Da natamnaxac so Daniel
1So Darío maye llalec so Asuero, som chegoxoguet na medos, somaye ilotague' co'ollaxa na caldeopi. 2Qaq so la'auaxanec vi'i da lo'onataxanaxac da nta'a somaye, nache aỹem Daniel, ñapaxagueetega aso lere so na'aqtaxanaxanec Jeremías, co'ollaq Ñim Nataxala' ỹa'axatem somaye da qom inoxoorec caua setenta vi'iye nache ime da qanlaxaañi ye Jerusalén. 3Qaq huaña, nache ñatamen da ñachoxonnot Ñim Nataxala' maye Ñatamnaxala', qataq ñeqouaqchet qataq saayiñi soua sansatte' anogo, qataq ñeso'ongui so alo. 4Nache ñatamnot, qataq sa'aqtaxanem Ñim Nataxala' maye Ñatamnaxala', sheeta': 'Am Nataxala', maye 'Aro'onatac 'Enauacna 'Am lta'araic qataq 'Am 'añaxaic, maye nache 'eetai' naxa da 'aupacchigui nam 'auachaxanapecpi, qataq 'auachaxana da 'arauotaxanaqtaic nam 'Am ỹauotecpi, qataq ipaqueelec nam 'aramaxasoxonaxacpi: 5Qomi' huo'o co'ollaxa da qarasouaxashet, qataq so'otaq da qauem, qomi' qauemaiqa qataq sa salaxasoq, qataq saishet da 'am seuennataqa'a, qataq qolqa'ai co'ollaxa na 'aramaxasoxonaxacpi, qataq na 'arqataxacpi. 6Qataq saishet da salaxasoxoguet co'ollaxa so 'aramaxashecpi maye 'ara'aqtaxanaxanecpi, som da'aqtaxanem co'ollaxa da 'are'enaxat som qomi' ilotegueto nta'alpi, qataq so qarataxala'pi, qataq som hua'au qarta'alpi, qataq 'enauac so nhuo' le'ecpi ye Israel. 7'Am Nataxala', ỹataqta no'on da 'arataxac, qalaxaye qomi' judiopi, nagui ỹataqta huo'o da qara'agaxa, nam hueta'a ye Jerusalén qataq na laỹepi Israel le'ecpi, nam saqaỹapeque, qataq na qaỹoqta maye hueta'a nam ỹotta'a't 'alhuapi maye 'auamaxa co'ollaxa, souaxat da 'am saỹalaxaguet. 8'Am Nataxala', qomi' qataq nam nta'alpi maye qomi' ilotegueto, qataq nam qarataxala'pi, qataq nam qarta'alpi, ỹataqta huo'o da qara'agaxa, souaxat da 'am hueto'ot na qarasouaxashetpi. 9Qalaxaye 'Am Nataxala', qataq Qanatamnaxala', 'am choxonnataxanaxaic, qataq ishet da 'auapalaxat ca nasouaxashet. Qomi' 'Am sataỹaqa'aguet co'ollaxa 10qataq saishet da 'am ña'axaỹaxanaxa 'Am Nataxala' maye 'am Qanatamnaxala', qataq saishet co'ollaxa da salaxasoxoguet na 'arapaxaguenataxanaxacpi maye qomi' 'aỹa'anema, chegoqchigui 'anqa'en so 'aramaxashecpi maye 'ara'aqtaxanaxanecpi. 11'Enauac na Israel le'ecpi saỹalaxaguet na 'arapaxaguenataxanaxacpi qataq 'aramaxasoxonaxacpi, ỹoqo'oye qomi' taleguete dam qauem, qataq da qoỹan co'ollaxa na'aqtac, maye nanettalec aso lmalate na lamaxasoxonaxacpi so 'aramaxashec Moisés, cha'aye huo'o da qarasouaxashet 'am hueto'ot. 12'Am co'ollaq qomi' 'anamaxalo so lta'araic qauem, nache 'aupaqueelec som 'arasauaqtaxanaxac maye 'aua'axatta'a co'ollaxa da qomi' taleguete, qataq som nta'alpi maye qomi' ilotegueto co'ollaxa, cha'aye saỹauano' co'ollaxa da huo'o ca huaña ana 'alhua, cam 'eeta'am de'era nhuaxanaxanaxac maye talec ye Jerusalén. 