoitaique da chochaq qanquigaxacheeta de'era, cha'aye mashe qaua'aqaichigui dam iuennataxac. 9Qaq ỹoqo'oye da saishet da aỹem qaua'aqtaxañim som sechoxootega, nache 'enauac qami' da 'eeta'a't qome ca qanhuaxanaguiqui, cha'aye mashe qanaỹaañiitega't da aỹem qaỹa'añim cam qarasataxaqui maye choche natenataxanaxac, qataq qauem ca taỹa'a, cha'aye qauauoitaique da ñaralaxat ca iuennataxac. Ñaq aỹem qaua'aqtaxañim negue't som sechoxootega, yaqto' saỹaten nataqa'en da qanaloỹaua'a da aỹem qaua'axachem cam naigui. 10Nache 'enauac som ỹaanaxanaxaicpi ỹasateguet so nta'a, 'eeta': Ana 'alhua qaica ca ishet da 'am ỹa'axatem som 'auchoxootega. Qataq da lỹa 'eeta': Saỹauano' da huo'o ca nta'a, na'aictoxo' da 'amaqtaqaic qataq 'añaxaic, da iỹaxanot cam huo'o da no'onataguec, qataq ca ilaviigui ca lỹa, qataq ca ỹaanaxanaxaic da iỹaxaneua'a ca 'eeta'am de'era maye 'auỹaxaataique. 11'Am nta'a, dam 'auỹaxaataique, damaye ỹataqta huo'o da lqalaic, qaica ca ishet da ỹa'axat, nachenata nam atamnaxala'pi. ¡Qalaxaye namayepi ye saishet da ỹalectaigui nam shiỹaxauapi! 12Qaq so nta'a, co'ollaq hua'axaỹa de'era, nache ỹataqta dalemata, nache damaxasoxoolec da qaỹalauat 'enauac so ỹaanaxanaxaicpi ye Babilonia. 13Qaq co'ollaq qaỹa'axatec se'eso namaxasoxonaxac, nache qaỹe'eguenauga so Daniel qataq soua lỹa't, da yaqto' nataqa'en qaỹalaua't.
So Daniel ỹa'axat da naigui so lchoxonaxac so nta'a
14Qaq huaña nache so Daniel ỹataqta nchettac, qataq ntelañi co'ollaq detaxaỹot so Arioc, som lataxala' som nauaatalecpi so nta'a, maye mashe naỹamaxattac co'ollaxa da ỹalauat so ỹaanaxanaxaicpi. 15Nache inato' somaye, 'eeta': ¿Ta'ainco' ñi nta'a da ỹan de'era lamaxasoxonaxac, qataq da ỹataqta nque'elaxatta? Nache so Arioc da'aqtaxanem somaye dam huo'omshe huo'o de'era. 16Qaq huaña, nache so Daniel nqo'oneua'a so nta'a, nache nachoxonnot da ỹauo'o ca ldaqa' somaye da yaqto' da'aqtaxanem som dechoxootega so nta'a, qataq cam naigui. 17Qaq ime co'ollaxa nache taỹa so lma', nache da'aqtaxanema 'enauac de'era soua lỹa't, Ananías, Misael qataq so Azarías, 18da yaqto' iỹaxaaraique ca ltaunaxanaxac Ñim Lo'onatac 'Enauacna, maye neto'ot na piguem, souaxat de'era saqcha'a, da yaqto' saishet da qaỹalaua't, da lỹaueegueto so laỹepi ỹaanaxanaxaicpi ye Babilonia. 19Qaq nacheso se'eso pe da so Daniel, qaỹachaxana som saqcha'a, huaigui so lauanaqchec, qaq huaña nache so Daniel ỹo'oxoren Ñim Lo'onatac 'Enauacna maye neto'ot na piguem 20nache 'eeta' da la'aqtac:
«¡Nache 'eetai' qome da qaỹo'oxoreetac da le'enaxat Ñim Lo'onatac 'Enauacna,
cha'aye Ñimaye lalamaxat da naỹaanec, qataq da na'añaxac!
21Ñimaye naralaxa't naua na'axa'te qataq naua laloqo'ote,
nqat ca nta'a qataq ỹauo'o ca nta'a,
qataq ỹanem da laỹaanec nam ỹaanaxanaxaicpi,
qataq ỹanem da laỹaanataxanaxac nam ỹaanataxanaxaicpi.
22Ñimaye ỹachaxan cam huo'o da lqalaic qataq cam saqcha'a,
qataq ỹauatton cam huetaigui na napalaxa,
cha'aye Ñimaye huetaigui na yo'oqchiguiñi.
23'Am, maye 'Am Natamnaxala' so ita'alpi,
'Am sanot da ña'achecỹaxac qataq 'Am sho'oxoren,
cha'aye 'auo'ot da aỹem ỹaanaxanaxaic qataq aỹem 'añaxaic,
cha'aye nagui aỹem 'aỹa'anem da saỹaten dam seỹaxanaqtaique,
qataq qomi' 'auaỹaanaxanaxaneque dam ỹo'ot da lhuogoxo ñim nta'a.»
