Ñim Lo'onatac 'Enauacna qomi' ỹanema da qarca'alaxa
1Qaq qami' qoviitaigui co'ollaxa da 'eeta'am da qami' leuaxaiqa, souaxat da sa qaualaiguet Ñim Lo'onatac 'Enauacna qataq qoviitaigui da qaye'etaxalqoi. 2Qataq souaxat da qoquiitague' da qauem lataxac maye ỹo'ottac na shiỹaxauapi maye huetalec ana 'alhua. Qataq qauo'ocheetac na 'eetapeguecsat som saqcha'a maye damaxasoxonapec som ilotague' nam qauem saq cha'api na'añaxacpi qataq maiche ỹoiqueetac nam saishet da ỹalaxaguet Ñim Lo'onatac 'Enauacna. 3Qaq nataqa'en 'enauac da shenaqta nache shenaqta'am namayepi soua hua'au' vi'iye, da qolaqtague' nam maiche shenaqtapeguecpi, qataq so'otaqtac dam lqopitaxanaqtaic da qarapachiỹaxac qataq nam maiche qarhuennataxacpi. Qaq ỹoqo'oye ỹataqta 'itchiguiñi da qomi' huetaleguete da qaica ca 'ena'am lchec lalemataic Ñim Lo'onatac 'Enauacna da shenaqta'am 'enauac nam laỹepi shiỹaxauapi. 4Qalaxaye Ñim Lo'onatac 'Enauacna ỹataqta lta'araic da lchoxonnataxanaxa qataq da lauoche da shenaqta. 5Qaq ỹoqo'oye na'aictaxa da souaqtaigui co'ollaxa da 'eeta'am da qomi' leuaxaiqa souaxat na qarasouaxashetpi, qalaxaye Ñimaye qomi' ỹanema da qarca'alaxa co'ollaq nca'alaxatec So Cristo. Qomi' ñeca'alaxauec, chegoqchigui da lsoxoyec Ñim Lo'onatac 'Enauacna, na'aictaxa da saishet da saxaguet damaye. 6Ñim Lo'onatac 'Enauacna co'ollaq nca'alaxateeguesop da nleuaxa So Cristo Jesús, nache nataqa'en qomi' nca'alaxatre'c, nache qomi' nso'onaxana'ai'salo naqa'en Somaye. 7Qaq ỹo'ot de'era Ñimaye, cha'aye nshetaique da ỹachaxan da 'eetec cam ñaq natrauo na'axa'te da lta'araic lauotaxanaqtaic da shenaqta qataq dam lqouagaxanaqtaic maye ỹachegoxotchigui So Cristo Jesús. 8Cha'aye nachera da lqouagaxanaqtaic Ñim Lo'onatac 'Enauacna da huo'omshe qami' nca'alaxatre'c, cha'aye huo'o da qarpi'iỹaxaqui Ñimaye. Qaq damaye saishet da qami' chegoqchiguilo, cha'aye damaye maiche lachetaqtaxanaxat Ñim Lo'onatac 'Enauacna. 9Qaq damaye saishet da chegoqchigui ca ỹaỹamaqchiguiñi ỹo'ottac ca shiỹaxaua, yaqto' saishet da huo'o ca na'amqangui damaye. 10Cha'aye Ñim Lo'onatac 'Enauacna qomi' lo'onataqa, qataq qomi' nañaxateua'alo naqa'en So Cristo Jesús, cha'aye nshetaique da so'otaq ca ỹaỹamaqchiguiñi. Qaq damaye nale'eno' da lapaqtapiguiñi co'ollaxa da ỹauotaique qoyecỹaxac.
