So lta'araic nquia'axac maye ỹo'ot so nta'a Asuero
1De'era na'aqtaxanaxac, damaye huetoigui so na'a'q co'ollaq so nta'a Asuero, ilotague' so ciento veintisiete 'alhuapi, chegoqchiguiña ye la India nache ivira'a ye Etiopía, 2qaq som huaqta'a't nỹecpi ye Susa qalaq nacheso so naña naqa'en so lo'onataxanaqa'.
3Qaq co'ollaq mashe ivi' soua tres vi'iye da lo'onataxanaxac, nache so nta'a Asuero ỹo'ot so nquia'axac, qataq so na'ashaxac, da yaqto' ỹauo'o da llo'oxoyec 'enauac so lo'onataxanaxanecpi, qataq so ltauapi da lo'onataxanaxac da nta'a, qataq so lataxala'pi so alleppi ye Persia qataq ye Medio, qataq so nta'alpi, qataq so nataxala'pi yi'iye 'alhuapi, 4da yaqto' ỹachaxana da nsallaxa qataq da la'amaqchec da lo'onataxanaxac, qataq dam qaica ca 'ena'am llo'oxoyec da la'añaxac. Qaq se'eso nquia'axac qataq so na'ashaxac ivira'a so laiñi so 'oonolec vi'i, 5qaq co'ollaq ime somaye, nache so nta'a qaltaq ỹo'ot so lỹa nquia'axac qataq so na'ashaxac, nache ivi' siete na'axa'te soua huaiguilo, huaña naqa'en so nanaxanaqa' maye huaqta'ai' so lma' lta'araic. Qaq 'enauac so lma' so huaqta'a't nỹecpi ye Susa, som 'amaqtaqaicpi qataq 'enauac som saqallegueme da la'amaqchec, 'enauac da qaicoyeguen co'ollaxa. 6Qaq so qasoxoc, qalaq huo'o so ỹataqta no'on llo'oxoraxatpi hualoxolaỹipi maye lapagaxaic qataq malaxaraic da lo'oxoỹaxac, qaq somayepi huo'o so lquetpi chegaqaigui so lino maye naueralec da lo'oxoỹaxac, qaq somaye tachiviiguilo qanqa'en soua lauaco maye chegaqaigui so lcat plata, qataq nache ncoñettaua'alo soua nhuoqtel maye chegaqaigui so coma' mármol. Nataqa'en qaỹauo'o aso no'on so'onaxaquipi maye nda'a't oro, qataq so lcat plata, qataq so napiaxala' maye lo'oxonaxat so no'on coma' maye le'enaxat nácar, qataq so mármol maye lapagaxaic qataq so lairaxaic. 7Qaq so lataxa maye qanỹomtapigui, qalaq huetagui qanqa'en aso ỹomaxaquipi maye ndota't oro, qaq asomayepi ỹotta'a't da lataxac, qaq so qaimeeteguec lataxa ỹataqta qalota, qaipagaqchiichigui da 'eetec da lsoxoyec ca nta'a. 8Qalaxaye so nta'a ỹanem co'ollaxa so la'aqtac som lataxala'pi som namaxashecpi maye hueta'a so nma' lta'araic, da qaica ca qaỹamaqtalec da nỹomigui so lataxa, nacherata da ñi 'oonolec so maxasoxoicpi maicheye cam iỹaxaneua'a da nỹomgui. 9Qaq aso nate'e Vasti, nataqa'en ỹo'ot so lquia'axac qataq so la'ashaxac aso lhuapi som qaicoyeguenpi co'ollaxa da taua'a so lma' lta'araic so nta'a Asuero.
