Dalaxaic aỹamaxataxac
1«Qaq se'eso na'a'q Ñim Nataxala' qaltaq aỹem 'enapega, 'eeta': ‹'Achecte' qome caua dos coma'ye 'eeta'ama 'anqa'en soua hua'auchiyiñi, qataq 'auo'ot nataqa'en aca laỹe' chegaqaigui 'anqa'en na 'epaq, ime, nache 'asheguema qome añi qasoxonaxa da yaqto' aỹem 'autaxaỹapegue'. 2Qaq Aỹem nache sereleguete qome caamaye, 'enauac na ỹa'aqtacpi maye nanettaleguete co'ollaxa soua hua'auchiyiñi coma'ye maye 'aulaxachiguilo, qaq da ime nache 'auaỹamaxa't, 'auacheraiguilo aca'aca laỹe'.›
3Ime co'ollaxa nache so'ot aso laỹe' soomaye, chegaqaigui ñaqa'en na 'epaq acacia, qataq sechecte' soua dos coma'ye, nache sasheguema añi qasoxonaxa. 4Nache Ñim Nataxala' ỹereleguete se'esoua coma'ye soua diez nqataxaco, nache ipagaqchiichigui 'enauac na ỹereñepi maye qami' da'aqtaxaateguema co'ollaq huetaigui so norec le'eraxa, huaña añi qasoxonaxa. 5Huaña nache senoteeguesop añi qasoxonaxa qataq soxochiguilo aso laỹe' soua nqataxaco maye ỹo'onata. Cha'aye nachera da aỹem ỹamaxalec Ñim Nataxala', qaq nache ivitta'a nagui da huetanguilo asa'aso laỹe'.»
Da lo'onataxanaxac so leviitapi
6Qaq co'ollaq ime, nache so Israel le'ecpi ca'ai ye Berot Bené Yacán, nache taỹa ye Moserá. Huaña yemaye nache ileu so Aarón, qaq nache qailareña yemaye, nache so llalec Eleazar, talec da lo'onataxanaxac da ntaxaỹaxanaxanec. 7Qataq nache chegoqchiguiña yemaye da taỹa ye Gudgoda, qaq ime da hueta'a ye Gudgoda, nache qaltaq taỹa ye Jotbata, yem huaña ye qalota na la'auaxac na 'etaxat. 8Nache huaña yemaye da Ñim Nataxala', iỹotauga co'ollaxa na maiche nalamaxat nhuo' le'ecpi maye chegoxoguet so Leví, da yaqto' pa'aiguet da ỹache aso laỹe' da aỹamaxataxac, qataq da ilo'ogue da no'onataxanaxac, qataq da ỹan da nchoxonnataxanaxa chegoqchigui naqa'en da le'enaxat Ñim Nataxala', qaq nachera da 'eeta'ac choche ivitta'a nagui. 9Qaq ỹoqo'oye ne'ena leviitapi qaica ca lalamaxat logoxoshet, qataq na'alhua da ỹalectaigui na lqaỹañecpi, cha'aye Ñim Nataxala' lalamaxat namayepi, qataq maiche la'aqtac co'ollaxa Ñimaye.
10«Qaq aỹem sootasheguemec co'ollaxa añi qasoxonaxa soua cuarenta na'axa'te qataq cuarenta pe', da 'eeta'am so hua'auchiguiñi da soota'a añimaye, qaq Ñim Nataxala' aỹem na'axaỹaxana, nache saishet da ipaca'a da qami' ilaxachiguilo, 11qaq huaña, nache Ñim Nataxala' aỹem 'enapega, 'eeta': ‹'Aue qome, qojec, nache 'am ca'attaueegue qome ne'ena nhuo' le'ecpi, da yaqto' inoxoneua'a qataq nalec 'anqa'en yi'iye 'alhua maye sachaxanapecot co'ollaxa so hua'au lta'alpi.›»
Da lquiquiaxac Ñim Nataxala'
12Qaq nagui qami' Israel le'ecpi, Ñim Nataxala' maye Qanatamnaxala'ai, ¿Negue't ca iỹaxanaique da qauo'oche? Qomye huo'o naq 'enec qanqa'eñi Ñimaye, qataq qaualaqaiguet, qataq qauauochec, qataq qaumachiỹo'ot da qarquiyaqteỹaxaqui, qataq da qanachaalataxaqui, 13qataq qaualaqaiguet na lamaxasoxonaxacpi qataq na lqataxacpi, yaqto' 'onaxaic da llec da qanachaalataxaqui. 14Cha'aye Ñim Nataxala' maye Qanatamnaxala'ai, lalamaxat na npa'aguiñi, qataq na ỹoqta pa'asheguem na piguem, qataq ana 'alhua qataq 'enauac na huetalec anamaye. 15Qalaxaye Ñimaye lca'ateua'a co'ollaxa so hua'au qarta'ailpi cha'aye ỹataqta ỹauotec. Ime, qaltaq lca'aua'alo qami' maye qauachegoqoiguet somayepi, cha'aye co'ollaq lca'agui na nhuo' le'ecpi maye netalec ana 'alhua, nache qami' lca'ateua'alo, qaq nachera da 'eeteque nagui qami'.
16Ỹoqo'oye qanqacheeua'a qome na qauemsat naua qarquiyaqtelli', qataq saishet da nache qoquiito'ot da sa qaualaqai. 17Cha'aye Ñim Nataxala' maye Qanatamnaxala'ai, Ñimaye nataỹaña 'enauac na ỹotta'a't atamnaxala'pi, qataq Ñimaye Lataxala' na nataxala'pi. Ñim Lo'onatac 'Enauacna, Ñimaye 'amaqtaqaic, 'añaxaic qataq ncolanaxat, Ñimaye saishet da lca'atagui na shiỹaxauapi qataq saishet da ipactaique da qaisheeten da huo'o ca ỹo'ot. 18Ñimaye iueelec ca saploq, qataq aca pa'ai, qataq ichoxoren ca ỹaqa'a ca chegaqa'ague qataq ỹanem ca aloq qataq ca logoxot. 19Ỹoqo'oye qami' nataqa'en qauauochec qome ca chegaqauec, cha'aye qami' nataqa'en qauachegoqỹauec co'ollaq qoñiitaña ye Egipto.
20Huo'o naq 'enec qanqa'eñi Ñim Nataxala' maye Qanatamnaxala'ai, qataq nacheñita da qavio'oxoyiñi, saishet da qavio'oxoyiñi ca ỹaqa'a atamnaxala'pi. Qaq da huo'o ca qaỹa'añi qara'aqtaqui, nache chegoqchigui qanqa'eñi da le'enaxat Ñimaye. 21Cha'aye Ñimaye nacheñi ñi ỹalamaqchigui da qayo'oxonnataxanaxaqui, Ñim Qanatamnaxala'ai maye qami' ỹo'oteque na ỹataqta lta'araic ỹo'ot da na'aalaxa maye qauauañiichigui. 22Qaq so hua'au qarta'ailpi co'ollaq nvita ye Egipto, nache somayepi ivi' setenta ye lcata, qaq nagui Ñim Nataxala' ỹataqta nquicapeguec naqa'en ye lcata namayepi, 'eeta'am ana huaqaañipi maye neto'ot na piguem.
