Qoỹanot Ñim Nataxala' so na'auaxanec ñalaqpi
1Ñim Nataxala' 'enapega so Moisés, 'eeta':
2«Aỹem qaỹa'añiỹot qome na la'auaxanec qaỹa'alquipi, cha'aye 'enauac na la'auaxanec llalaqpi na Israel le'ecpi, namaye 'enauac ỹalamaxatpi, nache 'ena'am na la'auaxanec llalec na shiguiỹacpi».
3Nache so Moisés 'enapega na shiỹaxauapi, 'eeta':
«Qauennachiỹa'a qome ne'ena na'a'q maye huetoigui da Ñim Nataxala' qami' iroleguete da lta'araic la'añaxac da qami' nqateeguesopa ye Egipto, yem qoñiitaña co'ollaxa da choche qami' nlataqa. Qaq ỹoqo'oye nagui saishet qome da qollequi aca nauole 'ayiiña maye huo'o ana lalecte maye ỹasheeraxachigui. 4Qami' qaunoxoñiiuec ne'ena na'a'q maye huetoigui na ca'agoxoic le'enaxat Abib. 5Qaq nachena ne'ena ca'agoxoic huetoigui da qami' qauo'oche ca qayo'oxonnataxanaxaqui, qom mashe ime da qami' inoxonaqcheteua'alo ye 'alhua Ñim Nataxala', yem 'alhua maye huaña da qaica ca qoue na nallec, yem na'alhua na Canaán le'ecpi, hitiitapi, amorreopi, heveopi qataq na jebuseopi. Nacheye yem ỹachaxanapeguem co'ollaxa soua hua'au' qarta'alli' da ỹauotaique da qarmaye. 6Qaq ivi' qome naua siete na'axa'te da qollequiitac aca nauole 'ayiiña maye sa qaỹauo'o ana lalecte maye ỹasheeraxachigui. Qaq ca pa'atec na'a'q que'ecaua na'axa'te, nache qauo'oche ca qayo'oxonnataxanaxaqui da qavio'oxoyiñi Ñim Nataxala'. 7Qaq ivittrec qome que'ecaua siete na'axa'te da qollequiitac ana nauole 'ayiiña maye sa qaỹauo'o aca lalecte maye ỹasheeraxachigui, qaq saishet qome da huo'o ca 'oonolec da qoñiita da ỹaỹamaxattac ca ỹasheeraxachigui na ndaqñiguishec qataq aca nauole maye lalegue namaye, 'enauac na netalec que'eca 'alhua. 8Nache que'eca na'a'q qami' qome qaua'axacheetapeguem ca qaỹa'alquipi, qoñiita': De'era qaỹo'ot nagui, nachera da qomi' 'eeteque Ñim Nataxala' co'ollaq qolqa'ai naqa'en ye Egipto. 9Qaq damaye 'eeta'am qome ca yo'oqchigui la'anaxat na qarhuaqai huo'otaq na qaratapi, yaqto' da huo'otaq qautaqaitac, qalaq nache 'eetai' da qauennacheetapega da lqataxac Ñim Nataxala', cha'aye Ñimaye nacheñi ñi qami' nqateeguesopa ye Egipto co'ollaq qami' iroleguete da lta'araic la'añaxac. 10Qaq ỹoqo'oye da ivireuga ca laloxoqui de'era nquia'axac, nache qaltaq qauo'oche, qaq nache qoquiito'ot 'enauaque naua vi'iye.
