Da nchoxonnataguec ca ỹalaq
1Da ỹataqta 'aualaxaguet Ñim Nataxala' maye 'Anatamnaxala', qataq 'aupacchigui da 'auo'ot 'enauac na lamaxasoxonaxacpi maye 'am samaxalec da 'auo'ot nagui, nache Ñim Nataxala' ỹo'ot qome da 'anataỹaña 'enauac na ỹotta'a't shiỹaxauapi ana 'alhua. 2Qataq 'enauac ne'ena nchoxonnataxanaxapi 'am talec qome da ỹataqta 'aualaxaguet Ñim Nataxala' maye 'Anatamnaxala'. 3Ỹataqta huo'o qome da 'anchoxonnataguec da qonetaigui ca huaqta'a't nỹecpi, qataq da qouetauga ca no'onaxa. 4Qataq huo'o qome da nchoxonnataguec ca 'aỹa'alaqpi, qataq no'on da alaỹaxac ca 'añiguishecpi, qataq da lañaxataxac ca llalec aca 'arelopi huacapi, qaguetapi, qataq 'enauac ca laỹe shiguiỹacpi maye 'arelopi. 5Qataq sa qoue qome ca huetangui aca npaqtole maye laỹe' ca 'oq, qataq ca 'ardaqnaxanaxaqui, 6qataq huo'o qome da 'anchoxonnataguec da 'arviraxac, qataq da 'aunoxonec.
7Qataq Ñim Nataxala' 'am ỹanem qome da 'oxonec ca 'ampa'aguenaxauapi da 'am iloquiaxan, na'aictaxa da nalochiguiñi camayepi da 'am naỹa, qalaxaye da datauec nache ỹataqta nlagaxattac.
8Ñim Nataxala', 'am namaxa qome da lchoxonnataxanaxa da yaqto' nlaqchiguilo naqa'en naua laponaxaqui' na ala ca 'añiguishecpi, qataq 'enauac ca 'aro'onatacpi nache ỹataqta 'auamachiguiñi naqa'en qom qonetalec ye 'alhua maye 'am ỹanem qome.
9Qaq qom ỹataqta 'aualaxaguet na lamaxasoxonaxacpi, qataq qoquetelec da lataxac da llecỹaxac Ñim Nataxala' maye 'Anatamnaxala', nache ỹataqta 'itchiguiñi naqa'en da 'am iỹotauga da ỹataqta 'am lalamaxat, qataq ipacchigui da 'am ỹachaxanapeguem co'ollaxa. 10Huaña nache 'enauac na ỹotta'a't shiỹaxauapi ana 'alhua ỹaỹateeta da 'am lalamaxat Ñim Nataxala', nache ỹataqta 'am ñi'iỹa qome. 11Qataq Ñim Nataxala' 'am ỹanem qome da lchoxonnataxanaxa, nache ỹataqta qalota naqa'en ca 'aỹa'alaqpi, qataq ca llalec ca 'arelo shiguiỹacpi, qataq sa qoue naqa'en da alaỹaxac ca 'añiguishecpi maye ñaxaalec yi'iye 'alhua maye Ñim Nataxala' ỹachaxanapeguem co'ollaxa so hua'au 'arta'alpi. 12Qataq Ñim Nataxala' ỹauateua'a qome da lsallaxa maye hueto'ot na piguem, da yaqto' ipacchiguilo naqa'en naua laloqo'ote na auot da talec ca 'ana'alhua, nache ỹanem da no'on 'enauac ca 'aro'onatacpi. Huaña nache ishet qome da 'aua'aalaxanaxan ca ỹotta'a't shiỹaxauapi, qalaxaye 'am saishet qome da 'aua'aalaxatac. 13Qataq Ñim Nataxala', 'am ỹanagui qome da 'am nca'ataxala', saishet da 'anca'attauo naqa'en. Huaña nache 'anataỹaña 'enauac na laỹepi shiỹaxauapi, qaq 'am qalaq saishet da 'am qanataỹaña qom ỹoqta 'aualaxaguet na lamaxasoxonaxacpi Ñim Nataxala' maye 'Anatamnaxala', maye 'am samaxalec nagui da 'auo'ot, 14qataq da saishet da qoca'ai ne'ena na'aqtacpi da yaqto' qoquegue ca laỹepi atamnaxala'pi.
