Deuteronómio 33

«Ñim Nataxala' chegoqtelec añi Sinaí,

nache qomi' icoỹareleguete hualec añi Seír.

Qaq na lqashelgaxa qalaq chegoqtelec

aye qasoxonaxapi ye Parán,

nache ivira'a ye Meribá Cadés,

qaq na aloiguishec lhuaq,

nache 'ettaigui so nasoqta'a nqataxacpi.

₃Ñim Nataxala' ỹauotec na lalamaxat nhuo' le'ecpi,

qataq ntela'a na nañanotpi Ñimaye,

qataq na ỹalaxaguet,

qataq na ỹo'ot na lamaxasoxonaxacpi.

₄Nache so Moisés qomi' ỹanema co'ollaxa

de'era napaxaguenataxanaxac,

yaqto' qomi' maye sachegoxosoxoguet

so Jacob, qaralamaxat damaye,

₅nache huo'o co'ollaxa so nta'a ye Israel,

co'ollaq ivita da lapona't na lataxala'pi na nhuo' le'ecpi,

nache huaxaiguet na maiche nalamaxat

nhuo' le'ecpi ye Israel.»

₆Qaq 'era co'ollaxa da la'aqtac so Moisés,

maye talec naqa'en so chegoxoguetpi so Rubén,

'eeta': «¡Nache 'eetai' qome so Rubén!

¡Qataq saishet qome da imeuo,

na'aictaxa da saq 'amaqtaq na nalleppi!»

₇Qaq da la'aqtac maye ỹanem so Judá, 'eeta':

«'Am Nataxala', ñaq 'aua'axaỹa qome

da lỹaxanaxac na Judá,

qataq ỹalegoigui 'anqa'en qome

na maiche lalamaxat lauo' le'ecpi,

qataq 'auauota'a da 'ara'añaxac da 'aueelec namayepi,

qataq 'autauan da delogui' ca mpa'aguenaxauapi.»

₈Qaq da ỹanem la'aqtac so Leví, 'eeta':

«'Am Nataxala', soua 'aralamqa'ate Tumim

qataq Urim qalaq 'aỹa'anema so shiỹaxaua maye 'arpe'et,

qataq 'avi'iguen co'ollaq huaña ye Masah,

som 'ancotaỹapegue' co'ollaq huaña

ye npaxaatasheguem na 'etaxat ye Meribá,

₉som 'eetega so lta'a qataq aso late'e, 'eeta':

‹Sa ỹauana da qami' selota'alo›,

qataq co'ollaq ila'alo soua lqaỹa't qalaq, 'eeta':

‹Qami' sa sauatto'n›

nataqa'en co'ollaq ila'alo soua llalqa nache, 'eeta':

‹Saishet da qami' sauatto'n.›

Qalaxaye ỹataqta ỹalaxaguet da 'ara'aqtac

qataq ipactelec da ỹo'ot da 'anaỹamaxataxac.

₁₀Qataq somaye ỹapaxaguenec

da 'alapaxañi lataxac so Jacob,

qataq da 'arapaxaguenataxanaxac so Israel.

Qataq 'Am taỹot naqa'en so nchenaxanaxat,

qataq 'Am ỹanot so nachetaqtaxanaxat

shiguiỹac maye qaỹavigaxatta.

₁₁'Am Nataxala', ñaq 'aỹa'anem qome

da ỹaỹamaqchiguiñi 'enauac na ỹo'otpi,

qataq 'auamaateguet qome da 'auaconeguet

cam chegaqaigui da lo'onataxanaxac.

Qataq 'auo'ot da nhuaxanaguec ca mpa'aguenaxauapi,

yaqto' saishet da qaltaq ñe'eguelaxasheguem

ca nquiỹategapi namayepi.»

₁₂Qaq da ỹanem la'aqtac so Benjamín, 'eeta':

«So lauotaxat Ñim Nataxala'

ỹataqta amata da nmataxac,

cha'aye Ñimaye ỹataqta ntela'a somaye,

¡Nache somaye huetalec

da ltelaqtaxanaxac Ñimaye!»

₁₃Qaq da ỹanem la'aqtac so José, 'eeta':

«Ñim Nataxala', ỹanem qome da no'on ye na'alhua

cha'aye talec naqa'en na no'on 'aỹa maye chegoqo'ot na piguem,

qataq na 'etaxat maye chegaqaña na pa'aguiñi ana 'alhua,

₁₄qataq ỹataqta no'on da alaỹaxac na lañiguishecpi ye vi'i,

qataq ỹataqta no'on ana lqateguishe ala maye huetoigui na ca'agoxoicpi,

₁₅qataq ana ỹataqta no'on ala maye chegaqalec

ana ỹataqta togoshaapec qasoxonaxapi, qataq da alaỹaxac maye chegaqalec

nam qaỹoqotcheguemec 'alhuapi maye nache 'eetai',

₁₆qataq da ỹataqta no'on alaỹaxac na 'alhua,

qataq da sa qoue ana ala na nañiguishec, chegoqchigui da maiche 'eetapeguec

Ñim netaigui co'ollaxa asotai' 'epaqole maye 'ettaigui.