24Qaq co'ollaq ime de'era, nache so Daniel nqo'oneua'a so Arioc, som ỹamaq co'ollaxa so nta'a da ỹalauat som ỹaanaxanaxaicpi ye Babilonia, nache 'enapego', 'eeta': Saishet qome da 'aualauat nam ỹaanaxanaxaicpi. Ñaq aỹem 'auauegueua'a cam nta'a, yaqto' sa'aqtaxanem 'enauac da naigui som lchoxonaxac. 25Nache so Arioc sanaỹaloxon da ỹauegueua'a so Daniel so nta'a Nabucodonosor, nache so Arioc 'enapega so nta'a, 'eeta': Nam ncoñeteguishecpi maye chegaqa'a ye Judá, huo'o nam ỹale selalec maye ishet da 'am ỹa'axatem 'am nta'a, cam naigui so 'archoxonaxac. 26Qaq huaña, nache so nta'a 'enapega so Daniel, maye nataqa'en le'enaxat Beltsasar, 'eeta': ¿Ishet peta'a da aỹem 'aua'aqtaxanem som sechoxootega qataq cam naigui som ichoxonaxac? 27Nache so Daniel ỹasat, 'eeta': Qaica ca ỹaanaxanaxaic, huo'otaq ca ilaviigui ca lỹa qataq ca huo'o da no'onataguec, huo'otaq cam napaxagueetega ana huaqaañipi da ishet da 'am da'aqtaxanem de'era saqcha'a, maye huotaique da 'auaỹaten 'am nta'a. 28Qalaxaye huo'o Ñim Lo'onatac 'Enauacna maye neto'ot na piguem, maye ishet da ỹachaxan cam saqcha'a, qaq Ñimaye nacheñi ñi 'am ỹaỹaanaxanaxanec cam ñaq taỹa'a da yo'oq. 'Am nta'a, aỹem 'am sa'aqtaxanen som 'archoxonaxac qataq so 'arauanaqchec co'ollaq 'auo'ocheta: 29'Am nta'a, co'ollaq qouetalec so 'armala', nache 'auennataxaateguelec cam ñaq taỹa'a da yo'oq, qaq Ñim ỹachaxan cam saqcha'a, 'am ỹachaxana damaye. 30Qaq nataqa'en aỹem ỹaỹaanaxanaxanec de'era saqcha'a, qalaxaye saishet da souaxat da aỹem ỹaanaxanaxaic da ñapacalec 'enauac na laỹepi shiỹaxauapi, maye nacherata da yaqto' aỹem 'am sa'aqtaxanem 'am nta'a dam naigui so 'archoxonaxac, da yaqto' 'am nta'a ishet da 'auaỹaten som 'arhuennataxac maye 'am nvita co'ollaxa. 31'Am nta'a, co'ollaq 'auchoxootac nache 'aulota'a so nachattañi ne'enaqtac, maye ỹataqta lta'araic qataq qashelecteguiñi, qataq chaqaic da lataxac. 32Na lqaic se'eso ne'enaqtac qalaq imauec da oro, qaq ana ltogue qataq naua lhua'q qalaq lcat plata, qaq ana da'am qataq naua lteltaye qalaq 'enauac da lcat bronce, 33qaq naua lchel qalaq lcat, qaq naua lapia'ate qalaq huo'o na huaña na lcat qataq nqatelliguishec 'alhua. 34Qaq 'am nta'a, co'ollaq ña 'aulota'a, nache huo'o so coma' depoxoỹauec chegoqotcheguema aso qasoxonaxa, qaq na'aictaxa da qaica ca ỹamaxauec somaye, qalaq naañi nache tachiguilo naua lapia'ate se'eso ne'enaqtac, nache ilaxachigui. 35Qaq huaña nache so lcat, nqatelliguishec 'alhua, bronce, plata qataq so oro, 'enauac somayepi da dolachigui nache nda'a't lsoche, 'eeta'am da ivita ye napaxaỹaxa da qaichegoq na trigo, nache na la'at ỹaỹoxonaqchet na lvi, nache qaica ca no'onaxatañi. Qalaxaye som coma' maye ilaxachigui co'ollaxa se'eso ne'enaqtac, somaye nañigui da late'erai qasoxonaxa, nache ỹataqta imattalec ana 'alhua. 36Qaq 'eso som 'archoxonaxac co'ollaxa 'am nta'a. Qaq nagui, 'am sa'aqtaxanem dam naigui se'eso 'archoxonaxac. 37'Am nta'a, 'am ỹataqta 'am 'amaqtaqaic, 'anapacalec 'enauac na laỹepi nta'alpi, cha'aye Ñim Lo'onatac 'Enauacna maye neto'ot na piguem, 'am ỹanem co'ollaxa da 'aro'onataxanaxac, qonec, 'ara'añaxac qataq da 'ayo'oxoyec 38qataq da 'aulo'ogue 'enauac na 'alhuapi maye hueta'a na shiỹaxauapi, shiguiỹacpi qataq na maỹopi, Ñimaye 'am ỹanem 'am nta'a, da 'aulo'ogue 'enauac namayepi, maye nache 'am nqaic, maye nda'a't oro. 39Qaq 'am nta'a, qom ime de'era 'aro'onataxanaxac, nache huo'o qome ca lỹa nta'a maye nquicchiguiñi da la'amaqchec, qaq qom ime camaye nache huo'o ca lỹa nta'a maye nachera da naigui so lcat bronce, nache camaye ilo'ogue qome 'enauac ana 'alhua. 