So Moisés nqateeguesop ye Horeb so Israel le'ecpi
1Qaq 'era da la'aqtac co'ollaxa so Moisés da 'enapega so Israel le'ecpi, huaña ye toolec 'alhua ye Arabá, yem pa'aigue da nala' lliguisheguem ye Jordán maye nalotta aso Auaxai Togaxarai, qataq sa qaỹapeque ye huaqta'a't nỹecpi ye Parán, Tofel, Labán, Haserot qataq ye Dizahab. 2Qaq ivi' soua once na'axa'te da qanayectalec so nqa'aic maye taalec añi qasoxonaxa Seír, qaỹachegoqchiguiña co'ollaxa añi qasoxonaxa ye Horeb ivitta'a ye Cadés Barnea. 3Qaq so la'auaxanec na'a'q so ca'agoxoic once so vi'i cuarenta, nache so Moisés da'aqtaxanem co'ollaxa so Israel le'ecpi da lamaxasoxonaxac Ñim Nataxala'. 4Qaq damaye huetoigui co'ollaq mashe ime da loxonec so Sijón, so lta'a so amorreopi maye lma' ye Jesbón, qataq so Og maye lta'a na netaña ye Basán qataq ilotague' so netaña ye Astarot qataq ye Edrey. 5Qataq co'ollaq ñaq netaña ye pa'aigue da nala' lliguisheguem ye tala Jordán ye 'alhua Moab, nache so Moisés da'aqtaxanem co'ollaxa so Israel le'ecpi de'era napaxaguenataxanaxac, 'eeta':
6«Da la'aqtac Ñim Nataxala' maye Qanatamnaxala', co'ollaq huaña ye Horeb, 'eeta': ‹qami' mashe qaỹoqtegue da qoviitalec ana'ana qasoxonaxa. 7Qaq ỹoqo'oye qoqui qome, qanqo'oñiỹa aye qasoxonaxapi maye lalamaqte na amorreopi, qataq na lauoreua 'alhuapi ye Arabá, qasoxonaxapi, qataq ye nalochiguiñi 'alhua ye Néguev, qataq naua loiguiye aso auaxai, qataq ye na'alhua na cananeopi qataq ye Líbano, nache ivitta'a ye lta'araic tala Éufrates. 8Cha'aye Aỹem, qami' sanema da qaralamaxache, qaq nache qoqui da yaqto' qoñiỹalec yemaye, cha'aye sanem co'ollaxa da ỹa'aqtac so Abraham, Isaac qataq so Jacob da sanem yi'iye 'alhua qataq nam chegoxoguetpi soomaye.›»
Da 'eetec da qalca'aique so nataxala'pi maye nmit na lasouaxashet so Israel le'ecpi
9«Qaq se'eso na'a'q qami' sheetegalo, sheeta': ‹Da aỹem 'oonolec nache saishet da qami' ñalo'ogueta da qami' selotegueto. 10Cha'aye Ñim Nataxala' maye Qanatamnaxala'ai, ỹataqta qalota naqa'en na qoyalquipi, 'eeta'am ye lcata ana huaqaañipi na piguem. 11¡Qaq Ñim Nataxala' maye Natamnaxala' so hua'au qarta'ailpi, ivi' ye mil ye lcata da qami' nquigaxatrec. Qataq qami' ichoxore'n, qaq nache ipacchigui da ỹan la'aqtac co'ollaxa! 12Cha'aye da aỹem 'oonolec, nache saishet da ñalo'oguet da saỹamaxaañi 'enauac na qanpe'enaxaqui qataq na qancotaxaqui. 13Qaq ỹoqo'oye qauacoñiiua'alo qome caua shiỹaxau', qauachegoxochiỹaigui ñi 'oonolec na maiche nalamaxat nhuo' le'ecpi, ca ỹaanaxanaxaic, sa nqalat qataq ca mashe nmate' na lataxaguesat, yaqto' qarataxala'aipi ñaqa'en camayepi.›»
14«Nache qami' qauasache caillaye, qoñiita': ‹Aja' ỹaỹamaqchiguiñi da qonetapeguec.›»
15«Nache saconeua'alo soua shiỹaxau' sachegoxotaigui ñi 'oonolec na maiche nalamaxat nhuo' le'ecpi, maye ỹaanaxanaxaiqa qataq mashe nmate' na lataxaguesat, nache sami' da huo'o naq 'enec da qami' ilo'oguelo. Qaq huo'o na ilo'ogue ñaqa'en so mil, cien, cincuenta, diez, qataq huo'o na lataxala' na maiche nalamaxat nhuo' le'ecpi. 16Qaq se'eso nataxala'pi maye nmit na nasouaxashetpi sanem co'ollaxa de'era nqataxac, 'eeta': ‹Da qanmiche ca lasouaxashet na shiỹaxauapi, nache 'enauac ca qami' naua'alo na maiche qarhuo'oi le'ecpi qataq nache 'ena'am ca chegaqauecpi maye qami' netaiguilo, nache qauo'ochec ca ỹaỹamaqchiguiñi lataxac, 17qataq da qanmiche ca nasouaxashet, nache saishet da qalca'aitagui na shiỹaxauapi, da choxoraq huo'otaq sallaxanec. Qataq saishet da huo'o ca qayi'iitega, cha'aye ñi nmit na nasouaxashet, Nacheñi Ñim Lo'onatac 'Enauacna. Qaq da huo'o ca ỹataqta qalaqaic, nache aỹem qandoiua'a yaqto' maiche soicnapec da ñemit.›
18Qaq 'era da 'eetec se'eso na'a'q da ỹataqta qami' sapaxagueneque co'ollaxa 'enauac nam ishet da qauo'oche.»
