Efesios 5

₁Qaq cha'aye qami' lauotaqa'ate llalqa Ñim Lo'onatac 'Enauacna, ỹoqo'oye ỹataqta qanpogoxoiñiỹapegue' qome da qoñiita'am Ñimaye. ₂Qataq iuen da ỹataqta qauauochec na laỹepi shiỹaxauapi, 'eeta'am So Cristo da qomi' ỹauoteque qataq qomi' ileualeguete. Qaq da l-leuaxa Somaye Ñim Lo'onatac 'Enauacna, 'eeta'am naqa'en da alaitaỹaxac ca no'on coraxat maye qoỹaneuo da nachetaqtaxanaxat.

₃Qaq cha'aye qami' lalamaqa'ate Ñim Lo'onatac 'Enauacna, ỹoqo'oye no'on da saishet da qami' chemaxanguilo da huo'o ca quisheguetaxac qataq 'enauac nam laỹepi maye ishet da deshepaxanaqtaxan, huo'otaq da qaiqopita'a ca ỹaqa'a. ₄Qataq saishet qome da qanasaqaire'c naua na'aqtaqa maye qauema, huo'otaq ca na'aqtac maye qaica ca naigui huo'otaq cam ỹo'ot da naỹalliguiyec. Cha'aye namayepi saishet da ỹaỹamaxañi da qanasaqaiteguec. Chaqrato' da qami' qaỹa'añiitacot da qana'achecỹaxaqui Ñim Lo'onatac 'Enauacna. ₅Cha'aye qami' qauaỹaañita da ca ncachetague' aca sa lhua, huo'otaq ca ỹo'ottac ca deshepaxanaqtaxan, huo'otaq ca saishet da machiguiñi na'aictaxa da qalota na hueto'otpi, camaye saishet da inoxoneua'a da lo'onataxanaxac So Cristo qataq Ñim Lo'onatac 'Enauacna. Cha'aye nam ỹo'ottacpi ỹataqta qauem 'eeta'am da qanatameetacot ca choche ne'enaqtac qataq saq 'en. ₆Qataq saishet qome da huo'o ca qami' ỹatenache't da qami' iroleguete naua napaxaguenataxanaxaco maye qaica ca naiguilo. Cha'aye ne'enaua sa ỹaỹamaxaayiñi, nachenaua naua chegoqchiguilo dam qaica ca 'ena'am da lchec layeloxo Ñim Lo'onatac 'Enauacna da ỹauo'o da nhuaxanaguec nam saishet da ỹalaq. ₇Qaq ỹoqo'oye saishet qome da qa'aitegueua'a na shiỹaxauapi maye ỹo'ottac de'era.

₈Cha'aye da sa qaỹauatton Ñim Lo'onatac 'Enauacna, nache damaye 'eeta'am da qanayeetaigui na napalaxa. Qami' co'ollaxa qoviitaigui na 'eco' napalaxa, cha'aye saishet da qauauattoñi Ñim Lo'onatac 'Enauacna. Qalaxaye nagui qami' mashe qauauattoñi Ñimaye, nache qoviitaigui na yo'oqchiguiñi. Qaq ỹoqo'oye qami' ỹataqta qaupaquiichigui qome da lataxac cam ỹataqta ỹauattoota Ñimaye, ₉cha'aye se'eso Saqcha'a Na'añaxac nacheso so chegoqchigui da nauotaxanaqtaic qataq da 'eesa lataxac qataq dam achaalataxac maye qui'itta. ₁₀Qataq qanpogoxoiñiỹapegue' qome da qauo'oche ca lataxac maye ỹaỹamaxareeta Ñim Lo'onatac 'Enauacna. ₁₁Qataq saishet qome da qa'aitegueua'a nam ỹo'ottacpi nam sa ỹauatton Ñim Lo'onatac 'Enauacna, cha'aye nam ỹo'ottacpi qaica ca naigui. Nachaqrata da qauachaxañiỹa nam npe'enaxacpi. ₁₂Cha'aye ỹataqta 'eesa da ỹo'ot da na'agaxa da qaỹa'axat nam ỹo'ottac namayepi maye ỹoxottañi. ₁₃Qalaxaye da huo'otaq 'enauac ne'ena qauem lataxaguesat ỹataqta ỹaatec naqa'en nam yo'oqchiguiñi, huaña, nache 'enauac ỹataqta yo'oqta, cha'aye nam yo'oqchiguiñi maye nachena na ichoxot 'enauac. ₁₄Qaq ỹoqo'oye huo'o so deraxan co'ollaxa 'eeta':

