Naponaxacpi ye 'oonolec vi'i
1Qaq da ivita so ca'agoxoic Abib, nache qaupaquiichigui qome da qauo'oche ca Lapascua. Nache qavio'oxoyiñi Ñim Nataxala' maye Qanatamnaxala'ai, cha'aye huetoigui co'ollaxa so pe se'eso ca'agoxoic Abib, da Ñim Nataxala' qami' nqateeguesopa ye Egipto.
2Qaq que'eca Lapascua, nache huetoigui qome da qaỹa'añiiuo aca huaca, qataq qagueta da qarachetaqtaxanaqche da qaỹa'añiỹot Ñim Nataxala' maye Qanatamnaxala'ai, huaña qanqa'eñi ca lca'ateua'a da lanataqa' Ñimaye.
3Qaq da qollequi que'eca shiguiỹac maye qaỹa'añiiuo nache lalegue qanqa'eñi aca nauole maye qaica ca lalegue da ỹasheeraxachigui. Qaq nache ivittrec caua siete na'axa'te da qollequiitac aca'aca nauole maye qaica ca lalegue, cha'aye nachaso asom qanallectac co'ollaq qanayeuaigui da que'eenaxac, qataq da nỹalaxa da qanayeca'ai ye Egipto, qataq qom ñaq qanca'alliitauec, nache saishet da qaucouaỹa'ai se'eso na'a'q maye huetoigui co'ollaxa da qoquiỹa'ai ye Egipto. 4Qaq que'ecaua siete na'axa'te, nache qaca qanqa'eñi qome aca ishet da ỹasheeraxachigui ca ndaqñiguishec 'ayiiña 'enauac que'eca 'alhua. Qaq ca lapat que'eca shiguiỹac maye nachetaqtaxanaxat que'eca avit ca la'auaxanec na'a'q, saishet qome da huo'o ca qano'onaxatañi da taỹaigui qanqa'en ca lỹa na'a'q. 5Qataq que'eca Lapascua da qaualauachi que'eca shiguiỹac maye qarachetaqtaxanaxachi, nache saishet da camachaqca cam huaña que'eca huaqta'a't nỹecpi maye ỹotta'a't naua nañalo maye qami' ỹanema Ñim Nataxala', 6nachecata cam lca'ateua'a da lanataqa' Ñim Nataxala' maye Qanatamnaxala'ai, nache huaña camaye da qaỹa'añiiuo que'eca nachetaqtaxanaxat ca avit da mashe inoxootapiguiñi añi nala', yaqto' ipacchigui ye ñichiguiña añi nala' co'ollaq qoquiỹa'ai ye Egipto. 7Qaq ca lapat que'eca shiguiỹac maye qaỹa'añiiuo, camaye qauauoche nache qollequi, huaña qanqa'eñi qome ca lanataqa' Ñim Nataxala' maye Qanatamnaxala'ai, qaq ca nte'eta ca lỹa na'a'q nache qoquiiuo qome. 8Nache seis na'axa'te da qollequiitac aca nauole 'ayiiña maye qaca aca lalecte maye ỹasheeraxachigui, qaq ca na'a'q siete nache qauo'oche ca naponaxac da yaqto' qavio'oxoreñi Ñim Nataxala' maye Qanatamnaxala'ai, qataq que'eca na'a'q saishet da qauo'oche cam camachaqca nam no'onatacpi.
9Qaq qom inoxoorec caua siete semana, chegoqchiguiña ca na'a'q maye laloxoqui da qanqat na ala ca trigo, 10nache qauo'oche ca qaraponaxaqui que'ecaua na'axa'te da qavio'oxoreñi Ñim Nataxala' maye Qanatamnaxala'ai, qataq qaỹa'añiỹot aca qarachetaqtaxanaqche maye maiche chegoqchigui ñi 'oonolec da ỹan, qataq ca nalota'ai' ñi 'oonolec maye ỹachegoxotchigui da lqouagaxanaqtaic Ñim Nataxala'. 11Qataq qauamaichiguiñi qome, ỹauaachigui qanqa'eñi Ñim Nataxala' maye Qanatamnaxala'ai, qataq huaña ca lca'ateua'a da lanataqa', nache qaualliquiita'aguet nam qaỹa'alquipi, qarlataquipi, leviitapi, qataq na chegaqauecpi, saploqpi qataq ana pa'aipi maye qami' netaiguilo. 12Qataq qantooñita'ac da qami' nlataqa co'ollaq qoñiitaña ye Egipto, qaq ỹoqo'oye ỹataqta qaualaqaiguet qome ne'ena nqataxacpi.