Soua doce namaxa'she
19«Nache salaxasoxoguet da lamaxasoxonaxac Ñim Nataxala' maye Qanatamnaxala', nache qolqa'ai ye Horeb da ñeqo'onaxa aye qasoxonaxapi maye huaigui ye na'alhua na amorreopi. Nache sa'axasoxonaxalec ye ỹataqta qalochiguiñi toolec 'alhua, maye mashe qauauañiỹa qataq seviraqta'a ye Cadés Barnea. 20Huaña, nache sheeta': ‹Mashe ñevitaxa ana qasoxonaxapi maye lalamaqte na amorreopi, maye qomi' ỹanema Ñim Nataxala' maye Qanatamnaxala' da yaqto' qaralamaqte. 21Ñim Nataxala' maye Lo'onatac 'Enauacna qami' ỹanema ne'ena 'alhua, qaq nagui nache qoñiỹalec namaye. Huaña, nache ipacchigui da la'aqtac co'ollaxa Ñim Nataxala' maye Natamnaxala' so hua'au qarta'ailpi, qataq saishet da qayi'iitac huo'otaq da leuapigui ye qarville.› 22Qalaxaye qami' qauanaqui, nache aỹem qoñiỹapega, qoñiita': ‹'Onaxaictaxa da huo'oi caua 'auama'q na ỹalleppi da yaqto' hua'au' da imete'n yi'iye 'alhua. Qaq da ime, nache ñe'eguela'q da qomi' da'aqtaxaarema ca saqteuga qataq ca saqteua'a nam huaqta'a't nỹecpi.›»
23Nache so Moisés qaltaq 'eeta': «De'era qara'aqtaqui saỹamaxareeta co'ollaxa, ỹoqo'oye lleca'aua'alo soua doce na ỹalleppi, 'oonolec ñaqa'en na chegaqaigui na maiche nalamaxat nhuo' le'ecpi, 24qaq somayepi nache tasheguema aye qasoxonaxapi da imeten, nache ivitta'a ye ca'amapega't 'alhua maye le'enaxat da Escol. 25Ime, nache nqat ana ala ana nañiguishe yi'iye 'alhua da yaqto' lachaxanata da qomi' da'aqtaxanema da: ‹Ỹataqta 'onaxaic yi'iye 'alhua maye qomi' ỹanema Ñim Nataxala'.› 26Qalaxaye qami' sa qanashiñi da qoqui, nacherata da sa qaualaqaiguet Ñim Nataxala'. 27Qataq qoñiitaiguilo naua qaranataqa'achilli' da qoquiiteguelec Ñim Nataxala', nache qoñiita' da qara'aqtaqui: ‹Ñim Lo'onatac 'Enauacna qomi' sa ichoxore'n, ỹoqo'oye qomi' nqateeguesopa ye Egipto da yaqto' qomi' ỹalaua't na amorreopi. 28Qaq nagui, ¿hua'ago' ca sataxague? Cha'aye soua qaramaxa'ashe ỹa'axattrac da na lma' yi'iye 'alhua ỹataqta 'añaxaicpi qataq logoraicpi, qataq na huaqta'a't nỹecpi ỹataqta lta'al qataq qaỹoqotcheguemec na lpaqtaxat. Qataq ỹataqta huo'o da qarcolanaxa cha'aye qomi' qaỹa'aqtaxanema da yi'iye 'alhua lma' na chegoxoguet so shiỹaxaua logoraic maye le'enaxat Anac.›
29Nache aỹem sheeta' co'ollaxa: ‹Saishet da qayi'iitac qome, qataq saishet da qayi'iitega yemayepi. 30Ñim Nataxala' maye Qanatamnaxala'ai, Ñimaye hua'auta'ague da qa'aita'ague qataq maiche qami' delocleguete, 'eeta'am co'ollaq huaña ye Egipto, 31qataq cai huaña ye toolec 'alhua. Nache qauauañiichigui da Ñimaye ỹataqta qami' nachetrashegue'm choche qami' nviraxatraua'alo ne'ena 'alhua, 'eeta'am ca nta'a da nachetasheguem ca llalec›. 32Qalaxaye ñaqaiyeta saishet co'ollaxa da qaua'amaqchiñi Ñim Nataxala' maye Qanatamnaxala'ai, 33qamaq Ñimaye nacheñita da hua'auta'ague da qa'aita'ague da yaqto' lca'aique ca huaña da qanmachiiuec. Qaq ye pe nache 'ettaigui naqa'en so norec da icoỹatta'ague so qoyequi, qaq da yo'oxoñi qalaq qami' ipelteetaleguete so lo'oc.»