₁₅Qaq ỹoqo'oye ỹataqta qauloitegue qome da qarataxaqui. Saishet da qoñiita'am cam saqca ca ỹaỹaanapec. Nachaqrata da qoñiita'am ca shiỹaxaua maye ỹataqta deuennataxaatelec da huo'o ye ỹo'ot. ₁₆Qataq ỹataqta qauqopitaxañiỹa'ape naua na'axa'te da qauo'oche ca ỹaỹamaqchiguiñi, cha'aye naua na'axa'te maye souaqtaiguilo ỹataqta qauema. ₁₇Qaq ỹoqo'oye saishet qome da qaica ca qauaỹaañiỹapec. Chaqrata da qanpogoxoiñiỹapegue' da qauaỹaañi cam 'eetapeguec So Qarataxala'. ₁₈Qataq saishet qome da qami' taxaiqa, cha'aye damaye ỹaueca'a da nlaxaañi ca shiỹaxaua. Chaqrato' da ỹataqta qami' nlaqchiguilo So Saqcha'a Na'añaxac Qui'itta. ₁₉Qaq da ivita da qana'aqtaxañiỹa't qalaq nataqa'en qauo'oñi na ỹotta'a't no'onecpi maye chegoqo'ot So Saqcha'a Na'añaxac Qui'itta. Qataq qavio'oxoyiñi Ñim Lo'onatac 'Enauacna ỹataqta imauec da qarquiyaqteỹaxaqui. ₂₀Qataq nache 'eetai' da qaỹa'añiitacot da qana'achecỹaxaqui Ñim Lo'onatac 'Enauacna souaxat 'enauac na lataxaguesat, chegoqchigui qanqa'eñi So Qarataxala' Jesucristo.

₂₁Ñi 'oonolec qome da qoñiita ỹataqta ipacapegue' ca lỹa, souaxat da ỹataqta huo'o naq 'enec qanqa'eñi Ñim Lo'onatac 'Enauacna.

₂₂Aca 'alo mashe huaron, ỹataqta ỹalaxaguet ca lhua, ỹe'enaxatchigui naqa'en da ỹalaxaguet So Cristo. ₂₃Cha'aye ca lhua nacheca ca lqaic acamaye, 'eeta'am So Cristo, da Somaye nacheso so lqaic na 'amqaanataxanaxaicpi, qataq nacheso som lca'alaxaqui. So Cristo nacheso so lqaic, qaq na 'amqaanataxanaxaicpi nachena na 'eeta'am da lo'ocỹaxac Somaye. ₂₄Qaq ỹoqo'oye aca 'alo ỹataqta ỹalaxaguet ca lhua, qaq nache 'eeta'am na 'amqaanataxanaxaicpi da ỹataqta ỹalaxaguet So Cristo.

₂₅Qataq na ỹalleppi maye mashe huaron ỹataqta ỹauotec aca lhua, 'eeta'am So Cristo da ỹataqta ỹauotec na 'amqaanataxanaxaicpi, qataq ỹan co'ollaxa da nachaalataxac souaxat namayepi. ₂₆Ỹo'ot Somaye de'era, cha'aye ỹauotaique da iqui'itaxatta na 'amqaanataxanaxaicpi, irolec na 'etaxat da iỹo qataq da la'aqtac. ₂₇Yaqto' qom ivita da nachaalataxaneuo Somaye na 'amqaanataxanaxaicpi, qalaq ỹataqta huo'o da lyacỹaxac, qataq qaica ca lshepaxanaxa, huo'otaq ca 'eco' lvigaxataxa, huo'otaq ca lỹa 'eeta'am de'era. Nachaqrata da ỹataqta qui'itta qataq nalochiguiñi. ₂₈Ca ỹale mashe huaron, ỹataqta ỹauotec aca lhua, 'eeta'am da lauotaxanaqtaic da lalamaxat lo'ocỹaxac. Qaq ca ỹauotec aca lhua, camaye 'eeta'am da lauotaxanaqtaic da maiche lo'ocỹaxac. ₂₉Cha'aye qaica ca ishet da maiche ỹaỹemec da lalamaxat lo'ocỹaxac. Chaqrata da iquia'axan qataq ntela'a. Qaq 'era da 'eetec nataqa'en So Cristo da ntela'a nam 'amqaanataxanaxaicpi. ₃₀Cha'aye ỹoqta 'eesa da ñi 'oonolec da shenaqta ña'araqtaua'a na 'amqaanataxanaxaicpi maye lo'ocỹaxac So Cristo. ₃₁Cha'aye ana nere maye huetalec na la'aqtacpi Ñim Lo'onatac 'Enauacna, 'eeta': «Ca ỹale ca'ai ca lta'a qataq aca late'e da huaron, nache lmayaxaua aca lhua. Ime, nache que'ecaua dos 'eeta'am da 'oonolec da lo'ocỹaxac.» ₃₂Qaq de'era ỹataqta 'eesa qataq ỹataqta lta'araic da naigui maye saqcha'a. Qaq aỹem nachera da seueetac da sa'axattac So Cristo qataq na 'amqaanataxanaxaicpi. ₃₃Qaq ỹoqo'oye ñi 'oonolec da qoñiita ỹataqta ỹauotec aca lhua, 'eeta'am da lauotaxanaqtaic da maiche nachaalataxac. Qaq aca 'alo ỹataqta huo'o naq 'enec naqa'en ca lhua.