Da nauanaqchec co'ollaq qaila'alo soua cuatro shiguiỹac
1Qaq so la'auaxanec vi'i da lo'onataxanaxac so Belsasar ye Babilonia, nache so Daniel huo'o so lchoxonaxac, qataq so lauanaqchecpi. Qaq co'ollaq nlouec, nache ỹiyiñi nam lataxacpi maye ỹataqta huo'o naq 'enec naqa'en. Qaq 'era dam ỹiyiñi somaye: 2«Aỹem so sechoxootac, nache sela'alo soua cuatro la'a'che, maye ỹasheerelec naxa aso auaxai late'erai, nache ỹataqta iraxan na 'etaxat. 3Qaq nque'elaxatta da chegoqchiyingui aso auaxai, soua cuatro shiguiỹac maye ỹataqta lta'al, qataq ỹotta'a't da lataxa'c. 4So hua'auchiguiñi da nnoxoosheguem qalaq 'eeta'am na llon, qalaxaye huo'oi naua laua't 'eeta'am na vi'ic. Qaq so ñaq semeteetac, nache qanapo'c soua laua't, nache qanachalataxaañi da 'eeta'am qanqa'en na shiỹaxaua da nachattañi, nache ye lapio'oxo ỹe'eguelaxa da 'eeta'am na lapio'oxo na shiỹaxaua. 5Qaq so lỹa shiguiỹac maye ca'atalec somaye, qalaq 'eeta'am na oso, qalaxaye somaye ỹacasheguem na 'oonolec laỹe, qataq netaguilo naua lhue soua tres ncheshe'ete, nache sa'aqchigui da qoỹenapega, qoỹeeta': ‹¡'Asoma qojec, nache qollec na lapat maicheye da 'auaỹemec!› 6Qaq so lỹa shiguiỹac qalaq 'eeta'am na sauaxaic, qalaxaye cuatro soua laua't netrelec na l-laq, qaq nataqa'en sela'a da cuatro soua lqaigo, qataq qoỹanem da la'añaxac da ilo'ogue da no'onataxanaxac. 7Qaq som pa'atec shiguiỹac maye sela'a co'ollaq huaigui so ỹauanaqchec, somaye ỹataqta chaqaic, qataq ỹo'ot da ñi'iỹaxa, qataq qaica ca 'ena'am da la'añaxac. Somaye huo'oi soua ỹataqta late'el lhue lcat, nache chec 'enauac nam huo'o, qataq icolaxattac, qataq petapigui nam lli'iỹoxot. Qaq se'eso shiguiỹac ỹataqta huaỹoqtec da lataxac, saishet da 'ena'ama soua lỹa't maye sela'alo co'ollaq sechoxootac, cha'aye na lqaic somaye diez aso lcouepi. 8Qaq so ñaq selota'a aso lcouepi somaye, nache sauaachigui da chegoqchiguingui asomayepi, da nnoxoosheguem aso lcoue lỹa maye saq 'amaqtaq, qaq huaña nache qanapo'c soua tres lcoue, da yaqto' huo'o ca ldaqa' asom pa'atec lcoue maye nnoxoosheguem, qaq asomaye huo'oi naua la'ai'te, 'eeta'am na shiỹaxaua, qataq huo'o so alap maye qalota da napagaqaanaxac da detaqtac.
Ñim Nataxala' nmit 'enauacna
9Qaq so ñaq semeteetac somaye,
nache qaỹauo'o aso so'onaxaquipi,
nache huo'o so 'oonolec ỹa'axaiquiolec nso'ooñi.
Qaq soua alogo somaye ỹataqta ỹapaga'q 'eeta'am ana aloñi,
qaq na laue qalaq 'eeta'am na qui'itta qagueta laue.
Qaq na le'eraxa asom nso'onaxaqui,
qataq soua lasaxannal asomaye,
qalaq 'eeta'am na le'eraxa na norec,
10qaq nache chegoqtegueua'a somaye so la'auaxac na norec.
Qataq do'onataxaatacot somaye som qalota maye sa qaivi' da naloqten.
Qaq so qanayecot so ntaxaỹaxac
nache qaỹauachigui aso nerepi.
11Qaq aỹem semeteetac, ỹataqta seleuagui souaxat naua napagaqaanaxaiqa la'aqtaqa maye nasaxare'c aso saq 'amaqtaq lcoue, qaq so ñaq semeteetac, nache sauaachigui da qaỹalauat so shiguiỹac lta'araic, nache ỹataqta qaichecapigui, ime nache qaỹasaxangui so norec da yaqto' ỹavic. 12Qaq soua lỹa't shiguiỹac lta'al, nataqa'en qaiuotaxanec da la'añaxa'c, qalaxaye nache nca'altraue'c qanqa'en, choche ivittra'a som loga't. 13Qaq aỹem nache shecto'ot da semeteetac som ỹauanaqchec se'eso pe. Nache nque'elaxatta da:
Sela'a so 'eeta'am na shiỹaxaua llalec nactaigui so lo'oc na piguem,
nache somaye taỹa so hueta'a som ỹa'axaiquiolec,
nache qanquigaxateua'a so hueta'a somaye.