Nache 'enauac damaye talec naqa'en so José,

som qaiỹotauga maye chegaqaigui so lqaỹañecpi.

₁₇Qaq da lyacỹaxac so José qalaq 'eeta'am

ca la'auaxanec llalec ca huaca,

qataq da la'añaxac 'eeta'am da la'añaxac

naua lcoue ca no'onaxa le'ec huaca,

qaq nache iroleguete qome da decanaxangui

na ỹotta'a't shiỹaxauapi, ivitta'a naqa'en naua qaỹoqtalo 'aleu'.

Qaq namayepi nachena na qalota llalaqpi so Efraín,

qataq na qalota llalaqpi so Manasés.»

₁₈Qaq da ỹanem la'aqtac so Zabulón qataq so Isacar, 'eeta':

«'Am Zabulón, 'auamachiguiñi qome da huo'o ca 'aigue,

nataqa'en 'am Isacar da qonetaigui ca npe'lpi.

₁₉Qataq 'aỹaxana na ỹotta'a't shiỹaxauapi

da tasheguema 'anqa'en añi qasoxonaxa,

yaqto' ỹaneuo ca ỹaỹamaqchiguiñi lachetaqtaxanaxat,

nache nque'etaxaachigui qome na sa qoue nallec

maye chegaqangui aso auaxai,

qataq da nsallaxa maye hueto'oto naua loiguiye asomaye.»

₂₀Qaq da ỹanem la'aqtac so Gad, 'eeta':

«¡Ỹataqta qaỹo'oxoren qome

Ñim qalochiguiñi naqa'en na na'alhua so Gad!

Som 'eeta'am ca llon da nqapaxaatañi,

nqapaxaatalec ca loxonec,

nache ntactauec na lhuaq qataq lqaic.

₂₁Qataq lca'ateua'a ca no'on da ỹauo'o lalamaxat,

cha'aye qaiqataxanai' da qaỹauo'o lalamaxat na ỹo'otegue na lataxacpi.

Qataq nachena na lataxala' na nhuo' le'ecpi,

nache ipactelec da ỹo'ot da lamaxasoxonaxac Ñim Nataxala',

qataq da ỹaỹamaqchiguiñi lataxac na Israel le'ecpi.»

₂₂Qaq da ỹanem la'aqtac so Dan, 'eeta':

«So Dan 'eeta'am ca llalec ca llon,

maye parenaxaata co'ollaxa chegoqchiguiña ye Basán.»

₂₃Qaq da ỹanem la'aqtac so Neftalí, 'eeta':

«So Neftalí, ỹataqta ỹaỹamaxareeta co'ollaxa Ñim Nataxala',

ỹoqo'oye ỹataqta qalota naqa'en da nqouagaxa,

¡qataq na lalamaxat 'alhua chegoqchiguiña

aye auaxai choche ivitta'a ye la'añaxa!»

₂₄Qaq da ỹanem la'aqtac so Aser, 'eeta':

¡So Aser ỹataqta qaỹo'oxoren da ỹalectaigui na lqaỹañecpi,

qataq na lqaỹañecpi ỹataqta lauotaxat somaye!

Qataq na aceite ỹapapiaxa't naua lapia'ate,

₂₅qaq naua naso'omi qalaq la'araxat naqa'en na lcat qataq bronce,

qaq da la'añaxac qalaq nache 'eetai' ivitta'a ca loga't da nachaalataxac.

₂₆Ỹataqta qaica ca 'ena'am Ñim Natamnaxala' na Israel le'ecpi,

cha'aye netalec na piguem da 'am itauan,

qataq netalec na lo'oc da la'amaqchec.

₂₇Ñim Lo'onatac 'Enauacna maye nache 'eetai' da 'aye'eguenaxala',

qataq Ñim nache 'eetai' da 'am nlletañi,

qataq 'am dataueeguesop naqa'en na 'ampa'aguenaxauapi,

qataq 'am ỹamaxalec co'ollaxa da 'aulaxachigui namayepi.

₂₈Nache na Israel le'ecpi ỹataqta qome qaica ca ỹauotaique.

Qataq na chegoxoguetpi so Jacob,

netalec qome ca 'alhua maye

sa qoue na trigo qataq ana uva,

qaq na piguem qalaq nache chegoqtacot na 'aỹa.

₂₉¡'Am Israel, ỹataqta 'auamachiguiñi qome!

¿Negue'tom ca 'am 'eeta'am?

Cha'aye 'am lca'alaqtac Ñim Nataxala',

Ñimaye 'am npaxattalec qataq 'am itauan,

¡Ñimaye 'eeta'am ca 'ainec maye huegaxanaxaic!

Qaq ỹo'ot qome da 'oxonec ca 'ampa'aguenaxauapi

qataq da 'auapigui camayepi.