Nam saishet da ỹalegueua'a ca naponaxacpi
1Ca shiỹaxaua da que'emaxai naua lola huo'otaq da ỹataqta qaicheguec ñi logoxoshet, nache camaye saishet da ỹalegueua'a ca naponaxac maye lalamaxat Ñim Nataxala'.
2Ca ñalec maye choche ncachaxat, camaye saishet qome da ỹalegoigui qanqa'en ca naponaxac maye lalamaxat Ñim Nataxala', na'aictaxa da ivitta'a da mashe diez da nqochen ca llalec ca chegoxoguetpi camaye, qalaxaye saishet da ỹalegoigui qanqa'en ca naponaxac maye lalamaxat Ñim Nataxala'.
3Qataq na amoniitapi, moabiitapi, saishet qome da ỹalegoigui qanqa'en ca naponaxac maye lalamaxat Ñim Nataxala', na'aictaxa da mashe ivitta'a da diez da nqochen ca llalec ca chegoxoguetpi. 4Cha'aye namayepi saishet co'ollaxa da ỹauo'o ca qaraquipi, qataq ca qo'oqoi co'ollaq qaua'axasoxoñiilec ye na'alhua, co'ollaq qauachegoqoita'a ye Egipto. Nacherata da isheeten so Balaam, som llalec so Beor, maye chegoqta'a ye Petor maye huagui ye 'alhua Mesopotamia, da yaqto' qami' ỹasaxaleguete ca qauem la'aqtac. 5Qalaxaye Ñim Nataxala' maye Qanatamnaxala'ai, saishet co'ollaxa da ỹoqocha'a so Balaam, souaxat da lauotaxanaqtaic da qoñiita. Nache Ñimaye chegoqchigui naqa'en de'era l-laraxanaxac somaye da qami' ỹanema da qanchoxonnataguiiqui. 6Ỹoqo'oye saishet qome da huo'o qanqa'eñi ca l-lagaxayec, qataq da qaica cara qanqa'eñi namayepi qom ñaq huo'o da qanachaalataxaqui.
7Qalaxaye saishet qome da qauqaiquiitega na edomiitapi, cha'aye namayepi maiche qarhuo'oi le'ecpi. Qataq na Egipto le'ecpi, cha'aye co'ollaq qoñiitaña ye na'alhua namayepi, nache qami' choche qauachegoqỹauec. 8Qaq na chegoxoguetpi namayepi da ivi' da tres da nqochen ca llalaqpi, nache ishet qome da ỹalegoigui qanqa'eñi ca naponaxac maye lalamaxat Ñim Nataxala'.
Da 'eetec da qaiqui'itaxatta na nanataqa'pi
9Qaq da ivita da qanalaache' ca qampa'aguenaxauaipi, nache da qoviita'a ca lanataqa' na alleppi. Nache qanyiñiiguet qome 'enauac ca ishet da qami' ishepaxanaqche't. 10Qaq da huo'o ca 'oonolec da qoñiita da saishet da qui'itta, souaxat da sa nanoma da anac ca logoxoshet que'eca pe. Nache camaye ca'ai qanqa'en ca lanataqa' na alleppi, nache 'enauac que'eca na'a'q da saishet da huenoxoneua'a camaye. 11Qalaxaye da mashe avit, nache camaye nachel, qaq da inoxooñi añi nala', nache camaye ishet da huenoxoneua'a que'eca nanataqa'.
12Qataq qaỹauo'o qome ca qaiỹotauga na'ataxanaqa', qalaxaye qaỹatauga qanqa'en que'eca qanayeuta'a. 13Qaq ca 'aro'ogoxonaxatpi 'aualecteetaigui qome ca qo'oipaq shetteguet na lsheenec, yaqto' da 'atena'aguet ca 'ogoxoshet, nache 'ansherangui aca 'ara'ataxanaxaqui. Qaq da 'ame, nache 'auapolec ca 'ara'atec. 14Cha'aye Ñim Nataxala' maye Qanatamnaxala'ai, Ñimaye hueta'a ca qaranataqa'ai da yaqto' qami' npaxattaleguete, qataq qami' ỹanema da qoroxonqui ca qampa'aguenaxauaipi. Ỹoqo'oye que'eca qaranataqa'ai, camaye ỹataqta qui'itta qome qanqa'eñi, yaqto' Ñimaye saishet da ilalec ca saỹaỹamaxañi da qami' ỹalleta'alo, ten qom qami' ca'aisalo.
Da 'eetec qanqa'en ca 'eltaxaic
15Qaq da huo'o ca nlatac da dataueeguesop ca na'aco', nache da qami' iỹaxanoiguilo da qauauo'oi ca lle'eguenaqa', nache qami' saishet qome da qavi'iguelaxachiỹot ca na'aco'. 16Qataq qauauaqaita'a qome camaye da qami' netaiguilo, qataq maicheye ca nqopita da naña camaye cam huaqta'a't nỹecpi da yaqto' naigui. Qaq saishet da sa qauyacñiỹapec.
17Qataq saishet qome da huo'o ca ỹale, qataq 'alo na Israel le'ecpi da nquisheshigui da la'amqaanataxanaxac. 18Qataq saishet da qoỹanot Ñim Nataxala' maye Qanatamnaxala'ai aca chegaqaigui da quisheguetaxac, qataq saishet da qaisheetenaxana acamaye da huo'o ca qoỹan na'aqtac, cha'aye damaye ỹataqta deqaiga Ñim Nataxala'.
19Qataq aca lavigaxaiste 'om ca 'arỹa, saishet da 'anquigaxatsheguem da isheeten camaye, nache 'ena'am da nallec, huo'otaq ca lỹa maye iuen da qanquigaxatsheguem aca lasheue. 20Nachecata ca chegaqauec maye ishet da isheeten 'anqa'en aca ỹactec da qaisheeten aca navigaxaiste, qalaxaye ca maiche 'arhuo' le'ec, nache saishet da 'asheetenaxanaxanec acamaye. Yaqto' Ñim Nataxala' maye Qanatamnaxala'ai, ỹo'ot ca qanchoxonnataguiiqui chegoqchigui naqa'en da qaro'onataxanaxaqui qom mashe qoñiỹalec yi'iye 'alhua.
21Qaq da huo'o ca 'auachaxanapec da 'aỹa'anot Ñim Nataxala', nache sa 'anaỹaloxon da 'auo'ot qome. Cha'aye da saishet da 'auo'ot, nache Ñimaye 'am iỹaxanot da 'ausheeten, cha'aye huo'o da 'arasouaxashet. 22Qalaxaye da saishet da huo'o ca 'auachaxanapec, nache qaica ca 'arasouaxashet. 23Qalaxaye da maiche 'am chegoqchigui da 'aỹa'an ca 'ara'aqtac da huo'o ca 'auachaxanapec da 'aỹa'anot Ñim Nataxala' maye 'Anatamnaxala', nache ỹataqta 'aupacchigui qome da 'auo'ot camaye.
24Qaq da huo'otaq 'anqo'oneua'a ca lañiguishe uva lma' ca 'arỹa, nache ishet da maicheye ca tachiguiña aca qollec, qalaxaye saishet da huo'o aca 'auache da 'auachangui aca 'arachoxonaxaqui npaqta. 25Qaq da huo'otaq 'aigui ca lañiguishec trigo lma' ca 'arỹa, nache ishet da 'anapoctaigui camaye da 'anqat, qalaxaye saishet da 'auauota'a aca nchegaxanaqte da 'auchec camaye.
