So Mardoqueo qataq so Amán
1Qaq co'ollaq mashe qaỹoqtegue de'era, nache so nta'a Asuero ỹauo'o da la'amaqchec so Amán, som llalec so Hamedata maye chegoxoguet so Agagueo, nache ỹanem da lo'onataxanaxac da lataxala' so nta'alpi ye qanayeeta'a 'alhua. 2Qaq 'enauac som do'onataxaatacot so nta'a maye hueta'a so nma' lta'araic, ỹa'alyiñi naxa naua l-llecte, qataq naqñi naxa da nateugueye, huo'otaq naxa da datateguet so Amán, cha'aye som nta'a nache lamaxasoxonaxac de'era, qalaxaye so Mardoqueo saishet co'ollaxa da ỹalaxaguet se'eso namaxasoxonaxac.
3Qaq huaña nache som lamaxashecpi so nta'a, inattac so Mardoqueo da ta'ainco' da saỹalaxaguet da lamaxasoxonaxac so nta'a. 4Nache somayepi, 'enauaque naua na'axa'te da ỹe'eguelaxattalec naxa de'era lnataxanaxac, qalaxaye somaye saishet da qochetega somayepi. Qaq huaña nache somayepi ỹa'axateua'a so Amán, cha'aye ỹauotaique da ỹaỹaten da so Mardoqueo saishet da naralaxat ca la'aqtac, cha'aye mashe da'aqtaxanem somayepi da somaye Judá le'ec. 5Qaq so Amán co'ollaq ỹaỹaten da so Mardoqueo saishet da ỹa'alyiñi naua l-llectel, huo'otaq da naqñi naxa da nateugueye somaye, nache ỹataqta nlaxagui da lalemataic, 6qalaxaye souaxat da somaye mashe qaỹa'aqtaxanem co'ollaxa da so Mardoqueo Judá le'ec, nache lhuennataxac da sa ỹaỹamaxañi da nachesota somaye da ỹauo'o ca nhuaxanaguec, nache nmitaique ca lataxac da ỹalauat 'enauac so Judá le'ecpi, maye hueta'a so 'alhuapi maye ilotague' so Asuero.
Namaxasoxonaxac da yaqto' qaỹalauat so judiopi
7Qaq so la'auaxanec ca'agoxoic se'eso vi'i, som ca'agoxoic maye le'enaxat Nisán, co'ollaq mashe doce vi'iye da lo'onataxanaxac so Asuero, nache qaỹauo'o so alletaxac ỹauaachigui qanqa'en so Amán, da yaqto' ishet da qaỹaỹaten ca na'a'q qataq ca ca'agoxoic maye huetoigui qanqa'en som lapaxañi somaye, nache se'eso alletaxac taalec so na'a'q trece so ca'agoxoic doce, som ca'agoxoic maye le'enaxat Adar.
8Qaq huaña nache so Amán 'enapega so nta'a Asuero, 'eeta':
'Enauac na nhuo' le'ecpi maye hueta'a nam 'alhuapi maye 'aulotague' 'am nta'a, huo'o na nhuo' le'ecpi maye saishet da nhuoiguet na laỹepi, huo'o na maiche lalamaxat nqataxacpi maye saishet da nateneguet na nqataxacpi maye lalamaxat na laỹepi nhuo' le'ecpi, qaq namayepi saishet da ỹalaxaguet na 'aramaxasoxonaxacpi 'am nta'a. Qaq saỹaỹamaxañi da ne'ena nhuo' le'ecpi, nache queta da 'aulotague' 'am nta'a. 9Qaq ỹoqo'oye 'am nta'a, da 'auaỹamaxareeta de'era, nache iuen da 'aua'axatec cam 'alapaxañi lataxac da 'auamaxasoxoolec da nmichiguiñi qanqa'en da qaỹalauat namayepi, qaq aỹem sanem qome na 'aramaxashecpi aca trecientos treinta mil kilos na lcat plata, da yaqto' ỹaneua'a añi laỹe' ana 'om 'am nta'a.
10Qaq huaña nache so nta'a, nqat aso nchiguishaqte nache ỹanem so Amán, som npa'aguenaxaua so judiopi, 11nache 'enapega, 'eeta':
No'on da nache 'am hueto'ot aca plata. Qaq yi'iye nhuo' le'ecpi qalaq maicheye cam 'auo'otec.
12Qaq so na'a'q trece so la'auaxanec ca'agoxoic se'eso vi'i, nache qaiỹaxaneuga so leraxanaxanecpi so nta'a, nache somayepi ỹeyiñi so lamaxasoxonaxac so Amán maye taỹa'a so nta'alpi maye ilotague' so 'alhuapi qataq som lataxala'pi som hueta'a so 'alhuapi. Qaq se'eso namaxasoxonaxac nanettalec da naneraguec, qataq naua lalamaqa'ate la'aqtaqa som netalec so 'alhuapi qataq so nhuo' le'ecpi maye qaỹamaxa, qataq nanettalec so nta'a Asuero qataq itoqootalec aso la'anaxanaqte, 13qaq ime nache qaỹamaq, huapegue' qanqa'en som na'axaỹaxac lo'opi, da qaỹamaxa 'enauac so 'alhuapi maye ilotague' so nta'a. Qaq asomaye huetalec da namaxasoxonaxac da huaigui qanqa'en ca 'oonolec na'a'q da qaỹalauat 'enauac so judiopi, nsoxoppiolec, ỹa'axaiquipi, ñaqpiolec qataq 'alpi, nache qaỹacona 'enauac so lalamaxatpi somayepi. Qaq som na'a'q maye qoỹecchigui, nacheso so na'a'q trece so ca'agoxoic doce, som ca'agoxoic maye le'enaxat Adar. 14Qaq asa'aso lmalate se'eso namaxasoxonaxac, ivira'a qanqa'en da nqataxac, nache qaỹamaxa 'enauac so 'alhuapi qataq so nhuo' le'ecpi yaqto' ishet da naỹamaxattac, da iviteuga se'eso na'a'q. 15Qaq som na'axaỹaxac lo'opi, sanaỹaloxon co'ollaxa da jec da ỹo'ot da la'aqtac so nta'a, qaq se'eso qalapaxañi lataxac nataqa'en qaỹa'axatec, huaña so huaqta'a't nỹecpi ye Susa. Qaq so nta'a qataq so Amán, nso'ootrañi co'ollaxa nỹomta'ape, qaq som hueta'a ye Susa qalaq saỹaỹaten ca 'eetec.