Da nhuaxanaguec ca sa ỹalaq
15Qalaxaye da saishet da 'aualaxaguet Ñim Nataxala' maye 'Anatamnaxala', qataq da saishet da 'auo'ot 'enauac na lamaxasoxonaxacpi, qataq na lqataxacpi maye 'am samaxalec nagui da 'auo'ot, nache 'am talec qome 'enauac ne'ena qauem 'anhuaxanaguecpi: 16Ỹataqta qaica ca 'ana'achec da qonetaigui ca huaqta'a't nỹecpi, qataq da qonetauga ca no'onaxa. 17Qataq ỹataqta qaica qome ca huetangui aca npaqtole maye laỹe' ca nallec, qataq qauem ca 'ardaqnaxanaxaqui. 18Qataq ỹataqta qauem qome da lañaxataxac ca 'aỹa'alaqpi, qataq da alaỹaxac ca 'añiguishecpi, qataq ca llalec aca 'arelo huacapi, qagueta qataq ca laỹe 'arelopi shiguiỹacpi. 19Qataq ỹataqta qauem qome ca 'arviraxac qataq da ivita da 'aunoxonec.
20Qataq Ñim Nataxala' 'am namaxa qome na qauemsat, nache 'ansomaxaatapigui', qataq huo'o da 'anqui'icỹaxac, qataq 'enauac ca 'auo'ot saishet da ipaigui, nache ỹataqta sa qaỹaloq qome da 'am nlachiguiñi, souaxat da qauem ca 'auo'ottac nache qoca'ai Ñimaye. 21Ñim Nataxala', 'am huec naqa'en qome ca napaxa maye qanlem da yaqto' 'am ỹalauat, qom qonetaña ye 'alhua maye 'am ỹanem qome da qonalec. 22Nataqa'en 'am namaxa ca ỹotta'a't napiina maye dalaataxanapec, qataq ca lta'araic napaxa, qataq ca ỹo'ot na nalaache. Qataq ca lta'araic napaxaỹaxa, qataq ca lqaxaỹaxa na 'alhua, qataq huo'o ca lalaxat ca 'añiguishecpi, nache ỹataqta 'am saq nañaxaasheguem, ivitta'a da ỹataqta 'am ỹalauat. 23Qaq na piguem qalaq 'eeta'am qome ca lcat bronce, qaq ana 'alhua maye 'auapetalec qalaq 'eeta'am ca lcat. 24Nache Ñim Nataxala', saishet da 'am namaxa ca auot, nacherata da 'am talec naqa'en ca namoxoỹaxa, qataq ca coma' lsoche, ivitta'a da 'am nlachiguiñi naqa'en. 25Qataq 'am loxonec naqa'en qome ca 'ampa'aguenaxauapi, na'aictaxa da qanaloichiguiñi da qanqo'oñiỹa da qanalaache' camayepi, qalaxaye qanlagaxacheetac qome da qauataiueeguesop camayepi. Nache 'enauac na ỹotta'a't shiỹaxauapi 'am ỹe'enai' qome. 26Nache da 'aro'ocỹaxac da 'aleu qalaq chec na maỹo piguem le'ecpi, qataq na shiguiỹacpi maye dequi'iỹapec, nache qaica ca 'am do'otaxaalec.
