Caua nta'al qataq ca ñalaqpi
1Qami' ñalaqpi qaualaqaiguet caua qarta'alli', cha'aye qami' lalamaqa'ate So Cristo, cha'aye damaye nachera da ỹataqta ỹaỹamaqchiguiñi da qaỹo'ot. 2Cha'aye nam namaxasoxonaxacpi maye chegoqo'ot co'ollaxa so Moisés, som hua'auchiguiñi maye huo'o da ỹachaxanapec, 'eeta': «'Aualaxaguet qataq 'antela'a ca 'arta'a qataq aca 'arate'e, 3yaqto' ỹataqta 'onaxaic da 'icỹaxac qataq logoraic da 'anachaalataxac da qonetalec ana 'alhua.»
4Qaq qami' maye mashe huo'o na qaỹa'alqui, saishet qome da qaunogoqchichi namayepi. Nachaqrata da qauapaxagueñi, qataq qaỹa'añim dam napaxaguenataxanaxac maye quetague' nam ỹa'amaqteetac So Qarataxala'.
Na nlatacpi qataq na 'aco'pi
5Qami' nlatacpi, ỹataqta qaualaqaiguet qome na qana'aco'oipi maye huetalec ana 'alhua. Ỹataqta huo'o naq 'enec qanqa'eñi, qataq ỹataqta huesota da qarataxaqui, qataq ỹataqta qanasapacheeta, 'eeta'am qanqa'eñi da nacheso So Cristo da qauo'onataxañiitacot.
6-7Qaq de'era iuen da nache 'eetai' da qauo'ocheetac, qaq saishet da nda'a't da qami' ilotaguilo ca qana'aco'oi. Da qoñiita qami' l-lataqa So Cristo, qaq ỹoqo'oye da qauo'onataxañiitac qalaq qantoñiitapigui' qataq qanasapacheetelec cam 'eetapeguec Ñim Lo'onatac 'Enauacna, 'eeta'am da nacheso So Qarataxala' da qauo'onataxañiitacot, qaq saishet da nacheca ca qana'aco'oi. 8Cha'aye qauaỹachiñiita da ỹoqta 'eesa da So Qarataxala' isheeten da qoñiita, souaxat nam ỹaỹamaqchiguiñipi maye qauo'oche, saishet da ỹectega da qami' nlataqa huo'otaq da qami' huesochiyiñi.
9Qataq qami' 'aco'pi, iuen nataqa'en da ỹataqta qaue'enaxacheeteguet qome na qarlataquipi. Saishet da qauayiñiitalec. Qauennachiỹa'a da qami' qataq namayepi qoviito'ot Ñim Nataxala' maye neta'ague da piguem, qaq Ñimaye saishet da lca'atagui na shiỹaxauapi.
Na lo'ogoxonaxatpi maye saqcha'a cam quetague' So Cristo
10Qaq nagui qami' ỹaqaỹa't, qanmichiỹaique ca qara'añaxaqui maye chegoqo'ot So Cristo cam qaviñiitaique nagui. 11Qataq qaupaqtaxañiỹa qome nam no'ogoxonaxatpi maye qami' ỹanema Ñim Lo'onatac 'Enauacna, yaqto' da qami' iloquiaxa'n so pa'aguenataxanaxaic, nache ishet da qauataiỹa'aguet. 12Cha'aye qomi' saishet da seloquiaqtapegue' ca shenaqta'am shiỹaxaua, nachaqnata nam saq cha'api maye qauemaicpi hueto'ot na piguem, nam damaxasoxonapecpi, 'añaxaicpi maye ỹamaqpec nam huetaigui na napalaxa. 13Qaq ỹoqo'oye ¡qaupaqtaxañiỹa qome 'enauac na no'ogoxonaxatpi maye qami' ỹanema Ñim Lo'onatac 'Enauacna! Yaqto' da nvildeuo caua na'axa'te maye qauema, nache da qami' iloquiaxa'n so pa'aguenataxanaxaic, nache ishet da qauataiỹa'aguet. Qaq da mashe ime da qarloquiaxaqui, nache qoquiito'ot da qanaỹamaxacheetai'. 14Nache ỹataqta qanaỹamaxacheetai', qansachiigui da 'eesa lataxac, qataq qaupaqtaxañiỹa da no'on nataxac da 'eeta'am qanqa'eñi aca npaxaalec ana ltogue ca huataxanaq le'ec. 15Qataq nataqa'en qami' lhuotte' da qaua'axache da no'on na'axaỹaxac maye chegaqaigui da nlagaxayec; ¡ỹataqta qami' lhuotte' qome da qaua'axache damaye! 16Da qarpi'iỹaxaqui qome Ñim Lo'onatac 'Enauacna, nachera qome da qarpaqtaxanaxache da yaqto' qaualamache 'enauac anam 'ettaigui lchecnapi so pa'aguenataxanaxaic. 17Qataq da qarca'alaqai 'eeta'am qanqa'eñi aca qanaro'oi da yaqto' npaxaalec na qarqaiqui. Qataq qauacoñiỹa da la'aqtac Ñim Lo'onatac 'Enauacna da 'eeta'am qanqa'eñi ca ỹeelonec maye qami' ỹanema So Saqcha'a Na'añaxac Qui'itta. 18Qataq saishet da qaucoviỹa'ai da qanatamnaxaqui. Qataq da ivita da qauỹaxañiitacot Ñim Lo'onatac 'Enauacna, qalaq chegoqchigui qanqa'eñi So Saqcha'a Na'añaxac Qui'itta. Qataq ỹataqta, nache 'eetai' da qanloitauec, qataq saishet da qanasamiitapiguiñi. Qataq qanqouagaxauñiitalec 'enauac nam lalamaxatpi Ñim Lo'onatac 'Enauacna. 19Nataqa'en aỹem qanqouagaxauñiitalec, qauỹaxañiitacot Ñim Lo'onatac 'Enauacna da aỹem ỹanem ca ỹa'añaxac da sa'axat dam 'eetapeguec Ñimaye dam, nache 'eetai' da 'eetapeguec maye saqcha'a. 20Cha'aye So Qarataxala' aỹem ỹamaq da sa'axat de'era 'eetapeguec, qaq nachera da huo'omshe aỹem qaicoñettai' nagui. Qaq ỹoqo'oye qauỹaxañiỹot qome Ñim Lo'onatac 'Enauacna da yaqto' aỹem ỹami' ca ỹa'añaxac, yaqto' qaica ca she'etaique da sa'axat da no'on na'axaỹaxac.
Da pa'atec lquinaxanaxac so Pablo
21-22Qami' samaxalo ñi Tíquico maye qanauochaxaua qartaua qataq qarpe'et de'era qaro'onataxanaxac So Cristo, yaqto' ñimaye qami' ỹa'añaqche't qataq qami' da'aqtaxanema da sheeta qataq nam so'ottacpi.
23Ỹataqta huo'o da iyaxa da Ñim Lo'onatac 'Enauacna maye Qarta'a, qataq So Qarataxala' Jesucristo qami' ỹanema da nlagaxayec qataq da nsoxoyec qataq da npi'iỹaxac nataqa'en 'enauac nam laỹepi 'amqaanataxanaxaicpi. 24Qaq Ñim Lo'onatac 'Enauacna, ỹanem qome ca no'on 'enauac nam saishet da ỹalat da lauoche So Qarataxala' Jesucristo.
