'Oonolec so huaña da ño'oxonnataxanaxac
1Qaq 'ena na nqataxacpi, qataq na qalapaxañi lataxacpi, maye iuen da ỹataqta qaualaqaiguet, qom mashe qoñiitalec ye 'alhua maye qami' ỹanema Ñim Nataxala' maye Natamnaxala' so hua'au qarta'ailpi. 2Qaq qanlaxachiiñi qome 'enauac na natamnaqa'pi da natamnot na natamnaxala'pi yi'iye ỹotta'a't shiỹaxauapi, maye qauacoñiỹa qome ye na'alhua: Namayepi huo'o na huaña aye qasoxonaxapi, qataq ye ca'amapega't 'alhuapi, qataq huo'o na neto'ot na la'a't ana qo'oipaqpi maye qalochiguiñi ana lcouepi. 3Qataq qaulaxachiigui qome 'enauac aye lca'atoxonaxalatepi coma', qataq qauavigaxache ye lqui'ipi aso Aserá, qataq na laỹe natamnaxala'piolec, nache ỹataqta qauapalaxache 'enauac na le'enaxatpi namayepi yi'iye 'alhua.
4Qaq saishet da nache qoñeetec qome de'era, da qanatamñiỹot Ñim Nataxala', 5qaq cha'aye cam nanataqa' maye lca'ateua'a qome Ñim Nataxala' da yaqto' huaña da qanauane' Ñimaye, da ỹalectaigui na maiche nhuo' le'ecpi. Qaq nacheca ca qanmichiỹaique da huaña da qatamñiỹot Ñimaye. 6Nache camaye nacheca qome ca qairoua'a ca nachetaqtaxanaxat qaỹavigaxatta, qataq ca nachetaqtaxanaxat shiguiỹac, qataq aca diezmopi, qataq aca maiche chegoqchigui da qoỹan, qataq ca la'auaxanec llalec ca 'atetpi, huacapi qataq aca qaguetapi. 7Nache huaña camaye da qauqui'i, ỹauaachigui qanqa'eñi Ñim Nataxala' maye Qanatamnaxala'ai. Nache qami' qataq ca qaỹa'alquipi qauamaichiguiñi da qantoñiitapeguec ca chegaqaigui da qaro'onataxanaxaqui maye qami' ichoxonneque Ñim Nataxala'.
8Qaq huaña qome nache saishet da qauo'oche ca 'eeta'am na so'otaqtac nagui da souaqta'a ne'ena, da ñi 'oonolec ỹo'ot ca maiche 'eetapeguec, 9cha'aye ñaq saxanaxa da qaunoxoñiiua yi'iye qanmataqa'ai, maye qami' ỹanema qome Ñim Nataxala' maye Qanatamnaxala'ai. 10Qalaxaye qom mashe ivita da qaua'axasoxoñiilec ye tala Jordán, qataq mashe qoñiỹalec ye 'alhua, maye qami' ỹanema Ñim Nataxala', qataq da mashe qaica ca qampa'aguenaxauaipi, qataq qaica ca qayi'iitaique. 11Nache cam nanataqa' maye lca'ateua'a Ñim Nataxala' da yaqto' huaña da qanauane' Ñimaye, nacheca qome ca qaroiua'a 'enauac na qami' samaxaleguete: nachetaqtaxanaxat qaỹavigaxatta, nachetaqtaxanaxat shiguiỹac, qataq ana diezmopi, qataq aca nachetaqtaxanaqte maye chegaqaigui da qaro'onataxanaxaqui, qataq aca qauachaxañiỹapec da qaỹa'añiỹot Ñim Nataxala'. 12Huaña nache Ñim Nataxala' qami' ỹauaachiguilo qome da qauamaichiguiñi, qataq ca qaỹa'alquipi ỹalleppi qataq 'alpi, nataqa'en ca qarlataquipi qataq aca qarlataipi, qataq na leviitapi maye netaña qome que'eca qana'alhuai, cha'aye namayepi qaica ca maiche lalamaxat na'alhua.
13Qataq da qaỹa'añiiuo ca nachetaqtaxanaxat qaỹavigatta, nache saishet da camachaqca ca huaña qanqa'eñi da qaỹa'añiiuo camaye, 14nacherata da qaỹa'añiiuo aca qarachetaqtaxanaqche, nache huaña qanqa'eñi cam nanataqa' maye lca'ateua'a Ñim Nataxala', da ỹalectaigui na maiche nhuo' le'ecpi. Qaq nacheca ca huaña qome da qauo'oche 'enauac nam qami' samaxaleguete.
15Qaq maicheye ca qoñiitaña nỹecpi nache ishet da qaualauache ca shiguiỹac, maye qami' ỹanema Ñim Nataxala' da yaqto' qollequi ca lapat, qui'itta, huo'otaq saishet da qui'itta. Qaq 'eeta'am da 'eetec da qollequi ca lapat ca nauenec, huo'otaq aca ñi'imshe. 16Qalaxaye saishet da qollequi ca ltago'q, nacherata da qaucoyeelec na 'alhua 'eeta'am qanqa'eñi na 'etaxat.
