Huaqta'a't nỹecpi maye ñe'eguenaxaquipi
1Qaq Ñim Nataxala' maye Qanatamnaxala'ai, qom mashe ime da ilaxachigui ye ỹotta'a't shiỹaxauapi, nache da qami' ỹanaleguete naua lma'ate maye netaleguete nagui, qaq qom mashe qoñiỹaigui yem huaqta'a't nỹecpi maye lalamaxat yemayepi, 2nache qauỹochiỹaugalo qome caua tres cam huaqta'a't nỹecpi maye ỹotta'a't naua nañalo yi'iye 'alhua, maye qami' ỹanema qome Ñim Nataxala', 3qaq yi'iye 'alhua maye qami' ỹanema Ñim Nataxala' qaucolaxachiigui qome, tres qanqa'eñi caua loga'te, qataq qano'onaxachiiguelo caua nqa'aico, yaqto' ishet da ỹe'egueneua'a ca shiỹaxaua maye ilamaxata'a da ỹalauat ca lỹa. 4Nache que'eca dalaataxan maye ỹe'egueneua'a que'eca huaqta'a't nỹecpi, ishet da nca'alec da 'eesa da choche ilamaxata'a da ỹalauat ca lỹa, cha'aye saishet da ỹoqta lhuennataxac, qataq saishet da dalematatega camaye. 5Qataq nache 'eeta'am da huo'o ca shiỹaxaua da ỹauec ca lỹa da tareuga ca aviaq da lde'n, nache camaye da nasaxasheguem aca nqachepe da iquesoxogui ca 'epaq, qaq da ñeuec ca lauaq aca'aca nqachepe, nache tagui ca lỹa nache ileu. Nache que'eca shiỹaxaua ishet da taỹa que'eca huaqta'a't nỹecpi da datauec yaqto' saishet da qaỹalauat. 6Cha'aye saiuena'a da ỹapacauec da lauel ca lauo' le'ec que'eca ileu, nache ishet da ỹalauat da iviralec camaye, lamaaxa da qaỹoqoolec ca nqa'aic. Qaq que'eca shiỹaxaua saishet da iuen da qaỹalauat, cha'aye camaye choche ilamaxata'a da ỹalauat que'eca lỹa. 7Qaq ỹoqo'oye qami' samaxaleguete da qauỹochiỹaugalo qome caua tres que'eca huaqta'a't nỹecpi maye ỹotta'a't naua nañalo, 8qaq da Ñim Nataxala' maye Qanatamnaxala'ai da ivita da nquigaxatec ye qana'alhuai, qataq qami' imata'ama 'enauac ye 'alhua maye ỹachaxanapecot co'ollaxa so hua'au qarta'ailpi, 9qataq da ỹataqta qaualaqaiguet 'enauac ne'ena namaxasoxonaxacpi maye qami' sanema nagui, qataq qauauochec Ñim Nataxala' maye Qanatamnaxala'ai. Nache qaltaq qauỹochiỹaugalo qome caua tres lỹa't cam huaqta'a't nỹecpi maye ỹotta'a't naua nañalo. 10Qaq da nache qoñiitec de'era nache saishet da qarasouaxashichi da qaicoraxatrec caua ltago'q ca qaica ca ỹasouaxat, yi'iye 'alhua maye qami' ỹanema qome Ñim Nataxala', maye Qanatamnaxala'ai, qataq saishet da qarasouaxashechi da huo'o ca qaỹalauat.
11Qalaxaye da huo'o ca shiỹaxaua da nquiỹatega ca lỹa, nache ỹoicnapec da nqanaxateguet da ỹalauat. Ime, nache taỹa que'eca huaqta'a't nỹecpi da yaqto' ỹe'egueneua'a, 12nache ca nqueroxonecpi que'eca huaqta'a't nỹecpi maye ñe'eguenaqa', camayepi damaxasoxoolec da qaỹaconeua'a camaye, nache ỹanem que'eca shiỹaxauapi maye ipaltaique lvi' da yaqto' ỹalauat camaye. 13Saishet qome da qachoxooreñeetac que'eca dalaataxan, yaqto' yi'iye 'alhua Israel saishet da huaña da qaicoraxatrec caua ltago'q ca qaica ca ỹasouaxat, yaqto' qaica ca macheca da qoyecỹaxaqui.
14Qaq yi'iye 'alhua maye qami' ỹanema qome Ñim Nataxala' maye Qanatamnaxala'ai, saishet qome da qavi'igueñiita'a da qanquigaxachiỹa't ca loga't ca na'alhua ca qarỹai, maye mashe salcoshe'egue co'ollaxa da qaỹa'an.
Da lataxac da qaỹa'axat ca qaỹauaachigui
15Ca 'oonolec shiỹaxaua da ỹa'axat da ỹauaachigui ca lỹa da dalaataxan, huo'otaq ỹo'ot ca sa ỹaỹamaxañi, nache saishet da qaỹa'amaqten ca la'aqtaxanaxac. Cha'aye da nache 'eetec de'era, nache iuen da dos huo'otaq tres caua ỹa'axa't cam ỹauaachiguilo. 16Qaq da huo'o ca datenataxan da ỹa'axat ca lỹa da 'eetega ỹauaachigui da huo'o ca ỹo'ot saỹaỹamaxañi, 17nache 'enauaque caamaye da taua'alo ca lanataqa' Ñim Nataxala', ỹauaachigui ca ntaxaỹaxanaxanec, qataq ca nmit na nasouaxashetpi maye do'onataxaatac que'eca na'a'q. 18Qaq que'eca nmit ca nasouaxashet ỹoicnapec qome ca lataxac da nmit ca la'aqtaxanaxac que'eca shiỹaxaua, qaq da ilalec da saishet da 'eesa da ỹauaachigui ca 'eetega ỹo'ot ca lỹa, 19nache que'eca shiỹaxaua maye datenataxaatac, camaye nache qaỹo'otec cam huotaique da ỹo'otec que'eca lỹa. Yaqto' imeuo que'eca saỹaỹamaxañi maye qami' huetanguilo. 20Yaqto' 'enauac ca laỹepi shiỹaxauapi da ỹaỹaten da nhuaxanaguec camaye, nache ñi'iỹa da ỹo'ot ca 'eeta'am que'eca qauem. 21Qaq saishet qome da qauchoxoyiñiitac camaye: Cha'aye ca dalaataxan nache nataqa'en qaỹalauat, qataq ca iuaxangui aca la'aite ca lỹa nache nataqa'en qaiuaxangui aca la'aite, qaq ca iuaxaare'c caua lhue ca lỹa nache nataqa'en qaiuaxaare'c caua lhue, qaq ca iuaxangui na lhuaq ca lỹa nataqa'en qaiuaxangui na lhuaq, qataq ca iuaxangui ca lche ca lỹa nataqa'en qaiuaxangui na lche.
