Eclesiastés 9

₁Qaq 'enauac de'era aỹem ỹataqta ñañaneguet da semeteetac, huaña nache saỹaten da na no'on da lataxac qataq na ỹaanaxanaxaicpi, qataq nam lo'onatacpi, huetaiguilo naua lhua'q Ñim Lo'onatac 'Enauacna. Qaq cam shiỹaxaua saishet da ỹaỹaten dam nsoxoyec, qataq da nquiỹaxanaqtaic na'aictaxa da nlota'ai' damaye. ₂Qaq 'enauac namayepi 'eeta'a't da 'oonolec ye taỹa'a loga't: na no'on da lataxac qataq na qauem da lataxac, na soxoraic qataq na qauemaic, nam qui'itta qataq na nshepaxan, nam ỹaatac ana lachetaqtaxanaqte, qataq na saishet da ỹan ana lachetaqtaxanaqte, qataq nache 'ena'am cam soxoraic qataq cam 'etaxaloxoic, qataq cam ỹan ca la'aqtac, qataq cam saishet da ỹan.

₃Qaq huo'o dam ỹactec da qauem maye huetaigui 'enauac nam qaỹo'otpi ana'ana 'alhua: da 'enauac 'eeta'a't da 'oonolec ye taỹa'a loga't. Qataq dam lquiyaqteỹaxac ca shiỹaxaua nlaqchigui na qauem, qataq dam 'oopashaxac nache huetaigui ye lhuennataxa 'enauaque naua na'axa'te da nachaalataxac, qaq da ivita ye loga't, nache tauga ye huetaña na leuaxaicpi. ₄Qalaxaye huo'o da naquitaxac cam lhuennataxa, da nache 'eetai' da queta da nca'altauec, cha'aye ỹactec da huo'o da naigui cam pioq nca'altauec, qaq saq 'ena'am cam llon leuaxaic. ₅Cha'aye nam nca'altauecpi ỹaỹaten da taỹa'a da ileu, qalaxaye nam leuaxaicpi qaica ca ỹaỹaten qataq qaica ca laueguec, cha'aye dam na'aqtaguec namayepi mashe qaicoua'ai. ₆Qaq nataqa'en imeuo da lauotaxanaqtaic, qataq dam lquiỹaxanaqtaic, qataq da lsheguenataxanaxac, qataq nache tachiguiña da ỹalectapegueua'a 'enauac nam qaỹo'otpi ana'ana 'alhua.

₇Qaq ỹoqo'oye ¡'asoma qojec qome! Nache 'auamachiguiñi da 'auque'etac, qataq da 'anỹomtapigui na lataxa, cha'aye Ñim Lo'onatac 'Enauacna mashe ỹaỹamaxareeta nam 'auo'otpi. ₈Qataq 'enauaque qome naua na'axa'te da 'aỹa'aatrañi caua nogo lapagaxaiqa, qataq 'aucottalec qome na 'arqaic ca coraxat. ₉Qataq 'Auamachiguiñi qome da qoueta'aguet aca 'arauotaqte 'arhua, 'enauaque naua na'axa'te, qom ñaq 'anachattaigui de'era achaalataxac maye qaica ca naigui, dam 'am ỹanem co'ollaxa Ñim Lo'onatac 'Enauacna da qonetalec ana'ana 'alhua. Cha'aye nacherata 'araueguec maye chegaqaigui dam qalota 'aro'onataxanaxac ana'ana 'alhua. ₁₀Qataq 'enauac nam ishet da 'auo'ot, qalaq ỹataqta 'anasapattelec qome da 'auo'ot, cha'aye añi huachiqui maye 'aỹa'a, qaica ca no'onataxanaxac, qataq qaica ca qaiuennatega da qaỹo'ot, qataq qaica ca nauattonaxanaxac qataq ca naỹaanec.

₁₁Qataq huo'o da lỹa sela'a ana'ana 'alhua, da saishet da nachena nam qayaqaicpi na dauegaxan da qomitaxac, qataq saishet da nachena nam 'añaxaicpi nam dauegaxan da huo'o ye alaataxac. Qataq da saishet da nache 'eetai' naxa da deque'etai' nam ỹaanaxanaxaicpi, qataq nam ỹaanataxanaxaicpi da nache hueto'ot da lsallaxa, qataq nam sanqalaate' da ltaxaỹaxac saishet da qaỹaỹamaxatta da qaỹaconeguet. Cha'aye 'enauac namayepi da huo'o ye na'a'q da nvita da no'on qataq da qauem. ₁₂Qataq sela'a nataqa'en da qaica ca ỹaỹaten da nvita cam laloqo', 'eeta'am ca nỹaq da noxonec huetaigui ca naleguec, qataq 'eeta'am aca qoỹo da taigui aca nqoina, qaq nache 'eetec cam ỹale da mashe qaica ca ỹauotaique, nache nque'elaxatta da talec cam qauem.

₁₃Qataq nataqa'en huo'o dam sela'a ana'ana 'alhua, maye 'eeta'am ñaqa'en da huetaigui da lta'araic naỹaanec, qaq damaye, 'eeta': ₁₄huo'o so saq 'amaqtaq huaqta'a't nỹecpi, maye saq 'amaqtaq so hueta'a shiỹaxauapi, qaq huo'o so 'añaxaic nta'a taỹa somayepi da iloquiaxan, nache se'eso nta'a iconnaxaasop som huaqta'a't nỹecpi aso qalota nalaataxaquipi, da yaqto' loxonec. ₁₅Qalaxaye se'eso huaqta'a't nỹecpi hueta'a so 'oonolec ỹale maye choxoraq, qalaxaye ỹaanaxanaxaic, qaq somaye ishet taxa da do'ogoxona da laỹaanec da nca'alaxatec som huaqta'a't nỹecpi, ¡qalaxaye qaica co'ollaxa ca tachigui lauel somaye!

₁₆Qaq ỹoqo'oye aỹem shenapec da «ỹataqta ỹactec da 'onaxaic da naỹaanec, qaq saq 'ena'am da na'añaxac», na'aictoxo' da qaỹo'otan ca laỹaanec ca choxoraq, qataq da saishet da qana'axaỹaxanalo naua la'aqtaqa.