Deuteronómio 25

₁Qaq da huo'oi caua shiỹaxau' da ncotatega't, nache iuen da tareua'a cam huaña da huo'o ca qancotaỹapigui, nache ca nmit na nasouaxashetpi nmi't caamaye, nache camaye ỹa'axat negue't cam qaica ca ỹasouaxat. Qaq ca huo'o ca lasouaxashet, nache qaỹo'ot ca nhuaxanaguec. ₂Qaq cam huo'o ca lasouaxashet da iuen da qaiuaxan, nache ca nmit na nasouaxashetpi damaxasoxoolec da nqapaxaneguet qanqa'en na 'alhua, qataq ỹauaachigui camaye da qaiuaxan, nache naloqteeteguet da nhuaxanaguec ca lasouaxashet camaye. ₃Qalaxaye saishet qome da napacalec ca cuarenta da qaiuaxan, cha'aye da ỹapacauec da nhuaxanaguec camaye, nache ỹo'otec da qaica ca lyac camaye.

₄Saishet qome da 'auo'ot ca lmiiguishec ca nauegaxanaxala' huaca, da 'auchegoqtac aca ala ca 'añiguishec.

₅Da huo'oi caua nqaỹa't da netraigui ca 'oonolec lma't, qaq da huo'otaq ileu ca 'oonolec caamaye, qaq aca lhua que'eca ileu da ñaq saxanaqca ca llalec, nache aca'aca 'alo maye pa'ai saishet qome da ỹaqa'a ca huaroneguet. Cha'aye que'eca lqaỹa so lhua maye ileu, nacheca qome ca huaroneguet acamaye, yaqto' ipacchigui da lataxac da qaỹaroneguet ca ño'oxoua. ₆Nache ca la'auaxanec llalec camaye da deco'oiguet aca llo'oxoua, ỹanagui da le'enaxat que'eca lqaỹa maye mashe ileu, yaqto' saishet da qaỹapalaxat da le'enaxat camaye na Israel. ₇Qaq que'eca ỹale da saishet da huaroneguet aca llo'oxoua, nache acamaye taỹa ca ñegueuo ca huaqta'a't nỹecpi maye hueta'a ca nqueroxonecpi nache, 'eeta': So ỹo'oxoua saishet da nache 'eetai' naqa'en da le'enaxat so lqaỹa ne'ena Israel, cha'aye saishet da ipaguelec da lataxac da qaỹaroneguet ca ño'oxoua. ₈Nache ca nqueroxonecpi maye netaña que'eca huaqta'a't nỹecpi, iỹaxaneuga camaye da yaqto' detaxaỹapegue'. Qaq da ñaq 'eetalec da ỹoqta sa nashen da huaroneguet acamaye, ₉nache acamaye taỹa que'eca llo'oxoua, ỹauaachigui naqa'en ca nqueroxonecpi da nqat ca lỹa lapela' camaye, qataq nqaigoxoigui na lashec camaye, nache 'enapega, 'eeta': ¡'Era da qoỹeetec ca ỹale da sa nashen da nauaxaỹaxaasheguem ca chegoxoguetpi ca lqaỹa maye mashe ileu! ₁₀Qaq nache chegoqchiguiña qome da qaỹaỹaten na Israel, da que'eca shiỹaxaua qataq ca llalaqpi qaỹamata'ac: Llalaqpi so qanqat so lỹa lapela'.

₁₁Qaq da huo'oi caua ỹale't da deloctega't, nache anac aca lhua ca 'oonolec caamaye da iueelec ca lhua, nache acamaye da ỹacootot na alo' que'eca ỹale, nache ique'emaqchet, ₁₂nache qami' qauchiquiiuec na lhuaq qome aca'aca 'alo, saishet qome da qauchoxoreñiitac.

₁₃Qaq da huo'o ca qausheenaxañiỹa qataq da huo'o ca qaumiñi, nache saishet da qauo'ogoxoñiỹa aca naloqnaxanaxaqui ncachaxaqui late'erai, huo'otaq qapio'ole. ₁₄Nataqa'en saishet da huetaña ca 'arma' aca naloqnaxanaxaqui ncachaxaqui, late'erai huo'otaq qapio'ole, ₁₅nacherata da ỹataqta ipacchigui ye lcata ca naloqten aca 'araloqnaxanaxaqui, qataq nalochiguiñi ye lcata ca 'analoqten, yaqto' logoraic da 'anachaalataxac da qonetalec yi'iye 'alhua maye 'am ỹanem Ñim Nataxala', maye 'Anatamnaxala'. ₁₆Cha'aye Ñim Nataxala' ỹataqta deqaiga 'enauac nam ỹo'ottac de'era ncachaxac maye saỹaỹamaxañi.

₁₇Qantooñita'ac da qami' ỹo'oteque na amaleciitapi co'ollaq huangui so nqa'aic, co'ollaq mashe qoquiỹa'ai ye Egipto, ₁₈qataq da 'eetec co'ollaq saishet da ñi'iỹa Ñim Lo'onatac 'Enauacna da qami' naxategueta, huangui so nqa'aic, nache chegoxogue na qarlaqai da iloquiaxan so nca'ataxaatauopi maye nasamaqtocpi maye qaica ca la'añaxac. ₁₉Ỹoqo'oye qom ivita da Ñim Lo'onatac 'Enauacna, qami' isoueeguesopa ye ỹotta'a't shiỹaxauapi maye qampa'aguenaxauaipi yem lauoreuapi yi'iye 'alhua, maye qami' ỹanema qome Ñim Nataxala' maye Qanatamnaxala'ai. Nache ỹataqta qauapalaxache qome da le'enaxat nam chegoxoguetpi so Amalec yi'iye 'alhua. ¡Saishet qome da qaucouaỹa'ai de'era!