So Israel le'ecpi loxonec so Og maye nta'a ye Basán
1Qaq co'ollaq saqteuga so nqa'aic maye tateuga ye Basán, nache so Og maye lta'a so netaña yemaye nache qomi' ca'ata'agueta da qomi' iloquiaxa'n huaña ye Edrey.
2Qalaxaye Ñim Nataxala' aỹem 'enapega 'eeta': «Saishet qome da 'añi'iỹa namayepi, cha'aye 'am sami' da 'oxonec namaye qataq na nalleppi qataq ye na'alhua. Qaq 'avi'inaxatchigui da qonetec co'ollaxa so Sijón maye lta'a so amorreopi maye netaña co'ollaxa ye Jesbón.»
3Qaq 'era da 'eetec Ñim Nataxala' da qomi' ỹanema da qoroxonec so Og, maye lta'a so netaña ye Basán qataq so nalleppi, qaq nache salauataq 'enauac somayepi qaica ñaqa'enaq ca nca'altauec. 4Nataqa'en saconaxa 'enauac so lalamaxat huaqta'a't nỹecpi maye ỹotta'a't naua nañalo, qaica ca choche no'onañi ñaqa'enaq. Qaq da imauec, nache ivi' sesenta se'eso huaqta'a't nỹecpi maye ỹotta'a't naua nañalo yi'iye 'alhua Argob, maye ilotague' so Og, som nta'a ye Basán. 5Qaq 'enauac se'eso huaqta'a't nỹecpi qaỹoqotcheguemec co'ollaxa so lpaqtaxat, qataq so lpaqtaxat so lasompi, qataq saishet da ñaloqtenaq so laỹe huaqta'a't nỹecpi maye qaica ca lpaqtaxat. 6Qataq 'eeta'am da shenaqtec so Sijón, maye ilotague' na netaña ye Jesbón, da ñelaxataxañi 'enauac so huaqta'a't nỹecpi qataq salauataq so ỹalleppi, 'alpi, qataq so ñaqpiolec, 7nachesota so 'atetpi qataq so nogoxoshetpi maye huo'o da lashiichiỹaxac maye lalamaxat so qampa'aguenaxauapi da saconaxa.
8Qaq 'era da 'eetec se'eso na'a'q da saconaxa ye na'alhuapi se'esoua dos nta'al maye ilotagueto so amorreopi maye neraña co'ollaxa ye pa'aỹa'ague da nala' lliguisheguem ye tala Arnón, qataq ivitta'a añi qasoxonaxa Hermón, 9maye so sidooniopi ỹanagui co'ollaxa da le'enaxat Sirión, qaq so amorreopi ỹanagui da Senir. 10Nache 'enauac so huaqta'a't nỹecpi maye ỹotta'a't naua nañalo maye nalec ye nalochiguiñi na pa'asheguem aye qasoxonaxapi, da saconaxa ye 'alhua Galaad, Basán, qataq so huaqta'a't nỹecpi ye Salca, Edrey, maye lalamaxat so Og, maye ilotague' so netaña ye Basán. 11Qaq se'eso nta'a Og, somaye nacheso so pa'atec som logoraicpi, so lmala' lcat qalaq ivi' cuatro metros ye lalogaxa, qaq ye lcategue qalaq ivi' dos metros. Qaq se'eso mala' ñaq 'eetalec nagui da qaimeteetac huetaña ye Rabá maye lma' so amoniitapi.
Qoỹanec so 'alhua maye pa'aigue da yo'oxoñi ye tala Jordán
12Qaq so mashe qoroxonec ye 'alhua, nache sami' na maiche nhuo' le'ecpi maye chegoxoguet so Rubén qataq so Gad, chegoqchiguiña ye pa'aỹa'ague da sheu' ye Aroer maye hueteua'a na laỹe so la'auaxac Arnón, qataq ivitta'a na laiñi aye qasoxonaxapi ye Galaad, nache lỹaueegue' ñaqa'en so huaqta'a't nỹecpi. 13Qaq so no'onañi ye Galaad, qataq 'enauac ye 'alhua ye Basán maye lalamaxat co'ollaxa so Og, qataq 'enauac ye 'alhua ye Argob, maye nauattonatac da na'alhua so logoraicpi, yemaye sami' na laỹepi na maiche nhuo' le'ecpi maye chegoxoguet so Manasés. 14Nache so Yaír maye chegoxoguet so Manasés, somaye ỹacona ye 'alhua ye Argob, ivitta'a ye loga't ye 'alhua ye Gesur, qataq ye Macá, qataq naralaxat da le'enaxat ye Basán, nache ỹanagui da Havot Yaír. Qaq de'era le'enaxat ñaq 'eetalec ivitta'a nagui. 15Qaq so Maquir nache sanem ye 'alhua Galaad. 16Qaq na maiche nhuo' le'ecpi maye chegoxoguet so Rubén qataq so Gad, sanem ye chegoqchiguiña ye Galaad, nache ivira'a so la'auaxac Arnón, qataq ivitta'a ye tala Yaboc, maye loga't ye na'alhua so amoniitapi. 17Nataqa'en sanem ye 'alhua ye Arabá, maye pa'aỹa'ague da nala' lliguisheguem añi qasoxonaxa Pisga, yem 'alhua maye loga't ye tala Jordán, chegoqchiguiña ye Quinéret, nache ivitta'a aso auaxai ye Arabá, maye nachaso aso Auaxai Leuaxai.