13Qaq da ime ca laloxoquipi da qanqat ana ala ca trigo, qataq da qanlom na lli'i aca uva, nache qauo'oche ca naponaxac ivittrec caua siete na'axa'te, maye laloxoqui' da qanayenaigui na npe'lpiolec qo'oipaq lcouepi. 14Nache qauamaichiguiñi qome da qauo'oche que'eca naponaxac, qataq qaualliquiita'aguet ca qaỹa'alquipi, qarlataquipi, leviitapi, qataq ca chegaqauecpi, saploqpi, qataq aca pa'aipi maye netaña cam qoñiitaigui huaqta'a't nỹecpi. 15Qaq nache siete na'axa'te da qavio'oxoyiñiitac qome Ñim Nataxala' maye Qanatamnaxala'ai, huaña ca lca'ateua'a Ñimaye da lanataqa', yaqto' qami' ỹanema ca qanchoxonnataguiiqui chegoqchigui naqa'en na ala aca qorañiguishi, qataq da qaro'onataxanaxaqui, nache da qarlagaxayiqui ỹataqta nalochiguiñi qome.
16Qataq 'enauac na ỹalleppi, ye 'oonolec vi'i nache tres da ỹe'eguelaxalec da nachaateua'a ca lca'ateua'a lanataqa' Ñim Nataxala' maye Qanatamnaxala'ai, da yaqto' qaỹo'ot ca naponaxac maye laloxoqui da qanallec aca nauole maye qaca aca lalecte maye ỹasheeraxachigui, qataq ca naponaxac maye huetoigui da qanqat ca la'auaxanec ala ca nañiguishec, qataq ca laloxoqui da qanayenaigui na npe'lpiolec qo'oipaq lcouepi. Qalaxaye qaica qome ca nachaateua'a Ñim Nataxala' da qaica ca ỹanot Ñimaye. 17Nacherata da ñi 'oonolec irouo qome ca lachetaqtaxanaxat, maye ỹachegoxotchigui da nqouagaxa maye chegoqo'ot Ñim Nataxala' maye Qanatamnaxala'ai.
Da lataxac da qaỹo'ot ca nalochiguiñi lataxac
18Nache 'enauac ñi 'oonolec que'eca huaqta'a't nỹecpi maye ỹotta'a't naua nañalo, maye Ñim Nataxala' maye Qanatamnaxala'ai qami' ỹanema qome, qauauoi qome cam nataxala'pi qataq ca aloico lo'opi, da yaqto' ilo'ogue qataq nalochiguiñi naqa'en da nmit ca nasouaxashet. 19Qataq saishet qome da ỹashaxanec da nalochiguiñi lataxac, qataq saishet da lca'atagui na shiỹaxauapi, qataq saishet da ỹaconeguet aca nsheetenaxanaqte, cha'aye aca nsheetenaxanaqte iqanamaqchet ca ỹaanaxanaxaic, qataq ỹashaxanec ca la'aqtac ca shiỹaxaua maye no'on da lataxac. 20Nacherata da qoquiitegue da nalochiguiñi lataxac, yaqto' huo'o da qarca'alaqai da qoñiitalec ye 'alhua maye qami' ỹanema qome Ñim Nataxala' maye Qanatamnaxala'ai.
21Saishet qome da qaỹa'añiiñi aca qo'oipaq da yaqto' naña qanqa'eñi ca lqui'i aso Aserá, qataq saishet da sa qaỹapeque qanqa'eñi aca nca'atoxonaxalate maye lalamaqte Ñim Nataxala' maye Qanatamnaxala'ai. 22Qataq saishet da qano'oxoñiisheguem ca qare'enaqtaqui coma' da yaqto' qanatamnaxala'ai, cha'aye Ñim Nataxala' maye Qanatamnaxala'ai saishetaxateguet camaye.