27Ñim Nataxala' ỹo'ot qome da 'am ique'ete'n aca na'agotaqtepi, cagaxai, nhuetapi, qataq ca nquesaxa maye qaica ca lata', 'eeta'am co'ollaq huaña ye Egipto. 28Qataq 'am alaxaic naqa'en, qataq sa 'anauaañi, qataq sa 'anaỹaten naqa'en, 29nache 'apottapecra' ye na'a'q, qoneta'am ca sanauaañi maye huetaigui ca napalaxa. Qataq 'enauac ca 'auo'ot qaica ca ỹaỹamaqchiguiñi, qataq 'enauaque naua na'axa'te da qouetaiya', qataq 'am qanhuotta, nache qaica ca anac da 'am itauan. 30Qataq da huo'o aca 'autaxaỹapegue' da 'arhua, qalaxaye ca lỹa ỹale hua'aulec qome da lauañi' acamaye. Qataq da 'anauaxaỹaxaasheguem ca 'arma', qalaq saishet qome da 'avira'a da qonaigui camaye, qataq da 'aỹa'aañi aca 'añiguishe uva, qalaq saishet da 'avira'a da qollec aca ala acamaye. 31Qataq da qaỹalauat ca 'arelo huaca, nache 'auauaachigui qanqa'en, qalaxaye saishet da qollec ca lapat camaye. Qataq 'auauaachigui qome da qaiuotaxanec ca 'arelo 'ashena, qalaxaye saishet da 'am qaỹe'eguelaxatot, qataq aca 'arelo qagueta da ỹacona ca 'ampa'aguenaxauapi, qalaq qaica ca 'am itauan da yaqto' 'am ỹe'eguelaxatot. 32Qataq 'auauachigui qome ca 'aỹa'alaqpi ỹalleppi qataq 'alpi da qoỹanem ca ỹaqa'a shiỹaxauapi, nache choche 'anasamchiguiñi qome da 'anmittaique, qalaxaye saishet da 'auanata. 33Qaq na ala ca 'añiguishecpi maye ñaxaalec que'eca 'ana'alhua maye chegaqaigui da 'aro'onataxanaxac, camaye chec qome na chegaqauecpi shiỹaxauapi. Nache ỹataqta huo'o da 'anque'eenaxac qataq saishet da 'am qaiyacnapec 'enauaque naua na'axa'te. 34Nache da 'auauaachigui 'enauac de'era, nache 'am alaxaic naqa'en. 35Qataq Ñim Nataxala' ỹo'ot qome da 'am ique'eten aca 'ara'agotaqtepi naua 'arllecte, qataq naua 'archel, qataq 'enauac da 'aro'ocỹaxac icorelec ca nhuetaxanaxa maye qaica ca lata'.
36Qataq Ñim Nataxala' ỹo'ot qome 'am qataq ca nta'a maye 'arca'aguishec da qami' ỹauegalo ca 'alhua maye qami' qataq so hua'au qarta'ailpi sa qauauañiỹapega. Qaq huaña nache qanatamñiitacot qome ca ỹaqa'a atamnaxala'pi maye choche ne'enaqtac qo'oipaq qataq coma', 37huaña nache 'am qañi'iỹa, qataq 'am qane'eetapigui, qataq 'am laloqnaxanaxat 'enauac na ỹotta'a't shiỹaxauapi, maye 'am ỹauega Ñim Nataxala'. 38Qataq qalota qome aca 'aỹa'aañi ala ca nañiguishecpi qalaxaye saq 'amaqtaq aca 'anqat ala, cha'aye chec aca shiiquioxoipi nache ỹataqta ỹauta. 39Qataq da 'aỹa'aañi qome aca uva, qataq 'ametot, qalaxaye saishet da ivira'a da 'anqat aca ala, huo'otaq da 'anỹomgui ca lataxa maye chegaqaigui acamaye, cha'aye ca qoche'l chec qome acamaye. 40Qataq que'eca 'ana'alhua ỹataqta imattalec qome aca 'añiguishe olivo, qalaxaye saishet da 'avira'a da 'ancoyigui cam aceite maye chegaqaigui acamaye, cha'aye acamaye choche naañi qome aca ala. 41Qataq huo'o qome ca 'aỹa'alaqpi qataq aca 'aỹa'alepi, qalaxaye saishet da 'am neto'ot, cha'aye noxonecpi qome, nache qaỹauega ca lỹa 'alhua. 42Qataq 'enauac aca qo'oipaqpi qataq aca ala ca ñaxattalec que'eca 'ana'alhua nlaxaañi qome aca shiiquioxoipi. 43Qaq ca chegaqauecpi maye netaña que'eca 'ana'alhua qalaq ỹataqta nquictauec da 'añaxaicpi, qaq 'am qalaq nquictañi da 'ara'añaxac. 44Nache camayepi ishet da 'am ỹa'aalaxanaxan, qalaxaye 'am saishet da huo'o ca 'aua'aalaxanaxan. Cha'aye camayepi nca'ataxala'pi, qaq 'am qalaq 'anca'attauo qome.