18Qaq se'eso na'a'q qami' sanema co'ollaxa de'era ỹamaxasoxonaxac, 'eeta': «Ñim Nataxala' maye Qanatamnaxala'ai, qami' ỹanema ne'ena 'alhua da yaqto' qaralamaxache. Qaq na ỹalleppi maye ỹaỹaten da nalaataxac, nache hua'auta'ague qome da llec na lqaỹañecpi da taitague da le'ego. 19Qaq naua nañalo na huaqta'a't nỹecpi maye mashe qami' sanema, nache ndotec na 'alpi qataq na ñaqpiolec da no'onaña, qataq na qaralamaxache 'atetpi maye qalota. 20Qaq nache qaica qome ca ñe'eguelaq da ñaq saxanaxa da nalec yi'iye 'alhua na qarqaỹaipi, da yaqto' machiguiñi, 'eeta'ama qami', qom nalec yi'iye 'alhua maye pa'aỹa'atague da le'ego ye tala Jordán, maye ỹanem qome Ñim Lo'onatac 'Enauacna.» 21Qaq so Josué sanem co'ollaxa da ỹa'aqtac, 'eeta': «'Am 'auauaachigui Ñim Nataxala' maye Qanatamnaxala'ai, dam ỹo'oteque co'ollaxa se'esoua dos nta'al, qaq nachera da 'eetec naqa'en qome ye 'alhuapi maye qailotague' maye 'auapelec qome. 22Qaq saishet qome da 'aye'etega yemayepi, cha'aye Ñim Nataxala' maye Qanatamnaxala'ai maiche qami' delocleguete qome.»
So Moisés sa qaỹashenem da huenoxoneua'a ye Canaán
23Se'eso na'a'q, aỹem ñachoxonnot Ñim Nataxala', sheeta': 24«'Am Nataxala', 'Am 'auachaxana co'ollaxa ne'ena 'aramaxashec da 'ara'amaqchec qataq da 'ara'añaxac. Cha'aye qaica ca lỹa Lo'onatac 'Enauacna da neto'ot na piguem, huo'otaq ana 'alhua, da ishet da ỹo'ot nam qaica ca 'ena'am da llo'oxoyec maye ishet da 'auo'ot. 25Qaq ỹoqo'oye 'Am ñachoxonnot, da aỹem 'auasheetem da sa'axasoxoolec ye tala Jordán, da saitague da le'ego yaqto' semeten da lyac ye 'alhua maye huaña aye qasoxonaxapi, qataq ye Líbano.» 26Qalaxaye Ñim Nataxala' aỹem dalemataỹa souaxat qami', nache saishet da ỹasateguet da ñachoxonnaxac, nacherata da aỹem 'enapega, 'eeta'. ¡A'aye! 'Axaañi da aỹem 'aua'aqtaxaatapeguem de'era. 27Qalaxaye 'asheguema qome na pa'asheguem añi qasoxonaxa Pisga, qaq nache 'auallelec ye pa'aigue da sheu', la'añaxa, nala' lliguisheguem qataq da avit, qalaxaye saishet da 'aua'axasoxoolec qome ye tala Jordán. 28Qaq nacherata da 'auapaxaguen qome, 'aua'añaqchet, qataq qaramchigui 'anqa'en so Josué, cha'aye nacheso qome so lataxala' ne'ena nhuo' le'ecpi, qataq ỹanem qome yi'iye 'alhuapi maye choche 'aumeten nagui. 29Qaq cai ime, nache souaqa'a ye ca'amapega't 'alhua maye nalotta ye Bet Pegor.