34«Qaq Ñim Lo'onatac 'Enauacna co'ollaq hua'aqchigui da qoquiitapeguelec, nache dalemata nache ỹan da la'aqtac, 'eeta': 35‹Ne'ena qauemaic shiỹaxauapi saishet qome da chochaq 'oonolec ca inoxoneua'a yi'iye 'alhua maye sachaxanapeguem co'ollaxa so hua'au lta'alpi. 36Qaq nachesota qome so Caleb, maye llalec so Yefune da inoxoneua'a yi'iye 'alhua. Nache ca pelec 'alhua sanem qome somaye qataq ca chegoxoguetpi da yaqto' lalamaxat. Cha'aye somaye ỹataqta ỹalaxaguet Ñim Lo'onatac 'Enauacna.›»
37«Qaq nataqa'en aỹem dalemataỹa Ñim Nataxala' souaxat qami', nache 'eeta': ‹'Am saishet qome da 'aunoxoneua'a yi'iye 'alhua›. 38Nachesota so 'artaua Josué, maye llalec so Nun, da inoxoneua'a qome yemaye. Qaq somaye 'aua'añaqchet, cha'aye nacheso qome so ỹanem yi'iye 'alhua na Israel le'ecpi. 39Qaq na ñaq qapio'olec qaỹa'alquipi maye qaupi'itaxañeetega da deuotaxanec na qampa'aguenaxauaipi qataq ana qaramoxouaipi, namayepi nachenata da inoxoneua'a qome yi'iye 'alhua qataq sami' da yaqto' lalamaxat. 40Qalaxaye qami' qavi'iguelaqỹa nagui ye toolec 'alhua, qoquiitegue so nqa'aic maye taỹa'a aye Auaxai Togaxarai. 41Nache qami' qoñiỹapec: ‹Huo'o da qarasouaxashet hueto'ot Ñim Nataxala', qalaxaye nagui qolaq da seloquiaq qataq so'otaq da 'eetapeguec Ñim Nataxala' maye Qanatamnaxala'›. Ime, nache qana'achiigui so qaro'ogoxonaxache da yaqto' qauloqui, qapi'itaxañeetego' da sa qalaq da qoquiisheguemec aye qasoxonaxapi. 42Qalaxaye Ñim Nataxala' aỹem 'enapega co'ollaxa da qami' shenapegalo da saishet da qoqui da qanalaache, cha'aye Ñimaye saishet da qami' hueta'agueta, yaqto' saishet da qami' loxonqa na qampa'aguenaxauaipi qom qoqui.
43Qaq ñaq 'eetalec da sa qana'axaỹaxañi, sa qaualaqaiguet da la'aqtac Ñim Nataxala', ndotec da qanachaqchiñi, nache qoquiisheguemec añi qasoxonaxa. 44Nache so amorreopi maye netalec co'ollaxa yemaye, qami' dataỹa'agueta nache somayepi 'eeta'am na te'esaq lalaxat da qami' icaata'ape, nache qami' loxonqa chegoqchiguiña ye Seír choche qami' iviraxatta'alo ye Jormá. 45Huaña caillaye nache qaye'eguelaqai, nache qanỹeñeeto'ot Ñim Nataxala', qalaxaye Ñimaye saishet da hua'axaỹa so qanachoxonnaxaqui. 46Qaq ỹoqo'oye ỹataqta qaỹoqtegue da qoñiitaña ye 'alhua Cades.»
