1'Auasaxangui ca ne'etaxat aca 'arauole 'ayiiña,
qaq qom mashe qaỹoqteguelo caua na'axa'te
nache qaltaq 'aulalec acamaye.
2Cam 'am hueto'ot, 'aỹa'anoiguilo caua siete huo'otaq caua ocho,
cha'aye sa 'auaỹaten negue't cam qauem maye ishet da nvira ana 'alhua.
3Da nlaqchigui na lo'oc na piguem,
nache na auot huecorelec ana 'alhua.
Qaq aca qo'oipaq da hua'axague da sheu',
huo'otaq da hua'axague da taguiñi,
nache cam huaña da hua'axañi, nacheca cam huetaña.
4Qaq cam imelec da imeteetac na la'at,
qalaq saishet da ivira da danaxan,
qataq cam imelec da imeteetac na lo'oc na piguem,
nache saishet da ivira da deqataxan.
5Qaq cha'aye sa 'auaỹaten dam llecỹaxac na la'at, qataq sa 'auaỹaten da lañaxataxac ca nogotolec da huetaigui na lauel aca late'e, qaq nache 'eetec nataqa'en da sa 'auaỹaten nam ỹo'otpi Ñim Lo'onatac 'Enauacna, ñim ỹo'ot co'ollaxa 'enauac nam huetalec ana 'alhua. 6Qaq 'aỹa'aañi aca ala aca 'añiguishe ye nte'eta qataq ye avit, cha'aye sa 'auaỹate'n caamaye negue't acam ỹoqta no'on da lañaxataxac, huo'otaq aso hua'auchiguiñi, huo'otaq aca nca'ataxanauo, huo'otaq 'enauaque caamaye da no'on da lañaxataxa'c. 7¡Ỹataqta saq no'onolec na yo'oqchiguiñi, qataq ỹataqta 'onaxaic da qaỹamato'ot añi nala'! 8Qalaxaye na'aictaxa da qaỹoqteguelo naua vi'iye da nachaalataxac ca shiỹaxaua, qalaxaye iuen da taỹa'a lauel da qalote' qome caua na'axa'te ca napalaxa, qataq 'enauac cam ñaq naỹa'acna ỹataqta qaica ca naigui.
Nam nqataxacpi maye taalec nam nsoxoppi
9'Am nsoqolec, nagui da ñaq nalota't da 'anachaalataxac nache 'antootapigui' qome, qataq 'anque'etaxaachigui nam no'on maye ishet da 'auo'ot nagui. Qoquegue da 'arquiyaqteỹaxac souaxat nam 'aulota'api, qalaxaye 'auennata'a da Ñim Lo'onatac 'Enauacna, nmit qome 'enauac nam 'auo'otpi. 10Ñaq 'anqateeguesop qome añi 'arquiyaqte da nayeloxo, qataq qoca'ai 'enauac nam qauemsat, cha'aye ivira'alo naua ỹataqta no'oñi na'axa'te de'era nogotshec, ỹataqta qaica ca naigui.