17Qaq aca diezmopi maye chegaqaigui na ala ca trigo, lataxa, aceite, qataq ca la'auaxanec llalec aca qareloi huacapi, qaguetapi, qataq 'enauac ca maiche qami' chegoqchiguilo da qaỹa'añiỹot Ñim Nataxala', qataq camachaqca lỹa qarachetaqtaxanaxache maye chegaqaigui da qaro'onataxanaxaqui, saishet qome da qollequi da qoñiitaña ca qarmaye. 18Nacherata da ỹauaachigui qanqa'eñi Ñim Nataxala' maye Qanatamnaxala'ai, da qollequi nache huaña qanqa'eñi ca lca'ateua'a Ñimaye. Qami' qataq ca qaỹa'alquipi ỹalleppi qataq 'alpi, qarlataqui qataq aca qarlatai qataq na leviitapi maye qami' netaiguilo da yaqto' qantoñiitapeguec 'enauac ca chegaqaigui da qaro'onataxanaxaqui. 19Qalaxaye maxatchaxa qome, saishet da sa qautauañi na leviitapi maye netaña ca qana'alhuai.
20Qaq Ñim Nataxala', qom ivita da nquiguec naqa'en ye qana'alhuai maye qami' ỹachaxanapeguema co'ollaxa, nache da qansheetaique da qollequi ca lapat, nache ishet da qollequi 'enauac ca qansheetaique. 21Qaq da huo'otaq qaỹoqta ca huaña ca lca'ateua'a da lanataqa' Ñim Nataxala', nache qami' ishet da qaualauache ca shiguiỹac maye chegaqaigui ca qaralamaxache huacapi, huo'otaq qaguetapi, maye qami' ỹanema Ñim Nataxala', qaq nache huaña ca qoñiita'a da qollequi, nache qaupaquiichigui da ỹamaxasoxonaxac. 22Qaq 'eeta'am da qanallec ca lapat aca chegaxango, huo'otaq aca ñi'imshe, qui'itta huo'otaq da saishet da qui'itta, qalaxaye nache 'ena'am ishet da qollequi. 23Qalaxaye saishet da qollequi ca ltago'q, cha'aye na ntago'q chegaqaigui da nca'alaxa, qaq ỹoqo'oye saishet qome da qollequiỹa'ai' da lca'alaxa ca lapat. 24Nacherata da qaucoyeelec na 'alhua, 'eeta'am qanqa'eñi na 'etaxat. 25Saishet qome da qollequi na ntago'q, yaqto' no'oita da qanachaalataxaqui qami', qataq cam qami' chegoxogueta qome, cha'aye da qauo'oche de'era ỹaỹamaqchiguiñi nache Ñim Nataxala' ỹaỹamaxareeta da qami' ilotaguilo. 26Qalaxaye ca nogoxoshet maye huotaique da qaỹa'añi da qarachetaqtaxanaxache, qataq ca qauachaxañiỹapec da qaỹa'añiỹot Ñim Nataxala', camaye iuen da qaroiua'a ca lca'ateua'a da lanataqa' Ñimaye, 27qaq nache huaña aca nca'atoxonaxalate maye lalamaqte Ñim Nataxala' maye Qanatamnaxala'ai, da qaỹa'añiiuo ca qarachetaqtaxanaxache da qaỹavigaxat. Qalaxaye ca ltago'q que'eca shiguiỹac maye qaỹa'añiiuo nache qaucoyeelec aca nca'atoxonaxalate, qaq ca lapat ishet da qollequi.
28Qaq ỹataqta qana'axaỹaxañiỹalo, qataq qauaỹamaxache' qome 'enauaque naua namaxasoxonaxaco maye qami' samaxaleguete, cha'aye da qauo'oche' ne'enaua no'oñi, qataq ỹaỹamaqchiyiñi, nache qami' qataq ca qaỹa'alquipi, nache 'eetai' qome da no'oita da nachaalataxac, qataq qami' ỹaỹamaxareete' da qami' imeteeta'ape Ñim Nataxala' maye Qanatamnaxala'ai.
29Qataq qom qauauañiichigui Ñim Nataxala' maye Qanatamnaxala'ai, da imeuo naqa'en ye ỹotta'a't shiỹaxauapi maye netaleguete yeua 'aleu' maye qami' ỹanema qome, qataq da ime da ỹo'orauec yemayepi, qataq da mashe qoñiitalec yi'iye 'alhua, 30qataq qom mashe ime da ilaxachigui ye ỹotta'a't shiỹaxauapi, qataq mashe qoñiitalec yi'iye 'alhua. Nache saishet qome da qaue'enaxache da lataxac yemayepi, da qanatamñiỹot na natamnaxala'pi. Qataq saishet qome da qaunataxañiitac da qoñiita': «¿Chaq 'eetec ca lataxac da natamnot na natamnaxala'pi ne'ena ỹotta'a't shiỹaxauapi, da yaqto' nataqa'en qomi' ishet da so'otaq damaye?» 31Saishet qome da nache qoñiitec de'era, cha'aye Ñim Nataxala' maye Qanatamnaxala'ai, ỹataqta deqaiga 'enauac na ỹo'ottac yi'iye shiỹaxauapi, cha'aye da ỹo'oxoren nam natamnaxala'pi yemayepi, nache ivira'a da ỹavigaxat na llalec qataq ana llale da ỹanot na natamnaxala'pi da lachetaqtaxanaxat. 32Qaq ỹoqo'oye qauloitelec qome 'enauac nam qami' samaxaleguete, saishet da huo'o ca qanqotchiñiiuec, huo'otaq da qanqacheeua'a.