40Qataq anac qome ca lỹa nta'a, maye ỹataqta 'añaxaic 'eeta'am na lcat, nache camaye 'eeta'am qome na lcat da huo'o na ilaxachigui, qaq 'era da 'eetec que'eca nta'a da ilaxachigui qome 'enauac ca laỹepi nta'alpi. 41'Am nta'a, nataqa'en 'aula'a co'ollaxa da huo'o na huaña naua lapia'ate qataq naua lqona da nqatelliguishec 'alhua qataq huo'o na huaña na lcat, qaq de'era naigui ca no'onataxanaxac maye colaxagui qome, qaq na'aictaxa da ỹalectauo ca la'añaxac ca lcat, qalaxaye 'am nta'a 'aulota'a co'ollaxa da nataqa'en ỹaleeguet na nqatelliguishec 'alhua. 42Qaq naua lqona qalaq huo'o na huaña na lcat, qalaxaye nataqa'en huo'o na huaña na nqatelliguishec 'alhua, qaq de'era nache naigui da que'eca no'onataxanaxac qaramta qome, qalaxaye nataqa'en saishet da da'añi. 43Qaq 'am nta'a, dam 'eetec da 'aula'a co'ollaxa so lcat da ỹalecta'aguet so nqatelliguishec 'alhua, qaq 'era da 'eetec qome da lo'onataxanaxac que'eca nta'alpi da huaxaỹa't, chegoqchigui da naronaxac da naỹamaxara't, qalaxaye saishet qome da ỹañoxot da ỹoqta huaxaỹa't, 'eeta'am da 'eetec ca lcat da saishet da ỹalecta'aguet ca nqatelliguishec 'alhua. 44Qaq qom ñaq huetaigui da lo'onataxanaxac que'eca nta'alpi, nache Ñim Lo'onatac 'Enauacna maye neto'ot na piguem, nauaxaỹaxaasheguem qome ca no'onataxanaxac maye saishet qome da nlaguiñi, qataq saishet qome da anac ca laỹepi ỹotta'a't shiỹaxauapi da ilo'ogue, nacherata da camaye nlaxaañi da lo'onataxanaxac na laỹepi nta'alpi, qaq camaye chochaq tatec qome. 45Qaq 'am nta'a, 'era da naigui so coma' maye 'auauaachigui co'ollaxa da depoxoỹauec, chegaqalec aso qasoxonaxa maye qaica ca ỹamaxauec, som coma' maye ỹe'eguelaxa naqa'en da lsoche so lcat, so bronce, qataq so nqatelliguishec 'alhua, so lcat plata qataq so oro. Qaq Ñim 'Amaqtaqaic Lo'onatac 'Enauacna, 'am ỹachaxana 'am nta'a cam ñaq taỹa'a da yo'oq. Qaq som 'archoxonaxac ỹataqta 'eesa, qataq dam naigui ỹataqta ipacchigui qome. 46Qaq huaña nache so nta'a Nabucodonosor, ỹa'aroto naua l-llectel so Daniel, qataq nqollemñi nache iviraxata'aguet na latap na 'alhua, ime nache damaxasoxoolec da qoỹaneuo aca nachetaqtaxanaqte qataq ca nchenaxanaxat maye ama na laita. 47Ime nache 'enapega so Daniel, 'eeta': Ỹataqta 'eesa da Ñim Qanatamnaxala'ai ỹataqta lta'araic, napacalec na laỹepi atamnaxala'pi, qataq nacheñi Ñim Lataxala' nam nta'alpi, qataq nacheñi ñim ỹachaxan cam saqcha'a, cha'aye 'am ishet da 'auachaxan de'era saqcha'a. 48Qaq ime, nache so nta'a ỹanem so Daniel, so no'onataxanaxac maye huo'o da la'amaqchec, qataq ỹauo'o so qalota qataq ỹo'oxoraq nmepi, qataq nataqa'en ỹanem da ilo'ogue 'enauac som 'alhuapi ye Babilonia, qataq 'amaqtaqaic lataxala' 'enauac som ỹaanaxanaxaicpi yi'iye 'alhua. 49Qataq souaxat da lquiquiaxac so Daniel, nache so nta'a ỹanema soua, Sadrac, Mesac, qataq so Abednego, da no'onataxanaxac maye huo'o da la'amaqchec yi'iye 'alhua Babilonia, qaq so Daniel qalaq nache ỹalectaigui so ltauapi so nta'a.