45Qaq 'enauac que'eca qauemsat 'am naguelec qome, qataq cam 'aigue nache 'am icaalec, qaq da 'am ivi' nache iviraxata'a da 'am ỹalauat, souaxat da saishet da 'aualaxaguet Ñim Nataxala' maye 'Anatamnaxala', qataq saishet da 'aualaxaguet na lamaxasoxonaxacpi, qataq na lapaxañi lataxacpi Ñimaye. 46Qaq de'era nachera qome da la'anaxat qataq ntelaqtaxanaxac da qoneta, qataq cam 'am chegoxoguetpi, 47souaxat da saishet da 'avio'oxoren Ñim Nataxala' maye 'Anatamnaxala', qataq da saishet 'auamachiguiñi da 'antootapeguec da 'am ỹanem da qaica ca 'aueetaique. 48Qaq ỹoqo'oye choche 'am l-latac qome ca 'ampa'aguenaxauapi maye 'am namaxa qome Ñim Nataxala', nache 'anque'etaxangui qome ca 'arqouaxa, 'araquip, qouetauec, qataq ỹataqta 'am choxoraq. Nache Ñim Nataxala' ỹo'ot da 'anque'etaxangui da 'anlataguec, ivitta'a da ỹataqta 'am nlachiguiñi. 49Ñim Nataxala', 'am namaxa qome ca shiỹaxauapi maye chegaqa'a ca ỹataqta qaỹoqta 'alhua, qaq camayepi ỹataqta sailaua'ague 'eeta'am da naloxoyaxac ca taga' da huaỹotac, cam shiỹaxauapi maye saq 'aua'axaigueta naua la'aqtaqa, 50shiỹaxauapi maye ỹataqta chaqaic da lashiguiỹaxac, qataq sa ichoxoreetac ca ỹa'axaiquipi qataq ca ñaqpiolec. 51Qaq camayepi chec qome ca llalec ca 'arelopi, qataq ca ala ca 'añiguishecpi ivitta'a da 'am ỹachoxoren. Qataq qaica ca no'onañi naqa'en ca ala ca trigo, lataxa, aceite, qataq ca llalec aca 'arelo huacapi, qataq aca qaguetapi, nache 'am ỹalaua't qome na 'arqouaxa. 52Qaq cam 'ampa'aguenaxauapi coleesop qome ca 'aralamaxat huaqta'a't nỹecpi da 'am iloquiaxan ivitta'a da ỹamaxañi cam ỹataqta qaỹoqotcheguemec, qataq sansattec lpaqtaxat maye 'anteetacot, aja', coleesop qome 'enauac cam huaqta'a't nỹecpi maye ỹotta'a't naua nañalo yem 'alhua maye 'am ỹanem qome Ñim Nataxala' maye 'Anatamnaxala'. 53Qaq ca 'ampa'aguenaxauapi qom ñaq iloquiaxaatac cam 'aralamaxat nỹecpi nache ỹataqta lta'araic qome na 'arqouaxa nache ivira'a da qolle'c caua maiche 'aỹa'alqa maye 'am ỹanema co'ollaxa Ñim Nataxala' maye 'Anatamnaxala'. 54Qaq ivira'a qome ca ỹale maye ỹataqta huesota qataq soxoraic, camaye ỹataqta nquiỹa qome da ilota'a ca lqaỹa, qataq aca lauotaqte lhua, qataq caua llalqa maye ñaq huo'oi, 55nache saishet da nhuana'ato qome caamaye da chectac cam lapat caua llalqa. Qaq ỹataqta lta'araic naqa'en qome da 'erachetataic ca 'ampa'aguenaxauapi qom ñaq iloquiaxaatac cam 'aralaxamaxat huaqta'a't nỹecpi, 56nache ivira'a qome aca ỹataqta huesota qataq soxorai que'eca 'alpi, acam sa ỹaỹamaxaren naxa da qaicaua caua lapela'ate da pelec na 'alhua, acamayepi nquiỹa qome da ilota'a ca lhua, qataq caua llalqa maye ỹataqta lauotaqa'ate co'ollaxa, 57cha'aye ỹauotaique da sa lquia'axau' da chec cam ñiguiñi llalec, qataq aca lhue camaye, nacherata da ỹoxotchiguiñi da chec, cha'aye qaica qome ca nallec qom ñaq iloquiaxaatac ca 'aralamaxat huaqta'a't nỹecpi ca 'ampa'aguenaxauapi. 