Deuteronómio 18

₁Qaq na ntaxaỹaxanaxanecpi leviitapi, maye chegoxoguetpi so Leví, namayepi qaica qome ca taỹot da yaqto' lalamaxat, da 'eeta'am na laỹe Israel le'ecpi. Nachaqrata da taỹot ca nachetaqtaxanaxat maye qoỹanot Ñim Nataxala' da yaqto' lalamaxat. ₂Na leviitapi saishet da 'ena'am na laỹe Israel le'ecpi, maye qaỹauo'o ca lalamaxat na'alhua, cha'aye namayepi lalamaxatpi Ñim Nataxala', qataq maiche la'aqtac co'ollaxa Ñimaye.

₃Qaq da huo'o ca 'oonolec na nhuo' le'ecpi da ỹaneuo ca lachetaqtaxanaxat huaca huo'otaq qagueta, nache ca ntaxaỹaxanaxanecpi ishet da ỹacona ca laỹe ca l-laq lapat, qataq ca lanoc, huo'otaq ca da'ama'. ₄Nataqa'en qoỹanem ca la'auaxanec ala ca trigo, lataxa, aceite, qataq ca la'auaxanec npichiiguishic laue aca qagueta. ₅Cha'aye Ñim Nataxala' maye Qanatamnaxala'ai, Ñimaye lca'aguishec na leviitapi ỹachegoxottoigui na maiche nalamaxat nhuo' le'ecpi, yaqto' namayepi qataq ca chegoxoguetpi, nache 'eetai' da ilotague' da lataxac da qanatamnot Ñim Nataxala'.

₆Qaq ỹoqo'oye ca leviita da chegoqchiguiña ca camachaqca cam huaqta'a't nỹecpi maye ỹotta'a't naua nañalo na Israel, da huo'otaq lquiyaqteỹaxac da taỹa ca lca'ateua'a da lanataqa' Ñim Nataxala', ₇nache camaye ishet da ỹacoolec da lo'onataxanaxac da ntaxaỹaxanaxanec da qaitaxaỹapegue' Ñim Nataxala', da 'eeta'am ca laỹepi leviitapi maye do'onataxaatacot Ñim Nataxala'. ₈Qataq nache ipacchigui da lataxac da qoỹanem ca aloq 'eeta'am ca laỹe ntaxaỹaxanaxanecpi. Qataq da qaimen ca lalamaxat ca lta'a nache talec aca lasheue camaye.

₉Qom mashe qaunoxoñiiua'a yi'iye 'alhua maye qami' ỹanema Ñim Nataxala' maye Qanatamnaxala'ai, nache saishet qome da qauo'oche na qaiqaiga no'onataxacpi yi'iye ỹotta'a't shiỹaxauapi. ₁₀Qataq saishet da huo'o ca 'oonolec da qoñiita da ỹaneuo ca llalec, huo'otaq llale alo da lachetaqtaxanaxat qaỹavigaxat, qataq saishet da napaxaguena da yaqto' ilaviigui ca lỹa, huo'otaq da ỹa'axata'a ca ñaq natauo, qataq saishet da ỹo'ot da naconaxanaxac. ₁₁Huo'otaq da qanaueguela't ca nhuennataxac, huo'otaq da qainat ca ilaua'a ca saqcha'a, huo'otaq na nauegueuo na nqui'i, qataq da qainat ca lqui'i ca leuaxaic. ₁₂Cha'aye Ñim Nataxala' ỹataqta deqaiga ca ỹo'ottac ne'ena qauempi. Qaq ỹoqo'oye souaxat ne'ena qauem 'onataxacpi, nache Ñim Nataxala' maye Qanatamnaxala'ai qauauañiichigui qome da ỹo'orauec yi'iye ỹotta'a't shiỹaxauapi. ₁₃Qaq ỹoqo'oye iuen da ỹataqta ỹaỹamaqchiguiñi da qarataxaqui da qami' ỹalletaguilo Ñim Nataxala' maye Qanatamnaxala'ai. ₁₄Cha'aye yi'iye ỹotta'a't shiỹaxauapi maye qaunoxoñiiua'a da qoñiỹalec ye na'alhua, yemaye ỹataqta ỹa'amaqten na ỹa'axata'a ca ñaq naỹauo qataq na ilaviigui ca lỹa. Qalaxaye ne'ena 'onataxacpi, Ñim Nataxala' saishet da qami' ỹashenema da qauo'oche.

₁₅Qaq Ñim Nataxala' maye Qanatamnaxala'ai qami' chegoqtoiguilo naqa'en qome ca la'aqtaxanaxanec da 'eeta'am aỹem, qaq camaye ỹataqta qaualaqaiguet qome. ₁₆Cha'aye de'era maiche qauỹaxañiỹaique co'ollaq qauỹaxañiỹot Ñim Nataxala' maye Qanatamnaxala'ai, co'ollaq huaña añi qasoxonaxa Horeb, se'eso na'a'q co'ollaq 'enauac qalaỹoñiita'a't, nache qoñiita': «Saishet qome da qaltaq she'eguelaxasoxolec da sa'axasoqchigui da lavilỹaxac Ñim Nataxala' maye Qanatamnaxala', huo'otaq da seloxogui ca norec lta'araic, yaqto' saishet da seleuaq.» ₁₇Nache Ñim Nataxala' aỹem 'enapega, 'eeta': «Ỹaỹamaqchiguiñi da la'aqtac namayepi. ₁₈Qaq Aỹem, sachegoxottoigui qome namayepi ca ỹa'aqtaxanaxanec maye 'am 'eeta'am, qaq camaye nache ỹa'axat qome ca samaxalec ỹa'aqtac da da'aqtaxanem namayepi. ₁₉Qaq nache, 'enauac ca sana'axaỹaxana ca ỹa'aqtaxanaxanec da ỹa'axattac na ỹa'aqtacpi, nache Aỹem sechemaxata qome camayepi. ₂₀Qaq que'eca na'aqtaxanaxanec da ỹa'axattac ca 'eetega ỹa'aqtac da huo'otaq saishet da samaxalec da da'aqtaxan, huo'otaq da ỹa'axattac na laỹepi atamnaxala'pi, nache camaye ileu qome. ₂₁Qaq sa iuena'a da 'eeta' ca qarhuennataqai: ‹¿Ca 'eeteco' da ishet da saỹaanaq ca qaỹa'axattac da saishet da la'aqtac Ñim Nataxala'?› ₂₂Qaq que'eca la'aqtaxanaxac que'eca na'aqtaxanaxanec da saishet da ipaigui, nache la'anaxat qome da saishet da nacheñi Ñim Nataxala' da ỹamaxalec da da'aqtaxan camaye. Cha'aye camaye ỹa'aqtaxanaxan da maiche na'amqaanaxac, ỹoqo'oye saishet qome da qayi'iitega camaye.»