13Qaq 'enauac de'era qauem qomi' taleguete, nache ipacchigui som nanettalec aso lmalate na lqataxacpi so Moisés, qalaxaye qomi' saishet da 'am ñimitaqaique 'Am Nataxala' maye 'Am Qanatamnaxala', qataq saishet da saxanaxañi nam qauem maye so'otaqtacpi, qataq saishet da qolaxague dam 'eesa lataxac. 14Qaq ỹoqo'oye 'Am Nataxala', 'auqataxanai' co'ollaxa de'era qauem, nache qomi' 'anamaxalo da qomi' taleguete, cha'aye 'am Nataxala' maye 'am Qanatamnaxala', ỹataqta nalochiguiñi 'enauac nam 'auo'otpi, qalaxaye qomi' saishet co'ollaxa da 'am ña'axaỹaxanaxa. 15'Am Nataxala' maye 'am Qanatamnaxala', 'auachaxan co'ollaxa da lta'araic 'ara'añaxac, co'ollaq 'anqateeguesop ye Egipto na 'aralamaxat nhuo' le'ecpi, qaq nache chegoqchiguiña co'ollaxa da 'auo'ot da la'amaqchec da 'are'enaxat, nache ivitta'a nagui, qalaxaye qomi' huo'o da qarasouaxashet, qataq so'otaqtac na qauem. 16'Am Nataxala', qomi' saỹatenaq da 'am choxonnataxanaxaic. Ñaq qomi' 'anqouagueque taxa da ca'ai 'anqa'en ye Jerusalén da 'arayeloxo, cha'aye yi'iye huaqta'a't nỹecpi qataq añi qui'itta qasoxonaxa maiche 'aralamaqte. 'Enauac na ỹotta'a't shiỹaxauapi maye lauoreuapi ye Jerusalén, ỹataqta ỹe'eetac yemaye, qataq na 'aralamaxat nhuo' le'ecpi, souaxat nam qarasouaxashetpi, qataq nam lasouaxashetpi som hua'au qarta'alpi. 17'Am Qanatamnaxala', ñaq 'ana'axaỹaxana da natamnaxac qataq da nachoxonnaxac ne'ena 'aramaxashec, ñaq 'auo'ot da la'amaqchec da 'are'enaxat 'Am Nataxala', nache 'auachegoxotchigui da 'arsoxoyec da 'auamata'a dam huaigui aso 'aralamaqte atamnaxaqui maye ỹo'ot da naquicoxo. 18'Am Ñatamnaxala' ñaq aỹem 'auqocha'a, qataq aỹem 'ana'axaỹaxana, ñaq 'aulochigui da qanlaqtaguec, qataq da nlaqtaguec yem huaqta'a't nỹecpi yem huaña naxa da qaiỹaxana da 'are'enaxat. Saishet da so'otaq da qarỹaxanaxac da sepia'aqtalec ca no'on qarataxac, maye nacherata dam lta'araic 'archoxonnataxanaxa. 19¡'Am Nataxala', 'Am Nataxala'! ¡Ñaq qomi' 'aua'axaỹalo, qataq qomi' 'auchoxore'n! ¡Ña qomi' 'auqocha'alo 'Am Nataxala', nache 'auanac da qomi' 'autaua'n! ¡Qaq souaxat da 'arauotaxanaqtaic da qoneta 'Am Ñatamnaxala', qataq souaxat nam huaqta'a't nỹecpi, qataq souaxat na 'aralamaxat nhuo' le'ecpi, maye iỹaxaatega da 'are'enaxat, nache sa 'anaỹaloxon qome da 'auanac!