58Qaq 'am qom sa 'anapaxaguena 'enauac na nqataxacpi maye nanettalec ana'ana nere, qataq qaica ca 'enec 'anqa'en da ỹo'oxoraic le'enaxat Ñim Nataxala' maye 'Anatamnaxala', 59nache Ñimaye 'am talec naqa'en qataq ca 'am chegoxoguetpi ca napiina, qataq cam qauem nalolaxa maye qaica ca lata'. 60Ñimaye 'am talec qome naqa'en nam nalolaxapi maye talec co'ollaxa ye Egipto, nam ỹataqta ỹo'ot co'ollaxa da lta'araic 'arcolanaxa, qaq ỹataqta 'anque'etaxaachigui qome namayepi. 61Qataq nataqa'en 'am namaxa qome ca nalolaxa maye saishet da nanettalec ana'ana nere, choche ivitta'a da 'am nlachiguiñi. 62Qaq 'am Israel, maye 'am qalota co'ollaxa qoneta'am ana huaqaañipi maye neto'ot na piguem, 'am salaamai' qome, cha'aye souaxat da sa 'aualaxaguet Ñim Nataxala' maye 'Anatamnaxala'. 63Qaq dam 'eetec co'ollaxa Ñim Nataxala' co'ollaq ỹaỹamaxareeta da 'am talec da no'on qataq 'anquictauec, qaq nache 'eetec Ñimaye da ỹaỹamaxareeta qome da 'am ilaxachigui, nache ỹo'ot da 'am sa qaiyacnapec qom 'am qanqateeguesop yem 'alhua maye qonetalec qome. 64Ñim Nataxala' 'am ilagaxatoigui qome ca ỹotta'a't shiỹaxauapi ana 'alhua, qaq huaña qome nache 'anatameetacot ca ỹaqa'a atamnaxala'pi maye 'epaq, qataq coma' maye 'am qataq so hua'au 'arta'alpi sa ỹauatton. 65Qaq qom ñaq qonetaigui que'eca ỹotta'at shiỹaxauapi nache qaica qome ca 'arlagaxayec, qataq 'anmataxac, cha'aye Ñim Nataxala' 'am ỹo'otec qome da 'arcolanaxa, qataq daquigoi' naua 'ara'ai'te qataq qaica qome ca 'ara'añaxac. 66Qataq nache 'eetai' qome da huetaigui da lchec da 'anachaalataxac, qataq 'am nlaqchigui qome da 'arcolanaxa ye na'a'q, qataq ye pe, nache da 'anachaalataxac qaica qome ca mpaxaalec. 67Qaq souaxat da ỹataqta lta'araic da 'arcolanaxa cam 'aulota'api, nache ye nte'eta qalaq qoneta: «¡Yaxasa'a da pasa'a da pe!» Qaq ye pe qalaq qoneta: «¡Yaxasa'a da yo'oxoñi!» 68Qaq na'aictaxa Ñim Nataxala' da 'am ỹachaxanapecot co'ollaxa da saishet da qaltaq 'avi'eguelaqtegue so nqa'aic da 'aigue da Egipto, qalaxaye Ñimaye 'am ỹe'eguelaxategue qome damaye, qonetangui naqa'en aca notaxaqui maye quiguingui na 'etaxat, qaq huaña qome yemaye nache 'am imenot ca 'ampa'aguenaxauapi, qalaxaye qaica qome ca 'am desheenaxana.