11Ñim Nataxala' qom mashe qami' ỹanaleguete yem na'alhua na Canaán le'ecpi qom ipactelec dam la'aqtac maye qami' ỹanema co'ollaxa qataq soua hua'au' qarta'alli', qaq qom mashe ime da qami' ỹanema que'eca 'alhua, 12nache qami' qaỹa'añiỹot qome Ñim Nataxala' 'enauac na la'auaxanec qaỹa'alquipi ỹalleppi, nataqa'en 'enauac na la'auaxanec llalec ỹale nam qareloipi, cha'aye 'enauac namayepi lalamaxat Ñim Nataxala'. 13Qalaxaye ca la'auaxanec llalec aca 'ashena, camaye nmeneguet qanqoỹen ca qagueta llalec, qaq da saishet da nmeneguet qanqoỹen ca qagueta llalec da qoỹaneuo, nache que'eca 'ashena llalec qainoxon na lqosot. Nataqa'en qauauo'oi aca qarachetaqtaxanaqche da nmeneguet ñi 'oonolec ca la'auaxanec ca qaỹa'alquipi. 14Qaq cam na'a'q da qami' ina't ca qaỹa'alqui da 'eeta': ¿Negue't ca naigui de'era?, nache qoñiita' qome: Ñim Nataxala' do'onataxana da lta'araic la'añaxac co'ollaq qomi' nqateeguesopa ye Egipto, cha'aye co'ollaq sonaqtaña yi'iye 'alhua nache choche qomi' nlataqa. 15Qataq so faraón ỹataqta qaramchigui añi lquiyaqte da saishet da qomi' ỹaxaarec, qaq ỹoqo'oye Ñim Nataxala' ỹalauat so la'auaxanec llalec ñi 'oonolec so Egipto le'ecpi qataq 'enauac so la'auaxanec llalec so shiguiỹacpi. Qaq ỹoqo'oye qomi' sanaqot Ñim Nataxala' nam qara'auaxanec qoyalec ỹale, qataq ana qarachetaqtaxanaqte maye nmeneguet namayepi. 16Qaq ỹoqo'oye damaye 'eeta'am ca la'anaxat na qarhuaq, huo'otaq na qaratap, qaq damaye naigui da seuennaqte da Ñim Nataxala' nacheñi ñi qomi' nqateeguesopa ye Egipto co'ollaq do'onataxana da lta'araic la'añaxac».
So lo'oc lta'araic qataq so norec
17Qaq so faraón co'ollaq ỹasheetem da jec so Israel le'ecpi, nache Ñim Lo'onatac 'Enauacna saishet da ỹauecteuga so nqa'aic maye taalec ye na'alhua so filisteopi som sa qaỹalec nqa'aic, cha'aye Ñimaye tachigui lauel da so Israel le'ecpi saishet da deloqui da huo'otaq qailoquiaxan, qaq sa iuena'a da huo'o da ntogotaxac nache saqalaq da ỹe'eguelaxa ye Egipto. 18Qaq ỹoqo'oye Ñimaye quetegue naqa'en somayepi so nqa'aic maye taalec ye toolec 'alhua som tataxaama aso Auaxai Togaxarai.
Nache co'ollaq jec so Israel le'ecpi, nache nalochiguiñi 'eeta'am na alleppi. 19Qaq so Moisés, nataqa'en ỹache' soua lpi'ineqa so José, cha'aye so José 'enapega co'ollaxa so Israel le'ecpi da ipactelec so ỹan la'aqtac da nache 'eetec de'era. Qaq 'enapeco' da la'aqtac: «Ỹoqta 'eesa qome da Ñim Lo'onatac 'Enauacna qami' itaua'n, qaq qom ivita da ipacchigui damaxa, nache qami', qauache' qome naua ipi'ineqa».
20Qaq so Israel le'ecpi co'ollaq ca'ai ye Sucot, nache qaltaq hua'a ye Etam, yem chegoqchiguiña ye toolec 'alhua. 21Qaq Ñim Nataxala' nnaictague' somayepi, ye na'a'q quetaigui so lo'oc da ỹachaxaata'ague na llec somayepi, qaq ye pe qalaq quetaigui so norec le'eraxa, da yaqto' icoỹattalec somayepi. Qaq ỹoqo'oye somayepi ishet da queta ye na'a'q qataq ye pe. 22Qaq se'eso lo'oc lta'araic nache hua'auta'ague naxa na llec somayepi ye na'a'q, qaq ye pe, qalaq nacheso se'eso lo'oc da 'ettaigui nache icoỹattalec somayepi.