Qaỹa'axatta'alo soua setenta semanas
20Qaq aỹem nache shecto'ot da ñatameetac, qataq da sa'axattac nam ỹasouaxashetpi, qataq na lasouaxashetpi na ihuo' Israel le'ecpi, qataq saatacot da ñachoxonnaxac Ñim Nataxala' maye Ñatamnaxala', seỹaxaateguelec añim qui'itta nqasoxonaxa. 21Qaq so ñaq ñatameetac, nache so Gabriel, som aỹem nachaxana co'ollaq huaigui so hua'auñi ỹauanaqchec, somaye anac huaỹotac da naỹa ye soota'a. Qaq da lviraxac somaye, hua'c da huetoigui so laloqo' naxa da qoỹanot Ñim Nataxala' ana nachetaqtaxanaqtepi ye avit. 22Nache aỹem 'enapega, 'eeta': Daniel, aỹem ñanac nagui da yaqto' 'am saỹaanaxanaxanec de'era. 23Cha'aye co'ollaq choche 'anatamen, nache Ñim Lo'onatac 'Enauacna 'am ỹasateguet. Qaq aỹem ñanac da 'am sa'axatem dam lasataxac Ñimaye, cha'aye Ñim Lo'onatac 'Enauacna ỹataqta 'am ỹauotec. Qaq nagui, ỹataqta 'ana'axaỹaxaachigui de'era, yaqto' 'auaỹateeta da naigui som 'arauanaqchec:
24Iuen qome da inoxonaqchetrec caua Setenta semanas nam 'arhuo' le'ecpi,
qataq na qui'itta huaqta'a't nỹecpi maye 'aralamaxat,
da yaqto' nache tachiguiña naqa'en da lle'etaxaloxo qataq da lasouaxashet,
qataq yaqto' ỹaconeguet ca nchoxonnataguec souaxat nam qauempi,
nache chochaq tatec qome naqa'en da na'ayiñi da nalochiguiñi lataxac,
yaqto' ipacchigui qome som 'arauanaqchec
qataq som 'ara'aqtaxanaxac, qataq da qaiqui'itaxat yem saqaishetapec.
25Qaq iuen da 'auaỹaten qataq 'auaỹateeteguet de'era, 'eeta':
Chegoqchiguiña qome cam laloqo' da qaỹamaxasoxoolec
da qañe'eguelaxatsheguem qataq da qaltaq qano'oxoosheguem ye Jerusalén,
nache ivitta'a ca lviraxac cam nataxala' maye nca'aguishec,
nache ỹapacrauec qome caua siete semanas,
qataq ca nqa'aicpi qataq ca npaqtaxanaxatpi
maye qaltaq qano'oxoosheguem qome ye Jerusalén
qalaq huetaiguilo caua sesenta y dos semanas,
qalaxaye huaigui qome ca lta'araic naquicoxo.
26Qaq qom inoxoorec caua sesenta y dos semanas,
nache qanqat da nachaalataxac cam nataxala' maye nca'aguishec.
Nache ye Jerusalén qataq añi atamnaxaqui ilaxachiguilo qome
cam shiỹaxauapi maye nalleppi cam nta'a maye anac qome.
Qaq ỹataqta nque'elaxatta qome que'eca loga't,
'eeta'am da lviraxac ca ndep.
Qataq huo'o qome ca nlaqtaxanaxac
qaq camaye vi'iiguet qom ime ca alaataxac.
27Qaq huaigui qome ca lỹa la semana nache que'eca nta'a
naỹamaxate' qome ca qalota shiỹaxauapi,
qalaxaye ca laiñi que'eca la semana,
nache ỹa'axaneguet qome na nachetaqtaxanaxatpi
maye qaỹavigaxatta, qataq ana laỹe nachetaqtaxanaqtepi.
Qaq huo'o qome ca ỹataqta qauem qaỹo'ot da hualec qanqa'en
añi nca'atoxonaxalate maye lmalate na nachetaqtaxanaxat qaỹavigaxatta,
nache ivitta'a da cam nlaqtaxanaxac maye qalapaxañi co'ollaxa talec cam ỹo'ot de'era qauem.»