10Qaq so ivita so na'a'q siete se'eso nquia'axac qataq so na'ashaxac, nache so nta'a ỹataqta machiguiñi souaxat so lataxa, nache ỹama'q soua siete shiỹaxau' maye ỹataqta lpe'e'te, so Meumán, Bizta, Jarboná, Bigta, Abagta, Zetar qataq so Carcas, 11da yaqto' ỹe'eguenauga da ỹauegueua'a somaye aso nate'e Vasti, qataq da ỹaatañi naqa'en aso naro'o aca nate'e, yaqto' so nhuo' le'ecpi, qataq so 'amaqtaqaicpi ỹalleppi, ishet da ỹa'aalac da lyac aso nate'e, cha'aye asomaye 'eesa da 'onaxai. 12Qalaxaye aso nate'e saishet co'ollaxa da ỹalaxaguet da la'aqtac so nta'a, maye ỹanema soua shiỹaxau' maye ỹataqta lpe'e'te. Nache so nta'a ỹataqta dalemata qataq ỹataqta nlaxagui da lalemataic, 13nache nnate' som shiỹaxauapi maye ỹaỹaten so nqataxacpi, cha'aye maiche lataxac naxa so nta'a da huo'o ca ỹo'ot, qalaq iuen da nnate' som ỹaỹaten na nqataxacpi, qataq dam nalochiguiñi lataxac. 14Qaq soua ỹataqta pa'ata'agueta so nta'a, qalaq nachesoua soua Carsena, Setar, Admata, Tarsis, Meres, Marsena qataq so Memucán, qaq se'esoua siete nachesoua soua ỹataqta 'amaqtaqaiqa ye Persia qataq ye Media, som ỹalectraigui so na'atta'a't ltauapi so nta'a, qataq huetalec da 'amaqtaqaic no'onataxanaxac yi'iye 'alhua. 15Nache so nta'a ina't soomaye, 'eeta': Da yaqto' ipacchigui na nqataxacpi, ¿negue't ca iuen da qaỹo'otec aso nate'e Vasti, cha'aye asomaye saỹalaxaguet som ỹamaxasoxonaxac maye sanem, chegoqchiguilo ñaqa'en soua ỹamaxa'she?
16Nache so Memucán, hua'aqchigui naqa'en som ỹalectaigui som na'atta'a't ltauapi so nta'a, da ỹasateguet so nta'a, 'eeta': Aso nate'e Vasti saishet da nacherata da 'am saỹalaxaguet, maye nataqa'en 'enauac na nta'alpi, qataq 'enauac nam hueta'a na 'alhuapi maye 'aulotague' 'am nta'a Asuero. 17Dam ỹo'ot aso nate'e, damaye ỹaỹaten qome 'enauac na 'alpi, qaq nachera qome dam chegoqteua'a da na 'alpi, saishet da huo'o ca 'enec naqa'en na lhuapi, cha'aye anamayepi 'enapec qome: Ñi nta'a Asuero damaxasoxoneuga aso nate'e Vasti, qalaxaye asomaye sanashen da jec. 18Qaq anam lhuapi na nataxala'pi na Persia qataq na Media, qom ỹaỹaten de'era ỹo'ot aso nate'e, qaq nachena na na'a'q nache ncotaỹapegue' na lhuapi, qaq damaye ỹo'ot qome ca no'otanaxanaxac, qataq ca nalemataic. 19Qaq ỹoqo'oye 'am nta'a, da ỹaỹamaqchiguiñi 'anqa'en da 'aỹa'an ca 'ara'aqtac, da qalapaxañi ca lataxac da yaqto' qaỹalecnoigui na nqataxacpi maye lalamaxat na Persia qataq na Media da yaqto' saishet da qanlaxaañi: Da aso nate'e Vasti saishet qome da qaltaq ỹe'eguelaxa da 'am nachaateua'a. Qataq da lo'onataxanaxac da nate'e qanqat qome, nache qoỹanem aca lỹa 'alo maye taiguet damaye. 20Qaq que'eca lataxac maye qalapaxañi, qalaq iuen da imauec na 'alhuapi maye 'aulotague' da ỹaỹaten 'am nta'a, yaqto' 'enauac na 'alpi da huo'o naq 'enec naqa'en na lhuapi, maicheye cam lataxac, choxoraq huo'otaq sallaxanec.
21Qaq de'era lhuennataxac so Memucán, ỹaỹamaxareeta so nta'a, qataq so na'atta'a't ltauapi, nache so nta'a ỹacoolec da ỹo'ot. 22Nache ỹamaq aso lerepi, ỹamaxa 'enauac so 'alhuapi maye ilotague', qaq nanettalec so maiche la'aqtac som hueta'a som 'alhuapi, qataq so nhuo' le'ecpi maye ilotague', nache huetalec asomaye da lamaxasoxonaxac da 'enauac na ỹalleppi da nache hueto'ot da huo'o da 'enec da hueta'a na lma'pi, qaq da detaxaỹapegue' na lauo' le'ecpi qalaq ỹauota'ai naua maiche lalamaqa'ate la'aqtaqa.
