Deuteronómio 8

₁Qaq ỹataqta qauo'oche qome 'enauac na namaxasoxonaxacpi maye qami' sanema nagui, yaqto' nache 'eetai' da qanca'alliitauec, qataq qaviyiỹa'a da ỹataqta qami' qalota, qataq qoñiỹalec ye 'alhua maye Ñim Nataxala' ỹachaxanapecot co'ollaxa da ỹanem so hua'au qarta'ailpi. ₂Qataq saishet qome da qaucouaỹa'ai 'enauac so qanque'eenaxaqui maye huaiguilo se'esoua cuarenta vi'iye co'ollaq qoquiitalec ye toolec 'alhua, co'ollaq Ñimaye ỹe'eguen da qarquiyaqteỹaxaqui da ỹoqta 'eesa da qaupaquiichiguilo naua lamaxasoxonaxaco huo'otaq saishet. ₃Na'aictoxo' da ỹauo'o co'ollaxa da qanque'eenaxaqui, qataq huo'o naqa'en so qarqouaqai, qaq co'ollaq ime, nache qami' iquia'axaneque so nallec maye chegaqasheguem le'enaxat maná, som nallec maye qami', qataq so hua'au qarta'ailpi sa ỹauatton, cha'aye huotaique da qauaỹaañi da saishet da nachecata ca nallec da nca'altauec naqa'en ca shiỹaxaua, cha'aye nataqa'en naua la'aqtaqa Ñim Nataxala' deca'alaqtaxa'n. ₄Qaq se'esoua cuarenta vi'iye saishet da huo'otaq ltoi' soua qorogolle' maye qaỹa'añeetrañi, qataq saishet da nalaua't naua qarapia'achilli'. ₅Qataq qauaỹaañita da Ñim Nataxala' maye Qanatamnaxala'ai, ỹataqta ỹaỹamaxatchiguiñi da qarataxaqui, 'eeta'am ca nta'a da ỹaỹamaxaañi da lataxac ca llalec. ₆Qaq ỹoqo'oye qauaỹamaxacheeteque qome naua lamaxasoxonaxaco Ñim Nataxala' maye Qanatamnaxala'ai, qataq qaualaqaigueta qataq qoquiiteguelo naua lapaxaguenataxanaxaco Ñimaye. ₇Cha'aye Ñimaye qami' ỹauegalo ye ỹataqta no'on 'alhua, yem 'alhua maye huo'o na la'auaxacpi, qataq na npaxaatasheguem 'etaxat, qataq na chegaqasheguemec aye qasoxonaxapi qataq ye ca'amapega't 'alhua, ₈qataq yi'iye 'alhua ñaxaalec na trigo, cebada qataq ana lcheyec ana uva, higo, granada, olivo qataq sa qoue na te'esaq lli'i. ₉Qataq huaña yemaye da saishet da qaviñiitaique ca nallec, qataq ca laỹe nhuenecpi. Qaq na coma' qalaq qauachegoxochiỹaigui ca lcat, qaq aye qasoxonaxapi qalaq qauachegoxochiỹaigui ca cobre. ₁₀Qalaxaye qom mashe qauqui'iitac qataq qami' comaraxaiqa, nache saishet da qaucouaỹa'ai da qaỹa'añiỹot da qana'achecỹaxaqui Ñim Nataxala' maye Qanatamnaxala'ai, souaxat da ỹataqta 'onaxaic yem qami' ỹanema 'alhua.

₁₁Saishet qome da qaucouaỹa'ai Ñim Nataxala' maye Qanatamnaxala'ai. Qataq saishet da sa qauo'oche na lamaxasoxonaxacpi qataq na lapaxañi lataxacpi, qataq na lqataxacpi maye qami' samaxaleguete nagui. ₁₂Qaq qom mashe qauqui'iitac, qataq qami' comaraxaiqa, qataq da mashe qauo'oche' caua no'o'n qarma'achilli', qataq mashe qoñiỹaiguilo, ₁₃qataq da mashe nquiguec na llalec aca qareloi huacapi, qaguetapi, qataq da mashe nquictasheguem aca qo'omi plata, oro qataq da qarsallaqai, ₁₄nache saishet qome da qana'amaqchiñi, qataq da qaucouaỹa'ai Ñim Nataxala' maye Qanatamnaxala'ai, maye qami' nqateeguesopa co'ollaxa ye Egipto, yem huaña co'ollaxa da choche qami' nlataqa; ₁₅qataq qoquiitalec nataqa'en ye toolec 'alhua maye chaqaic qataq qalochiguiñi, qataq nlaqtelec na 'araxanaq maye qanlem na lshenataxanaxa, qataq na pe'elaqtoic, qataq qaica na 'etaxat. Qalaxaye Ñimaye qami' ỹanema so 'etaxat ỹachegoxotaigui aso coma' da yaqto' qami' nỹomaxa'n, ₁₆qataq huaña yi'iye toolec 'alhua da qami' iquia'axaneque so nallec maye chegaqasheguem le'enaxat maná, som nallec maye sa ỹauanapega co'ollaxa da chec so hua'au qarta'ailpi, qataq huaña da ỹo'ot so lta'araic qanque'eenaxaqui qataq so qañe'eguenataguiiqui da yaqto' qauaỹachiñi da qami' ỹaỹamaxattrapiguiñi Ñimaye.

₁₇Qataq saishet qome da qarhuennataqai, da 'eeta': «'Enauac de'era qarsallaxa damaye chegaqaigui da qaro'onataxanaxac, qataq da la'añaxac naua qarhuaxaye.» ₁₈Nacherata da qauennachiỹa'a Ñim Nataxala' maye Qanatamnaxala'ai, cha'aye Ñimaye nacheñi ñim qami' ỹanema da qara'añaxaqui da yaqto' qauacoñiiguet de'era nsallaxa, yaqto' ipacchigui da ỹan la'aqtac co'ollaq naỹamaxate' so hua'au qarta'ailpi.

₁₉Qalaxaye da qaucouaỹa'ai Ñim Nataxala' maye Qanatamnaxala'ai, da qoquiigue na ỹaqa'a atamnaxala'pi da qanatamñiỹot, nache nagui qami' sa'aqtaxaatema da ỹataqta qami' nlachiyiñi qome. ₂₀Cha'aye da saishet da qaualaqaiguet Ñim Nataxala' maye Qanatamnaxala'ai, nache qami' ilaxachiguilo qome, qoñiita'am naqa'en da 'eetec da ilaxachigui na ỹotta'a't shiỹaxauapi de'era qa'aita'ague.