1¿Negue't cam 'ena'am ca ỹaanaxanaxaic? Qataq ¿Negue't cam ỹaỹaten cam lataxac 'enauac nam chochena? Dam naỹaanec 'eeta'am da icoỹaroigui da lasheguiỹaxac cam shiỹaxaua, qataq naralaxat dam lasheguiỹaxac.
Da qaỹalaxaguet ca nta'a
2Qaq 'am seqata da 'aualaxalec nam lamaxasoxonaxacpi ca nta'a, cha'aye maiche 'arasataxac co'ollaxa hua'aqchigui 'anqa'en Ñim Lo'onatac 'Enauacna. 3Saishet da ỹapac da 'auỹalapigui' da qoca'ai camaye. Qataq saishet da 'aỹapegueua'a cam saỹaỹamaxañi lataxac, cha'aye camaye ishet da ỹo'ot ca maiche 'eetapeguec. 4Cha'aye ca la'aqtac ca nta'a huo'o da la'añaxac, nache qaica ca ishet da nmit nam ỹo'otpi. 5Qaq cam ỹalaxaguet ca namaxasoxonaxac, nache sa ivireguet ca qauem, qaq ca ỹaanaxanaxaic qalaq ỹaỹaten ca laloqo' qataq ca 'eetec da ipacchigui damaye. 6Cha'aye ỹoqta 'eesa da huo'o ye laloqo', qataq da lataxac da qaỹo'ot 'enauac nam no'onatacpi, qalaxaye huo'o da lta'araic lqalaic maye hueto'ot ca shiỹaxaua 7da camaye saỹaỹaten cam ishet da ivireguet, qataq qaica ca ishet da ivitaqna'aguet camaye.
8Qaica ca shiỹaxaua hueto'ot da na'añaxac da nalalec da achaalataxac da yaqto' ishet da nllañi, qataq qaica nataqa'en ca hueto'ot da na'añaxac da ishet da ilo'ogue da nleuaxa. Qaq ỹoqo'oye qaica ca ỹet de'era loquiaxac, qaq cam yeloxoic saishet da nca'alaxatec da layeloxo.
9Qaq 'enauac de'era sauaachigui, cha'aye ñalemaqte' da ñapaxaguena, 'enauac nam qaỹo'ottacpi ana'ana 'alhua, qataq da na'añaxac maye hueto'ot ca ỹale da ỹo'otec ca qauem ca lỹa.
10Qaq nataqa'en sauaachigui nam qauemaicpi da ỹo'oxoraq qanqa'en da qailareñi. Qaq nam saqỹet naxa da hueta'a ye ndaqa' maye qui'itta, qataq nam hueta'a ye huaqta'a't nỹecpi maye huaña nam no'on maye ỹo'otpi co'ollaxa, icoua'ai namayepi. ¡Qaq de'era nataqa'en qaica ca naigui! 11Cha'aye da sa qaiỹalapegue' da qaỹauo'o ca nhuaxanaguec cam ỹo'ottac nam qauem, nache nam shiỹaxauapi ishet da lhuennataxac da nache queto'ot da ỹo'ottac nam qauem. 12Qaq cam 'etaxaloxoic ishet da cien da ỹe'eguelaxalec da ỹo'ot ca qauem, qataq ỹataqta qaỹoqtrec naua vi'iye da nachaalataxac, qalaxaye nataqa'en saỹaten da 'onaxaic da taỹa'ague cam huo'o naq 'enec naqa'en Ñim Lo'onatac 'Enauacna qataq ỹalaxaguet Ñimaye. 13Qalaxaye nam qauemaicpi qalaq qauem da taỹa'ague, qataq sa qaỹa'ague da nachaalataxac, 'eeta'am na paqal, cha'aye saishet da ỹalaxaguet Ñim Lo'onatac 'Enauacna.
14Qataq huo'o dam qaica ca naigui maye qaỹo'ottac ana'ana 'alhua, cha'aye nam shiỹaxauapi maye no'on da lataxac, qalaq 'eeta'am qanqa'en da qauemaicpi, qaq nam qauemaicpi qalaq 'eeta'am qanqa'en da no'on da lataxac. ¡Qaq aỹem shenapec da nataqa'en de'era qaica ca naigui! 15Qaq ỹoqo'oye aỹem sho'oxoren dam namaicỹaxac, cha'aye qaica ca lỹa no'on maye ishet da ỹo'ot cam shiỹaxaua ana'ana 'alhua, nacherata da deque'etac, nỹomtac qataq da'aistac. Cha'aye nachaqrata damaye hueto'ot, dam chegaqaigui da lo'onataxanaxac da nachaalataxac maye ỹanem Ñim Lo'onatac 'Enauacna.
16Qaq co'ollaq salemaqtelec da ñapaxagueetega da sauatton dam naỹaanec, qataq da semeteetac 'enauac nam qaỹo'ottac ana 'alhua, nache sevitta'a da saishet da so'oche ye na'a'q qataq ye pe. 17Qataq sela'a da ca shiỹaxaua saishet da ỹauatton 'enauac nam huetalec ana 'alhua maye ỹo'otpi co'ollaxa Ñim Lo'onatac 'Enauacna. Qaq na'aictaxa da lta'araic da na'añaxataxac camaye da yaqto' ỹanata ca naigui, qalaxaye saishet da ỹanata; qataq na'aictaxa da ca ỹaanaxanaxaic 'eetega ỹaỹaten, qalaxaye nataqa'en saishet da ivi' da ỹaỹaten.