So Cristo nacheso so 'enauac qomi' ỹauaxaỹaxana't
11-12Nam judiopi da qami' iỹaxanalo qalaq, 'eeta': «Nam qaica ca na'anaxashet», qaq namayepi nloola't, 'eeta': «Nam huo'o na na'anaxashet», cha'aye namayepi ỹo'ot na la'anaxat na lo'oc. Qami' saishet da qami' judío lashe', ỹoqo'oye iuen da qauennachiỹa'a co'ollaq saxanaxa da qauacoñiiguet So Cristo qataq saishet da qaualliquiitaigui na Israel le'ecpi. Qataq saishet da qaualliquiiua'a da naỹamaxataxac qataq na ỹachaxanapec Ñim Lo'onatac 'Enauacna maye ỹo'otec na lalamaxatpi. Qataq qoviitalec co'ollaxa ana 'alhua qaica ca qanaquitaxaqui qataq saishet da qauauattoñi Ñim Lo'onatac 'Enauacna. 13Qalaxaye qami' maye qami' qaỹoqtalo co'ollaxa Ñim Lo'onatac 'Enauacna, mashe sa qami' qaỹapigui nagui Ñimaye, cha'aye mashe qana'ayeetaua'a So Cristo chegoqchigui da l-leuaxa co'ollaq qaiuaxaneguet so npe'enaxaqui. 14So Cristo nacheso so qomi' ỹanema da qarlagaxayec. Chegoqchigui da nque'eenaxac Somaye co'ollaq qaiuaxaata'aguet so npe'enaxaqui da ilaxachigui so npaqtaxanaxat maye nachera da nquiỹaxanaqtaic, maye ỹo'ot da na judiopi sa nhuoone' nam saishet da judiopi. Qaq nagui ne'enaua dos, Somaye ỹo'oteguet da 'enauac da nhuo' le'ecpi. 15Cha'aye So Cristo nlaxaañi da lamaxasoxonaxac na nqataxacpi qataq nache chegoqchigui Somaye da se'eso sa nhuoona't nhuo' le'ecpi ivira'a da auochaxauapi. 16Chegoqchigui da l-leuaxa So Jesucristo co'ollaq qaiuaxaata'aguet so npe'enaxaqui, da Somaye ỹa'axaneguet da pa'aguenaxac maye huetaiguilo se'esoua nhuo' lashe'. Qataq l-llatcheguem se'eso pa'aguenaxac co'ollaq qaiuaxaneguet so npe'enaxaqui Somaye, ime nache ỹauaxaỹaxana't da yaqto' 'enauac da nhuo' le'ecpi qataq huetaigui da lactapiguiñi, cha'aye hueto'ot Ñim Lo'onatac 'Enauacna.
17So Cristo anac co'ollaxa da ỹa'axatem 'enauac na shiỹaxauapi da no'on na'axaỹaxac maye ỹo'ot da nlagaxayec, qaq ivirauga na saishet da judiopi maye qaỹoqta co'ollaxa Ñim Lo'onatac 'Enauacna qataq nam judiopi maye saqaỹapeque Ñimaye. 18Chegoqchigui da ỹo'ot So Cristo da, na'aictaxa na lauo' le'ecpi judiopi huo'otaq nam saishet da judiopi, da 'oonolec so qomi' hueta'agueta Saqcha'a Na'añaxac som chegoqchigui da ishet da saqaỹapeque Ñim Lo'onatac 'Enauacna maye Qarta'a. 19Qaq ỹoqo'oye qami' saishet da 'eco' ỹaqa'a ca qauachegoqỹa'ague naqa'en Ñim Lo'onatac 'Enauacna. Nachaqrata da nagui qami' qaualliquiitaigui nam lalamaxat lauo' Ñimaye qataq nataqa'en qanhuañiỹaua'a nam lalamaxatpi namayepi, cha'aye nagui mashe qaualliquiitaigui nam llalaqpi Ñim Lo'onatac 'Enauacna. 20Qataq qami' 'amqaanataxanaxaicpi qoñiita'am ca nỹec maye qano'oxootapiguisheguem, no'oxootelec qanqoỹen som lapaxañi co'olloxocheye na lamaxashecpi So Jesús qataq so la'aqtaxanaxanecpi Ñim Lo'onatac 'Enauacna. Qaq nacheso So Jesucristo som 'eeta'am ca coma' maye nllañi ca nỹec. 21Somaye nacheso som nlletañi cam nỹec qataq nquictasheguem naqa'en, choche ivitta'a da 'eeta'am ca nỹec maye ño'oxonnataxanaxaqui da qaỹo'oxoren Ñim Nataxala'. 22Nagui da mashe qana'ayeetaua'a So Jesucristo, nache nataqa'en qami' qana'ayeetaua'a ñi'iñi nỹec, maye netaigui Ñim Lo'onatac 'Enauacna ỹachegoxotchigui naqa'en So Saqcha'a La'añaxac.