14Nache somaye qoỹanem da la'añaxac,
llo'oxoyec, qataq da no'onataxanaxac,
nache na ỹotta'a't shiỹaxauapi,
qataq nam ỹotta'a't naua la'aqtaqa do'onataxanot somaye.
Qaq dam la'añaxac somaye qalaq nache 'eetai' qome,
qataq dam lo'onataxanaxac saishet qome da nlaguiñi.
15Qaq aỹem Daniel, ñanomteguet da icolanaxa da aỹem loxonec, qataq lta'araic da iuogoxo souaxat se'eso sauaachigui, 16nache ñiquigueua'a so 'oonolec maye hueta'a yi'iye nachattañi, nache seỹaxanot da aỹem da'aqtaxanem cam naigui 'enauac se'eso sauaachigui. Nache somaye ỹasat da aỹem da'aqtaxanem, nache, 'eeta': 17Se'esoua cuatro shiguiỹac lta'al, naiguilo caua cuatro nta'al da ilo'oguelo qome 'enauac ana 'alhua.
18Qalaxaye ime qome nache da no'onataxanaxac qoỹanem na nhuo' le'ecpi maye lalamaxat Ñim Nataxala' maye Nataỹaña 'Enauacna, nache chochaq tatec qome da lalamaxat. 19Qaq aỹem sauotaique da ỹoqta saỹateeta ca naigui som pa'atec se'esoua cuatro shiguiỹac maye sauaachigui, cha'aye da lataxac somaye ỹataqta chaqaic, soua lhue qalaq lcat, qaq soua nna'ache qalaq bronce, qataq chec 'enauac nam huo'o, icolaxattac qataq petapigui na lli'iỹoxot. 20Qaq aỹem nataqa'en sauotaique da ỹoqta saỹateeta ca naigui asa'aso diez lcouepi, qataq aso lcoue maye saq 'amaqtaq, qataq som alap maye huo'o da napagaqaanaxac da detaqtac, qaq asa'aso saq 'amaqtaq lcoue ivitta'a da napacaleguete soua lỹa't lcoue, nache soua tres lỹa't lcoue naayiñi da yaqto' huo'o ca ldaqa' asomaye.
21Qaq huaña nache sauaachigui da asa'aso saq 'amaqtaq lcoue, deloctague' na nhuo' le'ecpi maye lalamaxat Ñim Lo'onatac 'Enauacna nache loxonec, 22choche ivitta'a da nvi' so ỹa'axaiquiolec, nache da do'onataxana da nalochiguiñi lataxac da nmit na nhuo' le'ecpi maye lalamaxat Ñim Nataxala' maye Nataỹaña 'Enauacna, cha'aye mashe ivita so laloqo' da nam nhuo' le'ecpi maye lalamaxat Ñim Lo'onatac 'Enauacna ỹaconeguet da no'onataxanaxac.
23Nache somaye, 'eeta':
Som pa'atec se'esoua cuatro shiguiỹac lta'al,
somaye naigui cam pa'atec que'ecaua cuatro nta'al
maye huo'oi qome ana'ana 'alhua,
qaq camaye saishet qome da 'eeta'am ca laỹepi.
Qaq camaye chec qome 'enauac na huetalec ana 'alhua,
petapigui qataq nlaxaañi.
24Qaq aso diez lcouepi qalaq naigui caua diez nta'al
maye ilo'ogue qome que'eca no'onataxanaxac.
Qaq da ime da lo'onataxanaxac caamaye,
nache qaltaq inoxoneuo ca lỹa nata'a,
qaq camaye sanateneguet qome da lataxac cam hua'auchiyiñi,
qataq nqa't qome caua tres que'ecaua nta'al.
25Qataq isheueetac qome Ñim Nataxala' maye Nataỹaña 'Enauacna,
qataq nquigaxattañi qome nam nhuo' le'ecpi maye lalamaxat Ñimaye,
qataq nmitaique qome ca lataxac da
naralaxat na lqataxacpi Ñim Lo'onatac 'Enauacna,
qataq nam lataxacpi da na'amqaanataxanaxac,
nache na nhuo' le'ecpi maye lalamaxat Ñim Lo'onatac 'Enauacna,
huetalec qome da la'añaxac camaye,
choche ivittre'c caua tres vi'iye qataq ca laiñi ca lỹa vi'i.
26Qalaxaye camaye qanmit qome
nache qaiuotaxanec da la'añaxac,
nache ivitta'a da imauec da qanlaxaañi.
27Qaq da lo'onataxanaxac, la'añaxac
qataq da llo'oxoyec
'enauac nam nta'alpi maye netalec ana 'alhua,
qoỹanem qome nam nhuo' le'ecpi maye lalamaxat
Ñim Nataxala' maye Nataỹaña 'Enauacna.
Qaq dam lo'onataxanaxac qalaq chochaq tatec qome,
nache 'enauac qome na nhuo' le'ecpi ana 'alhua
do'onataxanot qataq ỹalaxaguet.
28Qaq 'ena na loga't de'era na'aqtaxanaxac. Qaq aỹem Daniel, ỹataqta sa saỹaten ca sheetec, qataq ỹataqta ñapagaqtec, qalaxaye qaica ca sa'aqtaxaateguem se'eso sauaachigui co'ollaxa.»
