Da lataxac na namaxasoxonaxacpi
1Qaq 'ena na namaxasoxonaxacpi, nqataxacpi, qataq na qalapaxañi lataxacpi, maye aỹem ỹamaxalec Ñim Nataxala' maye Qanatamnaxala'ai da qami' sapaxagueneque, yaqto' ỹataqta qauo'oche qom mashe qoñiitalec yi'iye 'alhua maye qami' ỹanema qome da qaralamaxache. 2Yaqto' huo'o naq 'enec qanqa'eñi Ñim Nataxala' maye Qanatamnaxala'ai qataq ỹataqta qaualaqaiguet na lamaxasoxonaxacpi, lqataxacpi maye qami' samaxaleguete yaqto' qami' qataq na qoyalquipi qataq qarhuallipi ỹataqta qaỹoqtec da nachaalataxac da netalec ye 'alhua. 3Qaq ỹoqo'oye qami' Israel le'ecpi ỹataqta qauo'oche qome de'era, yaqto' 'onaxaic da qanachaalataxaqui qataq ivitta'a da ỹataqta qami' qalota qom qoñiitalec yi'iye 'alhua maye huaña da sa qoue na huaca lche' qataq na te'esaq lli'i, nache ipacchigui da ỹan la'aqtac co'ollaxa Ñim Nataxala' maye Natamnaxala' so hua'au qarta'ailpi.
4Ñaq qana'axaỹaxañi qami' Israel le'ecpi: Ñim Nataxala' maye Lo'onatac 'Enauacna, Ñimaye nacheñita 'oonolec da Nataxala'.
5'Auauotec qome Ñim Nataxala' maye Lo'onatac 'Enauacna, ỹataqta 'amato'ot da 'arquiyaqteỹaxac, 'anachaalataxac qataq da 'ara'añaxac.
6Qaq ne'ena ỹa'aqtacpi maye 'am sanem nagui, ỹataqta 'aỹa'anaigui qome da 'arquiyaqteỹaxac, 7nache 'avi'eguelaxattalec da 'auapaxagueeteguec na 'aỹa'alaqpi, da qonetaña ca 'arma', huo'otaq da qoquetague' ca nqa'aic, huo'otaq da 'annaañi ye pe, qataq da qoñisheguem ye nte'eta. 8Nache ne'ena nqataxacpi, 'axattchiguiñi da 'anagui na 'arhuaq qataq 'analec na 'aratap da yaqto' la'anaxat 'anqa'en, 9qataq 'erelec ca lasom ca 'arma', qataq ca ñegueuo ca lpaqtaxat camaye.
So Moisés ỹamaxalec da ỹalaq so Israel le'ecpi
10Ñim Nataxala' maye Qanatamnaxala'ai, ỹanem co'ollaxa da la'aqtac so Abraham, Isaac qataq so Jacob da qami' ỹanema yi'iye 'alhua. Da yaqto' qoñiỹaigui qome na ỹataqta no'on huaqta'a't nỹecpi maye saishet da qaro'onataqui, 11qataq da'aichigui na ỹataqta no'on nogoxoshetpi maye saishet da qara'añaqtegueshiqui, qataq ana ñi'illoxoquipi maye saishet da qanshiyi co'ollaxa, qataq qollequi ana ala ana uva qataq ana oliva maye saishet da maiche qa'añiiñi co'ollaxa. Qaq da qollequi ana'ana ala nache ỹataqta qami' comaraxaiqa. 12Qaq ỹoqo'oye saishet qome da qaucouaỹa'ai Ñim Nataxala' maye qami' nqateeguesopa co'ollaxa ye Egipto, yem huaña co'ollaq choche qami' nlatacpi. 13Ỹoqo'oye huo'o naq 'enec qanqa'eñi Ñim Nataxala' maye Lo'onatac 'Enauacna, qataq nacheñita qaualaqaiguet. Qataq da qaỹa'añi ca qara'aqtaqui qalaq qauacoñiỹa da le'enaxat Ñimaye. 14Qataq saishet da qauca'achiỹa na natamnaxala'pi na shiỹaxauapi maye qarhuoreuaipi, 15cha'aye Ñim Nataxala' maye Qanatamnaxala'ai, qami' huetanguilo. Qaq Ñimaye ỹataqta ca'alaxanaxaic, qataq ishet da qami' dalemataỹalo, nache qami' ilaxachiguilo.
16Saishet qome da qavi'igueñi Ñim Nataxala' maye Qanatamnaxala'ai, da 'eeta'am da qoñeetec co'ollaq huaña ye Masah. 17Qataq qaupaquiichigui na lamaxasoxonaxacpi Ñim Nataxala' maye Qanatamnaxala'ai, na lamaxasoxonaxacpi, qataq na lqataxacpi maye qami' ỹanema Ñimaye. 18Qataq qauo'oche na ỹaỹamaqchiguiñi qataq no'on lataxacpi maye ỹaỹamaxareeta Ñim Nataxala', yaqto' 'onaxaic da llec da qanachaalataxaqui qom qoñiỹalec ye 'alhua maye Ñim Nataxala' ỹachaxanapeguem co'ollaxa da ỹanem so hua'au qarta'ailpi. 19Yaqto' Ñimaye ỹo'orauec na qampa'aguenaxauaipi maye nshetaique da qami' dataỹa'agueta, nache ipacchigui da la'aqtac co'ollaxa.
20Qaq da huo'o ca na'a'q da qami' ina't na qoyalquipi, da 'eeta': «¿Negue't ca naigui ne'ena namaxasoxonaxacpi, nqataxacpi, qataq na qalapaxañi lataxacpi, maye qomi' ỹamaxaleguete Ñim Nataxala' maye Qanatamnaxala'?» 21Nache qami' qoñiita': «Qomye huo'o so na'a'q da qomi' l-lataqa so faraón co'ollaq huaña ye Egipto, qalaxaye Ñim Nataxala' ỹauota'a da ỹataqta lta'araic la'añaxac da qomi' nqatre'c. 22Qataq sauanaqchigui na na'anecpi qataq na lta'araic lchecpi maye ỹo'ot Ñim Nataxala', maye ỹo'otec so lta'a na netaña ye Egipto qataq na llalaqpi somaye. 23Nache qomi' nqateeguesopa yemaye da yaqto' qomi' ỹauegalo da qomi' ỹanema ye 'alhua maye ỹachaxanapecot co'ollaxa so hua'au qarta'alpi. 24Ime, nache Ñim Nataxala' qomi' ỹamaxaleguete da salaxasoxoguet 'enauac ne'ena lqataxacpi, qataq huo'o naq 'enec ñaqa'enaq, yaqto' 'enauaque naua na'axa'te da qaica ca da, da qanachaalataxac, qaq 'era da 'eetec nache ivitta'a nagui. 25Qaq ỹoqo'oye da ỹataqta salaxasoxoguet na lamaxasoxonaxacpi Ñim Nataxala' maye Qanatamnaxala'. Nache ỹaỹamaqchiguiñi da qarataxac, da sepagaqchigui da qomi' ỹamaxaleguete Ñimaye.»
